3 Yel yaꞌ David bꞌey tuꞌ, isto yaꞌ bꞌey konhobꞌ Mizpa ayko yul ismajul txꞌotxꞌ Moab, yalni yaꞌ tet naj isreyal Moab hakaꞌ tiꞌ:

«Mamin, chiwalan tawet, estam chawaqꞌ nino bꞌay chikan inmaman yebꞌ inmiꞌan takꞌatanh, masanto chiwilan tzet chinelikojan yu Komam Dios,» xhi yaꞌ.

4 Hak tuꞌ yu yiniti yaꞌ ismam yebꞌ ismiꞌ sata naj isreyal txꞌotxꞌ Moab, iskankano bꞌey tuꞌ yulbꞌal istiempohal yet ekꞌyaꞌ David iskolno isbꞌa tet yaꞌ rey Saúl. 5 Yajaꞌ yal yaꞌ Gad, ischejabꞌ Komam Dios, tet yaꞌ David hakaꞌ tiꞌ:

«Mach chaxhkan hakoloꞌ habꞌa bꞌey tiꞌ, wal xin as kol habꞌa bꞌey txꞌotxꞌ Judá,» xhi yaꞌ tet yaꞌ David.

Hak tuꞌ yu isto yaꞌ David bꞌey txꞌotxꞌ Judá, yapni yaꞌ xolaj qꞌebꞌtaj chiyij Haret.

6 Ay huneꞌ tzꞌayik xin, tzꞌonhanayo yaꞌ rey Saúl yich huneꞌ teꞌ tamarisco ay bꞌey Gabaa bꞌay ay Yatut Komam Dios, ayko islanza yaꞌ yul isqꞌabꞌ, hoyaniko issoldado yaꞌ yinh. Hayet yabꞌenilo yaꞌ Saúl bꞌay ay yaꞌ David yebꞌ ebꞌnaj tzujan yinta yaꞌ, 7 yalni yaꞌ Saúl tuꞌ tet issoldado hakaꞌ tiꞌ:

—Hex wet konhobꞌ Benjamín, kaw abꞌewe tzet chiwalan, ¿tajka chetxumu ta chiyaqꞌ naj iskꞌahol yaꞌ Isaí hetxꞌotxꞌ yebꞌ heyuva, yebꞌ ta chexyako naj yahawilo yinh mil ebꞌnaj soldado yebꞌ yinh hunun majanil cien soldado? 8 Yuxin hesunil kexpakꞌiko winhan, yuto machi hunujex heyal wetan tato ay tzet istꞌinhbꞌakano inkꞌaholan yu yamigo isbꞌa naj yebꞌ iskꞌahol yaꞌ Isaí, kaw machi nino kinheyakojan yinh hekꞌul, machi hunujex tiꞌ heyalilo wetan tato xaꞌok inkꞌaholan aqꞌokꞌule tet naj inchejabꞌ tikꞌahan, naj chinmaqꞌni kamojan, xhi yaꞌ Saúl.

9 Wal naj Doeg, naj edomita aykꞌo naj bꞌey tuꞌ, naj yahawil ebꞌnaj ischejabꞌ yaꞌ Saúl, haꞌ naj xin halni hakaꞌ tiꞌ:

—Hanintiꞌan wilan iskꞌahol yaꞌ Isaí bꞌey Nob, apni naj iskꞌatanh yaꞌ sacerdote Ahimelec, iskꞌahol yaꞌ Ahitob. 10 Yaꞌ Ahimelec tuꞌ isqꞌambꞌe yaꞌ tet Komam Jahawil yibꞌanhilo naj David, yaqꞌni yaꞌ tzet chislo naj, yaqꞌnipaxo yaꞌ yespada naj Goliat, naj filisteo, tet naj, xhi naj.

11 Hayet yabꞌen yaꞌ rey Saúl tuꞌ, yanito yaꞌ yawtemal yaꞌ sacerdote Ahimelec, yaꞌ iskꞌahol yaꞌ Ahitob, yebꞌ sunil mak ayto yu isbꞌa yaꞌ yebꞌi, ebꞌnaj sacerdote ay bꞌey Nob; sunil ebꞌnaj tuꞌ apni iskꞌatanh yaꞌ rey. 12 Yalni yaꞌ rey Saúl tet yaꞌ sacerdote Ahimelec hakaꞌ tiꞌ:

—Hach, iskꞌahol yaꞌ Ahitob, abꞌe tzet chiwalan, xhi yaꞌ.

Istaqꞌwi yaꞌ Ahimelec:

—Ay hinan Mam rey, ayinikojan tasataj lah, xhi yaꞌ.

13 Yalni yaꞌ Saúl tet yaꞌ hakaꞌ tiꞌ:

—¿Tzet yinh xin chawako hahowal winhan, hach yebꞌ iskꞌahol yaꞌ Isaí? Hach tiꞌ hawaqꞌ tzet chislo naj, hawaqꞌnipaxo espada tet naj, haqꞌambꞌen tet Komam Dios yinh naj yu yaniko naj howal winhan yunhe kinismaqꞌnikamojan naj, hakaꞌ chu naj tinanh, xhi yaꞌ Saúl.

14 Istaqꞌwi yaꞌ Ahimelec tet yaꞌ:

—Mam rey, xol ebꞌnaj hachejabꞌ, machi hunu ebꞌnaj tiꞌ kaw yijem hakaꞌ yaꞌ David, yebꞌpaxo xin yichamil hakutzꞌin ye yaꞌ, haꞌ yaꞌ kaw ay yelapno xol ebꞌnaj chimunla tawinta yul hapalacio. 15 Mach bꞌabꞌelixto intzotelan yinh yaꞌ David tet Komam Dios. Mam rey, kaw chiwalan tawet tato mach chatxumiko istxꞌojal winhan yebꞌ yinh mak ayto wuh hinbꞌahan yebꞌi, yuto mach wohtajojan nichꞌano huneꞌ tzet chawal tiꞌ, xhi yaꞌ.

16 Istaqꞌwi yaꞌ rey Saúl tet yaꞌ:

—Hach Ahimelec, kaw yilal hakami yebꞌ sunil mak ayto yu isbꞌa yebꞌ hamam, xhi yaꞌ.

17 Ischejni yaꞌ ebꞌnaj soldado chitanheni, yalni yaꞌ tet ebꞌnaj hakaꞌ tiꞌ:

—Potxꞌwekamo ebꞌnaj issacerdote Komam Dios tiꞌ, yuto yetbꞌi isbꞌa ebꞌnaj yebꞌ naj David, kaw yohta ebꞌnaj tato lanhan yebꞌanikꞌo isbꞌa naj wetan, yaj mach yalilo ebꞌnaj naj wetan, xhi yaꞌ.

Yaj xin mach isje ebꞌnaj soldado tuꞌ ispotxꞌoꞌkamo ebꞌnaj issacerdote Komam Jahawil. 18 Yuxin yal yaꞌ rey Saúl tet naj Doeg, naj edomita hakaꞌ tiꞌ:

—Potxꞌkamo ebꞌnaj hach tiꞌ, xhi yaꞌ.

Yok naj Doeg tuꞌ ispotxꞌnokamo ebꞌnaj sacerdote. Haꞌ yinh huneꞌ tzꞌayik tuꞌ 85 (howebꞌ ishokꞌal) ebꞌnaj ispotxꞌkamo naj; wal xil isqꞌap ebꞌnaj aykoj, qꞌap efod, nabꞌa linonhe. 19 Lahwi tuꞌ istopaxo naj Doeg bꞌey Nob, iskonhobꞌ ebꞌnaj sacerdote, ispotxꞌnipaxokamo naj yu espada, ebꞌnaj winaj yebꞌ ebꞌix ix yebꞌ nixhte unin yebꞌ nixhte neneꞌ ay yul konhobꞌ tuꞌ. Ismaqꞌnikamo naj sunil iswakax yebꞌ isburro yebꞌ ismeꞌ ebꞌnaj sacerdote. 20 Yajaꞌ xin ay huneꞌ iskꞌahol yaꞌ Ahimelec, Abiatar isbꞌi,^a elkanh bꞌay ok kamik tuꞌ, isto yaꞌ bꞌay ay yaꞌ David. 21 Yalni yaꞌ Abiatar tet yaꞌ David tato ischej yaꞌ rey Saúl potxꞌlaxokamo sunil ebꞌnaj sacerdote yet Komam Jahawil. 22 Hayet yabꞌen yaꞌ David huneꞌ tuꞌ, yalni yaꞌ hakaꞌ tiꞌ:

—Yinhtikꞌa huneꞌ tzꞌayik yet inbꞌeykꞌojan iskꞌatanh yaꞌ Ahimelec, aykꞌo naj Doeg, naj edomita, yuxin intxuman tato chiyalilo naj tet yaꞌ rey Saúl ta kinbꞌeyan iskꞌatanh yaꞌ Ahimelec. Wal xin, wuhan yuxin mapotxꞌlaxkamo hamam yebꞌ sunil makta ayto yu isbꞌa yebꞌ hamam. 23 Mach chaxhxiwi, kananhkano inkꞌatanhan, matzet chawuh. Haꞌ mak choche kaxhpotxꞌnoj, chiyoche kinispotxꞌoꞌpaxojan, wal tinanh wal haweh inkꞌatanhan, xhi yaꞌ David tet yaꞌ.