—Aqꞌ hatxꞌotxꞌ wetan bꞌay tzꞌunbꞌil teꞌ uva hawu, yuto chiwochehan intzꞌunuꞌan itah sat txꞌotxꞌ, yebꞌ xin yuto kawil yeko txꞌotxꞌ yinh watutan. Ta chawoche chiwaqꞌan hunxa selel txꞌotxꞌ ekꞌbꞌalto kaw kꞌul tawet, maka chinloqꞌan txꞌotxꞌ tawet, xhi yaꞌ.

3 Istaqꞌwi naj Nabot tet yaꞌ Acab:

—Mach isje iskꞌul Komam Jahawil ta chintxonhilojan intxꞌotxꞌan aqꞌbꞌil yu inmaman inmajulojan, xhi naj.

4 Lahwi tuꞌ isto yaꞌ Acab bꞌey yatut, kaw yiqꞌ bꞌiskꞌulal yaꞌ yebꞌ xin tit ishowal yaꞌ yu tzet yal naj Nabot ah Jezreel hakaꞌ tiꞌ: «Machi waqꞌan intxꞌotxꞌan tawet, txꞌotxꞌ aqꞌbꞌil wetan inmajulojan yu inmaman,» xhi naj. Hayet yapni yaꞌ rey bꞌey yatut, isto yaꞌ ishilbꞌano isbꞌa sat istxꞌat, ismeltzoniko isbꞌa yaꞌ yinh sat bꞌitzꞌabꞌ, mach xin isjepaxo yaꞌ waꞌoj. 5 Yapni ix Jezabel yixal yaꞌ iskꞌatanh, yalni ix:

—¿Tzet yinh xin kaw bꞌiskꞌulal hawehi, mach xin chajepaxo waꞌoj? xhi ix tet yaꞌ.

6 Istaqꞌwi yaꞌ:

—Kintzotelan tet naj Nabot ah Jezreel, walnihan tet naj ta chistxonhto naj istxꞌotxꞌ wetan bꞌay tzꞌunbꞌil teꞌ uva, maka ta chiyoche naj chiwaqꞌan hunuxa selel txꞌotxꞌ tet naj, yajaꞌ yal naj tato mach chistxonhto naj txꞌotxꞌ, xhi yaꞌ.

7 Yalni ix Jezabel tuꞌ tet yaꞌ:

—Matzet chal hakꞌul, ¿tom mach yahawilo konhobꞌ Israel hawehi? Ahanhwanoj, kat hawaꞌi, tzalahojabꞌ hawanma, yuto haninan chiwaqꞌan istxꞌotxꞌ naj Nabot ah Jezreel tawet, xhi ix tet yaꞌ.

8 Lahwi tuꞌ istzꞌibꞌnhen ix hunteqꞌan teꞌ carta, yaniko ix isbꞌi yaꞌ rey Acab yinh teꞌ, yanipaxiko ix issellohal isjolqꞌabꞌ yaꞌ rey yinh teꞌ, yanito ix teꞌ tet ebꞌnaj ichamta winaj Israel yebꞌ tet ebꞌnaj yahaw konhobꞌ bꞌay ay naj Nabot. 9 Haꞌ teꞌ carta istzꞌibꞌnheto ix tuꞌ, hak tiꞌ chiyute yalni teꞌ hakaꞌ tiꞌ: «Halwe tet konhobꞌ Israel ta mach chiwaꞌi yu istxahli, kat yalaxiko naj Nabot sata konhobꞌ tuꞌ, 10 kat heyaniko kawanho ebꞌnaj winaj isah, leqꞌtiꞌ chꞌok testigohal sata naj Nabot tuꞌ, chalni ebꞌnaj tato txꞌoj istzotel naj Nabot yinh Komam Dios yebꞌ yinh yaꞌ rey. Lahwi tuꞌ kat heyinilto naj istxam konhobꞌ, kat heqꞌojnikamo naj,» xhi teꞌ carta tuꞌ.

11 Sunil ebꞌnaj yet konhobꞌ naj Nabot yebꞌ ebꞌnaj ichamta winaj Israel yebꞌ ebꞌnaj yahawil konhobꞌ, isyije ebꞌnaj hakaꞌ yu yalnito ix Jezabel yul teꞌ carta. 12 Yalnito ebꞌnaj tet anma tato chiskutxbꞌako isbꞌa anma, mach xin chiwaꞌ yu istxahli, yaniko ebꞌnaj naj Nabot sata konhobꞌ. 13 Yapni kawanh ebꞌnaj winaj txꞌoj isnabꞌal, yay tzꞌonhno ebꞌnaj sata naj Nabot, isnahnikanh ebꞌnaj leqꞌtiꞌal yinh naj, yalni ebꞌnaj tet konhobꞌ hakaꞌ tiꞌ: «Naj Nabot tiꞌ, txꞌoj istzotel naj yinh Komam Dios yebꞌ yinh yaꞌ rey,» xhi ebꞌnaj. Lahwi tuꞌ yinito konhobꞌ naj Nabot istxam konhobꞌ, isqꞌojnikanh ebꞌnaj naj yu chꞌen chꞌen, iskam naj. 14 Lahwi tuꞌ, ischejni ebꞌnaj yalno tet ix Jezabel hakaꞌ tiꞌ: «Naj Nabot, makam naj, yuto maqꞌojlaxkanh naj yu anma,» xhito ebꞌnaj.

15 Hayet yabꞌen ix Jezabel tato qꞌojlaxkamo naj Nabot, yalni ix tet yaꞌ Acab: «Wal tinanh ahanhwanoj, hawetxa ye istxꞌotxꞌ naj Nabot ah Jezreel, txꞌotxꞌ mach isje naj istxonho tawet, yuto matxa naj, wal xin makam naj,» xhi ix.

16 Hayet yabꞌen yaꞌ Acab tato kam naj Nabot tuꞌ, yahwano yaꞌ, isto yaꞌ sat istxꞌotxꞌ naj Nabot ah Jezreel, yokkano txꞌotxꞌ yu yaꞌ xin. 17 Yajaꞌ tzotel Komam Jahawil tet yaꞌ Elías tisbita, yalni Komam tet yaꞌ: 18 «Ahanhwanoj, kat hato hawilno yaꞌ Acab, isreyal Israel bꞌey Samaria. Tinanh ay yaꞌ sat istxꞌotxꞌ naj Nabot, apni yaꞌ bꞌey tuꞌ yunhe yokkano istxꞌotxꞌ naj Nabot tuꞌ yu yaꞌ. 19 Hak tiꞌ xin chawute hawalni tet yaꞌ: “Haꞌ Komam Jahawil chihalni hakaꞌ tiꞌ: ‘Hach tiꞌ, maxawaqꞌkamo naj Nabot, hawinilo tzet ay naj,’ xhi Komam,” kachi. Chawalnipaxo tet yaꞌ: “Haꞌ Komam chihalni hakaꞌ tiꞌ: Haꞌtikꞌa bꞌay isleqꞌkanh metx txꞌiꞌ ischikꞌil naj Nabot, haꞌtikꞌa tuꞌ chisleqꞌpaxokanh metx txꞌiꞌ hachikꞌil,” kachi,» xhi Komam tet yaꞌ Elías.

20 Hayet yabꞌen yaꞌ Acab huneꞌ tuꞌ, yalni yaꞌ tet yaꞌ Elías:

—Wal tinanh, manchalohan hawu, chawaniko hahowal winhan, xhi yaꞌ. Istaqꞌwi yaꞌ Elías tet yaꞌ:

—Makaxhchaloh wuhan yuto maxawaqꞌ habꞌa hawatxꞌen istxꞌojal sata Komam Jahawil. 21 Yuxin chal Komam Dios: “Wal tinanh chiwayojan isyaꞌtajil tawibꞌanh, yu huneꞌ tuꞌ xin chꞌekꞌ tzꞌisbꞌal, kat intanhtzenilojan sunil hawikꞌal, chintanhtzenilojan sunil ebꞌnaj winaj yuninal hawuninal, ebꞌnaj chejabꞌ yebꞌ ebꞌnaj mach chejabꞌo ay yul konhobꞌ Israel. 22 Lahan chiꞌelkaniko hawatut hakaꞌ elkaniko yatut naj rey Jeroboam, iskꞌahol naj Nabat, yebꞌ hakaꞌ elkaniko yatut naj Baasa, iskꞌahol naj Ahías, yu hamul hawakoj hawaqꞌnitij inhowalan tawinh, yebꞌ yu hawijbꞌa ebꞌnaj Israel yaniko ismul,” xhi Komam. 23 Yalnipaxo Komam Jahawil yinh ix Jezabel hakaꞌ tiꞌ: “Wal ix Jezabel, haꞌ metx txꞌiꞌ chikꞌuxnito isnimanil ix bꞌey iskꞌubꞌal konhobꞌ Jezreel. 24 Haꞌ hawuninal chikam yul konhobꞌ, haꞌ metx txꞌiꞌ chikꞌuxnito isnimanil, haxa ebꞌnaj hawuninal chikam xol ismunil, haꞌ noꞌ chꞌik, chꞌekꞌ satkanh chilojnito isnimanil,” xhi Komam, xhi yaꞌ Elías.

25 (Machi hunuxa yaꞌ rey hakaꞌ yaꞌ Acab, yuto isqꞌan isbꞌa yaꞌ tet istxꞌojal sata Komam Jahawil, yuto haꞌ ix Jezabel, yixal yaꞌ, chejni iswatxꞌen istxꞌojal tuꞌ. 26 Yaꞌ Acab kaw yahbꞌeta tzet iswatxꞌe yaꞌ, yuto ok tzujno yaꞌ yinta hunteqꞌan tioxh, yinayo isbꞌa yaꞌ tet, isbꞌeybꞌalnhen yaꞌ sunil istxꞌojal iswatxꞌe ebꞌnaj amorreo, ebꞌnaj istzumbꞌelo Komam Jahawil sata ebꞌnaj Israel.)

27 Yajaꞌ hayet yabꞌen yaꞌ rey Acab sunil tzet yal yaꞌ Elías tuꞌ istzilnilo yaꞌ xil isqꞌap, yaniko yaꞌ hunteqꞌan xilqꞌape hakaꞌ saco kaw qꞌaqꞌiꞌ, yok yaꞌ txahloj, mach xin waꞌ yaꞌ yu istxahli. Machi xin chipáxilo yaꞌ xil isqꞌap hakaꞌ saco tuꞌ yet chiwayi, yinayo isbꞌa yaꞌ sata Komam Dios. 28 Yuxin tzotel Komam Jahawil tet yaꞌ Elías tisbita, yalni Komam: 29 «¿Chimhawil yinayo isbꞌa yaꞌ Acab insatajan? Wal xin yu chiyiyo isbꞌa yaꞌ insatajan, yuxin matxa chiwayojan isyaꞌtajil yibꞌanh yaꞌ yulbꞌal tiempo yet itzitzto yaꞌ, wal xin haꞌ yibꞌanh iskꞌahol yaꞌ chiwayojan isyaꞌtajil halbꞌilxa wuhan,» xhi Komam tet yaꞌ Elías.