—Mamin, ¿chimisje intohan waqꞌaꞌkojan howal yinh ebꞌnaj filisteo tuꞌ? xhi yaꞌ.

Istaqꞌwi Komam tet yaꞌ:

—Asiꞌ, ako howal yinh ebꞌnaj filisteo tuꞌ, kat hakolnilo konhobꞌ Keila yul isqꞌabꞌ ebꞌnaj, xhi Komam.

3 Yajaꞌ ebꞌnaj tzujan yinta yaꞌ David, yal ebꞌnaj hakaꞌ tiꞌ:

—Wal hanhonh ayonh bꞌey Judá tiꞌ kaw chonhxiwanh, hajxam kotohanh janokojanh howal yinh ebꞌnaj filisteo bꞌey konhobꞌ Keila chimahkanh koxiwkanhanh, xhi ebꞌnaj.

4 Yuxin isqꞌambꞌe yaꞌ David tet Komam Jahawil hunelxa, istaqꞌwi Komam tet yaꞌ:

—Asiꞌ bꞌey konhobꞌ Keila tuꞌ, yuto haninan chiwakojan ebꞌnaj filisteo yul haqꞌabꞌ, xhi Komam.

5 Hak tuꞌ yu isto yaꞌ David yebꞌ ebꞌnaj winaj tzujan yintaj bꞌey konhobꞌ Keila. Yaniko yaꞌ howal yinh ebꞌnaj filisteo, isqꞌoji yaꞌ yinh ebꞌnaj, yinilo yaꞌ sunil isnoqꞌ ebꞌnaj filisteo tuꞌ. Hak tuꞌ yu iskolnilo yaꞌ David konhobꞌ Keila yul isqꞌabꞌ ebꞌnaj filisteo.

6 Yaꞌ Abiatar, iskꞌahol yaꞌ Ahimelec, yaꞌ apni iskoloꞌ isbꞌa iskꞌatanh yaꞌ David; haꞌ yaꞌ xin tzujan yinta yaꞌ David yet yapni yaꞌ bꞌey konhobꞌ Keila, iqꞌbꞌil xin qꞌap xilqꞌape efod yu yaꞌ. 7 Lahwi tuꞌ yal-lax tet yaꞌ rey Saúl ta haꞌ bꞌey konhobꞌ Keila ay naj David, yuxin istxum yaꞌ hakaꞌ tiꞌ: «Wal tinanh, haꞌ Komam Dios xaꞌaniko naj David tiꞌ yul inqꞌabꞌan, yuto haꞌ kaw naj maspebꞌakanikto isbꞌa yul huneꞌ konhobꞌ hoybꞌil yu kꞌubꞌ, yebꞌ kaw kꞌul yehiko ispultahil,» xhi yaꞌ yinh isnabꞌal.

8 Yinhnhena tuꞌ, iskutxbꞌaniko yaꞌ Saúl sunil ebꞌnaj issoldado yunhe isto ebꞌnaj ishoynoyo konhobꞌ Keila yu yaniko howal yinh yaꞌ David yebꞌ ebꞌnaj tzujan yinta yaꞌ. 9 Yajaꞌ hayet yabꞌenilo yaꞌ David tato ayko yinh isnabꞌal yaꞌ Saúl istit yaniko howal yinh yaꞌ, yalni yaꞌ David tet yaꞌ sacerdote Abiatar: «Iti qꞌap efod,» xhi yaꞌ. 10 Yalni yaꞌ David tet Komam hakaꞌ tiꞌ:

—Mam Jahawilanh, isDiosal hanhonh Israelonh tiꞌanh, hanin hachejabꞌ intiꞌan wohtanhelojan tato choche yaꞌ rey Saúl yul istanhtzelo konhobꞌ Keila tiꞌ wuhan. 11 Mamin, ¿chimhul yaꞌ Saúl kinissayaꞌan hakaꞌ yal-lax wettiꞌan tiꞌ? ¿Chimxinkinyakojan konhobꞌ tiꞌ yul isqꞌabꞌ yaꞌ rey Saúl? Mamin koDiosal hanhonh Israelonh tiꞌanh, hanin hachejabꞌ intiꞌan chinqꞌanan tawet tato chawaqꞌ wohtanhelojan, xhi yaꞌ.

Istaqꞌwi Komam Jahawil tet yaꞌ David:

—Hoꞌ chul yaꞌ, xhi Komam.

12 Isqꞌambꞌenpaxo yaꞌ David hunelxa:

—¿Chimkinyakojan konhobꞌ tiꞌ yul isqꞌabꞌ yaꞌ yebꞌ ebꞌnaj tzujan wintajan? xhi yaꞌ.

Istaqꞌwi Komam Jahawil:

—Hoꞌ chexyako konhobꞌ yul isqꞌabꞌ ebꞌnaj, xhi Komam.

13 Hak tuꞌ yu yel yaꞌ David yebꞌ ebꞌnaj tzujan yinta bꞌey konhobꞌ Keila, etza 600 ebꞌnaj tzujan yinta yaꞌ. Machi xin bꞌay kan yaꞌ David tuꞌ yinh hunelnhe, wal xin tonhe chiꞌekꞌ kolo yaꞌ yebꞌ ebꞌnaj tzujan yintaj. Haxa yet yabꞌenilo yaꞌ rey Saúl tato el yaꞌ David yul konhobꞌ Keila tuꞌ, matxa to yaꞌ saywal yinh ebꞌnaj.

14 Lahwi tuꞌ xin iskankano yaꞌ David yebꞌaꞌ isbꞌa yul huneꞌ chꞌen nhachꞌen ay bꞌey iswiꞌ witz sat txꞌotxꞌ desierto Zif. Waxanhka kaw chissayikꞌo yaꞌ rey Saúl yaꞌ David, yajaꞌ machi yako Komam Dios yaꞌ yul isqꞌabꞌ yaꞌ. 15 Yabꞌenilo yaꞌ David tato elto yaꞌ rey Saúl saywal yinh yaꞌ yu ispotxꞌnikamo yaꞌ yaꞌ, yuxin kankano yaꞌ David bꞌey Hores sat txꞌotxꞌ desierto Zif.

16 Ay huneꞌ tzꞌayik tiꞌ xin apni yaꞌ Jonatán ilwal yinh yaꞌ David bꞌey Hores. Hak tuꞌ xin yu yiqꞌni yip yanma yaꞌ David yu iptzebꞌal yaqꞌ yaꞌ Jonatán. 17 Yalni yaꞌ Jonatán tet yaꞌ David tuꞌ:

—Mach chaxhxiwi, mach chachilcha yu inmaman, yuto hach chaxhok isreyalo konhobꞌ Israel. Haninan xin chinokan yinh iskabꞌo reyal tawintaj. Wal xin yohtapaxo inmaman huneꞌ tiꞌ, xhi yaꞌ Jonatán.

18 Iskawanhil ebꞌyaꞌ tꞌinhbꞌankano huneꞌ tzotiꞌ tuꞌ sata Komam Dios Jahawil, tzujan tuꞌ xin ispaxto yaꞌ Jonatán yatut, wal yaꞌ David kankano yaꞌ bꞌey Hores. 19 Yajaꞌ xin ay hunteqꞌan ebꞌnaj ay bꞌey txꞌotxꞌ desierto Zif to bꞌey konhobꞌ Gabaa iskꞌatanh yaꞌ rey Saúl, yalni ebꞌnaj tet yaꞌ hakaꞌ tiꞌ:

—Mam rey, ¿hawohtami tato haꞌ naj David ay naj sat kotxꞌotxꞌanh? Ebꞌabꞌil isbꞌa naj yul huneꞌ chꞌen nhachꞌen ayko iswiꞌ witz Haquila, ayko yinh yetkꞌulal sur, sat txꞌotxꞌ Hores. 20 Yuxin ta chawoche hanhkawonhanh chijakojanh naj yul haqꞌabꞌ, xhi ebꞌnaj.

21 Istaqꞌwi yaꞌ Saúl tet ebꞌnaj:

—Yaqꞌabꞌayo Komam Dios iskꞌulal teyibꞌanh, yuto chitzꞌay hekꞌul winhan. 22 Wal tinanh chiwalan teyet tato kam cheyil bꞌay ewan naj, kat heqꞌambꞌeni mak ilni naj bꞌey tuꞌ, yuto hanintiꞌan kaw wohtajan tato haꞌ naj David tuꞌ kaw helan naj iskolni isbꞌa. 23 Yuxin as kam ilwej bꞌaytuꞌwal chiꞌekꞌ naj yebꞌa isbꞌa, haxa yet kaw tꞌinhan heyekoj, kat heyul heyalno wetan, kat intohan teyintaj. Ta xin yeli ay naj sat hetxꞌotxꞌ tuꞌ yilal chinekꞌan insayaꞌan naj xol sunil ebꞌnaj Judá, xhi yaꞌ tet ebꞌnaj.

24 Yel ebꞌnaj ah Zif tuꞌ sata yaꞌ rey Saúl, ispaxto ebꞌnaj iskonhobꞌ, yajaꞌ wal yaꞌ David yebꞌ ebꞌnaj tzujan yintaj, haxa bꞌey txꞌotxꞌ desierto Maón ay yaꞌ yul ismajul txꞌotxꞌ Arabá, yinh yetkꞌulal sur sat txꞌotxꞌ desierto tuꞌ. 25 Isto yaꞌ Saúl tuꞌ yebꞌ ebꞌnaj issoldado saywal yinh yaꞌ David, yajaꞌ xin yabꞌelo yaꞌ David tato tit yaꞌ rey Saúl saywal yinh yaꞌ, yuxin ayti yaꞌ yinh iskꞌul chꞌen nhachꞌen bꞌay ewan ye tuꞌ, iskan yaꞌ sat txꞌotxꞌ desierto Maón. Hayet yabꞌenilo yaꞌ rey Saúl tato haꞌ bꞌey Maón ay yaꞌ David, isto yaꞌ saywal yinh yaꞌ. 26 Yapni yaꞌ rey Saúl iskawilal yaꞌ David, haꞌ yinh isqꞌaxep iskꞌul witz tuꞌ ay yaꞌ Saúl yebꞌ issoldado, haxa yinh hunxa qꞌaxepxa witz tuꞌ xin ay yaꞌ David yebꞌ issoldado; lanhan xin yel yaꞌ yinh anhe tet yaꞌ rey Saúl. Yajaꞌ haxa yet hoybꞌilxayo yaꞌ David yebꞌ issoldado yu yaꞌ Saúl, hanikꞌxanhe xin istzabꞌcha yaꞌ. 27 Lahwi tuꞌ xin yapni huneꞌ naj chejabꞌ yalno tet yaꞌ Saúl hakaꞌ tiꞌ:

«Mam rey meltzanh yinh anhe, yuto maꞌok ebꞌnaj filisteo yul konhobꞌ,» xhi naj.

28 Hayet yabꞌen yaꞌ huneꞌ tuꞌ, isbꞌejni yaꞌ issayni yaꞌ David, isto yaꞌ yebꞌ issoldado yaqꞌaꞌ howal yinh ebꞌnaj filisteo tuꞌ. Yu huneꞌ tuꞌ yuxin alaxkaniko isbꞌi huneꞌ chꞌen nhachꞌen tuꞌ hakaꞌ tiꞌ: Sela-hama-lecot, haꞌ chal yelapnoj Sat chꞌen chꞌen ok pohlebꞌahil.

29 Lahwi tuꞌ xin yel yaꞌ David bꞌey tuꞌ, iskankano yaꞌ xolaj hunteqꞌan chꞌen nhachꞌen bꞌey txꞌotxꞌ En-gadi.