Kabꞌkonkanh iskꞌul ebꞌnaj filisteo yinh yaꞌ David
29
Iskutxbꞌaniko ebꞌnaj yahawil ebꞌnaj filisteo sunil issoldado bꞌey konhobꞌ Afec, wal ebꞌnaj Israel iskutxbꞌapaxiko isbꞌa ebꞌnaj bꞌey isnuqꞌ ha haꞌ bꞌey Jezreel. 2 Hayet isbꞌisni ebꞌnaj yahawil ebꞌnaj filisteo issoldado yinh 100 yebꞌ yinh mil yilni ebꞌnaj tato tzujan yaꞌ David yebꞌ issoldado yinta naj rey Aquis. 3 Yuxin isqꞌambꞌe ebꞌnaj tet naj rey Aquis hakaꞌ tiꞌ:—¿Tzet chu hunteqꞌan ebꞌnaj hebreo tiꞌ bꞌey tiꞌ? xhi ebꞌnaj.
Istaqꞌwi naj rey Aquis tet ebꞌnaj:
—Haꞌ naj tiꞌ, naj David, ischejabꞌ yaꞌ Saúl isreyal Israel, ayxa istiempohal yehikꞌo naj inkꞌatanhan; yichtax yul naj inkꞌatanhan machi hunu ismul naj chiwilan, xhi naj.
4 Yajaꞌ tit ishowal ebꞌnaj yinh naj rey Aquis tuꞌ, yalni ebꞌnaj hakaꞌ tiꞌ:
—Hal tet naj, meltzojabꞌ naj yebꞌ issoldado yul yehobꞌal bꞌay yebꞌil hawu, mach chu isto naj jinta yinh howal tiꞌ, yuto kꞌuxantaxka jinh chipakꞌiko naj yet ayko howal. Yuto ta chiyoche naj chikan naj kꞌulal yul sat naj rey Saúl, naj yahawil naj, chu ispotxꞌnikamo naj ebꞌnaj kosoldado tiꞌ, kat yinito naj iswiꞌ ebꞌnaj tet naj. 5 ¿Machmi taj naj tiꞌ naj David, chisbꞌitnhe ebꞌix ix, ebꞌix chꞌah tꞌujla yet chikanhalwi chalni hakaꞌ tiꞌ:
“Huneꞌ mil ebꞌnaj ispotxꞌkamo yaꞌ Saúl,
wal yaꞌ David 10 (lahonhebꞌ) mil ebꞌnaj ispotxꞌkamo yaꞌ,” xhi ebꞌix? xhi ebꞌnaj tet naj rey Aquis tuꞌ.
6 Yuxin yawteti naj rey Aquis yaꞌ David, yalni naj tet yaꞌ:
—Yinh kaw yeli hach tiꞌ kaw kꞌul hanabꞌal yebꞌ xin kaw tohol habꞌeybꞌal yul insatan. Yet ayach yul campamento, machi hunu istxꞌojal tiꞌ chiwilan tawinh yichitax hawul inkꞌatanhan; yajaꞌ ebꞌnaj yahawil ebꞌnaj filisteo tiꞌ mach chachochelax yu ebꞌnaj; 7 yuxin paxanhtoj yinh aqꞌankꞌulal, haxinwal matzet chiyal ebꞌnaj yahawil ebꞌnaj filisteo tiꞌ, xhi naj.
8 Istaqꞌwi yaꞌ David:
—¿Tzet inwatxꞌehan? ¿Ayxam hunu istxꞌojal chawil winhan hanin hachejabꞌ intiꞌan yuxin mach chinhachahtojan intohan waqꞌaꞌan howal yinh mak chichiwako iskꞌul tawinh? xhi yaꞌ.
9 Istaqꞌwi naj rey Aquis tet yaꞌ David:
—Hach tiꞌ kaw kꞌul hach yul insatan, lahan hach hakaꞌ hunu yángel Komam Dios, yajaꞌ mayal ebꞌnaj yahawil ebꞌnaj filisteo hakaꞌ tiꞌ: “Mach chito naj jintajanh yinh howal,” xhi ebꞌnaj wetan. 10 Yuxin hayet hekal kaw sahabꞌ chachahwano, kat hato yinh habꞌel, kat hameltzo yebꞌ ebꞌnaj soldado tzujan tawintaj, ebꞌnaj ischejabꞌ hawahawil, xhi naj rey Aquis.
11 Haxa yet hunxa tzꞌayik kaw sahabꞌ ahwano yaꞌ David yebꞌ ebꞌnaj issoldado, ismeltzo ebꞌnaj sat istxꞌotxꞌ ebꞌnaj filisteo; wal ebꞌnaj soldado filisteo, to ebꞌnaj bꞌey konhobꞌ Jezreel.