—Chiwalan tawet tato chakutxbꞌako ebꞌnaj hasoldado kat kotoh yinh howal, xhi naj.

2 Istaqꞌwi yaꞌ David tet naj Aquis:

—Kꞌultikꞌa, haꞌ tinanh chawilaꞌ hanta chinqꞌojihan inwatxꞌenan hanin hachejabꞌ intiꞌan, xhi yaꞌ David. Yuxin yal naj Aquis tet yaꞌ David hakaꞌ tiꞌ:

—Wal xin chachwakanikojan yahawil yinh hunelnhe yinh ebꞌnaj soldado chintanhenan, xhi naj Aquis.

3 Haꞌ yinh huneꞌ tiempo tuꞌ, ayxana iskam yaꞌ Samuel, kaw xin sunil konhobꞌ Israel yiqꞌ bꞌiskꞌulal yinh iskamikal yaꞌ. Mujlax yaꞌ bꞌey iskonhobꞌ, haꞌ ton konhobꞌ Ramá. Wal yaꞌ rey Saúl xin xaꞌistzumbꞌelo yaꞌ sunil makta ahbꞌelom yebꞌ makta chiqꞌumlan kamom.

4 Iskutxbꞌan isbꞌa ebꞌnaj filisteo iswatxꞌenkanh ebꞌnaj iscampamento bꞌey Sunem. Hakpax tuꞌ yaꞌ rey Saúl iskutxbꞌako yaꞌ issoldado, iswatxꞌenkanh ebꞌnaj iscampamento bꞌey Gilboa. 5 Yajaꞌ hayet yilnito yaꞌ Saúl iscampamento ebꞌnaj filisteo, isxiwkanh yaꞌ, iskabꞌkonkanh iskꞌul yaꞌ. 6 Isqꞌambꞌen yaꞌ Saúl tet Komam Jahawil yinh tzet chiꞌelikoj, yajaꞌ xin mach taqꞌwi Komam tet yaꞌ; mach ispajtze Komam yul wayike, mach ispajtzepaxo Komam tet yaꞌ sacerdote yu Urim,^a mach ispajtze Komam tet ebꞌyaꞌ ischejabꞌ Komam. 7 Yuxin yal yaꞌ Saúl tet ebꞌnaj ischejabꞌ hakaꞌ tiꞌ:

—As saywe hunu ix ix chisqꞌumla isbꞌa yebꞌ kamom, kat heyul heyalno wetan, kat intohan inqꞌambꞌeno hinbꞌahan tet ix, xhi yaꞌ.

Istaqꞌwi ebꞌnaj ischejabꞌ yaꞌ hakaꞌ tiꞌ:

—Bꞌey Endor ay huneꞌ ix, xhi ebꞌnaj.

8 Ishelnilo yaꞌ Saúl xil isqꞌap ayko yinh, yaniko yaꞌ komon xilqꞌape yinh, isto yaꞌ yebꞌ kawanh ischejabꞌ yet aqꞌbꞌalil iskꞌatanh huneꞌ ix tuꞌ. Yalni yaꞌ tet ix hakaꞌ tiꞌ:

—Chinqꞌanan tawet tato chawawte ispixan hunu mak chiwochehan, yuto ay inqꞌambꞌebꞌalan tet, xhi yaꞌ.

9 Istaqꞌwi ix tuꞌ tet yaꞌ Saúl hakaꞌ tiꞌ:

—Hach tiꞌ, hawohtaj tzet yu yaꞌ rey Saúl yet istzumbꞌenilo yaꞌ anma ahbꞌelom yebꞌ mak chisqꞌumla isbꞌa yebꞌ kamom sat txꞌotxꞌ tiꞌ, ¿tzet yinh xin chinhawaqꞌ txꞌaqꞌmojan yunhe waykꞌayan yul isqꞌabꞌ kamikal? xhi ix.

10 Istaqꞌwi yaꞌ Saúl tet ix:

—Chiwaqꞌ bꞌinahojan isbꞌi Komam Jahawil yinh chiwalnihan tawet tato matzet chul tawinh yinh huneꞌ tiꞌ, xhi yaꞌ.

11 Isqꞌambꞌen ix:

—¿Mak xin chawoche chiwawtehan ispixan tuꞌ? xhi ix.

Istaqꞌwi yaꞌ Saúl:

—Chiwochehan chawawte yaꞌ Samuel, xhi yaꞌ.

12 Yinhnhena tuꞌ yilni ix yinh yaꞌ Samuel, yah yaw ix yinh kaw ip, yalni ix tet yaꞌ Saúl tuꞌ:

13 —¿Tzet yinh xin chachetli winhan? ¿Chinhawetahan? Hach tiꞌ rey Saúl, xhi ix.

Istaqꞌwi yaꞌ rey Saúl tuꞌ:

—Mach chaxhxiwi, ¿mak lanhan hawilni? xhi yaꞌ.

Istaqꞌwi ix tet yaꞌ Saúl:

—Ay huneꞌ dios, chiwilan yahilo yul txꞌotxꞌ, xhi ix.

14 Isqꞌambꞌen yaꞌ Saúl:

—¿Tzet jilni yinh mak chawil tuꞌ? xhi yaꞌ.

Istaqꞌwi ix:

—Chiwilan yinh huneꞌ naj icham, hukaniko xil isqꞌap yinh, xhi ix.

Hak tuꞌ yu istxumnilo yaꞌ rey Saúl tato haꞌ yaꞌ Samuel chil ix, yay jahno yaꞌ Saúl tuꞌ, yay xulno yaꞌ sat txꞌotxꞌ. 15 Yalni yaꞌ Samuel tet yaꞌ rey Saúl hakaꞌ tiꞌ:

—¿Tzet yinh xin chinhawetahan chinhawawtenan? xhi yaꞌ.

Istaqꞌwi yaꞌ Saúl tet yaꞌ:

—Kaw bꞌiskꞌulal wehan, yuto kutxanxako ebꞌnaj filisteo yu yaniko ebꞌnaj howal winhan. Xakinisbꞌejkanojan Komam Jahawil, mach xin chispajtze Komam wetan yu ischejabꞌ, maka yul wayike, yuxin kach wawtehan yunhe hawalni wetan tzet wal wuten hinbꞌahan, xhi yaꞌ.

16 Istaqꞌwi yaꞌ Samuel tet yaꞌ:

—¿Tzet yinh xin chaqꞌambꞌe wetan?^b Yuto bꞌejbꞌil hachkano yu Komam Jahawil yu ayko ishowal Komam tawinh. 17 Sunil tzet yalkano Komam Jahawil wetan tawinh, lanhan yijni isbꞌa, wal xin chachyilo Komam reyalil, kat yaniko Komam yaꞌ David haseleloj. 18 Yuto mach hayije tzet yal Komam Jahawil, yet mach hatanhtzelo ebꞌnaj amalecita, ebꞌnaj chichiwa iskꞌul Komam yinh, yu huneꞌ tuꞌ, yuxin hak tiꞌ chawaqꞌle. 19 Chachyako Komam yebꞌ ebꞌnaj Israel yul isqꞌabꞌ ebꞌnaj filisteo, haxa yet hekal ayachxa yebꞌ ebꞌnaj hakꞌahol bꞌay ay intiꞌan. Chanipaxiko Komam iscampamento ebꞌnaj Israel yul isqꞌabꞌ ebꞌnaj filisteo, xhi yaꞌ Samuel.

20 Hayet yabꞌen yaꞌ rey Saúl hakaꞌ tuꞌ, yaykꞌay yaꞌ sat txꞌotxꞌ, yuto kaw xiw yaꞌ yabꞌen tzet yal yaꞌ Samuel. Yaꞌ Saúl tuꞌ kaw nimajalkano istel yaꞌ; matxatikꞌa xin yip yaꞌ yuto huneꞌ tzꞌayik yebꞌ huneꞌ aqꞌbꞌal maxhtikꞌa waꞌ yaꞌ. 21 Haxa yet yilni huneꞌ ix tuꞌ tato kaw bꞌiskꞌulal ye yaꞌ rey Saúl, yalni ix tet yaꞌ:

—Mamin, hanin hachejabꞌ intiꞌan manyijehan tzet maxaqꞌan wetan, manhin hinbꞌahan inkaman yu tzet manwatxꞌetiꞌan. 22 Yuxin chinqꞌanan tato chayije tzet chiwalan, chiwitijan nichꞌano tzet chaloh, kat hawaꞌi, yunhe yok hawip, kat hato yinh habꞌel, xhi ix.

23 Yaj xin mach isje yaꞌ Saúl waꞌoj, yuxin okpaxo ebꞌnaj ischejabꞌ yaꞌ yebꞌ ix tuꞌ yalaꞌ tato chiwaꞌ yaꞌ. Hak tuꞌ yu isyijen yaꞌ, yahwano yaꞌ sat txꞌotxꞌ, yay tzꞌonhno yaꞌ sat txꞌat. 24 Ay xin huneꞌ noꞌ tzehla wakax kaw bꞌaqꞌich bꞌey yatut ix, ispotxꞌnikamo ix noꞌ yinh anhe, iswatxꞌen ix noꞌ, yiniti ix ixim harina, iswatxꞌen ix ixim pan machi yanhal. 25 Lahwi tuꞌ yiniti ix tzet chislo yaꞌ rey Saúl yebꞌ ischejabꞌ tuꞌ, iswaꞌ ebꞌnaj. Hayet lahwi iswaꞌkanilo ebꞌnaj, ismeltzo ebꞌnaj yinhtikꞌa huneꞌ aqꞌbꞌal tuꞌ.