—Hex tiꞌ kaw heyohtaj tato konhobꞌ Ramot, ay yul ismajul Galaad jet yehi, tonhe xin chiꞌekꞌ kosat, machi jilo yul isqꞌabꞌ ebꞌnaj sirio tuꞌ, xhi yaꞌ.

4 Yalni yaꞌ Acab tuꞌ tet yaꞌ Josafat:

—¿Chimhawoche chachto jintajanh jaqꞌaꞌko howal yinh konhobꞌ Ramot ay yul ismajul Galaad? xhi yaꞌ. Istaqꞌwi yaꞌ Josafat:

—Hanintiꞌan lahan hakaꞌto hawuxhta wehan, yebꞌ inkonhobꞌan lahan hakaꞌpaxo hakonhobꞌ, yebꞌ inchehan lahan hakaꞌ hawetpaxo noꞌ, xhi yaꞌ.

5 Yalnipaxo yaꞌ Josafat:

—Yajaꞌ ayxikꞌa chaqꞌambꞌe tet Komam Jahawil bꞌabꞌel, xhi yaꞌ.

6 Yuxin iskutxbꞌako yaꞌ rey Israel 400 ebꞌyaꞌ ischejabꞌ Komam Dios, isqꞌambꞌen yaꞌ tet ebꞌyaꞌ:

—¿Tzet cheyute heyalni, chimkintohan waqꞌaꞌkojan howal yinh konhobꞌ Ramot, ay yul ismajul Galaad, mato mach chintohan? xhi yaꞌ. Istaqꞌwi ebꞌyaꞌ ischejabꞌ Komam:

—Asiꞌ, yuto haꞌ Komam Jahawil chiꞌaniko konhobꞌ tuꞌ yul haqꞌabꞌ, xhi ebꞌyaꞌ.

7 Yajaꞌ isqꞌambꞌepaxo yaꞌ Josafat:

—¿Machim hunuxa ischejabꞌ Komam Dios bꞌey tiꞌ bꞌay chikoqꞌambꞌepaxoj? xhi yaꞌ.

8 Istaqꞌwi yaꞌ isreyal Israel tet yaꞌ Josafat:

—Ayto huneꞌxa ischejabꞌ Komam bꞌay chu koqꞌambꞌen yinh tzet chu yalni Komam Jahawil, haꞌ ton yaꞌ Micaías, iskꞌahol yaꞌ Imla, kachannhe xin chichiwa inkꞌulan yinh yaꞌ yuto machi hunelo tiꞌ chiyal yaꞌ iskꞌulal winhan, wal xin hanhe isyaꞌtajil chiyal yaꞌ, xhi yaꞌ. Istaqꞌwi yaꞌ Josafat tet yaꞌ:

—Mach chawal hakaꞌ tuꞌ, xhi yaꞌ.

9 Yawten yaꞌ isreyal Israel huneꞌ naj ischejabꞌ, yalni yaꞌ tet naj: «As iti yaꞌ Micaías, iskꞌahol yaꞌ Imla yinh anhe,» xhi yaꞌ.

10 Yaꞌ Acab, isreyal Israel yebꞌ yaꞌ Josafat, isreyal Judá, ayko qꞌap xil isqꞌap ebꞌnaj rey yinh ebꞌyaꞌ, tzꞌonhanayo ebꞌyaꞌ yul isxhila yul txonhbꞌal, iskawilal istiꞌ ispultahil konhobꞌ Samaria. Sunil xin ebꞌyaꞌ ischejabꞌ Komam Dios ayko sata ebꞌyaꞌ rey tuꞌ chalni tzet chiꞌeliko yaꞌ isreyal Israel tuꞌ. 11 Wal naj Sedequías, iskꞌahol naj Quenaana, iswatxꞌe naj hunteqꞌan yechel yukꞌaꞌ noꞌ wakax, yaj hierro chꞌen yako naj, yalni naj: «Hak tiꞌ chiyute yalni Komam Jahawil hakaꞌ tiꞌ: “Haꞌ yu hunteqꞌan chꞌen hakaꞌ yukꞌaꞌ wakax tiꞌ, chetejkamo ebꞌnaj ah Siria masanto chetanhtzekanilo ebꞌnaj,” xhi Komam,» xhi naj.

12 Haktikꞌapax tuꞌ ebꞌyaꞌ ischejabꞌ Komam Dios lahannhe yalni ebꞌyaꞌ tet yaꞌ isreyal Israel hakaꞌ tiꞌ: «As ako howal yinh konhobꞌ Ramot, ay yul ismajul Galaad, hach chachqꞌoji yinh, yuto haꞌ Komam Jahawil chiꞌaniko ebꞌnaj yul haqꞌabꞌ,» xhi ebꞌyaꞌ.

13 Haꞌ naj chejabꞌ bꞌey inoti yaꞌ Micaías, yal naj tet yaꞌ hakaꞌ tiꞌ:

—Sunil ebꞌyaꞌ ischejabꞌ Komam Dios, lahannhe chu yalni ebꞌyaꞌ iskꞌulal yinh yaꞌ rey. Hakojabꞌ tuꞌ, hach tiꞌ, haꞌojabꞌ iskꞌulal chawal yinh yaꞌ, hakaꞌ yalni ebꞌyaꞌ tuꞌ, xhi naj.

14 Istaqꞌwi yaꞌ Micaías tet naj chejabꞌ tuꞌ:

—Haꞌ Komam Jahawil itzitz, haꞌ tzet chal Komam wetan haꞌ chiwalan, xhi yaꞌ.

15 Lahwi tuꞌ, isto yaꞌ Micaías iskꞌatanh yaꞌ rey Israel, hayet yapni yaꞌ yalni yaꞌ rey tet yaꞌ:

—Micaías, ¿tzet chawute hawalni? ¿Chimkintohan waqꞌaꞌkojan howal yinh konhobꞌ Ramot ay yul ismajul Galaad, mato machoj? xhi yaꞌ.

Istaqꞌwi yaꞌ Micaías:

—Asiꞌ, chachqꞌoji yinh, yuto haꞌ Komam Jahawil chiꞌaniko yul haqꞌabꞌ, xhi yaꞌ.

16 Yalni yaꞌ rey tet yaꞌ:

—Txꞌiꞌalxa el chiwalan tawet tato hanhe isyelal chawal wetan, chawaqꞌni bꞌinaho isbꞌi Komam Jahawil, xhi yaꞌ.

17 Istaqꞌwi yaꞌ Micaías tet yaꞌ:

—Wilan sunil Israel issajlemito iswiꞌla witz, hakaꞌ issajlemito noꞌ meꞌ machi mak chitanheni, yalni Komam Jahawil wetan: “Haꞌ hunteqꞌan anma tiꞌ, machi yahaw, kꞌul ta chimeltzoto yatut yinh aqꞌankꞌulal,” xhi Komam, xhi yaꞌ Micaías.

18 Yalni yaꞌ rey tet yaꞌ Josafat:

—Ilkꞌanabꞌ xin lah ¿Tom maxhtikꞌa walan tawet tato haꞌ huneꞌ yaꞌ tiꞌ, maxhtikꞌa nino iskꞌulal chiyal yaꞌ wibꞌanhilojan? Wal xin to hanhe isyaꞌtajil chiyal yaꞌ winhan, xhi yaꞌ. 19 Yalni yaꞌ Micaías xin:

—Abꞌe tzet chal Istzotiꞌ Komam Jahawil: “Wilan Komam Jahawil tzꞌonhan yul istzꞌonhobꞌal, sunil ebꞌnaj ejército ay satkanh ayko iskawilal Komam, ayko ebꞌnaj yinh iswatxꞌqꞌabꞌ Komam, aypaxiko ebꞌnaj yinh ismekqꞌabꞌ Komam. 20 Lahwi tuꞌ xin yalni Komam Jahawil: ¿Mak chiꞌiptzen yaꞌ Acab isto howal yinh konhobꞌ Ramot ayko yul ismajul Galaad yu iskam yaꞌ? Hak tuꞌ xin txꞌiꞌal mak halni, yaj nananta chu yalni. 21 Haxa eliko xin ay huneꞌ espíritu apni sata Komam Jahawil, yalni hakaꞌ tiꞌ: ‘Haninan chintubꞌtetojan yaꞌ,’ xhi. Isqꞌambꞌen Komam tet espíritu tuꞌ: ‘¿Tzet xin chu hatubꞌtento yaꞌ?’ xhi Komam. 22 Yalni: ‘Chintohan kat walnihan leqꞌtiꞌal yalaꞌ sunil ebꞌyaꞌ ischejabꞌ Komam tet yaꞌ rey Acab,’ xhi. Istaqꞌwi Komam Jahawil: ‘Tubꞌte yaꞌ, kat isyijeno yaꞌ tzet chawala. Asiꞌ xin, kat hawatxꞌen hakaꞌ hawalni tiꞌ,’ xhi Komam. 23 Yuxin haꞌ Komam Jahawil chejnhe huneꞌ espíritu aqꞌnhe leqꞌtiꞌal yalaꞌ ebꞌyaꞌ chejabꞌ tiꞌ, yajaꞌ wal Komam xayala tato haꞌ isyaꞌtajil chihul tawibꞌanh,” xhi yaꞌ Micaías tet yaꞌ rey Acab.

24 Hayet yalni yaꞌ Micaías hakaꞌ tuꞌ, ishitziko naj Sedequías, iskꞌahol naj Quenaana, ispaqꞌnilto naj isqꞌotx yaꞌ Micaías, yalni naj tet yaꞌ:

—¿Bꞌaytuꞌwal makaw istonako Yespíritu Komam Jahawil maꞌel winhan yu istzotel tawet, hach tiꞌ? xhi naj.

25 Istaqꞌwi yaꞌ Micaías:

—Chawilaꞌ yet huneꞌ tzꞌayikal yet chaxhekꞌ yul hunun nha yet chawebꞌano habꞌa, xhi yaꞌ.

26 Yalni yaꞌ rey Acab, isreyal Israel:

—Tzabꞌweyo yaꞌ Micaías tiꞌ, kat heyinito yaꞌ tet naj Amón, gobernador yinh konhobꞌ, yebꞌ tet naj Joás, inkꞌaholan. 27 Cheyal tet ebꞌnaj hakaꞌ tiꞌ: “Hak tiꞌ yalni yaꞌ rey: Awekto yaꞌ yul preso, nixhtenhe istiꞌ pan yebꞌ nixhtenhe haꞌ cheyaqꞌ tet yaꞌ masanto yet chinmeltzohan yinh aqꞌankꞌulal,” xhi yaꞌ rey.

28 Yalni yaꞌ Micaías tet yaꞌ rey Acab:

—Tato kꞌul chu hameltzohi, maxhtaj Komam Jahawil chihalni tzet mawalan tawet, xhi yaꞌ.

Lahwi tuꞌ xin yalnipaxo yaꞌ hakaꞌ tiꞌ: «Cheyabꞌekano hesunil hex wet konhobꞌ huneꞌ tiꞌ,» xhi yaꞌ Micaías.

29 Lahwi tuꞌ isto yaꞌ Acab, isreyal Israel yebꞌ yaꞌ Josafat isreyal Judá, yanoko howal yinh konhobꞌ Ramot ay yul ismajul Galaad. 30 Yalni yaꞌ rey Acab tet yaꞌ rey Josafat: «Nan chiwutelo hinbꞌahan yu hunu komon xilqꞌape chiwakojan yet chinokan xol howal, wal hach xin mach chawilo xil haqꞌap ayko tawinh,» xhi yaꞌ.

Ishelnilo yaꞌ rey Acab xil isqꞌap tuꞌ, yaniko yaꞌ xil isqꞌap soldado yinh, yok yaꞌ xol howal. 31 Yajaꞌ wal naj isreyal Siria xayal naj tet ebꞌnaj 32 (kabꞌlanhebꞌ iskawinaj) capitán yinh iscarruaje yet howal hakaꞌ tiꞌ: «Mach cheyako howal yinh ebꞌnaj soldado; ebꞌnaj ay yelapno maka ebꞌnaj mach yelapnoj, wal xin yinhnhe naj isreyal Israel cheyaqꞌ howal,» xhi naj tet ebꞌnaj capitán. 32 Hayet yilni ebꞌnaj capitán yaꞌ rey Josafat, yalni ebꞌnaj: «Haꞌ naj tiꞌ isreyal Israel,» xhi ebꞌnaj. Ishitziko ebꞌnaj iskꞌatanh yaꞌ yu yaniko ebꞌnaj howal yinh, yajaꞌ ah yaw yaꞌ Josafat. 33 Hayet yilni ebꞌnaj capitán tato maxhtaj yaꞌ isreyal Israel tuꞌ, yel ebꞌnaj iskꞌatanh yaꞌ. 34 Yajaꞌ xin ay huneꞌ naj soldado tonhe chisqꞌojto islitꞌ, kꞌuxan xin yapni yinh yaꞌ rey Acab, bꞌay chischah isbꞌa isxijbꞌanil chꞌen chꞌen yet howal ayko yinh yaꞌ, yuxin yal yaꞌ Acab tuꞌ tet naj lanhan yijbꞌali yinh noꞌ cheh nhikꞌnhe carruaje bꞌay ayahto yaꞌ: «Meltzo noꞌ cheh nhikꞌnhe carruaje tiꞌ, chinhawinilojan xol howal yuto niman inlahwilalan maꞌoki,» xhi yaꞌ.

35 Yajaꞌ xin yiqꞌkanh yip howal yinh huneꞌ tzꞌayik tuꞌ, ayahto xin yaꞌ rey Israel yul iscarruaje yet chiyaqꞌni howal ebꞌnaj Israel yebꞌ ebꞌnaj sirio. Haxa yet qꞌejbꞌiyal xin iskamayo yaꞌ rey Acab, malikꞌo ischikꞌil yaꞌ yul carruaje tuꞌ.

36 Haxa yet lanhanxa isto tzꞌayik yal-lax tet sunil ebꞌnaj soldado: «¡Paxanhweto hunun hex bꞌay ay hex! ¡Paxanhweto hunun hex sat hetxꞌotxꞌ! 37 Makam yaꞌ rey Acab,» xhi.

Yilaxto yaꞌ bꞌey konhobꞌ Samaria, ismujlax yaꞌ bꞌey tuꞌ. 38 Istxꞌahlaxilti ischikꞌil yaꞌ yul carruaje bꞌey huneꞌ ha haꞌ ay bꞌey Samaria, isleqꞌnikanh metx txꞌiꞌ ischikꞌil yaꞌ. (Haꞌ bꞌey huneꞌ ha haꞌ tuꞌ, haꞌ bꞌey tuꞌ chiꞌaxhni ebꞌix txꞌoj ye iswiꞌ.) Sunil tuꞌ yij isbꞌa hakaꞌtikꞌa yu yalni Komam Jahawil.

39 Haꞌ sunil hunteqꞌanxa tzet iswatxꞌe yaꞌ rey Acab yebꞌ sunil tzet yu yaꞌ, yebꞌ istzotiꞌal yatut yaꞌ iswatxꞌekanh, marfilnhe okniko yinh, yebꞌ istzotiꞌal ej nime konhobꞌ iswatxꞌe yaꞌ, tzꞌibꞌnhebꞌil yul hum chitzotel yinh ebꞌyaꞌ isreyal Israel.^a 40 Hayet iskam yaꞌ rey Acab, yok yaꞌ Ocozías, iskꞌahol yaꞌ, seleloj.

41 Hayet kanhebꞌxa habꞌil yok yaꞌ Acab isreyalo Israel, yok yaꞌ Josafat, iskꞌahol yaꞌ Asa isreyalo Judá. 42 35 (Holanhebꞌ iskawinaj) habꞌil yaꞌ Josafat yet yok yaꞌ reyalil. 25 (Howebꞌ iskawinaj) habꞌil ok yaꞌ reyal bꞌey konhobꞌ Jerusalén. Wal isbꞌi ismiꞌ yaꞌ xin Azuba, isbꞌi ix, iskutzꞌin naj Silhi ye ix.

43 Yaꞌ Josafat isbꞌeybꞌalnhe yaꞌ iskꞌulal hakaꞌ isbꞌeybꞌal ismam, haꞌ ton yaꞌ Asa. Machi xin ishekꞌilo isbꞌa yaꞌ yinh iskꞌulal, wal xin hanhkꞌanhe istoholal iswatxꞌe yaꞌ sata Komam Jahawil. Kachannhe xin mach ischej yaꞌ ilaxolo hunteqꞌan bꞌay chitxahli anma tet istioxh iswiꞌla witz, yuto haꞌ bꞌey tuꞌ chiyaqꞌ konhobꞌ tuꞌ isxahanbꞌal, chisnhusnipaxo teꞌ pom bꞌey tuꞌ. 44 Istꞌinhbꞌakano yaꞌ Josafat istzotiꞌ yok yinh aqꞌankꞌulal yebꞌ yaꞌ isreyal Israel. 45 Haꞌ hunteqꞌanxa tzet iswatxꞌe yaꞌ Josafat, yebꞌ yip yaꞌ, yebꞌ howal yaqꞌ yaꞌ, tzꞌibꞌnhebꞌil yul hum chitzotel yinh ebꞌyaꞌ rey Judá. 46 Yaꞌ Josafat, istanhtzelo yaꞌ isbꞌeybꞌal ebꞌnaj winaj chiwatxꞌen mule yebꞌ yet winajil, hunteqꞌan istxꞌojal yaqꞌle ismam yaꞌ Josafat istanhtzeniloj, haꞌ ton yaꞌ rey Asa. 47 Haꞌ yinh hunteqꞌan habꞌil tuꞌ, mach isreyal konhobꞌ Edom, kachannhe ebꞌnaj gobernador ayko selelo ebꞌnaj rey.

48 Yaꞌ Josafat, iswatxꞌe yaꞌ teꞌ barco hakaꞌ teꞌ chiwatxꞌi bꞌey txꞌotxꞌ Tarsis, yunhe yilaxto teꞌ iqꞌo oro bꞌey txꞌotxꞌ Ofir; yajaꞌ matxa yito ebꞌnaj teꞌ yuto pohto teꞌ bꞌey konhobꞌ Ezión-geber.^b 49 Yuxin yal yaꞌ Ocozías, iskꞌahol yaꞌ Acab tet yaꞌ Josafat: «Tojabꞌ ebꞌnaj inmunlawoman munlaho yinta ebꞌnaj hamunlawom yinh teꞌ barco tuꞌ,» xhi yaꞌ. Yajaꞌ xin mach isje yaꞌ Josafat.

50 Iskam yaꞌ Josafat hakaꞌ yu iskamto ismam icham yebꞌ ismam yaꞌ, ismujlax yaꞌ bꞌay mujbꞌil ismam bꞌey iskonhobꞌ yaꞌ David, yichmam yaꞌ. Yok yaꞌ Joram reyalo seleloj ismam.

51 Hayet 17 (hujlahonhebꞌxa) habꞌil yok yaꞌ Josafat isreyalo Judá, yok yaꞌ Ocozías, iskꞌahol yaꞌ Acab isreyalo Israel bꞌey Samaria.

52 Yaꞌ Ocozías tuꞌ, haꞌ istxꞌojal iswatxꞌe yaꞌ sata Komam Jahawil, isbꞌeybꞌalnhen yaꞌ istxꞌojal iswatxꞌe ismam yebꞌ istxꞌojal iswatxꞌe ismiꞌ. Isbꞌeybꞌalnhenpaxo yaꞌ istxꞌojal iswatxꞌe yaꞌ Jeroboam, iskꞌahol naj Nabat, yet yijbꞌan yaꞌ konhobꞌ Israel yanoko ismul. 53 Yok tzujno yaꞌ yinta tioxh Baal, yinayo isbꞌa yaꞌ tet, iswatxꞌen yaꞌ sunil istxꞌojal iswatxꞌe ismam yet yalanhtokanoj. Yu tzet iswatxꞌe yaꞌ tuꞌ, yuxin tit ishowal Komam Jahawil, isDiosal konhobꞌ Israel.