—¿Tzet xawutehan? ¿Tzet inmulan? ¿Tom ay hunu istxꞌojal inwatxꞌehan yinh hamam, yuxin chinissayikꞌojan yaꞌ yu kinispotxꞌnikamojan? xhi yaꞌ David.

2 Istaqꞌwi yaꞌ Jonatán:

—Machoj, mach chu kach ispotxꞌnikamo inmamtuꞌan. Txumu tato machi hunu tzet ye tuꞌ tiꞌ chiswatxꞌe yaꞌ tato mach chal yaꞌ wetan, waxanhka tzet ye tuꞌ kaw matzet chal yelapnoj maka tzet ye tuꞌ ay yelapnoj, ¿tom xin mach chalilo yaꞌ wetan tato chiyoche yaꞌ kach ispotxꞌoꞌ hawalni? Machoj, ¡mach chachispotxꞌkamo yaꞌ! xhi yaꞌ.

3 Yalni yaꞌ David yinh kaw isyelal tet yaꞌ Jonatán hakaꞌ tiꞌ:

—Yaꞌ hamam tuꞌ kaw yohta yaꞌ ta kaw xahan ayinan hawu, yuxin yal yaꞌ hakaꞌ tiꞌ: “Machojabꞌ chꞌabꞌelax huneꞌ tiꞌ yu naj Jonatán, xin wal mach chiꞌok bꞌiskꞌulal yinh yanma naj,” xhi yaꞌ. Yajaꞌ xin chiwaqꞌ bꞌinahojan isbꞌi Komam Dios, chiwalnihan tawet tato kaw kawilxa wekojan yul isqꞌabꞌ naj kamikal, xhi yaꞌ David.

4 Yalni yaꞌ Jonatán tet yaꞌ David:

—Chinwatxꞌehan bꞌaytet choche hawanma, xhi yaꞌ.

5 Istaqꞌwi yaꞌ David tet yaꞌ Jonatán:

—Hayet hekal chiꞌichiko qꞌinh yinh unin ixahaw, hunta el chiꞌekꞌtzelax qꞌinh tuꞌ chinok tzꞌonhnojan waꞌo iskꞌatanh yaꞌ hamam, yajaꞌ yet hekal tuꞌ ta chisje hakꞌul chiwebꞌato hinbꞌahan xol telaj masanto yet qꞌejbꞌiyal yinh yox tzꞌayik qꞌinh. 6 Ta xin chinisqꞌambꞌehan hamam tuꞌ kat hawalni tet yaꞌ hakaꞌ tiꞌ: “Isqꞌan naj David wetan ta chito naj yinh anhe bꞌey iskonhobꞌ Belén, yuto haꞌ ismam yebꞌ yuxhtaj chaqꞌ isxahanbꞌal tet Komam bꞌey tuꞌ hunun habꞌil,” hak tuꞌ chawute hawalni tet hamam. 7 Ta xin chiyal yaꞌ hamam tuꞌ: “Kꞌultikꞌa,” ta xhi yaꞌ, kaw matzet chal inkꞌulan chal tuꞌ; yaj tato chitit ishowal yaꞌ yet chawalni, hak tuꞌ chu hatxumniloj tato chiyoche yaꞌ kinispotxꞌoꞌkamojan. 8 Yuxin tzꞌayojabꞌ hakꞌul winhan, hanin hachejabꞌ intiꞌan, wal xin jamigo kobꞌa sata Komam Jahawil; yajaꞌ ta ay inmulan yul hasat, kꞌulmi kinhapotxꞌnikamojan, matxa yilalo chinhawitojan iskꞌatanh hamam, xhi yaꞌ David.

9 Istaqꞌwi yaꞌ Jonatán:

—Mach chatxum hakaꞌ tuꞌ, wal xin tato chiwabꞌehan ta chiyoche inmamtuꞌan chachispotxꞌoꞌ, chiwalaꞌan tawet, xhi yaꞌ Jonatán.

10 Yalni yaꞌ David tet yaꞌ Jonatán:

—¿Mak chihalni wetan tato txꞌoj chu istaqꞌwo hamam tawet wibꞌanhilojan? xhi yaꞌ.

11 Yalni yaꞌ Jonatán tet yaꞌ David tuꞌ:

—Elojonhto yintalto konhobꞌ tiꞌ, xhi yaꞌ. Yelto ebꞌyaꞌ iskawanhil. 12 Yalni yaꞌ Jonatán tet yaꞌ David:

—Komam Jahawil, koDiosal hanhonh Israelonh tiꞌ chaqꞌ isbꞌa yinh tzet chiwalan tawet, wal xin hayet hekal maka kabꞌe yinhtikꞌa huneꞌ hora tiꞌ chinqꞌambꞌelojan tet inmaman tzet isnahni yaꞌ tawinh. Tato kꞌul chisnah yaꞌ tawinh, chiwaltojan tawet; 13 yajaꞌ ta txꞌoj chisnah inmaman tawinh, haꞌojabꞌ Komam Jahawil chiꞌanayo isyaꞌtajil wibꞌanhan tato mach chiwalilojan tawet, yebꞌ ta mach chinkolwahan tawinh hakolni habꞌa. Haꞌojabꞌ Komam Jahawil chikolwa tawinh hakaꞌ yu iskolwa yinh inmaman yet yalanhtokanoj. 14 Wal xin ta itzitz intohan yet bꞌaqꞌinh, kꞌulojabꞌ chawute hakꞌul winhan hakaꞌ iskꞌulchꞌanil iskꞌul Komam Jahawil tawinh, hak tuꞌ xin mach chinhapotxꞌkamojan. 15 Taka xakinkaman xin chiwalkanojan tawet tato chanati wuninalan yinh sunilbꞌal tiempo. Hayet chitanhilo ebꞌnaj ayko ishowal tawinh yinh hununtajil yu Komam Jahawil, machojabꞌ chakꞌaytzelo hawaqꞌni bꞌinaho inbꞌihan yul hawatut, xhi yaꞌ Jonatán.

16 Hak tuꞌ yu istꞌinhbꞌankano istzotiꞌ yaꞌ Jonatán yebꞌ yaꞌ David, yalni yaꞌ Jonatán hakaꞌ tiꞌ: «Haꞌojabꞌ Komam Jahawil chiꞌilni tzet chiꞌeliko ebꞌnaj ayko ishowal tawinh, kat kach iskolnilo yul isqꞌabꞌ ebꞌnaj,» xhi yaꞌ Jonatán. 17 Yuto kaw xahan ay yaꞌ David yu yaꞌ Jonatán, yuxin iskayeꞌnhe yaꞌ istꞌinhbꞌankano istzotiꞌ yebꞌ yaꞌ David. 18 Yalnipaxo yaꞌ Jonatán tuꞌ:

—Yet hekal chiꞌichiko qꞌinh yuto tzꞌul ixahaw, hayet chiꞌil-laxi tato machijach yul hatzꞌonhobꞌal, tzimi chal-lax tawinh: 19 Yuxin qꞌakꞌul tato chachok waꞌo oxebꞌo tzꞌayik qꞌinh tuꞌ iskꞌatanh inmaman. Lahwi tuꞌ kat hato hawebꞌano habꞌa bꞌaytikꞌa hawebꞌa habꞌa yet bꞌabꞌelal, kat hawechman bꞌey chꞌen chꞌen Ezel; 20 kat inqꞌojnitojan oxebꞌ litꞌ bꞌey tuꞌ, hakaꞌto ay tzet bꞌay lanhan wilwentojan. 21 Lahwi tuꞌ kat inchejnitojan inchejabꞌan issayaꞌ bꞌay chꞌaykꞌay teꞌ litꞌ tuꞌ, ta xin chiwalan tet naj hakaꞌ tiꞌ: “Hasatakꞌti ayayo teꞌ, iti teꞌ,” ta kinchihan, chisje hawelti bꞌay ewan haweh tuꞌ yinh tzalahilal, yuto matzet chachyute inmaman. Tato hak tuꞌ chijal kꞌul-la tzotiꞌ yinh Komam Jahawil. 22 Yajaꞌ ta chiwalan tet naj hakaꞌ tiꞌ: “Haꞌ teꞌ litꞌ tuꞌ nahatta maꞌaykꞌay teꞌ tasatakꞌtoj,” ta kinchihan, chachelkanh, yuto haꞌ Komam Jahawil chachchejnitoj, yunhe hakolni habꞌa. 23 Wal tzet tꞌinhbꞌabꞌilkano ju kokawanhil, haꞌ Komam Jahawil chaqꞌ isbꞌa yinh tzet halbꞌil ju yinh sunilbꞌal tiempo, xhi yaꞌ Jonatán tet yaꞌ David.

24 Lahwi tuꞌ yebꞌanto isbꞌa yaꞌ David xol telaj; haxa yet yapni istzꞌayikal bꞌay chiꞌichiko qꞌinh yet tzꞌul ixahaw yok tzꞌonhno yaꞌ rey Saúl yinh mexha waꞌoj. 25 Ay tzꞌonhno yaꞌ yinh bꞌitzꞌabꞌ bꞌaytikꞌa chitzꞌonhi yaꞌ hunta el, yaypaxo tzꞌonhno yaꞌ Jonatán. Haxa iskawilal yaꞌ rey Saúl ay tzꞌonhno naj Abner, iskankano istzꞌonhobꞌal yaꞌ David, machi mak ok yul. 26 Yajaꞌ yinh bꞌabꞌel tzꞌayik tuꞌ matzet yal yaꞌ rey Saúl yuto istxum yaꞌ yinh isnabꞌal hakaꞌ tiꞌ: «Aymi hunu tzet txahul iswatxꞌe naj David tiꞌ, yuxin machi mahul naj. Machim masajnhe isbꞌa naj hakaꞌ yalni ley,» xhi yaꞌ yul isnabꞌal. 27 Haxa yinh iskabꞌ tzꞌayik qꞌinh yet tzꞌul ixahaw, machipaxo yaꞌ David yul istzꞌonhobꞌal, yuxin isqꞌambꞌe yaꞌ Saúl tet yaꞌ Jonatán, iskꞌahol:

—¿Tzet yinh xin mach hul iskꞌahol yaꞌ Isaí waꞌo yet ewi, machi mahulpaxo naj tinanh? xhi yaꞌ. 28 Istaqꞌwi yaꞌ Jonatán tet yaꞌ Saúl:

—Naj David tuꞌ, isqꞌan naj wetan tato chinchatojan naj bꞌey iskonhobꞌ Belén, 29 yuto tolabꞌ sunil mak ay yu naj chiskutxbꞌako isbꞌa yinh qꞌinh yu yaqꞌni isxahanbꞌal tet Komam Jahawil bꞌey iskonhobꞌ, yuxin awtelax naj yu yuxhtaj, yalnipaxo naj wetan tato chitzꞌay inkꞌulan yinh naj chinchanitojan naj, yunhe yilnipaxo naj hanikꞌ ye yuxhtaj; yuxin mach ayokꞌo naj waꞌo kokꞌatanh, xhi yaꞌ Jonatán.

30 Hayet yabꞌen yaꞌ rey Saúl hakaꞌ tuꞌ, istit lemna ishowal yaꞌ yinh yaꞌ Jonatán, yalni yaꞌ tet yaꞌ:

—Hach tiꞌ, yunin ix ix txꞌoj ye iswiꞌ, mach yijemoj. ¿Tom mach wohtajojan hawalni, tato kaw hawamigo habꞌa yebꞌ naj iskꞌahol yaꞌ Isaí tuꞌ? Hak tuꞌ chu hawiniti txꞌixobꞌal tawibꞌanh, yebꞌpaxo txꞌixobꞌal yibꞌanh hamiꞌ. 31 Yulbꞌal istiempohal itzitz iskꞌahol yaꞌ Isaí sat txꞌo txꞌotxꞌ tiꞌ mach tꞌinhano hawekoj, yebꞌ mach chaxhok reyal, yuxin chejto issayomal naj tinanh kat yilaxti naj bꞌey tiꞌ, yuto yilal iskam naj, xhi yaꞌ Saúl.

32 Istaqꞌwi yaꞌ Jonatán, yalni yaꞌ tet ismam:

—¿Tzet yinh xin chikam naj hawalni? ¿tzet ismul naj? xhi yaꞌ.

33 Istit ishowal yaꞌ Saúl tuꞌ, yinikanh yaꞌ chꞌen lanza, isqꞌojnito yaꞌ yinh yaꞌ Jonatán yunhe islahwi yaꞌ. Hak tuꞌ yu istxumnilo yaꞌ Jonatán tato hinan ismam yaꞌ tuꞌ ispotxꞌnikamo yaꞌ David. 34 Istit ishowal yaꞌ Jonatán, yah lemna yaꞌ bꞌay tzꞌonhan yinh mexha tuꞌ, matxa xin waꞌ yaꞌ yinh iskabꞌ tzꞌayik qꞌinh yet unin ixahaw tuꞌ, yuto yiqꞌ bꞌiskꞌulal yaꞌ yinh yaꞌ David yu tit ishowal ismam yaꞌ yinh. 35 Haxa yet hunxa tzꞌayik yinh sahabꞌ sakꞌayal, yelto yaꞌ Jonatán yintalto konhobꞌ hakaꞌtikꞌa yu yalni yaꞌ tet yaꞌ David yet yalanhtokanoj, ok tzujan huneꞌ naj nichꞌan tzeh yinta yaꞌ. 36 Yalni yaꞌ Jonatán tet naj tzeh tuꞌ:

«Chinqꞌojtojan teꞌ litꞌ kat hato hasaynokanh teꞌ yinh anhe,» xhi yaꞌ.

Hayet lanhan isto naj tzeh tuꞌ yinh anhe, isqꞌojnito yaꞌ Jonatán teꞌ litꞌ yinh kaw ip, yunhe ispalkꞌon teꞌ satato naj nichꞌan tzeh tuꞌ. 37 Haxa yet yapni naj bꞌay aykꞌay teꞌ litꞌ tuꞌ, yalni yaꞌ Jonatán yinh kaw ip tet naj:

—Hitzanhtoj, hasatato tuꞌ maꞌapni teꞌ, xhi yaꞌ.

38 Yalnipaxo yaꞌ Jonatán tet naj yinh kaw ip hunelxa hakaꞌ tiꞌ:

—Asiꞌ yinh anhe, mach chaxhok linhnoj, xhi yaꞌ.

Issikꞌnikanh naj teꞌ litꞌ tuꞌ, yiniti naj teꞌ tet yaꞌ Jonatán. 39 Yajaꞌ mach yohtajo naj tzeh tuꞌ tzet yehi, kachannhe yaꞌ Jonatán yebꞌ yaꞌ David. 40 Lahwi tuꞌ yaniko yaꞌ Jonatán ischꞌen yet howal tet naj nichꞌan tzeh tuꞌ, yalni naj xin: «Asiꞌ, ito hunteqꞌan tiꞌ yul konhobꞌ,» xhi yaꞌ.

41 Hayet isto naj tzeh tuꞌ, yelti yaꞌ David bꞌay ebꞌabꞌil isbꞌa yinh yetkꞌulal sur, yay jahno yaꞌ oxel sat txꞌotxꞌ sata yaꞌ Jonatán, istzꞌolen isqꞌotx ebꞌnaj hunun, yok ebꞌnaj oqꞌo iskawanhil, yajaꞌ wal yaꞌ David kaw ekꞌbꞌalto oqꞌkano yaꞌ. 42 Yalni yaꞌ Jonatán tet yaꞌ David:

«Asiꞌ, matzet chal hakꞌul, yuto halbꞌilxa ju sata Komam Dios hakaꞌ tiꞌ: Haꞌ Komam Dios chiꞌok hawetbꞌihoj yebꞌ wetbꞌihojan yebꞌ yetbꞌiho hawuninal bꞌaqꞌinh yebꞌpaxo yetbꞌiho wuninalan, konhchi,» xhi yaꞌ Jonatán tet yaꞌ David.

Lahwi tuꞌ yok yaꞌ David yinh isbꞌel ispaxtoj, wal yaꞌ Jonatán meltzo yaꞌ yul iskonhobꞌ.