—¿Tzet yinh xin hachukilchꞌan, machi xin hunu mak tzujan tawintaj? xhi yaꞌ.

2 Istaqꞌwi yaꞌ David tet yaꞌ Ahimelec:

—Haꞌ yaꞌ rey kinchejnitijan, ay huneꞌ chejbꞌanil chul wubꞌan, yal yaꞌ wetan hakaꞌ tiꞌ: “Machi mak tet chawalilo huneꞌ chejbꞌanile tiꞌ yebꞌ tzet chiꞌapni hawubꞌ,” xhi yaꞌ wetan. Wal ebꞌnaj wetbꞌihan xawalan bꞌay chinchale hinbꞌahan yebꞌ ebꞌnaj. 3 Kꞌuxanta ay tzet chilolax kꞌuwan hawu, ¿machim howebꞌo pan maka hunuxa tzet ye tuꞌ? xhi yaꞌ David.

4 Istaqꞌwi yaꞌ sacerdote tet yaꞌ:

—Machi ixim komon pan kꞌuwan wuhan, hanhe ixim haltebꞌil tet Komam Dios; chiwaqꞌan ixim tawet, yajaꞌ tanhe saj ye ebꞌnaj hachejabꞌ, tanhe machi ebꞌix ix bꞌay way ebꞌnaj, xhi yaꞌ.

5 Istaqꞌwi yaꞌ David:

—Yinh kaw yeli ebꞌix jetbꞌihanh nahat yehilo ebꞌix jinhanh, yettax kabꞌwi yebꞌ ewi kankano ebꞌix. Waxanhka xin komon huneꞌ bꞌel tiꞌ yajaꞌ yet jelanh sajxa ye isnimanil ebꞌnaj tzeh tiꞌ hakaꞌ yalni ley, haxa tinanh ekꞌbꞌal saj ye ebꞌnaj, xhi yaꞌ David.

6 Hak tuꞌ yu yaqꞌni yaꞌ sacerdote ixim pan haltebꞌilxa tet Komam Dios tet yaꞌ David. Yinhtikꞌa huneꞌ tzꞌayik tuꞌ, ilaxilo ixim sata Komam, yalaxayo ixim kajla pan lanhanto iswatxꞌi selelo ixim sat mexha. Haꞌ ixim pan haltebꞌilxa tet Komam Dios, yaqꞌ yaꞌ sacerdote tet yaꞌ David, yuto machi ixim komon pan kꞌuwan yu yaꞌ. 7 Hayet huneꞌ tzꞌayik tuꞌ aykꞌo huneꞌ ischejabꞌ yaꞌ rey Saúl bꞌey Yatut Komam Dios, tzabꞌlaxayo naj yuto ay huneꞌ ismul naj yakoj. Haꞌ naj tuꞌ, edomita naj, Doeg isbꞌi. Yahaw yeko naj yinh ebꞌnaj chitanhen ismeꞌ yaꞌ Saúl.

8 Lahwi tuꞌ yalni yaꞌ David tet yaꞌ sacerdote Ahimelec:

—¿Machim hunu chꞌen lanza, maka hunu espada ayikꞌo takꞌatanh? Kaw yinh anhexanhe kinischejtijan yaꞌ rey, yuxin matxa wihti wespadahan maka hunuxa inmunlabꞌalan yet howal, xhi yaꞌ.

9 Istaqꞌwi yaꞌ sacerdote:

—Hatiꞌ ayikꞌo yespada naj Goliat, naj filisteo kaxhqꞌoji yinh bꞌey akꞌal Ela, ay chꞌen yinta qꞌap xilqꞌape yet ebꞌnaj sacerdote, pichbꞌiliko huneꞌ qꞌap qꞌap yinh chꞌen, ta chawoche chisje hawinito chꞌen yuto machi hunuxa chꞌen ay bꞌey tiꞌ, xhi yaꞌ.

Istaqꞌwi yaꞌ David:

—Aqꞌ chꞌen wetan, yuto machi hunuxa chꞌen lahan hakaꞌ chꞌen tiꞌ, xhi yaꞌ.

10 Isto yaꞌ David yinh huneꞌ tzꞌayik tuꞌ yuto elkanh yaꞌ tet yaꞌ rey Saúl; yapni yaꞌ iskꞌatanh naj Aquis, isreyal konhobꞌ Gat. 11 Hayet yil-lax yaꞌ David yu ebꞌnaj ischejabꞌ naj Aquis, yalni ebꞌnaj hakaꞌ tiꞌ:

—¿Machmi taj naj tiꞌ, naj David, isreyal txꞌotxꞌ tiꞌ, naj bꞌitnhelax yu ebꞌix ix yet iskanhalwi ebꞌix? Yalni ebꞌix hakaꞌ tiꞌ: “Yaꞌ Saúl huneꞌnhe mil ebꞌnaj ispotxꞌkamo yaꞌ, wal yaꞌ David, 10 (lahonhebꞌ) mil ebꞌnaj ispotxꞌkamo yaꞌ,” xhi ebꞌix, xhi ebꞌnaj.

12 Hayet yabꞌen yaꞌ David yalni ebꞌnaj hakaꞌ tuꞌ, yok yinh iskꞌul yaꞌ; isxiwkanh yaꞌ tet naj Aquis, isreyal konhobꞌ Gat. 13 Yuxin hakaꞌxanhe nan anmahil yuteko isbꞌa yaꞌ David sata ebꞌnaj, yuteko isbꞌa yaꞌ sukal, istzꞌibꞌnheniko yaꞌ nime tzꞌibꞌ yinh ej pulta; kꞌul yubꞌ yaꞌ toxanhe chiꞌay yal istiꞌ yaꞌ yinh xil iskelem. 14 Hayet yilni naj rey Aquis yaꞌ David tuꞌ, yalni naj tet ebꞌnaj ischejabꞌ:

—¿Tom mach cheyila tato suk huneꞌ naj tiꞌ? ¿Tzet yinh xin maxeyiti naj insatajan? 15 ¿Tom machi ebꞌnaj suk bꞌey tiꞌ yuxin makexbꞌey heyiqꞌati naj tiꞌ, kat iswatxꞌen naj issukal yul watuttiꞌan? xhi naj.