4 —Kaw xakonhekꞌyaꞌanh yu isyaꞌtajil yaqꞌ hamam jetanh, yuxin chijochehanh ta chawilo hanikꞌo yalil munil jibꞌanhanh, ta hak tuꞌ chikoyijehanh tzet chawala, xhi ebꞌnaj tet yaꞌ.

5 Istaqꞌwi yaꞌ Roboam tet ebꞌnaj:

—Paxanhwetoj, hato yet oxe chexhuli, kat waqꞌnihan ispaj hetzotiꞌ tiꞌ, xhi yaꞌ. Hak tuꞌ yu ispaxto konhobꞌ Israel. 6 Isqꞌambꞌen yaꞌ rey Roboam tet ebꞌnaj ichamta winaj munla yinta ismam yet itzitzto, haꞌ ton yaꞌ Salomón, yalni yaꞌ:

—¿Tzet chu waqꞌnihan ispaj istzotiꞌ konhobꞌ tiꞌ? xhi yaꞌ.

7 Istaqꞌwi ebꞌnaj tet yaꞌ:

—Tato chawoche kaxhok isreyalo konhobꞌ tiꞌ, kꞌul chu hapajtzen isqꞌambꞌebꞌal ebꞌnaj, hak tuꞌ xin chisyijen ebꞌnaj tzet chawal yinh sunilbꞌal tiempo, xhi ebꞌnaj.

8 Yajaꞌ mach yabꞌeto yaꞌ Roboam tzet yal ebꞌnaj ichamta winaj tuꞌ, isqꞌambꞌenpaxo yaꞌ tzet wal yuni huneꞌ qꞌambꞌebꞌal tuꞌ tet ebꞌnaj yet tzehal ayko iskꞌatanh, ebꞌnaj yet chꞌibꞌom yaꞌ. 9 Yalni yaꞌ tet ebꞌnaj:

—Haꞌ konhobꞌ tiꞌ, chiyoche tato chiwilojan hanikꞌ yalil isyaꞌtajil munil yaqꞌ inmaman tet, ¿tzet cheyute heyalni wetan yinh huneꞌ tiꞌ? xhi yaꞌ tet ebꞌnaj.

10 Istaqꞌwi ebꞌnaj tzeh tet yaꞌ:

—Hak tiꞌ chawute hapajtzen tet ebꞌnaj chiyoche chawilo hanikꞌo yalil isyaꞌtajil munil yaqꞌ hamam tet hakaꞌ tiꞌ: “Haꞌ nichꞌan yiximal inqꞌabꞌan, ekꞌbꞌalto nimajal yinh sata yikta inmaman. 11 Haꞌ inmamtuꞌan yaqꞌ munil kaw yaꞌta teyet, yajaꞌ wal hinan ekꞌna chiwayojan yalil isyaꞌtajil munil teyibꞌanh. Kexismaqꞌ inmaman yu tzꞌum, wal hinan xin, chiwakojan chꞌen chꞌen yinh iswiꞌ noꞌ tzꞌum tuꞌ, kat wanaytojan teyinh, yunhe heyabꞌen isyaꞌil,” kachi, xhi ebꞌnaj tet yaꞌ.

12 Haxa yinh yox tzꞌayik, yapni yaꞌ Jeroboam yebꞌ konhobꞌ Israel iskꞌatanh yaꞌ rey Roboam, hakaꞌtikꞌa yu yalni yaꞌ tet ebꞌnaj tato hato yinh oxebꞌ tzꞌayik chiꞌapni ebꞌnaj iskꞌatanh yaꞌ. 13 Yajaꞌ kaw yaꞌ ispaj istzotiꞌ konhobꞌ tuꞌ yaqꞌ yaꞌ, yuto mach yabꞌeto yaꞌ tzet yal ebꞌnaj ichamta winaj. 14 Wal xin haꞌ tzet yal ebꞌnaj tzeh tet yaꞌ, haꞌ yal yaꞌ tet konhobꞌ tuꞌ, yalni yaꞌ hakaꞌ tiꞌ: «Haꞌ inmamtuꞌan yaqꞌ munil kaw yaꞌta teyet, yajaꞌ wal hanintiꞌan, ekꞌna chiwayojan yalil munil teyibꞌanh; yaqꞌ inmaman tzꞌum heyijaꞌ, wal hinan xin chiwakojan chꞌen chꞌen yinh iswiꞌ noꞌ tzꞌum tuꞌ chiwaqꞌnihan heyijaꞌ yunhe heyabꞌen isyaꞌil,» xhi yaꞌ. 15 Mach yabꞌeto yaꞌ rey Roboam tzet isqꞌan konhobꞌ Israel, yuto hak tuꞌ nabꞌil yu Komam Dios, Jahawil, yunhe yijni isbꞌa tzet yalkano yaꞌ Ahías, silonita tet yaꞌ Jeroboam, iskꞌahol naj Nabat, yu chejbꞌanile tzet yal Komam Dios. 16 Hayet yilni konhobꞌ Israel tato mach yabꞌeto yaꞌ rey Roboam tzet isqꞌana, yalni ebꞌnaj tet yaꞌ hakaꞌ tiꞌ:

Ispaxto konhobꞌ Israel tuꞌ yul ismantiado.^b 17 Yajaꞌ ok yaꞌ Roboam tuꞌ reyal yinh anma Israel ay yulaj ismajul Judá. 18 Lahwi tuꞌ ischejnito yaꞌ rey Roboam naj Adoram xol ebꞌnaj Israel, yuto haꞌ naj yahawil yeko yinh ebꞌnaj chiꞌalaxiko yinh munil; yajaꞌ isqꞌojkamo ebꞌnaj Israel naj. Hayet yabꞌen yaꞌ Roboam huneꞌ tuꞌ, yahto yaꞌ yul iscarruaje yinh anhe, yelkanh yaꞌ, isto yaꞌ bꞌey Jerusalén.^c 19 Hak tuꞌ yu ispohnilo isbꞌa ebꞌnaj Israel xol yuninal yaꞌ David, masanto tinanh.

20 Haxa yet yabꞌenilo konhobꞌ Israel tato xameltzoti yaꞌ Jeroboam bꞌey Israel, yanito ebꞌnaj yiqꞌomal yaꞌ, yalaxiko yaꞌ sata konhobꞌ Israel, yaniko ebꞌnaj yaꞌ Jeroboam tuꞌ isreyalo Israel, machi xin hunu majan ebꞌnaj Israel ok tzujno yinta ebꞌnaj yuninal yaꞌ David, kachannhe ebꞌnaj Judá ok tzujnoj.

21 Hayet yapni yaꞌ rey Roboam bꞌey Jerusalén, iskutxbꞌaniko yaꞌ ebꞌnaj Judá yebꞌ ebꞌnaj Benjamín; 180 mil isbꞌisil ebꞌnaj yinh sunil. Ebꞌnaj tuꞌ sikꞌlaxilo ebꞌnaj, yuto kaw helan ebꞌnaj yinh howal, kutxiko ebꞌnaj yunhe yaniko ebꞌnaj howal yinh ebꞌnaj Israel, yunhe ismeltzo ebꞌnaj yalanh yip yaꞌ Roboam, iskꞌahol yaꞌ Salomón. 22 Yajaꞌ tzotel Komam Dios Jahawil tet yaꞌ Semaías, ischejabꞌ Komam, yalni Komam tet yaꞌ: 23 «Okanh tzotelo tet yaꞌ rey Roboam, iskꞌahol yaꞌ Salomón, isreyal ebꞌnaj Judá, yebꞌ tet sunil yikꞌal yaꞌ Judá, yebꞌ tet yikꞌal yaꞌ Benjamín yebꞌ tet hunteqꞌanxa konhobꞌ: 24 “Hak tiꞌ yute yalni Komam Dios Jahawil hakaꞌ tiꞌ: Mach chexto heyaqꞌaꞌko howal yinh heyuxhta, haꞌ ebꞌnaj Israel, wal xin meltzohanhwe hunun hex heyatut, yuto hak tuꞌ el yinh inkꞌulan, ta hak tuꞌ chiyuhi,” xhi Komam, kachi tet yaꞌ rey,» xhi Komam tet yaꞌ Semaías, ischejabꞌ Komam.

Hayet yabꞌen ebꞌnaj hakaꞌ tuꞌ, ismeltzo ebꞌnaj yatut, hakaꞌtikꞌa yu yalni Komam.

25 Iswatxꞌenkanh yaꞌ Jeroboam konhobꞌ Siquem ay bꞌey txꞌotxꞌ chewal txꞌotxꞌ Efraín, yehayo yaꞌ bꞌey tuꞌ. Lahwi tuꞌ yel yaꞌ bꞌey Siquem, iswatxꞌenkanh yaꞌ konhobꞌ Penuel.^d 26 Istzotel yanma yaꞌ rey Jeroboam hakaꞌ tiꞌ: «Wal tinanh, chimeltzopaxiko konhobꞌ tiꞌ yalanh yip ebꞌnaj yuninal yaꞌ David. 27 Tato chito yaqꞌaꞌ isxahanbꞌal bꞌey yul Yatut Komam Dios Jahawil, bꞌey Jerusalén chimyaqꞌaꞌko isnabꞌal yinh yaꞌ rey Roboam, isreyal Judá, kat kinismaqꞌnikamojan, kat yokkano tzujno Israel tiꞌ yinta yaꞌ Roboam hunelxa,» xhi yaꞌ.

28 Haxa yet lahwi isqꞌambꞌenilo yibꞌanhilo huneꞌ tuꞌ tet ebꞌnaj ayko iskꞌatanh, iswatxꞌen yaꞌ yechel kakꞌonh noꞌ tzehla wakax oronhe, yalni yaꞌ tet konhobꞌ Israel: «Txꞌiꞌalxa habꞌil heyichiko hebꞌeykꞌo bꞌey Jerusalén, wal tinanh hex Israel, ay hediosal lah, haꞌ kabꞌebꞌ yechel hediosal tiꞌ, haꞌ kexinilo sat txꞌotxꞌ Egipto,» xhi yaꞌ.^e 29 Yanikanh yaꞌ huneꞌ yechel wakax tuꞌ bꞌey Bet-el, hunxa xin bꞌey Dan. 30 Yu huneꞌ tuꞌ yuxin ok ismul anma, yuto hata bꞌey konhobꞌ Dan chibꞌeykꞌo yiqꞌayo isbꞌa sata yechel huneꞌ wakax tuꞌ. 31 Iswatxꞌenpaxokanh yaꞌ Jeroboam yatut tioxh yinh iswiꞌla wonhan, yaniko yaꞌ ebꞌnaj komon sacerdote, mach levitaho xol konhobꞌ. 32 Yalni yaꞌ Jeroboam tato chiꞌekꞌtzelax huneꞌ niman qꞌinh yinh 15 (isholanhebꞌ) tzꞌayik yinh iswaxajebꞌ ixahaw yinh huneꞌ habꞌil tuꞌ, hakaꞌ huneꞌ niman qꞌinh chiꞌekꞌtzelax bꞌey Judá, isnhusni yaꞌ xahanbꞌal yibꞌanh huneꞌ mexha. Haktikꞌapax tuꞌ yute yaꞌ bꞌey Bet-el, yalten yaꞌ xahanbꞌal tet yechel wakax iswatxꞌe. Yanipaxiko yaꞌ ebꞌnaj sacerdote yu ismunla yul yatut tioxh iswatxꞌekanh yinhla iswiꞌ wonhan. 33 Yalten yaꞌ Jeroboam xahanbꞌal yibꞌanh mexha iswatxꞌe bꞌey Bet-el. Haꞌ yinh 15 (isholanhebꞌ) tzꞌayik yinh iswaxajebꞌ ixahaw, yinh huneꞌ habꞌil tuꞌ yichekanh yaꞌ Jeroboam huneꞌ niman qꞌinh hakaꞌ chal iskꞌul, yalni yaꞌ ta haꞌ huneꞌ qꞌinh tuꞌ, haꞌ isqꞌinh anma Israel, haꞌ yinh huneꞌ tzꞌayik tuꞌ isnhus yaꞌ teꞌ pom yibꞌanh mexha yet xahanbꞌal.