Yaꞌ David yebꞌ ix Abigail
25
Apni istzꞌayikal bꞌay kam yaꞌ Samuel, iskutxbꞌaniko isbꞌa sunil konhobꞌ Israel, yok oqꞌo yu bꞌiskꞌulal yinh yaꞌ. Ismujlax yaꞌ bꞌey iskonhobꞌ, haꞌ ton Ramá. Wal yaꞌ David el yaꞌ bꞌay ebꞌabꞌil isbꞌa, isto yaꞌ bꞌey txꞌotxꞌ desierto Parán.2 Haꞌ xin bꞌey txꞌotxꞌ Maón ay huneꞌ naj kaw qꞌalom, bꞌey Carmel ay istxꞌotxꞌ naj bꞌay ay isnoqꞌ, oxebꞌ mil ismeꞌ naj, huneꞌ mil ischiw naj. Bꞌey Carmel tuꞌ xin chiskꞌupilo naj xil ismeꞌ. 3 Huneꞌ naj tuꞌ Nabal isbꞌi naj, wal yixal naj xin Abigail isbꞌi ix. Ix Abigail tuꞌ, kaw ay yitzꞌatil iswiꞌ ix, yebꞌ kaw kawla ix ix; wal naj Nabal tuꞌ kaw how iswiꞌ naj, yebꞌ kaw txꞌoj isbꞌeybꞌal naj; yikꞌal yaꞌ Caleb ye naj.
4 Hayet ay yaꞌ David bꞌey txꞌotxꞌ desierto yabꞌenilo yaꞌ tato chiskꞌupilo naj Nabal xil ismeꞌ bꞌey Carmel. 5 Yuxin ischejto yaꞌ David tuꞌ 10 (lahonhwanh) ebꞌnaj tzeh, yalni yaꞌ tet ebꞌnaj hakaꞌ tiꞌ: «Ahanhweto bꞌey Carmel iskꞌatanh naj Nabal, kat heyalni tato haninan chinqꞌambꞌetojan hanikꞌ ye naj.a 6 Cheyalnipaxo tet naj hakaꞌ tiꞌ: “Yaqꞌabꞌ Komam Dios aqꞌankꞌulal tawet, yebꞌ tet hawuninal, kat yanayo iskꞌulal yibꞌanh sunil tzet ayach. 7 Mawabꞌehan tato ayachikꞌo hawiqꞌalo xil hameꞌ, hawohtaxapaxoj tato haꞌ kokꞌatanhanh ehikꞌo ebꞌnaj chitanhen hameꞌ bꞌey Carmel tiꞌ. Hayet aykꞌo ebꞌnaj kokꞌatanh tuꞌanh matzet yu ebꞌnaj, machipaxo tzet ilaxilo tet ebꞌnaj yinh huneꞌ tiempohal tuꞌ. 8 Chisje haqꞌambꞌen tet ebꞌnaj chitanhen hameꞌ, ebꞌnaj xin chihalni tawet ta yeli; yuxin kꞌulojabꞌ chu konhhachahnihanh, yebꞌ kꞌul chawute hakꞌul jinhanh yinh huneꞌ tzꞌayik tiꞌ, chawaqꞌni hanikꞌo tzet ayach jetanh yebꞌ tet yaꞌ David, yaꞌ hakaꞌ hakꞌahol yehi,” kexchi,» xhi yaꞌ David tet ebꞌnaj ischejabꞌ.b
9 Hak tuꞌ yu isto ebꞌnaj ischejabꞌ yaꞌ David iskꞌatanh naj Nabal tuꞌ, yalni ebꞌnaj ischejbꞌanil tet naj, yechman ebꞌnaj ispaj ischejbꞌanil tuꞌ. 10 Yajaꞌ taqꞌwi naj Nabal tuꞌ tet ebꞌnaj hakaꞌ tiꞌ:
—¿Mak anmahil naj David tuꞌ? ¿Mak najil huneꞌ naj iskꞌahol yaꞌ Isaí cheyal tuꞌ? Yuto tinanh kaw txꞌiꞌal ebꞌnaj chejabꞌ chiꞌelkanh tet ebꞌnaj yahaw. 11 ¿Tom xin chiwilojan tzet chislo inchejabꞌan chiꞌinilo xil inmeꞌtiꞌan yebꞌ ha haꞌ chiyukꞌu, yebꞌ noꞌ chibꞌe watxꞌebꞌilxa, kat waqꞌnihan tet mak mach wohtajojan? xhi naj.
12 Hak tuꞌ yu ismeltzo ebꞌnaj ischejabꞌ yaꞌ David tuꞌ, haxa yet yapni ebꞌnaj, yalni ebꞌnaj tet yaꞌ yinh tzet yal naj Nabal tuꞌ. 13 Yuxin yal yaꞌ David tet ebꞌnaj tzujan yinta hakaꞌ tiꞌ:
«Kꞌalweko heyespada yinh heyiktaj hunun hex,» xhi yaꞌ.
Iskꞌalniko ebꞌnaj yespada yinh yiktaj, hakpax tuꞌ yaꞌ David. Yok tzujno 400 ebꞌnaj yinta yaꞌ David, iskankano 200 ebꞌnaj istanheno isqꞌuybꞌe ebꞌnaj. 14 Yajaꞌ xin ay huneꞌ naj ischejabꞌ naj Nabal halni tet ix Abigail, ix yixal naj Nabal hakaꞌ tiꞌ: «Ay hunteqꞌan ebꞌnaj ischejti yaꞌ David, ispeto bꞌey txꞌotxꞌ desierto isqꞌambꞌeno hanikꞌ ye yaꞌ jahaw tiꞌanh, yajaꞌ xin kaw how yu istzotel yaꞌ tet ebꞌnaj. 15 Hunteqꞌan ebꞌnaj tuꞌ, kaw kꞌul yute iskꞌul ebꞌnaj jinhanh, sunilbꞌal tiempo konhekꞌanh tanhe meꞌ iskꞌatanh ebꞌnaj tuꞌ, machi hunu istxꞌojal iswatxꞌe ebꞌnaj jinhanh, matzet yipaxilo ebꞌnaj jetanh. 16 Wal xin hakaꞌ hunu kꞌubꞌ, yuko ebꞌnaj jenhelojanh yet konhistanhenanh ebꞌnaj tzꞌayikal yebꞌ aqꞌbꞌalil yet ayonhikojanh kotanhenah noꞌ meꞌ. 17 Yajaꞌ mach chu kotzotel tet yaꞌ jahawil tiꞌanh, yuto kaw how iswiꞌ yaꞌ. Yuxin wal tinanh kaw kam chatxumu tzet chawute, yuto yinh kaw yeli ay istxꞌojal chitij yibꞌanh yaꞌ yebꞌ sunil mak ay yul yatut yaꞌ,» xhi naj.
18 Wal ix Abigail tuꞌ yinhxanhe anhe yiti ix 200 ixim pan yebꞌ kabꞌ net nohna yu vino, yebꞌ hokꞌonh noꞌ meꞌ watxꞌebꞌilxa, yebꞌ howebꞌ mal ixim trigo qꞌanbꞌinaj, yebꞌ 100 (huneꞌ ishokꞌal) chayan teꞌ uva tajtzebꞌilxa, yebꞌ 200 chayan teꞌ higo tajtzebꞌilxa. Yanahto ix sunil tzet chilolax tuꞌ yibꞌanh ej isburro. 19 Yalni ix tet ebꞌnaj ischejabꞌ:
«Bꞌabꞌanhwe insatajan, chexintzujuyojan,» xhi ix.
Yajaꞌ xin matzet yal ix tet yichamil, haꞌ ton naj Nabal tuꞌ. 20 Lahwi tuꞌ yahto ix yibꞌanh huneꞌ noꞌ burro, isto ix yul huneꞌ bꞌeh txannhe sat yinh isxulanil iskꞌul witz. Hayet ayko ix yinh isbꞌel tuꞌ, yilnito ix tato lanhan istit yaꞌ David yebꞌ ebꞌnaj tzujan yintaj, isto ix ischahno yaꞌ.
21 Wal yaꞌ David xayal yaꞌ hakaꞌ tiꞌ: «Yinh kaw yeli kaw nabꞌanhe intanhehan isnoqꞌ naj Nabal bꞌey txꞌotxꞌ desierto, machi xin tzet ay naj tuꞌ intzabꞌan, yajaꞌ xin haꞌ istxꞌojal chaqꞌ naj ispajo selel wetan. 22 Yuxin chiwaqꞌ bꞌinahojan isbꞌi Komam Dios yinh tzet chiwaltiꞌan, tato mach chinpotxꞌkamojan naj Nabal tiꞌ yebꞌ ebꞌnaj iskꞌahol naj yet hekal, tijabꞌ niman isyaꞌtajil wibꞌanhan yu Komam Dios,» xhi yaꞌ David.
23 Haxa yet lanhanxa ishitziko ix Abigail iskꞌatanh yaꞌ David, yayti ix yibꞌanh noꞌ burro, yay jahno ix, yay xulno ix sat txꞌotxꞌ. 24 Yapnikano ix yich yoj yaꞌ David, yalni ix tet yaꞌ:
—Mamin, haꞌ istxꞌojal iswatxꞌe naj Nabal, wibꞌanhojabꞌan chiꞌaykꞌayi, kaw chinqꞌanan tawet tato chawabꞌe nino tzet chiwalan hanin hachejabꞌ intiꞌan, yuto ay huneꞌ inchejbꞌanilan tawet. 25 Mach chawako yinh hakꞌul yinh tzet yal naj Nabal tawet, huneꞌ naj winaj tuꞌ kaw txꞌojkano naj. Hakaꞌtikꞌa yok isbꞌi naj tuꞌ, hak tuꞌ naj, kaw machikano nino isnabꞌal naj. Yajaꞌ hanin hachejabꞌ intiꞌan, machi wilan isbꞌeykꞌo ebꞌnaj tzeh hachejto tzotelo tet naj. 26 Tinanh xin Mamin, haꞌ Komam Jahawil chaxhlinhbꞌani yunhe mach chatanhtzelo mak tꞌinhanxatikꞌa hapotxꞌnikamoj yu hawaqꞌni ispaj selel tet. Haꞌ mak ayko ishowal tawinh, yebꞌ chiyoche kach ispotxꞌoꞌ, lahanojabꞌ chitanhkano hakaꞌ naj Nabal. 27 Wal tinanh xin ay hanikꞌ sabꞌehal iqꞌbꞌil wuhan chiwaqꞌan tawet, pohkanh yinh ebꞌnaj tzujan tawinta tiꞌ. 28 Chinqꞌanan tawet hanin hachejabꞌ intiꞌan, ta chawaqꞌ nimankꞌulal winhan. Yinh kaw yeli haꞌ Komam Jahawil chachaniko reyal yebꞌ ebꞌnaj hakꞌahol yinh sunilbꞌal ej tiempo, yuto yu Komam yuxin chawaqꞌ howal, machojabꞌ istxꞌojal chawil yulbꞌal sunil ej habꞌil. 29 Ta ay mak chachtzumbꞌenikꞌoj yu chiyoche kach ispotxꞌoꞌ matzet chal hakꞌul, yuto tꞌinhan hawehiko yul isqꞌabꞌ Komam Jahawil, haDiosal. Wal ebꞌnaj ayko ishowal tawinh, haꞌojabꞌ Komam chiqꞌojnito ebꞌnaj hakaꞌ isqꞌojlaxto hunu qꞌojbꞌal yu iswiꞌ ximich. 30 Hayet chiyijni isbꞌa sunil tzet halbꞌilkano yu Komam Jahawil tawinh, yet chachyaniko reyal yinh konhobꞌ Israel, 31 matzet chal hakꞌul, mach chawiqꞌ bꞌiskꞌulal yuto mach chapotxꞌkamo mak machi ismul, yebꞌ yu chawaqꞌ ispaj selel yu haqꞌabꞌ tet mak ayko ishowal tawinh. Yuxin Mamin, mach chaxhto potxꞌwal tuꞌ. Haxa yet kaw ay hawelapno yu iskꞌulal chaqꞌ Komam Jahawil tawet, chinhanatijan, hanin hachejabꞌ intiꞌan, xhi ix.
32 Istaqꞌwi yaꞌ David tet ix Abigail hakaꞌ tiꞌ:
—Hal-laxojabꞌ kꞌul-la tzotiꞌ yinh Komam Jahawil, koDiosal hanhonh Israelonh tiꞌ, yuto haꞌ Komam kaxhchejniti hawul kinatuklenan. 33 Yaqꞌabꞌpaxayo Komam Jahawil iskꞌulal tawibꞌanh yuto kaw kꞌul hanabꞌal, kach hul kachwal winhan yunhe matxa chintohan potxꞌwal, yu waqꞌnihan ispaj selel yu inqꞌabꞌan tet mak ayko ishowal winhan. 34 Chiwaqꞌ bꞌinahojan isbꞌi Komam Jahawil, koDiosal hanhonh Israelonh tiꞌ, yuto haꞌ chinpahnihan inwatxꞌenan istxꞌojal tawinh, yuto ta mach kach tit yinh anhe kinhachabꞌan, yet hekal matxa hunu ischejabꞌ naj Nabal itzitz, xhi yaꞌ David.
35 Lahwi tuꞌ ischahnilo yaꞌ David tzet chilolax tuꞌ tet ix Abigail, yalni yaꞌ tet ix hakaꞌ tiꞌ:
—Paxanhto yinh tzalahilal hawatut, mantxuman tato kꞌul hanabꞌal, chinyijenan tzet chaqꞌan tiꞌ, xhi yaꞌ.
36 Hayet ismeltzo ix Abigail bꞌey yatut, lanhan yekꞌtzen naj Nabal huneꞌ niman qꞌinh, hakaꞌ qꞌinh chiyekꞌtze ebꞌnaj rey, kaw xin ukꞌum naj Nabal tuꞌ yuxin kaw tzalahilal ye naj, hak tuꞌ xin matzet yal ix Abigail tet naj; wal xin hato yet hunxa tzꞌayik yal ix sunil tuꞌ tet naj. 37 Haxa yet hunxa tzꞌayik tuꞌ, yet xaꞌel teꞌ ukꞌe yinh sat naj, yalni ix Abigail yinh kaw habꞌan sunil tuꞌ tet naj. Hayet yabꞌen naj Nabal tuꞌ tzet yal ix, islow huneꞌ yaxchew yinh naj, iskawyanhilo isnimanil naj. 38 Haxa yet yekꞌto 10 (lahonhebꞌ) tzꞌayik, yaniti Komam Jahawil huneꞌ yabꞌil yinh naj Nabal tuꞌ, iskam naj. 39 Hayet yabꞌenilo yaꞌ David tato kam naj Nabal tuꞌ, yalni yaꞌ hakaꞌ tiꞌ:
«Hal-laxojabꞌ kꞌul-la tzotiꞌ yinh Komam Jahawil, yuto haꞌ Komam mapajtzen tet naj Nabal yu istxꞌojal iswatxꞌe naj winhan. Haꞌ Komam kolwa winhan yuxin machi inwatxꞌehan huneꞌ istxꞌojal tuꞌ. Wal xin istxꞌojal naj, aykꞌay yibꞌanh iswiꞌ yu Komam,» xhi yaꞌ David.
Lahwi tuꞌ ischejnito yaꞌ David ischejabꞌ yalno tet ix Abigail tato chiꞌok ix yixalo yaꞌ. 40 Haxa yet yapni ebꞌnaj ischejabꞌ yaꞌ David tuꞌ bꞌey Carmel tzotelo tet ix Abigail, yalni ebꞌnaj tet ix hakaꞌ tiꞌ:
—Makonhischejtijanh yaꞌ David jalaꞌanh tawet tato chiyoche yaꞌ chaxhok yixaloj yaꞌ, xhi ebꞌnaj chejabꞌ tuꞌ.
41 Hayet yabꞌen ix Abigail yinh tzet yal ebꞌnaj tuꞌ, yay jahno ix, yay xulno ix sat txꞌotxꞌ, yalni ix hakaꞌ tiꞌ:
—Hanintiꞌan ischejabꞌ yaꞌ David wehan, kꞌul wokan intxꞌahaꞌan yoj ebꞌnaj ischejabꞌ yaꞌ wahawilan, xhi ix.
42 Lahwi yalni ix hakaꞌ tuꞌ, iswatxꞌen isbꞌa ix yinh anhe, yahto ix yibꞌanh huneꞌ noꞌ burro, isto ix yinta ebꞌnaj ischejabꞌ yaꞌ David tuꞌ, yinipaxto ix howanh ebꞌix qꞌopo ischejabꞌ yintaj, yok ix Abigail tuꞌ yixalo yaꞌ David.