16
Istzotel Komam Dios Jahawil, tet yaꞌ Jehú, iskꞌahol naj Hanani, yu yalni yaꞌ tet yaꞌ Baasa, hakaꞌ tiꞌ: 2 «Haninan kach wikanhan xol pojoj, kach wanikojan isreyalo Israel inkonhobꞌan, yajaꞌ lahan habꞌeybꞌal yebꞌ yaꞌ Jeroboam, hawijbꞌan Israel inkonhobꞌan yanoko ismul. Hawaqꞌnitij inhowalan yu hamul. 3 Hach Baasa, chachintanhtzelojan yebꞌ sunil mak ay yul hawatut, hakaꞌ yekꞌ tzꞌisbꞌal chꞌinikanh qꞌalem, chintanhtzepaxilojan hawuninal chipoh bꞌaqꞌinh, chachintanhtzelojan hakaꞌ wutehan yikꞌal yaꞌ Jeroboam, iskꞌahol naj Nabat. 4 Haꞌ ebꞌnaj hakꞌahol chikam yul konhobꞌ, haꞌ metx txꞌiꞌ chikꞌuxnito isnimanil ebꞌnaj, haxa ebꞌnaj chikam xol ismunil, haꞌ noꞌ chꞌik chiꞌekꞌ satkanh, chilojnitoj isnimanil ebꞌnaj, xhi Komam,» xhi yaꞌ Jehú.5 Haꞌ hunteqꞌanxa tzet yu yaꞌ Baasa, yebꞌ tzet iswatxꞌe yaꞌ, yebꞌ yip yaꞌ, tzꞌibꞌnhebꞌil yul hum chitzotel yibꞌanhilo ebꞌyaꞌ isreyal Israel. 6 Iskam yaꞌ Baasa hakaꞌle yu iskamto ismam icham yebꞌ ismam yaꞌ, ismujlax yaꞌ bꞌey konhobꞌ Tirsa, yok yaꞌ Ela, iskꞌahol yaꞌ, reyal seleloj.
7 Haꞌ yaꞌ Jehú iskꞌahol yaꞌ Hanani, halni yu Komam Jahawil, yinh tzet tꞌinhan yul yibꞌanh yaꞌ Baasa, yebꞌ yibꞌanh yuninal yebꞌ sunil yikꞌal, yu istxꞌojal isbꞌeybꞌalnhe yaꞌ sata Komam Dios. Yaqꞌtij yaꞌ ishowal Komam yu tzetaj iswatxꞌe yu isqꞌabꞌ, yu istanhkanilo yaꞌ hakaꞌ yu istanhkanilo yaꞌ Jeroboam yebꞌ yikꞌal.
Ok yaꞌ Ela yebꞌ yaꞌ Zimri isreyalo konhobꞌ Israel
8 Haxa yet 26 (wajebꞌ iskawinaj) habꞌil yok yaꞌ Asa isreyalo Judá, yok yaꞌ Ela, iskꞌahol yaꞌ Baasa isreyalo konhobꞌ Israel bꞌey konhobꞌ Tirsa; wal xin kabꞌnhe habꞌil ok yaꞌ reyal. 9 Yajaꞌ haꞌ yaꞌ Zimri, yaꞌ yahaw yeko yinh yikta majan iscarruaje yaꞌ rey Ela, yako yaꞌ ishowal yinh yaꞌ Ela tuꞌ. Hayet huneꞌ tzꞌayik yet ay yaꞌ Ela bꞌey Tirsa bꞌey yatut naj Arsa, yukꞌikanh yaꞌ bꞌey tuꞌ. Naj Arsa tuꞌ yahawil yeko naj yinh ismunil yaꞌ Ela bꞌey Tirsa. 10 Yapni yaꞌ Zimri bꞌey yatut naj Arsa, ismaqꞌnikamo yaꞌ yaꞌ rey Ela. Lahwi tuꞌ xin yokkano yaꞌ Zimri reyalil selelo yaꞌ Ela. Hayet yuni huneꞌ tuꞌ, ayko yinh 27 (hujebꞌ iskawinaj) habꞌil yok yaꞌ Asa isreyalo Judá.
11 Haxa yet ayxako yaꞌ Zimri reyal, yet tzꞌonhanxa yaꞌ yul istzꞌonhobꞌal, ispotxꞌnikamo yaꞌ sunil yuninal yaꞌ Baasa, matxa hunu ebꞌnaj winaj kani, matxapaxo hunu yikꞌal yaꞌ kani, matxapaxo hunu yamigo yaꞌ kani. 12 Hak tuꞌ yu istanhtzenilo yaꞌ Zimri sunil yuninal yaꞌ Baasa, hakaꞌtikꞌa yu yalni Komam Jahawil yibꞌanhilo yaꞌ Baasa, tet ischejabꞌ, haꞌ ton yaꞌ Jehú. 13 Yu sunil ismul yaꞌ Baasa yako yebꞌ iskꞌahol chiyij Ela, yijbꞌan ebꞌyaꞌ konhobꞌ Israel yanoko ismul yu yiyo isbꞌa tet tioxh, yaqꞌnitij ebꞌyaꞌ ishowal Komam Jahawil, isDiosal Israel.
14 Haꞌ hunteqꞌanxa yetbꞌi tzet yu yaꞌ Ela, yebꞌ sunil tzet iswatxꞌe yaꞌ, tzꞌibꞌnhebꞌil yul hum chitzotel yibꞌanhilo ebꞌnaj isreyal Israel.
15 Hayet 27 (hujebꞌ iskawinaxa) habꞌil yok yaꞌ Asa isreyalo Judá, yokpaxo yaꞌ Zimri isreyalo Israel bꞌey konhobꞌ Tirsa, yajaꞌ hujebꞌnhe tzꞌayik ok yaꞌ reyal. Hayet hunel tuꞌ ay iscampamento ebꞌnaj Israel sat istxꞌotxꞌ ebꞌnaj filisteo yu yaniko howal yinh konhobꞌ Gibetón. 16 Hayet ay ebꞌnaj soldado Israel bꞌey iscampamento tuꞌ yabꞌen ebꞌnaj yal-laxi: «Haꞌ yaꞌ Zimri, aqꞌnikamo yaꞌ rey Ela,» xhi. Yuxin ebꞌnaj soldado Israel yako ebꞌnaj yaꞌ Omri isreyalo Israel yinh huneꞌ tzꞌayik tuꞌ. Haꞌ yaꞌ Omri, haꞌ yaꞌ yahawil yeko yinh ebꞌnaj issoldado Israel.a 17 Isbꞌejni yaꞌ Omri yebꞌ ebꞌnaj issoldado Israel yaniko howal yinh Gibetón, isto ebꞌnaj yanoko howal yinh konhobꞌ Tirsa.
18 Haxa yet yilni yaꞌ rey Zimri tato apni ebꞌnaj Israel yaqꞌaꞌko howal yinh konhobꞌ tuꞌ, yokto yaꞌ yul yatut ay bꞌey palacio, yaniko yaꞌ qꞌaꞌ yinh nha bꞌay ayikto tuꞌ, hak tuꞌ yu iskam yaꞌ. 19 Yu hakaꞌ tuꞌ, yu ismul yaꞌ yakoj, yuto iswatxꞌe yaꞌ istxꞌojal sata Komam Jahawil, isbꞌeybꞌalnhen yaꞌ istxꞌojal hakaꞌ yute yaꞌ Jeroboam, yako yaꞌ ismul yijbꞌan yaꞌ konhobꞌ Israel yaniko ismul.
20 Haꞌ hunteqꞌanxa yetbꞌi tzet iswatxꞌe yaꞌ Zimri yebꞌ yet ismaqꞌnikamo yaꞌ yaꞌ rey, tzꞌibꞌnhebꞌil yul hum chitzotel yibꞌanhilo ebꞌyaꞌ isreyal Israel.
Yet yok yaꞌ Omri isreyalo Israel
21 Hayet hunel tuꞌ kabꞌ majan eliko konhobꞌ Israel, huneꞌ majan yoche yaqꞌaꞌko naj Tibni, iskꞌahol naj Ginat, yinh reyal, haxa hunxa majan ebꞌnaj xin ochen yaqꞌaꞌko yaꞌ Omri reyal. 22 Yajaꞌ haꞌ anma tzujaniko yinta yaꞌ Omri qꞌoji yinh anma tzujaniko yinta naj Tibni, iskꞌahol naj Ginat, yuxin kam naj Tibni, yokkano yaꞌ Omri reyal.
23 Hayet 31 (hunlahonhebꞌ iskawinaj) habꞌil yok yaꞌ Asa isreyalo Judá, yok yaꞌ Omri 12 (kabꞌlahonhebꞌ) habꞌil isreyalo Israel, wal xin wajebꞌchꞌan habꞌil ekꞌyaꞌ bꞌey konhobꞌ Tirsa. 24 Isloqꞌni yaꞌ rey Omri huneꞌ txꞌotxꞌ wonhanb chiyij Samaria tet naj Semer yinh 68 (waxajebꞌ iskanhwinaj) kilo chꞌen plata. Iswatxꞌenkanh yaꞌ huneꞌ konhobꞌ, yako yaꞌ iskꞌubꞌal. Yaniko yaꞌ Samaria isbꞌiho huneꞌ konhobꞌ iswatxꞌekanh tuꞌ yuto Semer isbꞌi naj bꞌay isloqꞌ yaꞌ Omri txꞌotxꞌ.
25 Yaꞌ Omri tuꞌ, ay istxꞌojal iswatxꞌe yaꞌ sata Komam Jahawil, kaw ekꞌna xin kaw txꞌoj iswatxꞌe yaꞌ sata sunil ebꞌnaj rey ekꞌlena yet yalanhtokanoj. 26 Yuto isbꞌeybꞌalnhe yaꞌ istxꞌojal tzet iswatxꞌe yaꞌ Jeroboam, iskꞌahol naj Nabat, yijbꞌan yaꞌ konhobꞌ Israel yaniko ismul, yaqꞌnitij ebꞌnaj ishowal Komam Jahawil yet yinayo isbꞌa ebꞌnaj tet tioxh.
27 Haꞌ hunteqꞌanxa yetbꞌi tzet yu yaꞌ Omri, yebꞌ sunil tzet iswatxꞌe yaꞌ, yebꞌ yet isqꞌoji yaꞌ yinh howal, tzꞌibꞌnhebꞌil yul hum chitzotel yibꞌanhilo yinh ebꞌyaꞌ rey Israel. 28 Hayet iskam yaꞌ Omri, kam yaꞌ hakaꞌle yu iskamto ismam icham yaꞌ yebꞌ ismam yaꞌ; ismujlax yaꞌ bꞌey Samaria, yok yaꞌ Acab, iskꞌahol yaꞌ Omri tuꞌ reyal seleloj.
Ok yaꞌ Acab isreyalo konhobꞌ Israel
29 Hayet 38 (waxajlahonhebꞌ iskawinaj) habꞌilxa yok yaꞌ Asa isreyalo Judá, yet yichiko yaꞌ Acab, iskꞌahol yaꞌ Omri, isreyalo Israel.c 30 22 (Kabꞌ iskawinaj) habꞌilxa ok yaꞌ Acab isreyalo Israel bꞌey Samaria, yajaꞌ xin ekꞌbꞌal istxꞌojal iswatxꞌe yaꞌ iskꞌahol yaꞌ Omri sata ebꞌnaj rey ekꞌlena yet yalanhtokanoj. 31 Yuto isbꞌeybꞌalnhe yaꞌ istxꞌojal iswatxꞌe yaꞌ Jeroboam, iskꞌahol naj Nabat. Yaꞌ Acab yiqꞌ yaꞌ ix Jezabel, iskutzꞌin naj Et-baal, isreyal ebꞌnaj Sidonio, yok tzujno yaꞌ yinta tioxh Baal, yinayo isbꞌa yaꞌ tet.d 32 Iswatxꞌenkanh yaꞌ yatut tioxh Baal bꞌey Samaria, iswatxꞌenpaxo yaꞌ ismexhahil yet xahanbꞌal tet huneꞌ tioxh tuꞌ. 33 Iswatxꞌenpaxo yaꞌ yechel tioxh Asera, yuxin kaw ekꞌbꞌal istxꞌojal iswatxꞌe yaꞌ Acab tuꞌ sata ebꞌyaꞌ isreyal Israel ekꞌlena yalanhtokanoj, yaqꞌnitij yaꞌ ishowal Komam Jahawil, isDiosal Israel.
34 Haꞌ yinh istiempohal yaꞌ rey Acab iswatxꞌekanh naj Hiel, ah Bet-el, konhobꞌ Jericó. Hayet yanayo naj xeꞌal iskꞌubꞌal huneꞌ konhobꞌ tuꞌ, iskam isbꞌabꞌel kꞌahol naj, chiyij Abiram. Haxa yet yaniko naj ispultahil huneꞌ kꞌubꞌ tuꞌ, iskam islahobꞌal kꞌahol naj chiyij Segub, hak tuꞌ yu yijni isbꞌa tzet yaqꞌ Komam Jahawil yalaꞌ yaꞌ Josué, iskꞌahol yaꞌ Nun.