Chibꞌitnhelax Komam yu istoholal chiswatxꞌe
98
Bꞌitnhewe akꞌ bꞌit tet Komam Dios yuto iswatxꞌe nimeta kꞌaybꞌalkꞌule,qꞌoji Komam yinh ebꞌnaj aniko howal yinh,
yu yip yebꞌ yu isqꞌabꞌ kaw ay yelapnoj.
2 Yaqꞌ ohtanhelo Komam iskolwal,
isyenilo Komam istoholal chiswatxꞌe yinh sat ej konhobꞌ.
3 Chisyelo Komam iskꞌulchꞌanil iskꞌul yebꞌ isyelal tet iskonhobꞌ Israel.
Sunil yul sat yibꞌanhqꞌinal tiꞌ il-lax iskolwal Komam Dios, koDiosal.a
4 Sunil hex ay yul sat yibꞌanhqꞌinal tiꞌ
bꞌitnanhwe tet Komam yinh tzalahilal.
Bꞌitnanhwe yinh ip kat hepoqꞌni heqꞌabꞌ,
kat hebꞌitnhen salmo tet Komam.b
5 Aweko teꞌ arpa yet chebꞌitnhen salmo tet Komam,
kat heyanipaxiko hunteqꞌan munlabꞌal ay istxꞌanhal yet chebꞌitnhen Komam.
6 Bꞌitnanhwe sata Komam yinh kaw tzalahilal yuto Jahaw ye Komam.
Bꞌitnhewe Komam yebꞌ chꞌen trompeta yebꞌ chexuni yukꞌaꞌ noꞌ meꞌ.
7 Tzalahojabꞌ haꞌ mar yebꞌ sunil tzet ay xol haꞌ.
Tzalahojabꞌ yul sat yibꞌanhqꞌinal tiꞌ yebꞌ sunil mak ay sat.
8 Tzalahojabꞌ ej ha haꞌ hakaꞌta chispoqꞌ isqꞌabꞌ haꞌ.
Tzalahojabꞌpaxo ej witz kat yahwi yu tzalahilal.
9 Tzalahojabꞌ sunil tuꞌ sata Komam Dios,
yuto chihul Komam Yahawo sat txꞌo txꞌotxꞌ tiꞌ.
Chꞌok Komam Yahawo yinh sunil konhobꞌ ay yul sat yibꞌanhqꞌinal.
Kat yilni Komam yinh tzet chiꞌeliko anma yinh kaw istoholal yebꞌ isyelal.