Istꞌinhbꞌakano istzotiꞌ yaꞌ Jonatán yebꞌ yaꞌ David
18
Hayet lahwi istzotel yaꞌ David tet yaꞌ rey Saúl, yok yaꞌ Jonatán yamigoho yaꞌ David, kaw xin xahan chil yaꞌ Jonatán yaꞌ David tuꞌ, hakaꞌ isyaꞌilnhen isbꞌa yaꞌ. 2 Hakpax tuꞌ yaꞌ rey Saúl, matxa ischahto yaꞌ yaꞌ David yatut, wal xin yinhtikꞌa huneꞌ tzꞌayik tuꞌ kankano yaꞌ David munlaho iskꞌatanh yaꞌ rey. 3 Istꞌinhbꞌakano istzotiꞌ yaꞌ Jonatán yebꞌ yaꞌ David yok ebꞌyaꞌ amigohal iskawanhil, yuto kaw xahan ay yaꞌ David yu yaꞌ Jonatán hakaꞌ isyaꞌilnhen isbꞌa yaꞌ. 4 Yinilo yaꞌ Jonatán huneꞌ xil isqꞌap hukan yehi, yaqꞌni yaꞌ tet yaꞌ David tuꞌ, issahni yaꞌ hunteqꞌanxa xil isqꞌap tet yaꞌ. Yaqꞌnipaxo yaꞌ Jonatán tuꞌ yespada yebꞌ islitꞌ yebꞌ istxꞌambꞌal ayko yinh yikta tet yaꞌ David. 5 Bꞌajxanhetuꞌwal xin chischejto yaꞌ Saúl yaꞌ David chisyije yaꞌ, kaw xin kꞌul chiꞌelikoj yuto kaw helan yaꞌ David. Yaniko yaꞌ rey Saúl yaꞌ yahawilo yinh ebꞌnaj soldado yet howal, kaw xin chitzala sunil konhobꞌ Israel, yebꞌ ebꞌnaj yahawil yeko yinh ebꞌnaj soldado yinh yaꞌ David.
Yaꞌ rey Saúl yako ishowal yaꞌ yinh yaꞌ David
6 Hayet ismeltzo ebꞌnaj soldado yinh howal yet ispotxꞌnikamo yaꞌ David naj Goliat iskutxbꞌaniko isbꞌa ebꞌix ix tit yul sunil ismajul Israel, yelto ebꞌix ischahno yaꞌ rey Saúl; iskanhalwi ebꞌix, isbꞌitni ebꞌix yu tzalahilal, yaniko ebꞌix teꞌ pandereta yebꞌ hunteqꞌanxa munlabꞌal chꞌanilo isnuqꞌal bꞌit. 7 Hayet iskanhalwi ebꞌix tuꞌ, isbꞌitnhe ebꞌix hakaꞌ tiꞌ:
«Huneꞌ mil ispotxꞌ yaꞌ rey Saúl;
wal yaꞌ David, 10 (lahonhebꞌ) mil ispotxꞌkamo yaꞌ,» xhi ebꞌix.
8 Hayet yabꞌen yaꞌ rey Saúl huneꞌ tuꞌ mach ischah iswiꞌ yaꞌ, wal xin kaw titkano ishowal yaꞌ sikꞌlebꞌil, yalni yaꞌ hakaꞌ tiꞌ:
«Haxanhe yalaxiko naj David tiꞌ reyal inselelojan, yuto chal-laxi tato 10 (lahonhebꞌ) mil ebꞌnaj ispotxꞌkamo naj, wal hinan xin huneꞌnhechꞌan mil,» xhi yaꞌ.
9 Haꞌtikꞌa yinh huneꞌ tzꞌayik tuꞌ xin titkano ishowal yaꞌ rey Saúl yinh yaꞌ David, matxa kꞌulo ismujliko yaꞌ yinh yaꞌ David.
10 Haxa yet hunxa tzꞌayik yaniko Komam Dios huneꞌ espíritu matzwalil yinh yaꞌ Saúl,a toxanhe chul ekꞌ istzotel yaꞌ yu etaxnato yul iswiꞌ yaꞌ, yet ayikꞌto yaꞌ yul ispalacio; chixin yako yaꞌ David teꞌ arpa yabꞌeꞌ yaꞌ Saúl tuꞌ hakaꞌtikꞌa yu yaꞌ yinh hunteqꞌan tzꞌayik yet yalanhtokanoj. Iqꞌbꞌil xin islanza yaꞌ Saúl yu, 11 isqꞌojnito yaꞌ islanza tuꞌ yinh yaꞌ David. Istxumni yaꞌ Saúl yul isnabꞌal hakaꞌ tiꞌ: «Chiwilwetojan chꞌen yinh naj yunhe yekꞌto chꞌen yul iskꞌul naj kat iskawxiko naj sat bꞌitzꞌabꞌ,» xhi yaꞌ. Yajaꞌ xin kayel ismetzꞌilto isbꞌa yaꞌ David tet chꞌen lanza.
12 Wal yaꞌ Saúl chixiw yaꞌ tet yaꞌ David, yuto ayko Komam Jahawil yetbꞌiho yaꞌ, wal yaꞌ Saúl tuꞌ matxa ayoko Komam yetbꞌiho yaꞌ. 13 Yuxin yilo yaꞌ Saúl yaꞌ David tuꞌ yinh sat, yaniko yaꞌ yaꞌ yahawilo yinh huneꞌ mil ebꞌnaj soldado; haꞌ xin yaꞌ David ijbꞌanikꞌo ebꞌnaj yinh howal. 14 Kaw xin helan yaꞌ David yinh sunil tzet chiswatxꞌe, yuto ayko Komam Jahawil yetbꞌiho yaꞌ. 15 Hayet yilni yaꞌ Saúl tato kaw kꞌul yute isbꞌa yaꞌ David yinh sunil tzet chiswatxꞌe, isxiw yaꞌ Saúl tuꞌ tet yaꞌ. 16 Wal sunil anma Israel yebꞌ anma ah Judá kaw chitzala yinh yaꞌ David tuꞌ, yuto haꞌ yaꞌ ijbꞌalom xol ebꞌnaj yinh howal.
17 Hayet hunel yal yaꞌ Saúl tet yaꞌ David:
—Chiwaqꞌan inbꞌabꞌel kutzꞌinan hawixaloj, haꞌ ton ix Merab, yajaꞌ tato kaw helan chawute habꞌa yinh howal, yebꞌ ta mach chachxiw hawiqꞌwa yinh howal yinh ebꞌnaj ayko ishowal yinh iskonhobꞌ Komam Jahawil tiꞌ, xhi yaꞌ.
Yajaꞌ yal yaꞌ Saúl yinh isnabꞌal hakaꞌ tiꞌ: «Tanhe maxhtaj hinan chinpotxꞌkamojan naj yu inqꞌabꞌan, yuxin haꞌojabꞌ ebꞌnaj filisteo chilow isqꞌabꞌ yinh naj,» xhi yaꞌ.
18 Istaqꞌwi yaꞌ David tet yaꞌ Saúl tuꞌ:
—Mam rey ¿Tzet wehan? ¿tzet welapnojan? Yuto inmaman yebꞌ mak ay wuhan machi yelapno xol ebꞌnaj Israel, ¿yuxin tzet yinh chinhawakojan yichamilo hakutzꞌin? xhi yaꞌ David.
19 Yajaꞌ hayet yapni istzꞌayikal yok ix Merab, iskutzꞌin yaꞌ Saúl, yixalo yaꞌ David, haxa tet naj Adriel, naj ah Mehola alaxiko ix.
20 Yajaꞌ ay huneꞌxa iskutzꞌin yaꞌ Saúl chiyij Mical, kaw xin chiyoche ix yaꞌ David, yuxin hayet yabꞌen yaꞌ Saúl huneꞌ tuꞌ, kaw kꞌul eliko huneꞌ tuꞌ yul sat yaꞌ. 21 Yok yinh isnabꞌal yaꞌ Saúl hakaꞌ tiꞌ: «Chiwakojan ix yixalo naj yunhe yaykꞌay naj yul isqꞌabꞌ ebꞌnaj filisteo,» xhi yaꞌ yinh isnabꞌal. Yalni yaꞌ Saúl tet yaꞌ David tuꞌ yinh iskayel:
—Wal tinanh, chachok yichamilo inkutzꞌinan, xhi yaꞌ.
22 Ischejto yaꞌ Saúl ischejabꞌ hakaꞌ tiꞌ:
—Halwe tet naj David yinh ewantajil tato hanin rey intiꞌan kaw xahan ay naj wuhan, yebꞌ xahanpaxo ay naj yu ebꞌnaj inchejabꞌan. Halwepaxo tet naj ta chiwochehan ta chiꞌok naj yichamilo inkutzꞌinan, xhi yaꞌ Saúl tet ebꞌnaj ischejabꞌ.
23 Isto ischejabꞌ yaꞌ Saúl tuꞌ iskayeꞌnhe hunteqꞌan tzotiꞌ tiꞌ yabꞌeꞌ yaꞌ David. Ispajtzenpaxo yaꞌ:
—Ham heyalni tato subꞌuta jok yichamilo iskutzꞌin yaꞌ rey. Hanintiꞌan mebꞌaꞌ hinan, yebꞌ xin machi welapnojan, xhi yaꞌ David tuꞌ.
24 Isto ebꞌnaj chejabꞌ tuꞌ yaqꞌno ispaj istzotiꞌ yaꞌ David tuꞌ tet yaꞌ Saúl. 25 Yalni yaꞌ Saúl tet ebꞌnaj:
—Halwe tet naj David hakaꞌ tiꞌ: “Hanhe huneꞌ tiꞌ istohol inkutzꞌinan chinqꞌanan tet naj 100 (hokꞌal) iswiꞌ iswinajil ebꞌnaj filisteo, yu inpajtzenan selel tet ebꞌnaj filisteo ayko ishowal winhan,” kexchi, xhi yaꞌ Saúl.
Yal yaꞌ hakaꞌ tuꞌ yunhe yaykꞌay yaꞌ David yul isqꞌabꞌ ebꞌnaj filisteo. 26 Hayet yalni ebꞌnaj chejabꞌ huneꞌ tuꞌ tet yaꞌ David, istxumni isbꞌa iskꞌul yaꞌ tato kꞌul huneꞌ tzet chal-lax tet yaꞌ tuꞌ, yu chiꞌok yaꞌ yichamilo iskutzꞌin yaꞌ rey. Yaj yet yalanh maxhto chiyij isbꞌa istzꞌayikal yinh tzet isqꞌan yaꞌ rey tet yaꞌ, 27 isto yaꞌ David yebꞌ issoldado yanoko howal yinh ebꞌnaj filisteo, ispotxꞌnikamo yaꞌ 200 ebꞌnaj filisteo, ishosnilto yaꞌ iswiꞌ iswinajil ebꞌnaj, yinito yaꞌ tet yaꞌ Saúl, yu yok yaꞌ yichamilo iskutzꞌin yaꞌ rey tuꞌ. Hak tuꞌ yu yaniko yaꞌ Saúl ix Mical, yixalo yaꞌ David.
28 Yajaꞌ hayet yilni yaꞌ Saúl, istxumchalo yu yaꞌ tato Komam Jahawil ayko yetbꞌiho yaꞌ David, yebꞌ ta kaw chiꞌochelax yaꞌ David yu ix Mical, iskutzꞌin yaꞌ rey. 29 Yuxin kaw ahkanh xiwkilal yinh yaꞌ rey Saúl tet yaꞌ David. Hak tuꞌ yu yokkano ishowal yaꞌ Saúl yinh yaꞌ David yinh sunilbꞌal ej tzꞌayik. 30 Wal ebꞌnaj yahaw ebꞌnaj filisteo chilannhetikꞌa yaniko ebꞌnaj howal yinh ebꞌnaj Israel. Hunta el xin chiyaqꞌ ebꞌnaj howal tuꞌ, haꞌ yaꞌ David ekꞌbꞌal chiqꞌoji yinh ebꞌnaj sata hunteqꞌanxa ebꞌnaj yahawil issoldado yaꞌ rey Saúl, yuxin kaw ahkanokanh isbꞌina yaꞌ David xol anma Israel.