Yok howal yu yaꞌ Abías yebꞌ yaꞌ Jeroboam. 3 Isto yaꞌ Abías tuꞌ howal yinh yaꞌ Jeroboam yebꞌ 400 mil issoldado, ebꞌnaj tuꞌ sikꞌbꞌiliko ebꞌnaj yuto kaw helan ebꞌnaj yinh howal. Yelpaxti yaꞌ Jeroboam howal yinh yaꞌ Abías tuꞌ yebꞌ 800 mil issoldado, ebꞌnaj tuꞌ sikꞌbꞌiliko ebꞌnaj, yuto kaw helan ebꞌnaj yinh howal yebꞌ xin kaw ay yip ebꞌnaj.

4 Yok linhno yaꞌ Abías iswiꞌ wonhan Zemaraim yul ismajul txꞌotxꞌ chewal txꞌotxꞌ Efraín, yah yaw yaꞌ, yalni yaꞌ hakaꞌ tiꞌ: «Hach Jeroboam yebꞌ sunil hex Israel hex tiꞌ, abꞌewe tzet chiwalan. 5 ¿Tom mach heyohtajoj tato haꞌ Komam Jahawil, koDiosal hanhonh Israelonh tiꞌ aqꞌnhekano huneꞌ munil yinh reyal tet yaꞌ David yebꞌ tet yuninal yet istꞌinhbꞌankano istrato tet yaꞌ huneꞌ tzet huneꞌ trato machi ekꞌto yet yijni isbꞌa? 6 Yajaꞌ wal yaꞌ Jeroboam iskꞌahol naj Nabat, ischejabꞌ yaꞌ Salomón yikanh isbꞌa yaꞌ, yok yaꞌ howal yinh yahawil. 7 Iskutxbꞌaniko isbꞌa hunteqꞌan ebꞌnaj winaj kaw isah yebꞌ txꞌoj isbꞌeybꞌal yinta yaꞌ Jeroboam, isqꞌoji ebꞌnaj yinh yaꞌ Roboam iskꞌahol yaꞌ Salomón, mach xin yu iskolni isbꞌa yaꞌ Roboam tet ebꞌnaj, yuto nichꞌan tzehto yaꞌ yebꞌ xin maxhto isnabꞌal yaꞌ. 8 Haꞌ tinanh xin cheyoche heyiqꞌalo huneꞌ munil yinh reyalil aqꞌbꞌilkano yu Komam Jahawil tet yuninal yaꞌ David, yuto kaw niman hex, iqꞌbꞌilpaxo hunteqꞌan yechel wakax oro yaqꞌ watxꞌe yaꞌ Jeroboam hediosaloj. 9 Heyinipaxilo ebꞌyaꞌ sacerdote yinh ismunil Komam Jahawil yebꞌ ebꞌyaꞌ yuninal yaꞌ Aarón yebꞌ ebꞌnaj levita, hesayniko hesacerdote hakaꞌ chal hekꞌul, hakaꞌ chiyute hunteqꞌan konhobꞌ mach ohtanheho Komam Dios. Makxanhetikꞌa xin chihul yebꞌ huneꞌ wakax yebꞌ hujkꞌonh meꞌ, haꞌ huneꞌ mak tuꞌ chiꞌok issacerdoteho hunteqꞌan mach diosoj. 10 Wal hanhonhtiꞌanh haꞌ Komam Jahawil, koDiosalanh, mach xin chikopohilo kobꞌahanh yinh Komam, yebꞌ xin haꞌ ebꞌyaꞌ sacerdote chimunla yinh ismunil Komam Jahawil koxolanh haꞌ ton ebꞌyaꞌ yuninal yaꞌ Aarón yebꞌ ebꞌnaj levita. 11 Haꞌ ebꞌyaꞌ chinhusni xahanbꞌal tet Komam Jahawil hunun sakꞌayal yebꞌ qꞌejbꞌiyal, chisnhusnipaxo ebꞌyaꞌ teꞌ pom kaw xuqꞌ sam, chanipaxayo ebꞌyaꞌ ixim pan yibꞌanh mexha kaw saj, chanipaxiko ebꞌyaꞌ qꞌaꞌ yinh chꞌen lámpara hunun qꞌejbꞌiyal, chꞌen aykanh yibꞌanh candelero nabꞌa oro, yuto hanhonhtiꞌanh chikoyijehanh chejbꞌanile yet Komam Jahawil, koDiosalanh, wal hexpaxo hex tiꞌ xin, xahebꞌejkano Komam. 12 Hanhonhtiꞌanh haꞌ Komam Dios chonhijbꞌananh, haxa ebꞌyaꞌ issacerdote Komam watxꞌebꞌilxa isbꞌa ebꞌyaꞌ yoqꞌtzen trompeta yu yalaxiko howal teyinh. Hex Israel mach cheyako howal yinh Komam Jahawil, isDiosal jichmam, yuto nabꞌnhe cheyu, mach chexqꞌoji tet Komam,» xhi yaꞌ Abías tet ebꞌnaj.

13 Yajaꞌ wal yaꞌ Jeroboam ishoyayo issoldado yaꞌ ebꞌnaj soldado Judá yu yaniko ebꞌnaj howal yinh ebꞌnaj. Wal xin yinta ebꞌnaj tit ebꞌnaj, nanpaxo ebꞌnaj to sata ebꞌnaj. 14 Yuxin haxa yet yilniti yaꞌ Abías hoybꞌilxayo yaꞌ yebꞌ issoldado yu ebꞌnaj Israel, yuxin ah yaw ebꞌnaj tet Komam Jahawil ta chikolwa Komam yinh ebꞌnaj, yoqꞌtzenpaxo ebꞌyaꞌ sacerdote istrompeta. 15 Yah yaw ebꞌnaj Judá tuꞌ yinh kaw ip, hayet yahwi ebꞌnaj yu yaniko howal, yaqꞌni aykꞌayo Komam Dios yaꞌ Jeroboam yebꞌ sunil ebꞌnaj Israel sata yaꞌ Abías yebꞌ sata ebꞌnaj Judá. 16 Hak tuꞌ yu yelkanh ebꞌnaj Israel, yaniko Komam ebꞌnaj yul isqꞌabꞌ ebꞌnaj Judá. 17 Kaw xin niman ebꞌnaj Israel tuꞌ ismaqꞌkamo yaꞌ rey Abías yebꞌ issoldado, 500 mil isbꞌisil ebꞌnaj potxꞌlaxkamoj; ebꞌnaj kam tuꞌ, soldado kaw kꞌul xol ebꞌnaj Israel. 18 Hak tuꞌ xin yu yilaxayo ebꞌnaj Israel yinh huneꞌ tiempo tuꞌ, wal ebꞌnaj Judá qꞌoji ebꞌnaj yuto kawxi iskꞌul ebꞌnaj yinh Komam Jahawil, isDiosal yichmam.

19 Yok tzujno yaꞌ Abías yinta yaꞌ Jeroboam, yinilo yaꞌ hunteqꞌan konhobꞌ tet yaꞌ, haꞌ ton konhobꞌ Bet-el yebꞌ yaldeahil, yebꞌ konhobꞌ Jesana yebꞌ yaldeahil, yebꞌ konhobꞌ Efraín yebꞌ yaldeahil. 20 Yulbꞌal ishabꞌilal yet yok yaꞌ Abías reyal matxa yiqꞌkanh yip yaꞌ Jeroboam, lahwi tuꞌ istanhtzenilo Komam yaꞌ Jeroboam tuꞌ, iskam yaꞌ. 21 Wal yaꞌ rey Abías yiqꞌkanh yip yaꞌ; 14 (kanhlahonhwanh) yixal yaꞌ, 22 (kabꞌ iskawinaj) iskꞌahol yaꞌ yok 16 (wajlahonhwanh) iskutzꞌin yaꞌ. 22 Haꞌ hunteqꞌanxa tzet iswatxꞌe yaꞌ Abías yebꞌ isbꞌeybꞌal yaꞌ, yebꞌ tzotiꞌ yal yaꞌ, tzꞌibꞌnhebꞌilkano sunil tuꞌ yu yaꞌ Iddo, ischejabꞌ Komam Dios.