11
Hayet yapni yaꞌ rey Roboam bꞌey Jerusalén iskutxbꞌaniko yaꞌ sunil ebꞌnaj Judá yebꞌ ebꞌnaj Benjamín, 180 mil isbꞌisil ebꞌnaj soldado kaw helan yinh howal kutxikoj. Iskutxbꞌako isbꞌa ebꞌnaj yu isto ebꞌnaj yanoko howal yinh ebꞌnaj Israel, yu ismeltzoko ebꞌnaj yalanh yip yaꞌ rey Roboam tuꞌ. 2 Yajaꞌ tzotel Komam Jahawil tet yaꞌ Semaías ischejabꞌ, yalni Komam tet yaꞌ: 3 «Tzotelanh tet yaꞌ Roboam iskꞌahol yaꞌ Salomón, isreyal Judá yebꞌ tet ebꞌnaj Israel ay bꞌey Judá yebꞌ tet ebꞌnaj Benjamín kat hawalni tet ebꞌnaj: 4 “Hak tiꞌ yute yalni Komam Jahawil hakaꞌ tiꞌ: Mach chexto heyaqꞌaꞌko howal yinh ebꞌnaj heyuxhta Israel tuꞌ, wal xin meltzanhweto heyatut hunu hex, yuto hak tuꞌ el yinh inkꞌulan yuxin hak tiꞌ chiyute isbꞌa huneꞌ tiꞌ,” xhi Komam, kachi,» xhi Komam tet yaꞌ. Isyijen ebꞌnaj tzet yal Komam Jahawil, ispaxto ebꞌnaj, matxa xin to ebꞌnaj yaqꞌaꞌko howal yinh yaꞌ Jeroboam.3. YUNINAL YAꞌ DAVID OK REYAL YINTAJILOJ
(11:5–36:23)
Yiqꞌkanh yip yaꞌ Roboam
5 Yaꞌ rey Roboam, haꞌ yul konhobꞌ Jerusalén ehayo yaꞌ. Iswatxꞌenkanh yaꞌ iskꞌubꞌal hunteqꞌan konhobꞌ ay yul ismajul txꞌotxꞌ Judá. 6 Haꞌ ton hunteqꞌan konhobꞌ tiꞌ: konhobꞌ Belén, konhobꞌ Etam, konhobꞌ Tecoa, 7 konhobꞌ Bet-sur, konhobꞌ Soco, konhobꞌ Adulam, 8 konhobꞌ Gat, konhobꞌ Maresa, konhobꞌ Zif, 9 konhobꞌ Adoraim, konhobꞌ Laquis, konhobꞌ Azeca, 10 konhobꞌ Zora, konhobꞌ Ajalón yebꞌ konhobꞌ Hebrón; haꞌ hunteqꞌan konhobꞌ tuꞌ ayko yul ismajul Judá yebꞌ ismajul Benjamín, yako yaꞌ yip konhobꞌ tuꞌ. 11 Yako yaꞌ iskꞌubꞌal hunteqꞌan konhobꞌ tuꞌ, yalaxiko istanhemal, iskꞌubꞌalaxto tzet chilolaxi, yebꞌ vino yebꞌ aceite yul hunun konhobꞌ. 12 Yaqꞌnipaxo yaꞌ Roboam tuꞌ chꞌen escudo yebꞌ chꞌen lanza tet hunun konhobꞌ. Kaw kꞌul yu iswatxꞌenkano yaꞌ Roboam iskꞌubꞌal hunteqꞌan konhobꞌ tuꞌ, hak tuꞌ yu yokkano anma Judá yebꞌ anma Benjamín isyijeno tzet yal yaꞌ rey Roboam.
13 Haꞌ ebꞌyaꞌ sacerdote yebꞌ ebꞌnaj levita ay yulajla ismajul Israel, tit bꞌay aya, yok yetbꞌiho yaꞌ rey Roboam. 14 Isbꞌejkano ebꞌnaj levita tuꞌ tzetaj aya, yebꞌ istxꞌotxꞌ bꞌay chilow isnoqꞌ, yapni ebꞌnaj bꞌey Jerusalén yebꞌ yulajla konhobꞌ ay yul ismajul Judá, yuto ilaxilo ebꞌnaj yinh ismunil Komam Jahawil yu yaꞌ Jeroboam, yebꞌ yu ebꞌnaj iskꞌahol yaꞌ. 15 Yuto haꞌ kaw yaꞌ Jeroboam tuꞌ sayniko issacerdote chinhusni xahanbꞌal tet istioxh yebꞌ tet ischejabꞌ naj matzwalil yebꞌ tet yechel noꞌ wakax iswatxꞌe isdiosalo bꞌay nahat yekanh. 16 Aypaxo ebꞌnaj Israel xol hunun majan yet Israelal ok yinh yanma yinayo isbꞌa tet Komam Jahawil, isDiosal Israel, isbꞌeybꞌalnhen ebꞌnaj isbꞌeybꞌal ebꞌyaꞌ sacerdote yebꞌ ebꞌnaj levita, isto ebꞌnaj yaqꞌno isxahanbꞌal tet Komam Jahawil, isDiosal yichmam bꞌey Jerusalén. 17 Hak tuꞌ yu yiqꞌni yip yaꞌ Roboam, iskꞌahol yaꞌ Salomón yul ismajul txꞌotxꞌ Judá yulbꞌal oxebꞌ habꞌil, yuto oxebꞌnhe habꞌil tuꞌ isbꞌeybꞌalnhe ebꞌnaj isbꞌeybꞌal yaꞌ David yebꞌ isbꞌeybꞌal yaꞌ Salomón.
18 Yiqꞌni yaꞌ Roboam ix Mahalat, iskutzꞌin naj Jerimot, iskꞌahol yaꞌ David; haꞌ ismiꞌ ix Mahalat tuꞌ haꞌ ton ix Abihail, iskutzꞌin naj Eliab, iskꞌahol yaꞌ Isaí. 19 Haꞌ yuninal yaꞌ Roboam pitzkꞌa yebꞌ ix Mahalat haꞌ ebꞌnaj tiꞌ: naj Jeús, naj Semarías yebꞌ naj Zaham. 20 Lahwi tuꞌ yiqꞌnipaxo yaꞌ Roboam ix Maaca, iskutzꞌin naj Absalón, haꞌ yuninal yaꞌ pitzkꞌa yebꞌ ix Maaca haꞌ ebꞌnaj tiꞌ: Naj Abías, naj Atai, naj Ziza yebꞌ naj Selomit. 21 Yajaꞌ wal yaꞌ Roboam tuꞌ ekꞌbꞌal ayko yanma yaꞌ yinh ix Maaca, iskutzꞌin naj Absalón sata sunil ebꞌix yixal yebꞌ ebꞌix iskabꞌ yixal. Yaꞌ Roboam tuꞌ, ay 18 (waxajlahonhwanh) yixal yaꞌ, yok 60 (oxkꞌalwanh) ebꞌix iskabꞌ yixal yaꞌ, yebꞌ xin 28 (waxaj iskawinajwanh) iskꞌahol yaꞌ pitzkꞌahi, yebꞌ 60 (oxkꞌalwanh) iskutzꞌin yaꞌ. 22 Haꞌ xin yaꞌ Abías, yunin ix Maaca, yako yaꞌ Roboam tuꞌ iswiꞌehaloj yebꞌ yahawilo xol iskꞌahol, yuto haꞌ yaꞌ Abías tuꞌ yoche yaꞌ Roboam yaqꞌaꞌko reyalil. 23 Yaꞌ Roboam, kaw kꞌul yu istxumni yaꞌ, yuto ispujbꞌakanh yaꞌ iskꞌahol sat txꞌotxꞌ Judá yebꞌ sat txꞌotxꞌ Benjamín yebꞌ yulajla konhobꞌ ayko iskꞌubꞌal. Kaw niman tzet chislo ebꞌnaj yaqꞌ yaꞌ Roboam tuꞌ, yebꞌ xin kaw txꞌiꞌal yixal ebꞌnaj issay yaꞌ.