4 Istaqꞌwi yaꞌ rey Acab: «Yubꞌojabꞌ hakaꞌ hawalni tiꞌ mam rey, hanintiꞌan yebꞌ sunil tzet ayinan hawet yehi,» xhi yaꞌ.

5 Lahwi tuꞌ, istopaxo ebꞌnaj ischejabꞌ naj rey Ben-adad hunelxa yalno tet yaꞌ rey Acab: «Hak tiꞌ yalni yaꞌ rey Ben-adad tawet: “Haꞌ chꞌen haplata yebꞌ chꞌen oro yebꞌ ebꞌix hawixal yebꞌ hawuninal, chawaqꞌ wetan, 6 yebꞌ xin hayet hekal hakaꞌ huneꞌ hora tiꞌ chinchejtojan inchejabꞌan ispichꞌaꞌ sunil yul hawatut yebꞌ yatut ebꞌnaj chimunla tawintaj, kat yinito ebꞌnaj sunil qꞌalomal ay yul heyatut tuꞌ,” xhi yaꞌ Ben-adad,» xhi ebꞌnaj.

7 Lahwi tuꞌ yawten yaꞌ rey Acab sunil ebꞌnaj ichamta winaj Israel, yalni yaꞌ tet ebꞌnaj:

—Ilwej yuto haꞌ naj Ben-adad haꞌ istxꞌojal chiyoche naj iswatxꞌe winhan, maxhtaj iskꞌulal; yati naj ebꞌnaj ischejabꞌ yalaꞌ wetan tato chiyilo naj ebꞌix wixalan yebꞌ wuninalan yebꞌ inplatahan yebꞌ chꞌen oro, yajaꞌ waltojan tet naj tato chiwaqꞌan tzet chisqꞌan naj tuꞌ, yuxin kaw txumweloj tzet kaw wal yuni hun tiꞌ, xhi yaꞌ.

8 Istaqꞌwi ebꞌnaj ichamta winaj yebꞌ konhobꞌ Israel:

—Mach chayije tzet chal naj, mach chawaqꞌpaxo tzet chisqꞌan naj tuꞌ, xhi ebꞌnaj.

9 Lahwi tuꞌ yalni yaꞌ rey Acab tet ebꞌnaj ischejabꞌ naj rey Ben-adad: «Halwe tet yaꞌ rey, wahawil tuꞌan hakaꞌ tiꞌ: “Chinyijehan tzet yal yaꞌ yet bꞌabꞌelal, yajaꞌ haꞌ tzet chiyal yaꞌ tinanh mach chinyijehan,” kexchi,» xhito yaꞌ rey Acab.

Yinito ebꞌnaj ischejabꞌ naj rey Ben-adad ispaj tzotiꞌ tuꞌ. 10 Tzujan tuꞌ xin yanipaxto naj Ben-adad ischejabꞌ yalnito hakaꞌ tiꞌ: «Yaqꞌabꞌti hunteqꞌan tioxh isyaꞌtajil wibꞌanhan ta mach chintanhtzelojan konhobꞌ Samaria, wal xin haꞌ ispojojal Samaria tuꞌ, mach chabꞌe hunun bꞌetx yul isqꞌabꞌ ebꞌnaj chimunla inkꞌatanhan,» xhi naj.

11 Haxa yaꞌ isreyal Israel halnito tet naj Ben-adad hakaꞌ tiꞌ: «Mach istzanoj tato chiyanako ismay mak anmahil lanhan isto yinh howal sata mak lanhan ismeltzohi,» xhito yaꞌ rey Acab.

12 Hayet ismeltzo ebꞌnaj ischejabꞌ naj rey Ben-adad bꞌey campamento, ukꞌu teꞌ chu naj Ben-adad yebꞌ hunteqꞌanxa ebꞌnaj rey tzujan yintaj. Yalni ebꞌnaj chejabꞌ tuꞌ tet naj yinh tzet yu yalni yaꞌ rey Acab, yuxin yal naj Ben-adad tet issoldado: «Aweko howal,» xhi naj. Yuxin iswatxꞌe isbꞌa ebꞌnaj soldado yaniko howal yinh konhobꞌ.

13 Haꞌ yinh tuꞌ xin yapni huneꞌ ischejabꞌ Komam Dios iskꞌatanh yaꞌ Acab, isreyal Israel, yalni ischejabꞌ Komam:

—Hak tiꞌ yalni Komam Jahawil hakaꞌ tiꞌ: “Haꞌ huntenan ebꞌnaj ayko ishowal tawinh, chawil tiꞌ, haninan chiwakojan ebꞌnaj yul haqꞌabꞌ, yunhe hawohtanheniloj tato hanintiꞌan Dios hinan,” xhi Komam, xhi yaꞌ chejabꞌ tuꞌ.

14 Isqꞌambꞌen yaꞌ rey Acab:

—¿Mak xin chiꞌicheniko howal tuꞌ bꞌabꞌel? xhi yaꞌ.

Istaqꞌwi ischejabꞌ Komam:

—Hach tiꞌ, xhi yaꞌ.

15 Isbꞌisni yaꞌ Acab ebꞌnaj yahawil hunun majan ebꞌnaj Israel, 232 isbꞌisil ebꞌnaj. Isbꞌisnipaxo yaꞌ Acab sunil ebꞌnaj soldado ay yul hunun konhobꞌ Israel; hujebꞌ mil isbꞌisil ebꞌnaj. 16 Isto ebꞌnaj Israel yinh howal tuꞌ yinh chumanil. Wal naj Ben-adad yebꞌ ebꞌnaj 32 (kabꞌlahonhebꞌ iskawinaj) rey ayko yetbꞌiho naj yu iskolwahi, ukꞌu teꞌ chu ebꞌnaj yul iscampamento. 17 Yajaꞌ haꞌ ebꞌnaj yahawil hunun majan ebꞌnaj Israel bꞌabꞌito yanoko howal tuꞌ. Haꞌ naj Ben-adad xin yato naj huneꞌ ischejabꞌ, meltzo naj, yul naj yalnoj: «Ay ebꞌnaj ah Samaria lanhan istita,» xhi naj. 18 Yuxin yal naj Ben-adad hakaꞌ tiꞌ: «Tato aqꞌankꞌulal nabꞌil yu ebꞌnaj yuxin matit ebꞌnaj jinh, maka ta yu yaniko ebꞌnaj howal, tzabꞌweyo ebꞌnaj yinh yitzitztohal,» xhi naj.

19 Hayet yelto ebꞌnaj yahawil hunun majan ebꞌnaj Israel yinh howal tuꞌ, yok tzujno ebꞌnaj soldado Israel yinta ebꞌnaj. 20 Yichiko hunun ebꞌnaj Israel ispotxꞌni hunun ebꞌnaj issoldado naj Ben-adad, yelkanh ebꞌnaj sirio tuꞌ, tzumbꞌelax ebꞌnaj yu ebꞌnaj Israel, wal naj Ben-adad ahto naj yibꞌanh ischeh, yelkanh naj yebꞌ hunteqꞌanxa ebꞌnaj issoldado ayahto yibꞌanh cheh. 21 Istzujnayo yaꞌ isreyal Israel ebꞌnaj soldado sirio, ismaqꞌnikamo yaꞌ ebꞌnaj aykanh yibꞌanh cheh, yetanto yaꞌ iscarruaje ebꞌnaj, hak tuꞌ yu istanhtzelaxkanilo ebꞌnaj sirio yu ebꞌnaj Israel. 22 Lahwi tuꞌ yapni ischejabꞌ Komam Jahawil iskꞌatanh yaꞌ rey Acab hunelxa, yalni tet yaꞌ:

—Wal tinanh yilal hawaniko yinh hakꞌul, hasayni hunteqꞌanxa ebꞌnaj hasoldado, kat kaw hatxumni yinh tzet chawu, yuto yet huneꞌ habꞌil tinanh chihul naj rey ah Siria yaqꞌaꞌko howal tawinh hunelxa, xhi ischejabꞌ Komam.

23 Haꞌ ebꞌnaj yahawil issoldado naj rey ah Siria halni hakaꞌ tiꞌ:

—Haꞌ isDiosal ebꞌnaj Israel tiꞌ, isDiosal iswiꞌla witz, yuxin maqꞌoji ebꞌnaj jinh, yajaꞌ tato chijaqꞌle howal satla akꞌal yebꞌ ebꞌnaj, yinh kaw yeli hanhonh chonhqꞌoji yinh ebꞌnaj. 24 Haꞌ tzet yilal hawatxꞌen tinanh mam rey, chawilo sunil ebꞌnaj rey tiꞌ, kat hawaniko ebꞌnaj yahawil soldado selelo ebꞌnaj. 25 Chawaniko hunxa bꞌulan ebꞌnaj soldado hakaꞌ ebꞌnaj matanhilo tiꞌ, lahan xin isbꞌisil noꞌ cheh yebꞌ teꞌ carruaje chawako hakaꞌ matanhpaxilo tiꞌ, kat janiko howal yinh ebꞌnaj sat akꞌal, jilaꞌ xin tato mach chonhqꞌoji yinh ebꞌnaj, xhi ebꞌnaj.

Yabꞌento naj Ben-adad tzet yal ebꞌnaj yahawil issoldado, iswatxꞌen naj hakaꞌ tuꞌ. 26 Haxa yet yekꞌto huneꞌ habꞌil, isbꞌisni naj rey ebꞌnaj issoldado Siria, isto ebꞌnaj bꞌey konhobꞌ Afec yu yaniko howal yinh konhobꞌ Israel. 27 Hakpax tuꞌ ebꞌnaj Israel, bꞌislax ebꞌnaj soldado, yaqꞌlax tzet chiꞌokniko yu ebꞌnaj yinh howal, isto ebꞌnaj ischahno ebꞌnaj ah Siria. Iswatxꞌen ebꞌnaj iscampamento satakꞌti ebꞌnaj ah Siria. Lahan jilni iscampamento ebꞌnaj Israel tuꞌ hakaꞌ kabꞌ bꞌotzan noꞌ chiw, wal ebꞌnaj ah Siria xin nohna sat akꞌal yu ebꞌnaj.

28 Yapni ischejabꞌ Komam Jahawil iskꞌatanh yaꞌ isreyal Israel, yalni yaꞌ: «Haꞌ Komam Jahawil chalni hakaꞌ tiꞌ: “Chal ebꞌnaj ah Siria hakaꞌ tiꞌ: ‘Haꞌ ebꞌnaj Israel tiꞌ, isDiosal ebꞌnaj yeko iswiꞌla witz, mach yetto isDiosal ebꞌnaj ye akꞌal,’ xhi ebꞌnaj. Yuxin chiwakojan huneꞌ bꞌulan ebꞌnaj Siria tiꞌ yul haqꞌabꞌ, yunhe hawohtanheniloj tato hanintiꞌan Yahaw wehikojan yinh sunil,” xhi Komam,» xhi yaꞌ chejabꞌ tuꞌ.

29 Hujebꞌ tzꞌayik ehayo ebꞌnaj Israel yebꞌ ebꞌnaj ah Siria yul iscampamento, haꞌ iscampamento ebꞌnaj Israel ayayo satakꞌti iscampamento ebꞌnaj ah Siria. Haxa yinh ishuj tzꞌayik xin yichiko howal tuꞌ. Isqꞌoji ebꞌnaj Israel yinh ebꞌnaj ah Siria, ispotxꞌnikamo ebꞌnaj 100 mil ebꞌnaj ah Siria yinh huneꞌ tzꞌayik. Ebꞌnaj kam tuꞌ mach yibꞌanho noꞌ cheh aykanh ebꞌnaj, wal xin yoj ebꞌnaj yakoj. 30 Wal hunteqꞌanxa ebꞌnaj xin elkanh ebꞌnaj, isto ebꞌnaj bꞌey konhobꞌ Afec. Haxa iskꞌubꞌal konhobꞌ tuꞌ ay wuyna yibꞌanh 27 (hujebꞌ iskawinaj) mil ebꞌnaj iskutxbꞌa isbꞌa yul konhobꞌ tuꞌ. Hakpax tuꞌ naj rey Ben-adad elkanh naj, yapni naj yul konhobꞌ, chixin yebꞌa isbꞌa naj yul huneꞌ cuarto yulikto konhobꞌ tuꞌ.

31 Yalni ebꞌnaj ischejabꞌ naj Ben-adad tet hakaꞌ tiꞌ: «Jabꞌehanh tato kaw kꞌul iskꞌul ebꞌnaj rey Israel tuꞌ, yuxin ta chisje hakꞌul chijakojanh xil koqꞌapanh yet bꞌiskꞌulal, kat janikojanh txꞌanh lasu yinh konuqꞌanh, kat kotohanh jilnojanh naj rey Israel tuꞌ, kat jabꞌenanh tato chiyaqꞌ naj nimankꞌulal tawinh,» xhi ebꞌnaj tet naj.

32 Lahwi tuꞌ yaniko ebꞌnaj xil isqꞌap yet bꞌiskꞌulal yinh, yaniko ebꞌnaj txꞌanh lasu yinh isnuqꞌ, isto ebꞌnaj isyeno isbꞌa sata yaꞌ rey Israel, yalni ebꞌnaj tet yaꞌ:

—Mamin, haꞌ yaꞌ hachejabꞌ Ben-adad chisqꞌan yaꞌ tawet tato chawaqꞌ nimankꞌulal yinh yaꞌ, xhi ebꞌnaj. Istaqꞌwi yaꞌ rey Acab:

—¿Tom itzitzto naj? Haꞌ yul insatan hakaꞌto wuxhtajan ye naj, xhi yaꞌ rey.

33 Kaw kꞌul ispaj istzotiꞌ ebꞌnaj yaqꞌ yaꞌ rey Acab, yuxin yalpaxo ebꞌnaj tet yaꞌ hakaꞌ tiꞌ:

—Haꞌ yaꞌ hawuxhta Ben-adad tuꞌ itzitzto yaꞌ, xhi ebꞌnaj. Yalni yaꞌ rey Acab tet ebꞌnaj:

—Asiꞌwej kat heyiniti naj bꞌey tiꞌ, xhi yaꞌ.

Yapni naj Ben-adad isyeno isbꞌa tet yaꞌ rey Acab, yaqꞌni yaꞌ Acab ahoto naj yul carruaje iskꞌatanh. 34 Yalni naj Ben-adad tet yaꞌ Acab:

—Haꞌ konhobꞌ yilo inmaman tet hamam chiwaqꞌ meltzohojan tawet, kat hawatxꞌenkanh txonhbꞌal bꞌey konhobꞌ Damasco, hakaꞌ yu iswatxꞌenkanh inmaman txonhbꞌal bꞌey Samaria, xhi naj Ben-adad.

Istaqꞌwi yaꞌ rey Acab tet naj:

—Ta hak tuꞌ xin chachinbꞌejtzohan, xhi yaꞌ Acab.

Hak tuꞌ yu istꞌinhbꞌankano yaꞌ Acab istzotiꞌ yebꞌ naj Ben-adad, lahwi tuꞌ isbꞌejtzon yaꞌ Acab naj Ben-adad.

35 Yajaꞌ xin ay huneꞌ yaꞌ xol ebꞌyaꞌ iskꞌahol ischejabꞌ Komam Jahawil, halni tet hunxa yetbꞌi:

—Chinqꞌanan tawet tato chinhamaqꞌan, kat hawaniko inlahwilalan, xhi yaꞌ.

Yal yaꞌ hakaꞌ tuꞌ, yuto hak tuꞌ yute yalni Komam Dios tet yaꞌ. Yajaꞌ mach isje naj tuꞌ ismaqꞌaꞌ yaꞌ. 36 Yuxin yal huneꞌ yaꞌ iskꞌahol ischejabꞌ Komam Jahawil tet naj mach isje ismaqꞌaꞌ tuꞌ:

—Yu machi maxayije tzet mayal Komam Jahawil, yuxin hayet chikopohleno kobꞌa tiꞌ, chiꞌelilo huneꞌ noꞌ bꞌalam yul habꞌeh, kat kach ispotxꞌnikamo noꞌ, xhi yaꞌ.

Hayet ispohlen isbꞌa ebꞌnaj, isto naj tuꞌ yul bꞌeh, yelilo huneꞌ noꞌ bꞌalam yinh naj, ispotxꞌlaxkamo naj yu noꞌ.

37 Lahwi tuꞌ, ischahni isbꞌa iskꞌahol ischejabꞌ Jahawil yebꞌ huneꞌxa naj, yalni yaꞌ tet naj:

—Chinqꞌanan tawet tato chinhamaqꞌan, kat yok inlahwilalan hawu, xhi yaꞌ. Hak tuꞌ yu ismaqꞌni huneꞌ naj tuꞌ yaꞌ, islahwi yaꞌ yu naj. 38 Isto ischejabꞌ Komam yechmano yekꞌto yaꞌ rey Acab istiꞌ bꞌeh, ishelni isbꞌa yaꞌ, isximniko yaꞌ huneꞌ qꞌap qꞌap yenhelo sat. 39 Haxa yet yekꞌto yaꞌ rey Acab, yah yaw yaꞌ yinh kaw ip, yalni yaꞌ tet yaꞌ:

—Hanin hachejabꞌ intiꞌan mam rey, kinbꞌeykꞌojan yinh howal, yajaꞌ kinelkanhan xol ebꞌnaj soldado tuꞌ. Yet ayinan bꞌey tuꞌ yul huneꞌ naj soldado yiniti naj huneꞌ naj presowom inkꞌatanhan, yalni naj wetan: “Tanhe huneꞌ naj tiꞌ, yajaꞌ tato chabꞌejtzoto naj, hach chachkam selelo naj, maka chawaqꞌ huneꞌ talento chꞌen plata selelo naj,” xhi. 40 Yajaꞌ hayet ay tzet chiwuhan mach wilan yelkanh naj, isto naj, xhi yaꞌ tet yaꞌ rey.

Istaqꞌwi yaꞌ isreyal Israel tet yaꞌ:

—Hach kaw hach maxawalahti hamul, haꞌ tzet maxawal tiꞌ, hakton tuꞌ chu hatohlankano hamul, xhi yaꞌ rey.

41 Yajaꞌ yinh anhe yilo yaꞌ yenhel issat, yohtanhenilo yaꞌ isreyal Israel tato ischejabꞌ Komam ye yaꞌ. 42 Yalni yaꞌ tet yaꞌ rey:

—Hak tiꞌ chiyu yalni Komam Jahawil, hakaꞌ tiꞌ: “Hach tiꞌ maxabꞌejtzoto naj walan tato yilal hamaqꞌnikamoj, yuxin haxa hach chachkam selelo naj, haxa xin haꞌ konhobꞌ chikam selelo iskonhobꞌ naj,” xhi Komam, xhi yaꞌ ischejabꞌ Komam.

43 Hayet yabꞌen yaꞌ rey hakaꞌ tuꞌ, isto yaꞌ yinh bꞌiskꞌulal yatut yebꞌ xin kaw tit ishowal yaꞌ, yapni yaꞌ bꞌey konhobꞌ Samaria.