Iskꞌulal Komam Dios yinh konhobꞌ Israel
99
¡Komam Dios haꞌ Yahawil!Ayayo istzꞌonhobꞌal Komam yibꞌanh ebꞌnaj querubín.
Chiluylunkanh anma ay yul hunun konhobꞌ yebꞌ xin txꞌo txꞌotxꞌ sata Komam.a
2 Kaw aykano yelapno Komam bꞌey wonhan Sión,
kaw aykanokanh Komam yibꞌanh sunil konhobꞌ.
3 ¡Jalaꞌwe kꞌul-la tzotiꞌ yinh Komam,
yuto kaw aykano yelapnoj yebꞌ kaw aykano ismay!
¡Kaw machi nino istxꞌojal yinh Komam!
4 Mamin, hach tiꞌ Rey hach, kaw aykano hawip, chaxhtzala yinh istoholal.
Machi hunuxa mak ekꞌbꞌal yibꞌanh sata hunuxa mak yul hasat.
Chawatxꞌe iskꞌulal yebꞌ istoholal yinh yuninal yaꞌ Jacob.
5 Bꞌitnhewe isbꞌi Komam Dios koDiosal,
kat heyay jahno sata yich yoj Komam.
¡Machi nino istxꞌojal ay yinh Komam!
6 Yaꞌ Moisés yebꞌ yaꞌ Aarón ayko ebꞌyaꞌ xol ebꞌyaꞌ issacerdote Komam.
Wal yaꞌ Samuel ayko yaꞌ xol ebꞌnaj awten Komam yinh.
Iskolwa Komam yinh ebꞌyaꞌ yet isqꞌanni ebꞌyaꞌ iskolwal Komam.
7 Tzotelayti Komam tet ebꞌyaꞌ xol huneꞌ niman moyan.
Isyije ebꞌyaꞌ tzet yal Komam yebꞌ chejbꞌanile yaqꞌ tet ebꞌyaꞌ.
8 Mam Jahawil, hach koDiosalanh, hach hapajtze tzet isqꞌan ebꞌyaꞌ.
Hawaq nimankꞌulal yinh ismul ebꞌyaꞌ,
hawanipaxayo isyaꞌtajil yibꞌanh ebꞌyaꞌ yu istxꞌojal iswatxꞌe nimankꞌulal yinh ismul ebꞌyaꞌ.
9 Bꞌitnanhwe tet Komam Dios,
koDiosal kat heyay jahno sata Komam bꞌey wonhan yet Komam yehi.
Haꞌ Komam Dios koDiosal kaw machi nino istxꞌojal Komam.