—Haꞌ tinanh chiyij isbꞌa tzet haltebꞌil tawet yu Komam Jahawil yet yalni tato chiyako Komam yaꞌ ayko ishowal tawinh yul haqꞌabꞌ, kat hawilni tzet chawute yaꞌ, xhi ebꞌnaj.

Yahwano yaꞌ David tuꞌ, isto yaꞌ yinh nanhkꞌulal iskawilal yaꞌ rey Saúl, iskꞌupnilto yaꞌ hanikꞌ istiꞌ xil isqꞌap yaꞌ ayko yinh. 5 Yajaꞌ hayet lahwi iskꞌupnilto yaꞌ istiꞌ xil isqꞌap yaꞌ rey Saúl tuꞌ, istxumni isbꞌa yanma yaꞌ, 6 yalni yaꞌ hakaꞌ tiꞌ:

—Haꞌojabꞌ Komam Jahawil chikolwa winhan xin wal machi low inqꞌabꞌan yinh yaꞌ rey Saúl tiꞌ, yuto haꞌ Komam saynheko yaꞌ yok reyal, xhi yaꞌ David.

7 Haꞌ hunteqꞌan tzotiꞌ yal yaꞌ David tuꞌ haꞌ kachwa yinh ebꞌnaj soldado, yekꞌayo ishowal ebꞌnaj yinh yaꞌ Saúl; tzujan tuꞌ xin yelti yaꞌ Saúl yul chꞌen nhachꞌen, isto yaꞌ yinh isbꞌel. 8 Hakpax tuꞌ yaꞌ David elti yebꞌ issoldado yul chꞌen nhachꞌen, yahwito yaꞌ tet yaꞌ Saúl hakaꞌ tiꞌ:

—Mam rey, xhi yaꞌ David.

Hayet yabꞌen yaꞌ rey Saúl huneꞌ tuꞌ, istꞌanhxito yaꞌ yintaj, yajaꞌ wal yaꞌ David ay jahno yaꞌ, yay xulno yaꞌ sat txꞌotxꞌ, yuto kaw ay yelapno yaꞌ rey Saúl tuꞌ yul sat yaꞌ. 9 Yalni yaꞌ David tet yaꞌ Saúl hakaꞌ tiꞌ:

—Mamin, ¿tzet yinh xin chawabꞌeto tzet chal ebꞌnaj chalni hakaꞌ tiꞌ: “Haꞌ naj David ayko ishowal naj tawinh?” xhi ebꞌnaj. 10 Wal xin chiwaqꞌan hawohtanheloj tato haꞌ yinh huneꞌ tzꞌayik tiꞌ makaxhyako Komam Jahawil yul inqꞌabꞌan yul chꞌen nhachꞌen. Mayal ebꞌnaj insoldadohan wetan tato chachinpotxꞌkamojan, yajaꞌ mawaqꞌ nimankꞌulalan tawinh yuto mantxuman tato hach tiꞌ isreyal konhobꞌ Israel hawehi, haꞌ Komam Jahawil kach sikꞌniko reyal.

11 »Ilkꞌanabꞌ mam rey, ilkꞌanabꞌ istiꞌ xil haqꞌap mankꞌupilojan, lah. Mach masje inkꞌulan, yuxin machi makaxhinpotxꞌkamojan; wal xin haꞌojabꞌ huneꞌ tiꞌ chiꞌaqꞌni hatxumuloj tato hanintiꞌan mach istxꞌojal chinnakojan tawinh, yebꞌ mach ayoko inhowalan tawinh, yajaꞌ wal hach xin chinhasayikꞌojan, yunhe kinhapotxꞌnikamojan. 12 Haꞌojabꞌ Komam Jahawil chiꞌilni tzet chonheliko kokawanhil, haꞌojabꞌ Komam chiꞌaqꞌni ispaj tzet chinhawutetiꞌan, yajaꞌ wal hinan xin mach bꞌaqꞌinhal chilow inqꞌabꞌan tawinh. 13 Ay huneꞌ tzotiꞌ halbꞌilkano yet payat hakaꞌ tiꞌ: “Haꞌ istxꞌojal, yinh ebꞌnaj txꞌoj chitita,” xhi. Yuxin hanintiꞌan mach bꞌaqꞌinhal chilow inqꞌabꞌan tawinh. 14 ¿Mak anmahil chistzumbꞌekꞌo yaꞌ isreyal ebꞌnaj Israel? ¿Tom metx kamom txꞌiꞌ mato haꞌ noꞌ qꞌaj chissayikꞌo yaꞌ? 15 Haꞌojabꞌ Komam Jahawil chiꞌok juesal koxol, kat yilni ta hach maka haninan. Haꞌ Komam yohtaj tato machi istxꞌojal chinnakojan tawinh, haꞌ xin Komam chinkolnilojan yul haqꞌabꞌ, xhi yaꞌ David tet yaꞌ rey Saúl.

16 Hayet isbꞌejni yaꞌ David istzotel tuꞌ, yalni yaꞌ rey Saúl hakaꞌ tiꞌ:

—¿Tom hach tiꞌ kꞌahol, hach David? ¿Tom hach chaxhtzotel wettiꞌan? xhi yaꞌ.

Hayet lahwi yalni yaꞌ Saúl hakaꞌ tuꞌ ishatzꞌbꞌaniko yul isnuqꞌ yaꞌ yoqꞌi. 17 Yalni yaꞌ tet yaꞌ David hakaꞌ tiꞌ:

—Hach tiꞌ kaw tohol hanabꞌal, chawaqꞌni iskꞌulal ispajo selel istxꞌojal chiwuhan tawinh. 18 Tinanh xin, maxayelo iskꞌulchꞌanil hakꞌul winhan, yuto manyakojan Komam Jahawil yul haqꞌabꞌ, yaj machi makinhapotxꞌkamojan. 19 ¿Mak hunu tiꞌ chiꞌilcha hunu mak ayko ishowal yinh, kat isbꞌejtzontoj, yebꞌ mach chispotxꞌkamoj? ¡Machi maka! Yuxin haꞌojabꞌ Komam Jahawil chiꞌaqꞌni iskꞌulal ispajo tawet, yu huneꞌ iskꞌulal maxawatxꞌe winhtiꞌan. 20 Wal tinanh xin, matxumchalo wuhan tato hach chaxhok isreyalo konhobꞌ Israel, huneꞌ hamunil yinh reyalil, machi hunu mak chiꞌinilo tawet. 21 Yuxin chinqꞌanan tawet tinanh, taqꞌwekano yinh isbꞌi Komam Jahawil tato mach chatanhtzelo yuninal wuninalan tzujanilo wintajilojan, yebꞌ xin mach chatanhtzelo inbꞌihan yinh ej yuninal wuninalan, xhi yaꞌ rey Saúl.

22 Hak tuꞌ yu istaqꞌweniko yaꞌ David huneꞌ tuꞌ yibꞌanh tet yaꞌ rey Saúl, lahwi tuꞌ ispaxto yaꞌ yatut. Wal yaꞌ David yebꞌ ebꞌnaj tzujan yintaj yaꞌ, to ebꞌnaj yulaj chꞌen nhachꞌen ay bꞌey tuꞌ.