2 Hayet yabꞌen yaꞌ rey Saúl huneꞌ tuꞌ, yahwano yaꞌ, issikꞌnilo yaꞌ oxebꞌ mil ebꞌnaj soldado kaw helan xol yebꞌ naj Israel, isto ebꞌnaj yinta yaꞌ saywal yinh yaꞌ David bꞌey txꞌotxꞌ desierto Zif. 3 Iswatxꞌenkanh ebꞌnaj issoldado yaꞌ Saúl iscampamento yinh istzalanil Haquila istiꞌ bꞌeh, satakꞌti txꞌotxꞌ desierto. Wal yaꞌ David xin bꞌey txꞌotxꞌ desierto ay yaꞌ, yajaꞌ yabꞌelo yaꞌ tato apni yaꞌ Saúl saywal yinh yaꞌ bꞌey tuꞌ. 4 Yuxin ischejto yaꞌ David haywanh issoldado yilaꞌ bꞌaytuꞌwal ay yaꞌ Saúl. 5 Lahwi tuꞌ, isto yaꞌ David bꞌay ay iscampamento yaꞌ Saúl, yilnikano yaꞌ bꞌay chiway yaꞌ Saúl, yebꞌ bꞌay chiway naj Abner, iskꞌahol naj Ner. Naj Abner,^b haꞌ naj ayko yahawilo issoldado yaꞌ Saúl. Hak tuꞌ xin yu yilni yaꞌ tato haꞌ yul campamento chiway yaꞌ rey Saúl, hoyaniko xin issoldado yaꞌ yinh. 6 Yuxin yal yaꞌ David tet yaꞌ Ahimelec, naj heteo, yebꞌ tet naj Abisai,^c yunin ix Sarvia, yuxhta naj Joab, hakaꞌ tiꞌ:

—¿Mak hunujex tiꞌ chexto wintajan, jilaꞌ yaꞌ rey Saúl bꞌey iscampamento? xhi yaꞌ.

Istaqꞌwi naj Abisai tet yaꞌ:

—Hanan chintohan tawintaj, xhi naj.

7 Yinhtikꞌa huneꞌ aqꞌbꞌal tuꞌ to yaꞌ David yebꞌ naj Abisai bꞌey iscampamento yaꞌ rey Saúl. Wal yaꞌ Saúl tuꞌ, lanhan isway yaꞌ yul campamento, toqꞌanayo islanza yaꞌ iswiꞌtaj. Hakpax tuꞌ naj Abner kaw wayanh chu naj yebꞌ ebꞌnaj soldado, hilanayo ebꞌnaj, hoyaniko ebꞌnaj yinh yaꞌ rey Saúl. 8 Yalni naj Abisai tet yaꞌ David hakaꞌ tiꞌ:

—Wal tinanh mayako Komam Dios yaꞌ ayko ishowal tawinh yul haqꞌabꞌ. Chimhaje chinpotxꞌkamojan yaꞌ tinanh, chintejtojan islanza yaꞌ tiꞌ yul iskꞌul, kat isqꞌaxponayto chꞌen yul txꞌotxꞌ, hunelnhechꞌan chiwaqꞌan yinh yaꞌ, kat istanhkanilo yaꞌ, xhi naj tet yaꞌ David.

9 Istaqꞌwi yaꞌ David tet naj Abisai hakaꞌ tiꞌ:

—Machoj, mach chapotxꞌkamo yaꞌ, yuto haꞌ mak chipotxꞌnikamo yaꞌ rey sikꞌbꞌiliko yu Komam Jahawil, chiꞌay isyaꞌtajil yibꞌanh. 10 Chiwaqꞌ bꞌinahojan isbꞌi Komam Jahawil, chiwalnihan tato hanhe Komam chu yaqꞌni kamikal tet yaꞌ rey; yet chihul iskamikal yaꞌ, kat iskam yaꞌ, maka xol howal chikam yaꞌ. 11 Haꞌojabꞌ Komam Jahawil chinkolnihan winikanh inqꞌabꞌan yinh yaꞌ rey, sikꞌbꞌiliko yu Komam isreyalo konhobꞌ Israel. Wal xin ikanh islanza yaꞌ toqꞌanayo iswiꞌta yaꞌ tiꞌ, kat hawinipaxto huneꞌ xhalu bꞌay ayayto ha haꞌ chukꞌ yaꞌ, kat kopaxtoj, xhi yaꞌ David.

12 Hak tuꞌ yu yinito yaꞌ David islanza yaꞌ Saúl yebꞌ huneꞌ xhalu bꞌay ayayto ha haꞌ chukꞌ yaꞌ, ayayo iswiꞌta yaꞌ yet lanhan isway yaꞌ; ispaxto yaꞌ David yebꞌ naj Abisai. Yajaꞌ xin machi hunu ebꞌnaj issoldado yaꞌ Saúl ilni yebꞌ abꞌeni yet yapni yaꞌ David, yuto wayanh chu ebꞌnaj. Wal xin haꞌ Komam Jahawil aniko huneꞌ niman wayanh yinh ebꞌnaj sunil. 13 Wal yaꞌ David to yaꞌ yinh iswiꞌ huneꞌxa witz ayko satakꞌti bꞌay ay yaꞌ Saúl tuꞌ, kaw xin nahat xol ebꞌyaꞌ. 14 Yahwi yaꞌ David tet ebꞌnaj issoldado yaꞌ Saúl yebꞌ tet naj Abner, naj iskꞌahol naj Ner, yalni yaꞌ hakaꞌ tiꞌ:

—Abner, taqꞌwanh wetan, xhi yaꞌ David.

Istaqꞌwi naj Abner tuꞌ:

—Mak hach anmahil, ¿tzet yinh xin chaxhawi yinh kaw ip tet yaꞌ rey? xhi naj.

15 Istaqꞌwi yaꞌ David:

—¿Ham hach tiꞌ kaw ay hawelapnoj, machi hunu mak hakaꞌ hach xol ebꞌnaj Israel? ¿Tzet yinh machi maxatanhe yaꞌ rey hawahawil tuꞌ? Wal xin ay huneꞌ naj jet konhobꞌ tiꞌ mabꞌeyikto yul campamento tuꞌ mayoche naj ispotxꞌoꞌ yaꞌ rey. 16 Huneꞌ maxawu tiꞌ mach kꞌuloj, chiwaqꞌ bꞌinahojan isbꞌi Komam Jahawil chiwalnihan tato hawet ay hamaqꞌlaxkamoj, yuto mach chatanhe yaꞌ rey hawahawil tuꞌ, yaꞌ sikꞌbꞌiliko isreyalo konhobꞌ Israel yu Komam Jahawil. Wal tinanh xin say islanza yaꞌ yebꞌ huneꞌ xhalu bꞌay ayayto ha haꞌ bꞌey iswiꞌta yaꞌ, xhi yaꞌ David tuꞌ.

17 Yajaꞌ hayet yohtanhenilo yaꞌ rey Saúl ta haꞌ yaꞌ David chitzoteli, yalni yaꞌ hakaꞌ tiꞌ:

—¿Tom hach tiꞌ David, inkꞌaholan? ¿Tom hach chachtzotel tuꞌ? xhi yaꞌ.

Istaqꞌwi yaꞌ David:

—Hoꞌ, haninan mam rey, xhi yaꞌ.

18 Yalnipaxo yaꞌ David:

—¿Tzet yinh yuxin chinhatzumbꞌekꞌojan hanin hachejabꞌ intiꞌan? ¿Bꞌaytet inmulan yul hasat? ¿Tom ay txꞌoj chinwatxꞌehan yu inqꞌabꞌan? 19 Mam rey kaw chinqꞌanan tawet tato chawabꞌe nino tzet chiwalan, hanin hachejabꞌ intiꞌan. Tato haꞌ Komam Jahawil chiꞌaniko yinh hanabꞌal hawaniko howal winhan, chischah Komam huneꞌ xahanbꞌal chiwaqꞌan tet, yajaꞌ tato haꞌ anma chꞌok aqꞌokꞌule tawet hawaniko howal winhan, yaqꞌabꞌayo Komam Jahawil istzꞌaktiꞌ yibꞌanh hunteqꞌan anma tuꞌ. Yuto haꞌ chintzumbꞌenilojan sat txꞌotxꞌ ismajul ebꞌnaj Israel yu Komam Jahawil, kat yalni wetan: “As iyo habꞌa tet tioxh watxꞌebꞌil yu anma,” xhi ebꞌnaj. 20 Wal xin mach chisje inkꞌulan tato nahat chinelan sat istxꞌotxꞌ Komam Jahawil yet chinkaman. Yajaꞌ mam rey ¿tzet yinh xin chachekꞌ hasayaꞌ huneꞌ mak, hakaꞌ hasayni hunu noꞌ qꞌaj? Kach elti kinhasayaꞌan iswiꞌla witz hakaꞌ issaylax hunu noꞌ ahomtzꞌikin, xhi yaꞌ David.

21 Istaqꞌwi yaꞌ rey Saúl tet yaꞌ David hakaꞌ tiꞌ:

—David, hach tiꞌ hakaꞌ inkꞌaholan hawehi, wal tinanh chiwohtanhelojan tato wako inmulan. Wal xin meltzohanh, matxa tzet chachwutehan, yuto chiwohtanhelojan tato kaw ay welapnojan yul hasat, wal hinan xin hakaꞌ mak machi isnabꞌal, hak tuꞌ wute hinbꞌahan, chinwatxꞌenan istxꞌojal tawinh, xhi yaꞌ.

22 Istaqꞌwi yaꞌ David tet yaꞌ hakaꞌ tiꞌ:

—Mam rey, iqꞌbꞌil halanza wuhan, lah. Tijabꞌ hunu ebꞌnaj hasoldado yiqꞌato chꞌen bꞌey tiꞌ. 23 Haꞌojabꞌ Komam Jahawil chiꞌaqꞌni ispaj tet mak tohol isnabꞌal yebꞌ tet mak istoholalnhe chiswatxꞌe. Haꞌ Komam Jahawil makaxhaniko yul inqꞌabꞌan yinh huneꞌ aqꞌbꞌal tiꞌ, yajaꞌ machi manjehan kach inpotxꞌoꞌkamojan, yuto haꞌ Komam kach sikꞌniko isreyalo konhobꞌ Israel. 24 Wal xin kaw ay hawelapno yul insatan, yuxin ayojabꞌpaxo welapnojan yul sat Komam Jahawil, kat kiniskolnilojan yul isqꞌabꞌ sunil isyaꞌtajil, xhi yaꞌ David.

25 Yalnipaxo yaꞌ rey Saúl tet yaꞌ David hakaꞌ tiꞌ:

—David, kaw ayayo iskꞌulal Komam Jahawil tawibꞌanh, hach inkꞌahol. Yinh kaw yeli, kaw ay nimeta tzet ye tuꞌ ay yelapno chawatxꞌe. Kaw xin kꞌul chachelikoj, xhi yaꞌ Saúl tet yaꞌ David tuꞌ.

Lahwi tuꞌ ispaxto yaꞌ rey Saúl yatut, wal yaꞌ David xin tokano yaꞌ yinh isbꞌel.