3 Haꞌ yinh huneꞌ tzꞌayik tuꞌ, yaqꞌ ischejabꞌ Komam huneꞌ yechel, yalni hakaꞌ tiꞌ: «Haꞌ huneꞌ yechel tiꞌ, chiyeniloj tato haꞌ Komam Dios chejnhe hinan walnihan hunteqꞌan tzotiꞌ tiꞌ. Haꞌ huneꞌ ismexhahil xahanbꞌal tiꞌ chipohtoj, kat istixhmoto tanh aykanh yibꞌanh,» xhi ischejabꞌ Komam.

4 Hayet yabꞌen yaꞌ rey Jeroboam tzet yal ischejabꞌ Komam yinh ismexhahil yet xahanbꞌal, isyeto yaꞌ isqꞌabꞌ yinh ischejabꞌ Komam bꞌey ismexhahil yet xahanbꞌal tuꞌ, yalni yaꞌ: «Tzabꞌweyo huneꞌ naj tiꞌ,» xhi yaꞌ. Yajaꞌ haꞌ isqꞌabꞌ yaꞌ yeni tuꞌ, tajiloj, matxa yu ismeltzonti yaꞌ yuto kawtejiloj. 5 Ispohto huneꞌ ismexhahil yet xahanbꞌal, istixhmoto tanh aykanh yibꞌanh hakaꞌtikꞌa yechel ischej Komam Dios ta chal ischejabꞌ. 6 Yalni yaꞌ rey Jeroboam tet ischejabꞌ Komam Dios:

—Kaw chinqꞌanan tawet tato chaxhtxahli winhan tet Komam Dios, Jahawil, haDiosal, yu yanhcha inqꞌabꞌtiꞌan, xhi yaꞌ. Istxahli ischejabꞌ Komam yinh yaꞌ rey Jeroboam, yanhcha isqꞌabꞌ yaꞌ, iswatxꞌiloj. 7 Yalni yaꞌ rey tet ischejabꞌ Komam Dios:

—Tonh wintajan bꞌey watutan, kat hawaꞌi, chiwaqꞌnihan huneꞌ sabꞌehal tawet, xhi yaꞌ rey tet yaꞌ.

8 Yajaꞌ taqꞌwi ischejabꞌ Komam:

—Waxanhka chawaqꞌ yiktajo tzet ay bꞌey hawatut wetan, mach chintohan tawintaj. Hanintiꞌan mach chinwahan pan, mach chiwukꞌpaxojan ha haꞌ bꞌey huneꞌ txꞌotxꞌ tiꞌ; 9 yuto hak tuꞌ yu yalni Komam Dios, Jahawil wetan yet yalni: “Mach chawah pan, mach chawukꞌpaxo ha haꞌ bꞌey tuꞌ, haxa yet chachmeltzohi, nanxa bꞌehal bꞌay kaw hatita,” xhi Komam wetan, xhi yaꞌ chejabꞌ tuꞌ.

10 Yuxin nanxa bꞌehal bꞌay paxto ischejabꞌ Komam Dios, matxa xin meltzo yul bꞌeh bꞌay apni, yet yapni bꞌey Bet-el.

11 Haꞌ yinh hunteqꞌan tzꞌayik tuꞌ, ay huneꞌ ischejabꞌ Komam Dios kaw ichamxa ay bꞌey Bet-el, yapni ebꞌnaj iskꞌahol yaꞌ yalno tet yinh sunil tzet iswatxꞌe ischejabꞌ Komam yinh huneꞌ tzꞌayik tuꞌ bꞌey Bet-el, yalnipaxo ebꞌnaj tet ismam tuꞌ yinh tzet yal ischejabꞌ Komam tet yaꞌ rey Jeroboam. 12 Isqꞌambꞌen icham tet iskꞌahol tuꞌ:

—¿Tzet bꞌehal bꞌay mato ischejabꞌ Komam Dios tuꞌ? xhi icham.

Isyeni ebꞌnaj bꞌeh bꞌay meltzo ischejabꞌ Komam Dios ispeto bꞌey Judá. 13 Lahwi tuꞌ yalni icham tet iskꞌahol:

—Awekanh istzꞌum noꞌ burro, xhi icham.

Yanikanh ebꞌnaj istzꞌum noꞌ, yahto icham yibꞌanh noꞌ. 14 Isto icham istzujnoyo ischejabꞌ Komam Dios, hayet yapni icham tuꞌ tzꞌonhanayo ischejabꞌ Komam yich huneꞌ teꞌ hih istiꞌ bꞌeh. Isqꞌambꞌen icham tet ischejabꞌ Komam:

—¿Ham hach tiꞌ ischejabꞌ Komam Dios ispeto bꞌey Judá? xhi icham. Istaqꞌwi ischejabꞌ Komam:

—Hoꞌ, haninan, xhi.

15 Yalni icham tet ischejabꞌ Komam tuꞌ:

—Tonh inkꞌatanhan bꞌey watutan, kat hawani pan, xhi icham.

16 Yajaꞌ taqꞌwi ischejabꞌ Komam:

—Mach chu inmeltzohan tawintaj, mach chu inwanipaxojan pan, maka wukꞌnihan ha haꞌ tawinta bꞌey tiꞌ, 17 yuto haꞌ Komam Dios halni wetan hakaꞌ tiꞌ: “Mach chawah pan, mach chawukꞌpaxo haꞌ bꞌey tuꞌ, hayet kach meltzohi, nanxa bꞌehal bꞌay chaxhtita,” xhi wetan, xhi ischejabꞌ Komam.

18 Yajaꞌ yako icham leqꞌtiꞌal, yalni icham:

—Hanintiꞌan ischejabꞌpaxo Komam Dios wehan hakaꞌ hach tiꞌ, ay xin huneꞌ yángel Komam Dios Jahawil matzotel wetan yu chiwalan tawet tato chachmeltzo wintajan, kat hawani pan, kat hawukꞌni ha haꞌ bꞌey watutan, xhi icham.

19 Hak tuꞌ yu ismeltzo ischejabꞌ Komam yinta icham bꞌey yatut, iswahni pan yukꞌni ha haꞌ.

20 Haxa yet ayko sat mexha, istzotel Komam Dios Jahawil tet ischejabꞌ, icham bꞌey aqꞌno meltzoho ischejabꞌ Komam Dios tuꞌ. 21 Yalni icham yinh kaw ip tet ischejabꞌ Komam ispeto bꞌey Judá: «Hak tiꞌ chiyute yalni Komam Dios Jahawil: Yu maxamanhkꞌo yinh tzet yal Komam Dios Jahawil tawet, machi xin hakꞌubꞌa chejbꞌanile yaqꞌ Komam Dios Jahawil, haDiosal. 22 Makaxhmeltzotij, maxawahni pan, maxawukꞌnipaxo haꞌ bꞌay yal Komam tato mach chawukꞌu, yuxin mach chimujlax hanimanil bꞌay mujan isnimanil hamam,» xhi icham.

23 Haxa yet islahwi iswahni ischejabꞌ Komam pan, yebꞌ yukꞌni ha haꞌ; haꞌ icham bꞌey iqꞌwal yinh ischejabꞌ Komam tuꞌ, haꞌ icham anikanh isxhila noꞌ burro. 24 Ispaxto ischejabꞌ Komam, yajaꞌ haxa yet ayko yinh isbꞌel, yelilo huneꞌ noꞌ bꞌalam, iskam ischejabꞌ yu noꞌ. Iskankano pakꞌno isnimanil ischejabꞌ Komam yul bꞌeh, yokkano linhno noꞌ burro yebꞌ noꞌ bꞌalam iskꞌatanh isnimanil. 25 Haxa yet yekꞌto hunteqꞌan ebꞌnaj bꞌey tuꞌ, yilni ebꞌnaj isnimanil ischejabꞌ Komam pakꞌanayo yul bꞌeh, yilnipaxo ebꞌnaj noꞌ bꞌalam linhankanh iskꞌatanh isnimanil. Haxa yet yapni ebꞌnaj yul konhobꞌ yalni ebꞌnaj tzet yil tuꞌ tet icham ischejabꞌ Komam. 26 Hayet yabꞌen icham ischejabꞌ Komam Dios, bꞌey aqꞌno meltzoho ischejabꞌ Komam, yalni icham: «Haꞌ ischejabꞌ Komam tiꞌ, ismanhkꞌo tzet yal Komam Dios Jahawil, yuxin yako Komam yul isqꞌabꞌ noꞌ bꞌalam, makam ischejabꞌ Komam yu noꞌ hakaꞌtikꞌa yu yalni Komam tet,» xhi icham.

27 Lahwi tuꞌ yalni icham tet ebꞌnaj iskꞌahol: «Awekanh isxhila hunu noꞌ burro,» xhi icham. Yanikanh ebꞌnaj kꞌahole isxhila noꞌ. 28 Isto icham ischejabꞌ Komam Dios yilnoj, yapni icham bꞌay pakꞌanayo isnimanil ischejabꞌ Komam yul bꞌey, linhankanh xin noꞌ burro yebꞌ noꞌ bꞌalam iskꞌatanh isnimanil. Mach xin iskꞌuxto noꞌ bꞌalam tuꞌ isnimanil ischejabꞌ Komam, machi xin tzet yutepaxo noꞌ, noꞌ burro. 29 Yinikanh icham isnimanil ischejabꞌ Komam Dios, yanahto icham yibꞌanh isburro, ismeltzo icham bꞌey iskonhobꞌ, yoqꞌ anma yu bꞌiskꞌulal yinh ischejabꞌ Komam Dios tuꞌ, lahwi tuꞌ xin ismujlaxi. 30 Ismuj icham ischejabꞌ Komam Dios yul ispantionh, yok icham oqꞌo yinh, yalni icham: «¡Kꞌanchꞌan hach wuxhtaj!» xhi icham.

31 Haxa yet lahwi ismujnikano icham ischejabꞌ Komam, yalni icham tet ebꞌnaj iskꞌahol: «Hayet chinkaman hatiꞌ chinhemujan bꞌay manmujan ischejabꞌ Komam Dios tiꞌ, haꞌ bꞌay ayikto isbꞌajil tiꞌ, haꞌ tiꞌ chinheyaktojan, 32 yuto masan chiyij isbꞌa tzet ischej Komam Dios Jahawil yalaꞌ ischejabꞌ Komam yinh kaw ip sata ismexhahil xahanbꞌal bꞌey Bet-el tiꞌ, yebꞌ tzet yal ischejabꞌ Komam yinh yatut tioxh aykanh iswiꞌla wonhan, yulaj konhobꞌ ay sat txꞌotxꞌ Samaria,» xhi icham.

33 Waxanhka yij isbꞌa sunil tiꞌ, yajaꞌ mach isbꞌejkano yaꞌ Jeroboam iswatxꞌen istxꞌojal, wal xin yako yaꞌ ebꞌnaj sacerdote xol ebꞌnaj Israel yunhe ismunla yul yatut tioxh. Makxanhetikꞌa chiꞌochen yok sacerdotehal, haꞌ chako yaꞌ yinh ismunla yulaj yatut tioxh. 34 Haꞌ tzet iswatxꞌe yaꞌ Jeroboam tiꞌ, haꞌ ok ismuloj yebꞌ sunil yuninal, yuxin tanhtzelaxkanilo sunil yuninal yaꞌ Jeroboam tuꞌ, matxa hunu yikꞌal kani.