2 Lahwi tuꞌ istzotel Komam Jahawil tet yaꞌ Elías, yalni hakaꞌ tiꞌ: 3 «Elanh bꞌey tiꞌ, kat hato bꞌey txꞌotxꞌ ayko yinh yetkꞌulal bꞌay chꞌahilo tzꞌayik, kat hawebꞌanto habꞌa istiꞌ haꞌ nichꞌan haꞌ Querit, ayko satakꞌto haꞌ Jordán. 4 Haꞌ nichꞌan haꞌ tuꞌ chawukꞌu, yebꞌ xin xawalan tet noꞌ hoh tato haꞌ noꞌ chiꞌinapno tzet chaloh,» xhi Komam tet yaꞌ.

5 Isyijen yaꞌ Elías hakaꞌtikꞌa yu yalni Komam tet yaꞌ. Isto yaꞌ, yebꞌano isbꞌa istiꞌ haꞌ Querit ayko satakꞌto haꞌ Jordán. 6 Haꞌ noꞌ hoh xin chiꞌinito pan yebꞌ chibꞌe tet yaꞌ Elías yinh sahabꞌ sakꞌayal, haktikꞌapax tuꞌ yet qꞌejbꞌiyal, chiyito noꞌ pan yebꞌ chibꞌe tet yaꞌ; chiyukꞌnipaxo yaꞌ haꞌ nichꞌan haꞌ tuꞌ. 7 Haxa yet yekꞌto hayebꞌ tzꞌayik xin, istajkanh haꞌ nichꞌan haꞌ tuꞌ.

8 Lanhantotikꞌa xin yapni Istzotiꞌ Komam Jahawil tet yaꞌ Elías, yalni hakaꞌ tiꞌ: 9 «Elías, ahanhwanoj, kat hato bꞌey Sarepta, yul ismajul Sidón, kat hawehayo bꞌey tuꞌ. Xawalan tet huneꞌ ix hunix ay bꞌey tuꞌ tato chiyaqꞌ ix tzet chaloh,» xhi Komam tet yaꞌ.

10 Yel yaꞌ Elías bꞌey tuꞌ, isto yaꞌ bꞌey Sarepta. Haxa yet yapni yaꞌ yul ispultahil konhobꞌ tuꞌ, yilni yaꞌ huneꞌ ix hunix lanhan iskutxbꞌan ix issiꞌ, yawten yaꞌ ix yalni yaꞌ tet ix:

—Chinqꞌanan tawet tato chawiti nichꞌano ha haꞌ yul hunu vaso wukꞌuꞌan, xhi yaꞌ tet ix.

11 Hayet lanhan isto ix yinoti haꞌ, yawtenpaxo yaꞌ ix hakaꞌ tiꞌ:

—Chinqꞌanpaxojan tawet, chawiniti nichꞌano pan yul haqꞌabꞌ inwabꞌan, xhi yaꞌ.

12 Istaqꞌwi ix tet yaꞌ:

—Mamin, itzitz Komam Jahawil, haDiosal, chiwalan tawet tato machi ixim pan watxꞌebꞌil wuhan. Hunxanhe bꞌetx ixim harina yanhebꞌil wuhan yul huneꞌ xi, yebꞌ hanikꞌ teꞌ aceite yul huneꞌ xhalu, haꞌ xin chintohan inwatxꞌeꞌan, yuxin lanhan inkutxbꞌanan kabꞌ insiꞌtiꞌan. Chinwahnihan yebꞌ wuninan, haxanhe xin chikowahanh, chilahwi tuꞌ kat jechmananh kokamanh yu wahil, xhi ix.

13 Yalni yaꞌ Elías tet ix:

—Mach chaxhxiwi, as watxꞌe ixim hakaꞌ hawalni tiꞌ, yajaꞌ watxꞌe hunu nichꞌan inpanan yinh bꞌabꞌelal yinh ixim harina yanhebꞌil hawu tuꞌ, kat haqꞌantzen ixim xol tzaqꞌaqꞌ, kat hawiniti ixim wetan, lahwi tuꞌ kat hawatxꞌen hawet hawabꞌ yebꞌ hawunin, 14 yuto haꞌ Komam Jahawil, isDiosal Israel halni hakaꞌ tiꞌ: “Haꞌ ixim harina ayayto yul huneꞌ xi machi lahwi ixim, yebꞌpaxo teꞌ aceite ayayto yul xhalu machi lahwati teꞌ masanto yinh istzꞌayikal chiyaqꞌ haꞌ nhabꞌ yu Komam Jahawil sat yibꞌanhqꞌinal tiꞌ,” xhi Komam, xhi yaꞌ Elías.

15 Lahwi tuꞌ xin isto ix hunix iswatxꞌeno hakaꞌ yalni yaꞌ Elías. Iswaꞌ yaꞌ, iswaꞌpaxo ix yebꞌ yunin yulbꞌal txꞌiꞌal tzꞌayik. 16 Maxhtikꞌa lahwati ixim harina yul txꞌotxꞌ xi tuꞌ, yebꞌpaxo teꞌ aceite ayayto yul xhalu, maxhtikꞌa lahwati teꞌ hakaꞌ yu yalni yaꞌ Elías yu Komam Jahawil.

17 Lahwinhe hunteqꞌan tiꞌ xin, yok yabꞌil yinh yunin ix hunix, ix yahaw nha bꞌay ay yaꞌ Elías, kaw how yute islow huneꞌ yabꞌil tuꞌ, iskam naj. 18 Yuxin yal ix tet yaꞌ Elías:

—Mamin, ¿tzet wokan tawinh yinh huneꞌ tiꞌ? Hach tiꞌ ischejabꞌ Komam Dios, ¿tzet hawehi? ¿tom makaxhhul inkꞌatanhtiꞌan yunhe hananiti inmulan, yuxin makam wunintiꞌan? xhi ix.

19 Yalni yaꞌ tet ix:

—Iti hawunin tuꞌ bꞌey tiꞌ, xhi yaꞌ.

Yiniti ix nichꞌan yunin tuꞌ, ischelnilo yaꞌ, yinahto yaꞌ yul iscuarto yinh iskabꞌ piso, ishilbꞌanayo yaꞌ sat istxꞌat. 20 Istxahli yaꞌ tet Komam Jahawil, yalni yaꞌ hakaꞌ tiꞌ: «Mamin, hach inDiosalan, ¿tom haꞌ hunpaxo ix hunix bꞌay ay intiꞌan chawayo isyaꞌtajil, chawaqꞌni kamo yunin ix?» xhi yaꞌ.

21 Oxel ay pajno yaꞌ Elías yibꞌanh nichꞌan unin tuꞌ, yet istxahli yaꞌ tet Komam Jahawil: «Mamin, hach inDiosalan, chinqꞌanan tawet tato chawaqꞌ itzitzbꞌo nichꞌan unin tiꞌ,» xhi yaꞌ.

22 Yabꞌen Komam Jahawil istxah yaꞌ Elías, yaqꞌni itzitzbꞌokanh Komam nichꞌan unin tuꞌ, yulkanh iskꞌul. 23 Yinayti yaꞌ Elías nichꞌan unin bꞌey bꞌabꞌel piso bꞌay ay ismiꞌ, yalni yaꞌ tet ix:

—Ilkꞌanabꞌi mahulkanh iskꞌul hawunin lah, xhi yaꞌ.

24 Istaqꞌwi ix tet yaꞌ Elías:

—Haꞌ tinanh chiwohtanhelojan tato ischejabꞌ Komam Dios hawehi, haꞌ Istzotiꞌ Komam Jahawil chiꞌelti yul hatiꞌ kaw yel chala, xhi ix.