2. ISPOH ISBꞌA EBꞌNAJ ISRAEL
(10:1–11:4)
1 Yilo isbꞌa ebꞌnaj Israel yalanh yip yaꞌ rey Roboam
10
Yaꞌ Roboam, to yaꞌ bꞌey Siquem, yuto sunil anma Israel iskutxbꞌako isbꞌa bꞌey Siquem yu yanikaniko yaꞌ reyal. 2 Yapni isqꞌumal huneꞌ tuꞌ bꞌey Egipto tet yaꞌ Jeroboam, iskꞌahol naj Nabat, yuto haꞌ bꞌey tuꞌ yebꞌaꞌ isbꞌa yaꞌ tet yaꞌ rey Salomón, yajaꞌ hayet yabꞌen yaꞌ huneꞌ tuꞌ yel yaꞌ bꞌey Egipto, ispaxti yaꞌ. 3 Yanito ebꞌnaj Israel yiqꞌomal yaꞌ Jeroboam, yapni yaꞌ iskꞌatanh ebꞌnaj. Lahwi tuꞌ isto ebꞌnaj Israel yebꞌ yaꞌ Jeroboam tzotelo tet naj rey Roboam, yalni ebꞌnaj tet yaꞌ:4 —Hamam, yaqꞌ yaꞌ munil kaw yaꞌta jetanh yuxin wal tinanh chikoqꞌananh tawet tato chawilo yalil munil tuꞌ jibꞌanhanh, ta hak tuꞌ chikoyijehanh tzet chawala, xhi ebꞌnaj.
5 Istaqꞌwi yaꞌ Roboam tet ebꞌnaj:
—Hato yet oxebꞌ tzꞌayik chexhul inkꞌatanhan, chiwaqꞌnihan ispaj hetzotiꞌ, xhi yaꞌ.
Hak tuꞌ yu ispaxto ebꞌnaj yatut. 6 Yuxin isqꞌambꞌe yaꞌ rey Roboam tet ebꞌnaj ichamta winaj Israel munla yinta ismam yet ayiko reyal, yalni yaꞌ:
—¿Tzettaxka chu hepajtzen wetan yinh ispaj isqꞌambꞌebꞌal konhobꞌ Israel tiꞌ? xhi yaꞌ. 7 Yalni ebꞌnaj tet yaꞌ hakaꞌ tiꞌ:
—Tato kꞌul chawute habꞌa yinh konhobꞌ tiꞌ, yebꞌ ta chayije tzet choche iskꞌul yebꞌ ta kꞌul hatzotel tet, chisyije tzet chawala yinh sunilbꞌal ej tiempo, xhi ebꞌnaj tet yaꞌ.
8 Yajaꞌ xin mach yabꞌeto yaꞌ Roboam tzet yal ebꞌnaj ichamta winaj Israel tuꞌ, isqꞌambꞌen yaꞌ yinh tzet chiyute yalni ebꞌnaj tzehtaj chimunla yintaj, ebꞌnaj yet chꞌibꞌomal yaꞌ. 9 Yalni yaꞌ tet ebꞌnaj:
—Haꞌ konhobꞌ Israel tiꞌ chiyoche tato chiwilojan hanikꞌo yalil isyaꞌtajil munil yakaniko inmaman yibꞌanh, ¿tzimi cheyute heyalni hex tiꞌ? xhi yaꞌ.
10 Istaqꞌwi ebꞌnaj tzehtaj yet chꞌibꞌom yaꞌ Roboam tuꞌ:
—Hak tiꞌ chawute hawalni tet ebꞌnaj chiyoche chawilo hanikꞌ isyaꞌtajil munil yaqꞌ hamam tet hakaꞌ tiꞌ: “Haꞌ nichꞌan yiximal inqꞌabꞌan ekꞌbꞌal nimajal yinh sata yikta inmaman. 11 Haꞌ inmamtuꞌan yaqꞌ yaꞌ munil kaw yaꞌta teyet, yajaꞌ wal hinan ekꞌna chiwakojan yalil isyaꞌtajil munil teyibꞌanh. Kexismaqꞌ yaꞌ yu tzꞌum, yajaꞌ wal hinan chiwakojan chꞌen chꞌen yinh iswiꞌ tzꞌum tuꞌ chiwanaytojan teyinh, cheyabꞌen isyaꞌil hakaꞌ istzahwa noꞌ kꞌolotx,” kachi, xhi ebꞌnaj tet yaꞌ.
12 Yapni yaꞌ Jeroboam yebꞌ sunil ebꞌnaj Israel iskꞌatanh yaꞌ rey Roboam yinh yox tzꞌayik hakaꞌtikꞌa yu yalni yaꞌ tet ebꞌnaj: “Chexhul inkꞌatanhan yetto oxebꞌ tzꞌayik,” xhi yaꞌ. 13 Yajaꞌ kaw how yute yaqꞌni yaꞌ rey Roboam ispaj istzotiꞌ konhobꞌ Israel, yuto mach yabꞌeto yaꞌ tzet yal ebꞌnaj ichamta winaj Israel. 14 Wal xin haꞌ tzet yal ebꞌnaj tzehtaj, haꞌ yal yaꞌ tet konhobꞌ; yalni yaꞌ hakaꞌ tiꞌ:
—Haꞌ inmaman, yaqꞌ munil kaw yaꞌta teyet, yajaꞌ wal hinan ekꞌna chiwayojan yalil munil tuꞌ teyibꞌanh. Kexismaqꞌ inmamtuꞌan yu noꞌ tzꞌum, wal hinan chiwakojan chꞌen chꞌen yinh iswiꞌ noꞌ tzꞌum tuꞌ, chiwanaytojan teyinh yunhe heyabꞌen isyaꞌil, hakaꞌ isyaꞌil bꞌay chitzahwa noꞌ kꞌolotx, xhi yaꞌ.
15 Mach yabꞌeto yaꞌ rey Roboam tzet isqꞌan konhobꞌ Israel tuꞌ, yuto haꞌ Komam aqꞌni yubꞌ yaꞌ hakaꞌ tuꞌ, yu yijni isbꞌa tzet yalkano yaꞌ Ahías, silonita tet yaꞌ Jeroboam, iskꞌahol naj Nabat, yu chejbꞌanile yalkano Komam Jahawil. 16 Hayet yilni konhobꞌ Israel tato mach yabꞌeto yaꞌ rey tzet isqꞌan tuꞌ, yalni ebꞌnaj hakaꞌ tiꞌ:
«Hanhonh tiꞌ machi jok yinh yaꞌ David, iskꞌahol yaꞌ Isaí,
machipaxo komajul yinta yaꞌ.
¡Paxojonhweto hanhonh Israelonh tiꞌ jatut!
¡Yaqꞌabꞌ yaꞌ David tzet chiꞌokniko yu yuninal tiꞌ tinanh!» xhi ebꞌnaj.
Hak tuꞌ yu ispaxto sunil ebꞌnaj Israel yatut yul qꞌap mantiado.
17 Yajaꞌ ok yaꞌ Roboam tuꞌ reyal yinh anma Israel ay yulajla konhobꞌ ay yul ismajul Judá. 18 Lahwi tuꞌ ischejnito yaꞌ rey Roboam naj Adoram xol ebꞌnaj Israel, yuto yahawil yeko naj yinh chꞌen tohlabꞌal, yajaꞌ xin isqꞌojkamo ebꞌnaj Israel tuꞌ naj. Hayet yabꞌen yaꞌ rey Roboam huneꞌ tuꞌ yahto yaꞌ yul iscarruaje yinh anhe, yelkanh yaꞌ, isto yaꞌ bꞌey Jerusalén. 19 Hak tuꞌ yu ispohnikanilo isbꞌa ebꞌnaj Israel xol ebꞌnaj yuninal yaꞌ David, hakto tuꞌ xin ye tinanh.