Tzabꞌcha Judá yu naj rey Sisac
12
Hayet yiqꞌnikanh yip yaꞌ Roboam yinh reyal isbꞌejnikano yaꞌ chejbꞌanile yaqꞌ Komam Jahawil, isbꞌejnipaxkano sunil konhobꞌ Israel chejbꞌanile yaqꞌ Komam. 2 Yu ok yaꞌ manhkꞌomal tet Komam Jahawil, yuxin yet howebꞌxa habꞌil yok yaꞌ Roboam reyal, yapni naj Sisac, isreyal Egipto yaqꞌaꞌko howal yinh Jerusalén. 3 Apni naj isreyal Egipto tuꞌ yebꞌ 1,200 iscarruaje yet howal, yebꞌpaxo 60 (oxkꞌal) mil ebꞌnaj yet howal ayahto yibꞌanh cheh; aypaxo hunteqꞌanxa ebꞌnaj soldado ok yetbꞌiho naj yet istit naj bꞌey Egipto tuꞌ, haꞌ ton ebꞌnaj libio, ebꞌnaj suquieno yebꞌ ebꞌnaj etíope, wal xin matxa isbꞌi hanta isbꞌisil ebꞌnaj yinh sunil. 4 Ismajnayo ebꞌnaj konhobꞌ ayko iskꞌubꞌal yul ismajul Judá, yapnipaxo ebꞌnaj bꞌey Jerusalén.5 Yuxin to yaꞌ Semaías ischejabꞌ Komam Dios sata naj rey Roboam yebꞌ sata ebꞌnaj iswiꞌehal Judá, yuto kutxaniko ebꞌnaj bꞌey Jerusalén yu iskolni isbꞌa tet naj Sisac. Yalni yaꞌ Semaías tet ebꞌnaj:
—Hak tiꞌ chiyute yalni Komam Jahawil hakaꞌ tiꞌ: “Hex tiꞌ, bꞌejbꞌilinkanojan heyu, yuxin chexinbꞌejkanikojan yul isqꞌabꞌ naj Sisac,” xhi Komam, xhi yaꞌ.
6 Hayet yabꞌen ebꞌnaj iswiꞌehal Israel yebꞌ yaꞌ rey huneꞌ tuꞌ, yinayo isbꞌa ebꞌnaj sata Komam, yalni ebꞌnaj:
—Haꞌ ye yu Komam Jahawil, haꞌ istoholal chiswatxꞌe, xhi ebꞌnaj.
7 Hayet yilni Komam Jahawil ta yiyo isbꞌa ebꞌnaj; istzotel Komam tet yaꞌ Semaías, yalni Komam tet yaꞌ: «Yu mayiyo isbꞌa ebꞌnaj wetan yuxin matxa chintanhtzelojan ebꞌnaj; wal xin yinh anhe chinkolilojan Jerusalén tiꞌ yul isqꞌabꞌ naj Sisac tiꞌ, matxa chiwayojan inhowalan yibꞌanh. 8 Yajaꞌ chꞌokkanto ebꞌnaj yalanh yip naj rey Sisac, yu yilni ebꞌnaj ta ekꞌbꞌalto kꞌul yok ebꞌnaj inchejabꞌojan sata yok ebꞌnaj ischejabꞌo ebꞌnaj isreyalo ej konhobꞌ,» xhi Komam.
9 Hak tuꞌ yu yapni naj Sisac, isreyal Egipto bꞌey Jerusalén, yinilti naj sunil isqꞌalomal Yatut Komam Jahawil yebꞌ isqꞌalomal yatut yaꞌ rey; sunil tuꞌ yito naj. Yinipaxto naj chꞌen escudo oro watxꞌebꞌil yu yaꞌ rey Salomón. 10 Lahwi tuꞌ yaqꞌni watxꞌeꞌ yaꞌ Roboam chꞌen bronce ok escudohal selelo chꞌen yito naj Sisac; yaniko yaꞌ Roboam chꞌen escudo tuꞌ yul isqꞌabꞌ ebꞌnaj soldado chitanheni, ebꞌnaj ayko istanheno istiꞌ yatut yaꞌ rey. 11 Hunta el yet chito yaꞌ rey Roboam yul Yatut Komam Jahawil chiyinito ebꞌnaj soldado chitanhen yaꞌ hunteqꞌan escudo tuꞌ, hayet chimeltzo ebꞌnaj xin kat iskꞌubꞌanto ebꞌnaj chꞌen yul cuartel. 12 Hayet yinayo isbꞌa yaꞌ rey Roboam sata Komam Jahawil yinilo Komam ishowal yibꞌanh yaꞌ, hak tuꞌ xin matxa istanhtzelo Komam yaꞌ yinh hunelnhe, hakpax tuꞌ anma Judá kꞌulxa yilah.
13 Yiqꞌnipaxokanh yip yaꞌ Roboam yinh ismunil yinh reyal bꞌey Jerusalén, 41 (huneꞌ yoxkꞌal) habꞌil yaꞌ yet yok naj reyal; 17 (hujlahonhebꞌ) habꞌil ok yaꞌ reyal bꞌey Jerusalén, konhobꞌ issikꞌilo Komam Jahawil xol hunun majan ebꞌnaj Israel yu yaqꞌlax bꞌinaho isbꞌi Komam. Haꞌ isbꞌi ismiꞌ yaꞌ Roboam tuꞌ Naama isbꞌi ix, ix ah Amón. 14 Wal yaꞌ xin, haꞌ istxꞌojal iswatxꞌe yaꞌ, yuto mach yako yaꞌ yinh yanma issayni Komam Jahawil.
15 Haꞌ tzet iswatxꞌe yaꞌ Roboam tuꞌ yet yichebꞌanil yebꞌ yet islahobꞌal yebꞌ istxolal isbꞌi yuninal yaꞌ, tzꞌibꞌnhebꞌilkano yul hum yet yaꞌ Semaías yebꞌ yaꞌ Iddo, ebꞌyaꞌ ischejabꞌ Komam. Yaꞌ rey Roboam yebꞌ yaꞌ Jeroboam kaw naunhe chaqꞌlen howal ebꞌyaꞌ. 16 Iskam yaꞌ rey Roboam hakaꞌ yu iskam yichmam yaꞌ, ismujlax yaꞌ bꞌey iskonhobꞌ yaꞌ David, yok yaꞌ Abías iskꞌahol yaꞌ reyal seleloj.