—Choche inmaman kach ispotxꞌoꞌkamoj, yuxin chawil habꞌa, hayet sahabꞌ hekal chawebꞌato habꞌa bꞌay ewan, 3 yuto hayet hekal chineltojan yintalto konhobꞌ yebꞌ inmaman, bꞌay kawil ayach, kat wokan tzotelo tawinh tet inmamtuꞌan yu kach inkolnihan, kat xin walnihan tawet tzet chiyute yalni inmaman, xhi yaꞌ Jonatán tet yaꞌ David.

4 Wal yaꞌ Jonatán kaw kꞌul yu istzotel yaꞌ yibꞌanhilo yaꞌ David tet yaꞌ Saúl, yalni yaꞌ hakaꞌ tiꞌ:

—Mam, machojabꞌ chawako hamul chawatxꞌen hunu istxꞌojal yinh hachejabꞌ David, yuto machi hunu istxꞌojal tiꞌ xaꞌiswatxꞌe naj tawinh, wal xin kaw kꞌul sunil tzet xaꞌiswatxꞌe naj. 5 Kaw ishin isbꞌa naj iskami, yaqꞌni naj howal yebꞌ naj Goliat, ispotxꞌnikamo naj naj Goliat, hak tuꞌ yu iskolnilo Komam Jahawil konhobꞌ Israel. Hach kawach hawil huneꞌ tuꞌ, hatzalahi. ¿Tzet yinh xin chawako hamul chawochen hapotxꞌnikamo naj David, machi xin ismul naj? xhi yaꞌ Jonatán.

6 Hayet yabꞌen yaꞌ rey Saúl yinh sunil tzet yal yaꞌ Jonatán, yalni yaꞌ:

—Chiwalan yabꞌeꞌ Komam Jahawil tato mach chinpotxꞌan naj David, xhi yaꞌ.

7 Lahwi tuꞌ yawten yaꞌ Jonatán yaꞌ David, yalni yaꞌ sunil tuꞌ tet yaꞌ. Haꞌ kaw yaꞌ Jonatán tuꞌ inito yaꞌ David sata yaꞌ Saúl munlaho yul yatut yaꞌ rey hakaꞌtikꞌa yet yalanhtokanoj.

8 Lahwi tuꞌ yanipaxiko ebꞌnaj filisteo howal yinh ebꞌnaj Israel, yelto yaꞌ David yebꞌ ebꞌnaj soldado yaqꞌaꞌ howal yinh ebꞌnaj. Isqꞌoji yaꞌ David yinh ebꞌnaj, kaw xin tzetkꞌa ebꞌnaj kam yu yaꞌ, haxa hunteqꞌanxa ebꞌnaj xin elkanh ebꞌnaj tet yaꞌ David. 9 Yokpaxo huneꞌ espíritu matzwalil yinh yaꞌ Saúl yu Komam Jahawil, ayko xin islanza yaꞌ yul isqꞌabꞌ yet tzꞌonhan yaꞌ yul palacio. Lanhan xin yaniko yaꞌ David teꞌ arpa yinh sat yaꞌ. 10 Iswatxꞌe isbꞌa yaꞌ Saúl isqꞌojnito chꞌen lanza yunhe yekꞌto chꞌen yul iskꞌul yaꞌ David kat iskawxiko yaꞌ sat bꞌitzꞌabꞌ, yajaꞌ ismetzꞌnhelto yaꞌ David tuꞌ, iskankano txꞌapno chꞌen lanza yul iskꞌul bꞌitzꞌabꞌ. Yinhtikꞌa huneꞌ aqꞌbꞌal tuꞌ el yaꞌ David iskꞌatanh yaꞌ rey Saúl. 11 Yalni yaꞌ Saúl tet hunteqꞌan ebꞌnaj soldado tato chito ebꞌnaj istanheꞌ yatut yaꞌ David yunhe ispotxꞌnikamo ebꞌnaj yaꞌ yet sahabꞌ yinh hunxa tzꞌayik. Wal ix Mical, yixal yaꞌ David, yal ix tet yaꞌ hakaꞌ tiꞌ:

«Tato mach chakol habꞌa yinh huneꞌ aqꞌbꞌal tiꞌ, yet hekal kamom hachxa,» xhi ix.

12 Lahwi tuꞌ yanilti ix Mical huneꞌ txꞌanh lasu yul isventanahil yatut, yayti yaꞌ David yinh txꞌanh, hak tuꞌ yu yelkanh yaꞌ, iskolni isbꞌa. 13 Yiniti ix Mical huneꞌ tioxh ishilbꞌanayo ix sat txꞌat, yaniko ix xil noꞌ chiw isqꞌanho iswiꞌ, yanikanh ix istxow. 14 Haxa yet yapni ebꞌnaj issoldado yaꞌ rey Saúl tzabꞌwal yinh yaꞌ David, yalni ix Mical tato yaꞌay yaꞌ David. 15 Lahwi tuꞌ ischejnipaxto yaꞌ rey Saúl ebꞌnaj issoldado yiqꞌati yaꞌ David, yalni yaꞌ tet ebꞌnaj:

«Iweti naj yibꞌanh istxꞌat tuꞌ, kat inpotxꞌnikamojan naj,» xhi yaꞌ.

16 Hayet yokto ebꞌnaj soldado istzabꞌnoyo yaꞌ David yul yatut, yilni ebꞌnaj huneꞌ tioxh hilanayo sat txꞌat, ayko xil noꞌ chiw isqꞌanho iswiꞌ, isto ebꞌnaj yalno huneꞌ tuꞌ tet yaꞌ rey Saúl. 17 Yalni yaꞌ Saúl tet ix Mical:

—¿Tzet yinh xin makinhawetahan, yuto tonhe maxawil yelkanh naj bꞌay ayko inhowalan? xhi yaꞌ.

Istaqꞌwi ix tet ismam:

—Wal xin mayal naj wetan: “Elojinkanhan, wal xin ta mach chinachatojan, chaxhinpotxꞌkamojan,” xhi naj wetan, xhi ix tet ismam.

18 Yelkanh yaꞌ David, iskolchalo yaꞌ xin. Isto yaꞌ iskꞌatanh yaꞌ Samuel bꞌey Ramá. Yalni yaꞌ tet yaꞌ yinh sunil tzet utelax yaꞌ yu yaꞌ Saúl. Lahwi tuꞌ isto yaꞌ David yebꞌ yaꞌ Samuel ehoyo bꞌey konhobꞌ Naiot. 19 Yapni yalomal tet yaꞌ Saúl, yalni hakaꞌ tiꞌ: «Yaꞌ David, ayxa yaꞌ yul konhobꞌ Naiot yul ismajul Ramá,» xhi. 20 Ischejnito yaꞌ Saúl ebꞌnaj ischejabꞌ tzabꞌwal yinh yaꞌ David, yajaꞌ hayet yapni ebꞌnaj bꞌey tuꞌ, yilni ebꞌnaj hunbꞌulan ebꞌnaj ischejabꞌ Komam Dios lanhan yalni kꞌul-la tzotiꞌ yinh Komam. Ayko xin yaꞌ Samuel ijbꞌalo xol ebꞌnaj. Yet ayko ischejabꞌ yaꞌ Saúl iskꞌatanh ebꞌnaj tuꞌ yay Yespíritu Komam yibꞌanh ebꞌnaj, yokpaxo ebꞌnaj yalno kꞌul-la tzotiꞌ yinh Komam.

21 Hayet yabꞌen yaꞌ rey Saúl huneꞌ tuꞌ, ischejnipaxto yaꞌ haywanhxa ischejabꞌ. Hayet yapnipaxo ebꞌnaj, yok ebꞌnaj yalnopaxo kꞌul-la tzotiꞌ yinh Komam. Tzujan tuꞌ xin, yanipaxto yaꞌ rey Saúl haywanhxa ischejabꞌ yinhxa yoxel, yajaꞌ hayet yapni ebꞌnaj bꞌey tuꞌ, yokpaxo ebꞌnaj yalno kꞌul-la tzotiꞌ yinh Komam. 22 Lahwi tuꞌ, haxa kaw yaꞌ rey Saúl tuꞌ to bꞌey Ramá, hayet yapni yaꞌ bꞌay ay huneꞌ niman kꞌuh bꞌey Secú, isqꞌambꞌen yaꞌ hakaꞌ tiꞌ:

—¿Bꞌaytuꞌwal ay yaꞌ Samuel yebꞌ naj David? xhi yaꞌ. Istaqꞌwi ebꞌnaj:

—Haꞌ bꞌey Naiot yul ismajul Ramá ay yaꞌ, xhi ebꞌnaj tuꞌ.

23 Isto yaꞌ bꞌey Naiot yul ismajul Ramá. Hayet ayko yaꞌ yinh isbꞌel, yay Yespíritu Komam Dios yibꞌanh yaꞌ, yichiko yaꞌ yalni kꞌul-la tzotiꞌ yinh Komam, masanta bꞌey Naiot, yul ismajul Ramá.^a 24 Yinilo yaꞌ xil isqꞌap, yalni yaꞌ tzotiꞌ chitit tet Komam yinh sat yaꞌ Samuel, iskan tꞌilno yaꞌ huneꞌ tzꞌayik yebꞌ huneꞌ aqꞌbꞌal. Yuxin chal-lax hakaꞌ tiꞌ: «Haꞌ hunpaxo yaꞌ Saúl xol ebꞌyaꞌ ischejabꞌ Komam Dios,» xhi.