Tzotebꞌilkano yu yaꞌ Ahías yibꞌanhilo yaꞌ rey Jeroboam
14
Haꞌ yinh hunteqꞌan tzꞌayik tuꞌ, yabꞌiꞌay naj nichꞌan Abías, iskꞌahol yaꞌ Jeroboam. 2 Yuxin yal yaꞌ Jeroboam tet yixal: «Wal tinanh asiꞌ bꞌey Silo, helilo xil haqꞌap tiꞌ, kat hawaniko komon xilqꞌape tawinh, yunhe mach chachohtanhelaxi tato wixalan hawehi, yuto haꞌ bꞌey Silo tuꞌ ay yaꞌ Ahías, ischejabꞌ Komam Dios, yaꞌ halni wetan tato chinokan isreyalo konhobꞌ tiꞌ. 3 Kat hawinito 10 (lahonhebꞌ) pan yebꞌ ixim nime pan yebꞌ hunu xhalu noꞌ kabꞌ tet yaꞌ, haꞌ yaꞌ xin chihalno tawet yinh tzet chiꞌeliko nichꞌan inkꞌaholtiꞌan,» xhi yaꞌ tet yixal.4 Isyijen yixal yaꞌ Jeroboam huneꞌ tuꞌ, isto ix bꞌey Silo, yapni ix bꞌey yatut yaꞌ Ahías. Wal yaꞌ Ahías tuꞌ matxa chiyu yilni yaꞌ yu ichamil. 5 Yajaꞌ yal Komam Dios Jahawil tet yaꞌ hakaꞌ tiꞌ: «Haꞌ ix yixal yaꞌ Jeroboam chihulo ix isqꞌambꞌeꞌ tawet yinh nichꞌan yunin yaꞌay. Hayet chihul ix takꞌatanh, komon xil isqꞌabꞌ ix aykoj, hak tiꞌ xin chawute hawalni tet ix,» xhi Komam tet yaꞌ.
6 Haxa yet yabꞌen yaꞌ Ahías yay yoj ix yokapno yul pulta, yalni yaꞌ: «Okanh hach yixal yaꞌ Jeroboam, ¿tzet yinh xin helbꞌil xil haqꞌap yunhe mach chachtxumchalo wuhan? Hanintiꞌan chejbꞌil hinan walnihan isyaꞌtajil tawet. 7 Meltzohanh, kat hawalni tet yaꞌ Jeroboam tato hak tiꞌ chiyu yalni Komam Dios Jahawil, isDiosal Israel hakaꞌ tiꞌ: “Haninan kach insayilojan xol konhobꞌ, kach wanikojan isreyalo konhobꞌ Israel. 8 Wilojan konhobꞌ ayko yalanh yip yuninal yaꞌ David, wanikojan yalanh hawip, yajaꞌ xin mach yijemo hawute habꞌa, hakaꞌ yaꞌ David, inchejabꞌan. Yaꞌ David tuꞌ iskꞌubꞌa yaꞌ chejbꞌanile waqꞌan, yok tzujno yaꞌ wintajan yinh sunil yanma, hanhe xin istoholal iswatxꞌe yaꞌ insatajan. 9 Wal hach tiꞌ, ekꞌbꞌal istxꞌojal tzet chawatxꞌe sata ebꞌnaj rey ekꞌlena tasataj, yuto hawatxꞌe chꞌen chꞌen yechelo tioxh, hawatxꞌen komon dios hadiosaloj. Hawaqꞌnitij inhowalan, kinayahnikanilojan. 10 Yuxin chiwayojan isyaꞌtajil yibꞌanh makta ay yul hawatut, hach Jeroboam. Chintanhtzenilojan sunil ebꞌnaj winaj hawuninal bꞌey Israel, hach Jeroboam; ebꞌnaj yet isbꞌa ischukil, yebꞌ ebꞌnaj chejabꞌ. Chitzꞌistzꞌon intanhtzenilojan hawikꞌal yul hawatut hakaꞌ chu istzꞌislaxkanh istzaꞌ no noqꞌ, matxa hunu itzitz chikani. 11 Haꞌ ebꞌnaj yikꞌal yaꞌ Jeroboam chikam yul konhobꞌ, haꞌ metx txꞌiꞌ chikꞌuxnito isnimanil ebꞌnaj, haxa ebꞌnaj chikam xol ismunil, haꞌ noꞌ chꞌik chilojnito ischibꞌehal ebꞌnaj, yuto hak tuꞌ yalni Komam,” xhi ischejabꞌ Komam tuꞌ. 12 Wal hach tiꞌ xin, ahanhwanoj, paxanhto bꞌey hawatut, hayet chawanayo hawoj yinh istxam konhobꞌ tuꞌ, kat iskam nichꞌan hawunin. 13 Kat yoqꞌ anma Israel yu bꞌiskꞌulal yinh, kat ismujlaxi, yuto hanhe nichꞌan unin tuꞌ chimujlax xol sunil yuninal yaꞌ Jeroboam, yuto hanhechꞌan nichꞌan unin tuꞌ bꞌay chiꞌilchalo iskꞌulal yu Komam Dios Jahawil, isDiosal ebꞌnaj Israel. 14 Yinh tzꞌayik chito tiꞌ, chako Komam Jahawil hunuxa yaꞌ rey xol Israel, haꞌ yaꞌ tuꞌ xin chitanhtzenilo sunil yikꞌal yaꞌ Jeroboam, yinh huneꞌ tzꞌayik tuꞌ. 15 Chistzikobꞌtanhe Komam Jahawil konhobꞌ Israel, hakaꞌ chu istzikobꞌtanhelax teꞌ ah yu ha haꞌ. Chishokꞌkanh Komam anma Israel sat huneꞌ txꞌo txꞌotxꞌ kaw kꞌul yaqꞌ tet jichmam, kat isqꞌojnito satakꞌto haꞌ Éufrates, yuto iswatxꞌe anma istioxh Asera, hak tuꞌ yu yaqꞌnitij anma ishowal yinh Komam Dios. 16 Haꞌ Komam chiꞌaniko Israel yul isqꞌabꞌ hunuxa niman konhobꞌ yu ismul yaꞌ Jeroboam yakoj, yijbꞌanpaxo yaꞌ ebꞌnaj Israel yanoko ismul,» xhi yaꞌ Ahías tet ix.
17 Yahwano ix yixal yaꞌ Jeroboam tuꞌ, ispaxto ix bꞌey Tirsa, haxa yet yokto ix yul ispultahil yatut, iskamayo nichꞌan unin tuꞌ. 18 Ismujlaxi, sunil anma Israel oqꞌ yu bꞌiskꞌulal yinh, hakaꞌtikꞌa yu yaqꞌni Komam Dios yalaꞌ yaꞌ Ahías, ischejabꞌ.
19 Haꞌ yetbꞌi hunteqꞌan tzet iswatxꞌe yaꞌ rey Jeroboam, yebꞌ yet yaqꞌni howal yaꞌ, yebꞌ yinh tzet yu yijbꞌan yaꞌ ebꞌnaj Israel, sunil tuꞌ tzꞌibꞌnhebꞌil yul hum chitzotel yinh ebꞌnaj isreyal Israel.a 20 22 (Kabꞌ iskawinaj) habꞌil ok yaꞌ Jeroboam isreyalo Israel, haxa yet iskam yaꞌ hakaꞌ yu iskam ismam icham yebꞌ ismam, yok yaꞌ Nadab, iskꞌahol yaꞌ reyal seleloj.
Yet yok yaꞌ Roboam isreyalo Judá
21 Wal yaꞌ Roboam, iskꞌahol yaꞌ Salomón, ok yaꞌ isreyalo Judá, 41 (huneꞌ yoxkꞌal) habꞌil yaꞌ, yet yok yaꞌ reyal, 16 (wajlahonhebꞌ) habꞌil xin ok yaꞌ reyalil bꞌey Jerusalén, huneꞌ konhobꞌ issikꞌilo Komam xol hunun majan ebꞌnaj Israel yu isbꞌinako isbꞌi Komam yinh. Haꞌ xin ix Naama, ah Amón ismiꞌ yaꞌ Roboam tuꞌ. 22 Haꞌ anma Judá iswatxꞌe istxꞌojal sata Komam Dios Jahawil, ekꞌna xin yako anma tuꞌ ishowal Komam yinh iskꞌul, sata sunil ismul ismam icham.
23 Yuto haꞌ anma Judá tuꞌ iswatxꞌepaxokanh bꞌay chiyiyo isbꞌa iswiꞌla wonhan, iswatxꞌen istioxh yebꞌ yechel tioxh Asera iswiꞌla wonhan yebꞌ yalanh ej teꞌ nimeta qꞌebꞌtaj. 24 Okpaxo ebꞌnaj winaj iswatxꞌe mule yebꞌ yet winajil. Iswatxꞌen ebꞌnaj sunil isyahbꞌetajil hakaꞌ iswatxꞌe nime konhobꞌ istzumbꞌelo Komam sata ebꞌnaj Israel tuꞌ.b
25 Howebꞌxa habꞌil yok yaꞌ Roboam reyal yet yaniko naj Sisac, isreyal Egipto, howal yinh Jerusalén. 26 Yinito naj Sisac tuꞌ sunil qꞌalomal ay yul Yatut Komam Dios Jahawil, yebꞌ qꞌalomal ay yul yehobꞌal yaꞌ rey. Sunil hunteqꞌan tuꞌ yelqꞌato naj, yinipaxto naj sunil chꞌen escudo chꞌen oro watxꞌebꞌil yu yaꞌ Salomón.c 27 Yuxin haxa chꞌen bronce yaqꞌ watxꞌe yaꞌ rey Roboam escudohal selel chꞌen yelqꞌato naj Sisac, yaniko yaꞌ chꞌen escudo tuꞌ yul isqꞌabꞌ ebꞌnaj capitán. Haꞌ xin ebꞌnaj aqꞌni chꞌen tet ebꞌnaj soldado chitanhen ispultahil yatut yaꞌ rey. 28 Hayet chibꞌeykꞌo yaꞌ rey Roboam hunta el yul Yatut Komam Dios Jahawil, chiyinito ebꞌnaj soldado, chitanhen yaꞌ rey tuꞌ, chꞌen escudo, haxa yet chimeltzo ebꞌnaj xin, kat iskꞌubꞌanto ebꞌnaj chꞌen yul iscuarto ebꞌnaj soldado chitanheni.
29 Sunil hunteqꞌan tzet iswatxꞌe yaꞌ rey Roboam tzꞌibꞌnhebꞌil yul hum chitzotel yinh tzetaj iswatxꞌe ebꞌyaꞌ isreyal Judá.
30 Aynhetikꞌa xin howal xol yaꞌ rey Roboam yebꞌ yaꞌ rey Jeroboam yulbꞌal hunteqꞌan habꞌil ok ebꞌyaꞌ reyal. 31 Lahwi tuꞌ iskam yaꞌ rey Roboam hakaꞌ yu iskamto ismam yebꞌ ismam icham, ismujlax yaꞌ bꞌay mujbꞌil ismam bꞌey iskonhobꞌ yaꞌ David. Haꞌ ismiꞌ yaꞌ rey Roboam tuꞌ Naama isbꞌi ix, ah konhobꞌ Amón ix. Haꞌ xin yaꞌ Abiam, iskꞌahol yaꞌ Roboam tuꞌ, ok reyal seleloj.