To yaꞌ David sat istxꞌotxꞌ ebꞌnaj Filisteo
27
Yajaꞌ wal yaꞌ David, istxum yaꞌ hakaꞌ tiꞌ: «Aymi bꞌaqꞌinh chinispotxꞌkamojan yaꞌ Saúl, yuxin kꞌul intokanojan sat istxꞌotxꞌ ebꞌnaj filisteo, kat yokkano wanmahan yinh aqꞌankꞌulal; xin wal matxa chako yaꞌ Saúl yinh iskꞌul winhan, haxinwal matxa chinissayan yaꞌ sat txꞌotxꞌ Israel tiꞌ, hak tuꞌ xin chu inkolnilo hinbꞌahan yul isqꞌabꞌ yaꞌ,» xhi yaꞌ. 2 Lahwi tuꞌ, isto yaꞌ David yebꞌ ebꞌnaj 600 tzujan yintaj yaꞌ, iskꞌatanh naj Aquis, iskꞌahol naj Maoc; naj isreyal konhobꞌ Gat. 3 Hak tuꞌ xin yu yapni yaꞌ David yebꞌ ebꞌnaj tzujaniko yinta tuꞌ ehoyo iskꞌatanh naj rey Aquis. Sunil ebꞌnaj tuꞌ yito yixal yebꞌ yuninal; hakpax tuꞌ yaꞌ David tzujan kawanh yixal yintaj; ix Ahinoam ah Jezreel yebꞌ ix Abigail yixalbꞌen naj Nabal ah Carmel. 4 Wal yaꞌ Saúl yabꞌelo yaꞌ tato haꞌ bꞌey konhobꞌ Gat apni yaꞌ David iskoloꞌ isbꞌa, yuxin matxa to yaꞌ saywal yinh yaꞌ.5 Lahwi tuꞌ yalni yaꞌ David tet naj rey Aquis:
—Mam rey ta yeli kaw kꞌul hakꞌul winhan chinqꞌanan tawet tato chintohan ehoyo yul hunu yaldeahil yet hakonhobꞌ tiꞌ, yuto mach kꞌuloj tato hanin hachejabꞌ intiꞌan chinehayojan takꞌatanh yul konhobꞌ bꞌay ayachiko reyalil tiꞌ, xhi yaꞌ.
6 Yinh huneꞌ tzꞌayik tuꞌ yakaniko naj rey Aquis yaldeahil Siclag tet yaꞌ David yunhe yehayo yaꞌ bꞌey tuꞌ yebꞌ ebꞌnaj tzujan yintaj; yuxin haꞌ Siclag tuꞌ, yet txꞌotxꞌ Judá ye masanto tinanh.
7 Huneꞌ habꞌil yok kanhebꞌxa ixahaw eyayo yaꞌ David sat istxꞌotxꞌ ebꞌnaj filisteo. 8 Elto yaꞌ David yebꞌ issoldado yaqꞌaꞌ howal yinh ebꞌnaj gesurita yebꞌ yinh ebꞌnaj gezrita yebꞌ yinh ebꞌnaj amalecita; kaw xin txꞌiꞌalxa tiempo yehayo hunteqꞌan ebꞌnaj tuꞌ bꞌey tuꞌ, chiꞌichiti iskonhobꞌ ebꞌnaj tuꞌ satakꞌti txꞌotxꞌ Shur masanta chiꞌapni bꞌey ismohonal txꞌotxꞌ Egipto. 9 Naunhe xin yako yaꞌ David howal yinh hunteqꞌan konhobꞌ tuꞌ, ispotxꞌnikamo yaꞌ ebꞌnaj winaj yebꞌ ebꞌix ix, machi hunu kolchalo yul isqꞌabꞌ yaꞌ. Yinito yaꞌ ismeꞌ ebꞌnaj, noꞌ wakax, noꞌ burro yebꞌ iscamello hunteqꞌan anma tuꞌ, yinipaxto yaꞌ xilqꞌape; huntaꞌel bꞌey yaꞌ David yinh howal, lahwi tuꞌ kat ismeltzo yaꞌ iskꞌatanh naj Aquis. 10 Isqꞌambꞌen naj Aquis tet yaꞌ David: «¿Tzet konhobꞌal makaxhbꞌey hatanhtzelo tinanh?» xhi naj. Istaqꞌwi yaꞌ David hakaꞌ tiꞌ: «Manbꞌeyan intanhtzelojan ebꞌnaj ay bꞌey txꞌotxꞌ Neguev yul ismajul Judá,» xhi yaꞌ David. Hunelxa xin yalni yaꞌ David ta bꞌey txꞌotxꞌ Neguev yul yet Jerameel bꞌey yaꞌ istanhtzelo anma; hunelxa xin yalni yaꞌ ta bꞌey txꞌotxꞌ Neguev bꞌay ay ebꞌnaj ceneo bꞌey yaꞌ istanhtzelo anma.
11 Sunil ebꞌnaj winaj yebꞌ ebꞌix ix ay yul hunteqꞌan konhobꞌ tuꞌ istanhtzelo yaꞌ David, yunhe machi hunu mak chu yul yalno bꞌey konhobꞌ Gat yinh tzet chibꞌey yubꞌ yaꞌ David. Sunilbꞌal tiempo eh yaꞌ David sat istxꞌotxꞌ ebꞌnaj filisteo, chilannhetikꞌa yaniko yaꞌ howal yinh hunteqꞌan konhobꞌ tuꞌ. 12 Wal naj rey Aquis kaw chikawxi iskꞌul naj yinh yaꞌ David, istxumni naj hakaꞌ tiꞌ: «Naj David tiꞌ, kaw maꞌokkano ishowal naj yinh konhobꞌ Israel tinanh, yuxin chiꞌokkano naj inchejabꞌojan yinh sunilbꞌal ej tiempo,» xhi naj Aquis.