Tanhilo ebꞌnaj amalecita yu yaꞌ David
30
Haxa yet ismeltzo yaꞌ David yebꞌ ebꞌnaj issoldado, yinhxa yox tzꞌayik yapni ebꞌnaj bꞌey konhobꞌ Siclag. Yilni ebꞌnaj ta ok ebꞌnaj amalecita eleqꞌ yinh konhobꞌ Neguev yebꞌ yinh konhobꞌ Siclag; yako ebꞌnaj howal yinh Siclag tuꞌ, isnhusnipaxkanto ebꞌnaj. 2 Hayet isto ebꞌnaj amalecita tuꞌ yinh isbꞌel yinito ebꞌnaj anma presohal; sunil ebꞌix ix yebꞌ sunil nixhte unin, yebꞌ ichamta anma, yajaꞌ machi hunu mak ispotxꞌ ebꞌnaj. 3 Hayet yapni yaꞌ David yebꞌ ebꞌnaj issoldado bꞌey konhobꞌ Siclag, yilni ebꞌnaj tato xanhuslaxto konhobꞌ tuꞌ; yilnipaxo ebꞌnaj ta xaꞌilaxto yixal ebꞌnaj, yebꞌ iskꞌahol ebꞌnaj, yebꞌ iskutzꞌin ebꞌnaj preso yu ebꞌnaj amalecita tuꞌ. 4 Yuxin ok yaꞌ David yebꞌ ebꞌnaj tzujan yinta oqꞌoj, kaw yakaniko ebꞌnaj yul isnuqꞌ, ispaxilo yip ebꞌnaj yoqꞌi. 5 Yilaxpaxto ebꞌix kawanh yixal yaꞌ David, ix Ahinoam ah Jezreel yebꞌ ix Abigail, yixalbꞌen naj Nabal ah Carmel. 6 Kaw xin ok yinh iskꞌul yaꞌ David yuto yoche ebꞌnaj issoldado yaꞌ tuꞌ isqꞌojoꞌkamoj yu chꞌen chꞌen, yuto sunil ebꞌnaj tuꞌ kaw bꞌiskꞌulal ye iskꞌul yinh iskꞌahol yebꞌ yinh iskutzꞌin. Wal yaꞌ David xin, yako yanma yaꞌ yinh Komam Dios, isDiosal. 7 Lahwi tuꞌ yalni yaꞌ David tet yaꞌ sacerdote Abiatar, iskꞌahol yaꞌ Ahimelec:«Iti xil isqꞌap yaꞌ sacerdote, huneꞌ ayko efod yinh inkꞌatanhan,» xhi yaꞌ.
—Mamin, ¿chimisje intohan intzujuyojan hunteqꞌan ebꞌnaj elqꞌom tuꞌ? ¿Chimtzujchayo ebꞌnaj wuhan? xhi yaꞌ.
Istaqꞌwi Komam Dios tet yaꞌ:
—As tzujayo ebꞌnaj yuto chitzujchayo ebꞌnaj hawu, kat hakolnilo makta yito ebꞌnaj, xhi Komam tet yaꞌ.
9 Isto yaꞌ David tuꞌ yebꞌ ebꞌnaj 600 soldado tzujan yintaj, istzujuyo ebꞌnaj amalecita tuꞌ, yapni ebꞌnaj bꞌey ha haꞌ Besor, bꞌay kankano haywanh ebꞌnaj. 10 Wal yaꞌ David to yaꞌ yebꞌ 400 ebꞌnaj issoldado yintaj. Kankano 200 ebꞌnaj yuto matxa yu isqꞌaxponikꞌto ebꞌnaj yibꞌanh ha haꞌ yu sikilal. 11 Hayet ayko ebꞌnaj yinh isbꞌel tuꞌ, yilcha huneꞌ naj ah Egipto yu ebꞌnaj, yinito ebꞌnaj naj sata yaꞌ David, yaqꞌni ebꞌnaj tzet chislo naj, iswaꞌ naj, yukꞌnipaxo naj haꞌ. 12 Yaqꞌnipaxo ebꞌnaj huneꞌ pan watxꞌebꞌil yinh teꞌ higo qꞌanbꞌinaxa yebꞌ kabꞌ chayan teꞌ tajin uva, islohnito naj. Lahwi tuꞌ yok yip naj, yuto oxebꞌxa tzꞌayik yebꞌ oxebꞌxa aqꞌbꞌal machi waꞌ naj, machi ha haꞌ yukꞌpaxo naj. 13 Isqꞌambꞌen yaꞌ David tet naj:
—¿Mak hach anmahil? ¿tzet konhobꞌal hach? xhi yaꞌ.
Istaqꞌwi naj tzeh tuꞌ xin:
—Hanintiꞌan ah Egipto hinan, ischejabꞌ huneꞌ naj amalecita wehan, kinisbꞌejkanojan naj wahaw tuꞌan bꞌey tiꞌ yuto kinyabꞌi ayan; oxebꞌxa tzꞌayik xin inkankanojan tinanh. 14 Konhbꞌeyanh eleqꞌ yinh iskonhobꞌ ebꞌnaj cereteo yul ismajul txꞌotxꞌ Neguev yebꞌ yul ismajul txꞌotxꞌ Judá, yebꞌ yul iskonhobꞌ yaꞌ Caleb ay yul ismajul txꞌotxꞌ Neguev; janipaxikojanh qꞌaꞌ yinh konhobꞌ Siclag, xhi naj.
15 Isqꞌambꞌen yaꞌ David tet naj:
—¿Chimhaje chachto hayebꞌ wetan bꞌay ay ebꞌnaj soldado ok eleqꞌ tuꞌ? xhi yaꞌ.
Istaqꞌwi naj xin:
—Kꞌultikꞌa, ta chawaqꞌ bꞌinaho isbꞌi Komam Dios chawalni wetan tato mach chinhapotxꞌkamojan, maka mach chinhawakojan yul isqꞌabꞌ naj wahawil tuꞌanh, ta hak tuꞌ chintohan inyebꞌaꞌan ebꞌnaj tawet, xhi naj.
16 Hak tuꞌ yu yinito huneꞌ naj tuꞌ yaꞌ David bꞌay ay ebꞌnaj amalecita. Hayet yapni ebꞌnaj, nananta bꞌay wejanto ebꞌnaj bꞌey tuꞌ. Lanhan xin iswaꞌ ebꞌnaj, chukꞌni ebꞌnaj tzet chukꞌu, yekꞌtzen ebꞌnaj qꞌinh yu tzet yelqꞌalo ebꞌnaj tet ebꞌnaj filisteo yebꞌ tet ebꞌnaj Judá. 17 Yaniko yaꞌ David howal yinh ebꞌnaj, kabꞌ tzꞌayik xin yaqꞌ huneꞌ howal tuꞌ, ispotxꞌnikamo yaꞌ David sunil ebꞌnaj; kachanxanhe 400 ebꞌnaj tzeh ahto yibꞌanh iscamello yelkanh, haꞌ kolchahi.
18 Iskolnilo yaꞌ David sunil tzet elqꞌabꞌil yu ebꞌnaj amalecita, iskolnipaxilo yaꞌ kawanh yixal. 19 Machi hunu tzet yelqꞌato ebꞌnaj tuꞌ mach iskolilo yaꞌ David, wal xin sunil iskolilo yaꞌ, iskolnipaxilo yaꞌ iskꞌahol yebꞌ iskutzꞌin ebꞌnaj issoldado tuꞌ. 20 Iskolnipaxilo yaꞌ David sunil noꞌ meꞌ yebꞌ noꞌ wakax, kaw xin niman isbꞌisil noꞌ wakax tuꞌ. Yaqꞌni bꞌabꞌo ebꞌnaj noꞌ, yichiko ebꞌnaj yalni hakaꞌ tiꞌ: «Haꞌ yaꞌ David iqꞌwa yinh hunteqꞌan tiꞌ,» xhi ebꞌnaj.
21 Haxa yet yapni yaꞌ David yebꞌ issoldado bꞌay kankano ebꞌnaj 200 mach isje isqꞌaxpon haꞌ Besor yu kaw sikomxa ay ebꞌnaj; yelti ebꞌnaj ischahno yaꞌ David yebꞌ sunil mak tzujan yinta yaꞌ, yok ebꞌnaj isqꞌambꞌeno: «¿Hanikꞌ elikoj?» xhi ebꞌnaj. 22 Yajaꞌ ay hunteqꞌan ebꞌnaj kaw txꞌoj yebꞌ machiswalil, tzujan yinta yaꞌ David tuꞌ, yalni ebꞌnaj hakaꞌ tiꞌ: «Matzet chijaqꞌanh teyet yinh tzet majiqꞌanh tiꞌ, yuto mach kexbꞌey jintajanh, wal xin hanhe heyixal yebꞌ heyuninal cheyitoj, kat hetohi,» xhi ebꞌnaj. 23 Yajaꞌ yal yaꞌ David hakaꞌ tiꞌ:
—Hex wuxhtaj, mach cheyute hakaꞌ tuꞌ, yuto haꞌ Komam Jahawil aniko sunil tiꞌ yul koqꞌabꞌ, Komam konhtanheni, yaniko Komam ebꞌnaj aniko howal tuꞌ jinh yul koqꞌabꞌ. 24 Haꞌ tzet chiꞌekꞌ yinh henabꞌal tiꞌ, mach kꞌuloj, yuto hayet chipohlax tzet jiqꞌa, lahan chiyiqꞌ ebꞌnaj kankano tanheno koqꞌuybꞌe yebꞌ ebꞌnaj bꞌeykꞌo yinh howal, xhi yaꞌ David tuꞌ.
25 Hataxtikꞌa tuꞌ xin iskankano huneꞌ chejbꞌanile tuꞌ xol ebꞌnaj Israel masanto tinanh.
26 Hayet yapni yaꞌ David bꞌey Siclag, yanito yaꞌ tzet ye tuꞌ yiqꞌ yinh howal. Yanito yaꞌ tet hunteqꞌan yamigo ay bꞌey Judá, yalnito yaꞌ hakaꞌ tiꞌ: «Chiwatojan hunteqꞌan sabꞌehal tiꞌ teyet, haꞌ wilojan tet ebꞌnaj ayko ishowal yinh Komam Dios,» xhito yaꞌ. 27 Yato yaꞌ hunteqꞌan sabꞌehal tuꞌ tet ebꞌnaj ay bꞌey Bet-el, bꞌey Ramot yul yet txꞌotxꞌ Neguev, yebꞌ bꞌey Jatir. 28 Yanipaxto yaꞌ bꞌey Aroer, bꞌey Sifnot, yebꞌ bꞌey Estemoa, 29 yebꞌ bꞌey Racal, yebꞌ yulaj konhobꞌ ay yul ismajul Jerameel yebꞌ yulaj iskonhobꞌ ebꞌnaj ceneo, 30 yebꞌ Horma, yebꞌ bꞌey Corasán yebꞌ bꞌey Atac, 31 yebꞌ bꞌey Hebrón. Yanipaxto yaꞌ David sabꞌehal tuꞌ sunil bꞌayla ekꞌyaꞌ yebꞌ ebꞌnaj issoldado.