To yaꞌ Elías yebꞌaꞌ isbꞌa bꞌey witz Horeb
19
Yalni yaꞌ rey Acab tet ix Jezabel yinh sunil tzet iswatxꞌe yaꞌ Elías, yebꞌ yu ismaqꞌkamo yaꞌ sunil ebꞌnaj ischejabꞌ tioxh Baal. 2 Yuxin yato ix huneꞌ ischejabꞌ yalno tet yaꞌ Elías: «Yaqꞌabꞌayo indiosalan isyaꞌtajil wibꞌanhan ta mach chinpotxꞌkamojan yaꞌ Elías yet hekal yinh huneꞌ hora tiꞌ, hakaꞌ yu ispotxꞌnikamo yaꞌ ischejabꞌ indiosalan,» xhi ix.3 Hayet yilni yaꞌ Elías tato ay ismay ispotxꞌlax yaꞌ yu ix Jezabel yahwano yaꞌ isto yaꞌ iskolno isbꞌa bꞌey Beerseba yul ismajul Judá, haꞌ bꞌey tuꞌ xin yakano yaꞌ ischejabꞌ. 4 Hunto tzꞌayik xin yuteto yaꞌ isbꞌel sat txꞌotxꞌ desierto, isxew yaꞌ yinh isbꞌel tuꞌ yich huneꞌ teꞌ enebro, kaw xin choche yaꞌ iskami, yalni yaꞌ hakaꞌ tiꞌ: «Yetzanxana tiꞌ Mamin Wahawil, aqꞌin kamojan bꞌey tiꞌ, yuto hanintiꞌan mach ekꞌbꞌalo kꞌulinan sata ebꞌyaꞌ wichmaman,» xhi yaꞌ.
5 Yay hilno yaꞌ yich teꞌ enebro tuꞌ, iswaykanh yaꞌ. Hayet lanhan isway yaꞌ tuꞌ, yapni huneꞌ naj ángel pitwal yinh yaꞌ, yalni naj: «Ahanhwanoj, kat hawaꞌi,» xhi naj.
6 Haxa yet yel iswayanh yaꞌ yilnito yaꞌ yinh iswiꞌta yaꞌ huneꞌ ixim niman pan qꞌantzebꞌil yibꞌanh tzaqꞌaqꞌ, yebꞌ huneꞌ xhalu ha haꞌ. Iswanito yaꞌ ixim pan tuꞌ yukꞌni yaꞌ haꞌ, tzujan tuꞌ iswaypaxokanh yaꞌ. 7 Hayet lanhan isway yaꞌ Elías tuꞌ, yapnipaxo naj yángel Komam Jahawil pitwal yinh yaꞌ yinh iskayel, yalni naj tet yaꞌ: «Ahanhwanoj, kat hawaꞌi, yuto kaw nahatto yeto bꞌay chachapni,» xhi naj.
8 Yahwano yaꞌ Elías, yok yaꞌ waꞌoj, yok yip yaꞌ yu tzet isloh tuꞌ, isbꞌelwito yaꞌ 40 (kawinaj) tzꞌayik yok 40 (kawinaj) aqꞌbꞌal, masanta apni yaꞌ bꞌey Horeb bꞌey witz yet Komam Dios yehi.a 9 Yokto yaꞌ yul huneꞌ chꞌen nhachꞌen bꞌey tuꞌ, haꞌ tuꞌ xin way yaꞌ aqꞌbꞌalil. Istzotel Komam Jahawil tet yaꞌ, yalni hakaꞌ tiꞌ:
—Elías ¿tzet chawu bꞌey tiꞌ? xhi Komam.
10 Istaqꞌwi yaꞌ Elías:
—Mamin, hach tiꞌ Yahaw hach yinh sunil ejército, kaw tit inhowalan yu tzet chachutelax yu konhobꞌ Israel, yuto isbꞌejkano ebꞌnaj huneꞌ trato tꞌinhbꞌabꞌilkano hawu, yuchkꞌanayo ebꞌnaj mexha yet xahanbꞌal, ispotxꞌnikamo ebꞌnaj hachejabꞌ yu chꞌen espada, haninxanhehan xin ayinikꞌojan, chixin kinsaylaxikꞌojan yunhe inpotxꞌlax kamojan, xhi yaꞌ.
11 Yalni Komam Jahawil tet yaꞌ:
—Elanhti bꞌey tuꞌ, kat hawok linhno insatajan iswiꞌ witz tiꞌ, xhi Komam tet yaꞌ.
Chixin ekꞌ Komam Jahawil bꞌey tuꞌ, yekꞌ huneꞌ niman jaqꞌeqꞌ, ispohnito witz yebꞌ chꞌen nime chꞌen sata Komam, yajaꞌ mach ayoko Komam xol huneꞌ niman jaqꞌeqꞌ tuꞌ. Lahwi yekꞌ huneꞌ niman jaqꞌeqꞌ tuꞌ, yekꞌpaxo huneꞌ txixkabꞌ, yajaꞌ mach ayoko Komam xol huneꞌ txixkabꞌ tuꞌ. 12 Lahwi tuꞌ yekꞌ huneꞌ niman qꞌaꞌ, yajaꞌ machi Komam xol qꞌaꞌ tuꞌ. Lahwi yekꞌ huneꞌ niman qꞌaꞌ tuꞌ, yabꞌen yaꞌ Elías huneꞌ mak chixuqꞌabꞌli yinh kaw nanhkꞌulal yebꞌ kaw saqꞌal jabꞌeni. 13 Hayet yabꞌen yaꞌ Elías huneꞌ tuꞌ, yaniko yaꞌ yenhel issat, yelti yaꞌ yul chꞌen nhachꞌen, yok linhno yaꞌ istiꞌ chꞌen, yabꞌen yaꞌ huneꞌ yul nuqꞌe halni hakaꞌ tiꞌ:
—Elías, ¿tzet chawu bꞌey tiꞌ? xhi tet yaꞌ.
14 Istaqꞌwi yaꞌ Elías:
—Mam Wahawil, hach tiꞌ yahaw hach yinh sunil, kaw tit inhowalan yinh tzet chachutelax yu konhobꞌ Israel, yuto isbꞌejkano ebꞌnaj hatrato aqꞌbꞌilkano tet ebꞌnaj hawu, yuchkꞌanayo ebꞌnaj ismexhahil yet xahanbꞌal chꞌaqꞌlax tawet. Ispotxꞌnikamo ebꞌnaj sunil ebꞌnaj hachejabꞌ, haninxanhehan xin ayinikꞌojan, chixin kinsaylaxan yunhe inpotxꞌlax kamojan, xhi yaꞌ.
15 Yalni Komam tet yaꞌ:
—Asiꞌ, meltzanhto yul bꞌeh bꞌay kaxhtita sat txꞌotxꞌ desierto bꞌey Damasco, kat hawanayo aceite yibꞌanh iswiꞌ naj Hazael, yuto haꞌ naj chiꞌok isreyalo Siria, 16 kat hawanayo aceite yibꞌanh iswiꞌ yaꞌ Jehú, iskꞌahol naj Nimsi, yuto haꞌ yaꞌ chiꞌok isreyalo Israel, kat hawanipaxayo aceite yibꞌanh iswiꞌ yaꞌ Eliseo, iskꞌahol yaꞌ Safat, ah konhobꞌ Abel-mehola, yuto haꞌ yaꞌ chiꞌok inchejabꞌojan haseleloj. 17 Haꞌ mak chiskolilo isbꞌa tet yespada naj Hazael, haꞌ yaꞌ Jehú chipotxꞌnikamoj, haxa mak chiskolilo isbꞌa tet yespada yaꞌ Jehú, haꞌ yaꞌ Eliseo chipotxꞌnikamoj. 18 Yajaꞌ ayto hujebꞌ mil ebꞌnaj Israel machi ay jahno sata tioxh Baal, mach istzꞌohpaxo ebꞌnaj tioxh tuꞌ, xhi Komam.b
Yawtebꞌal yaꞌ Eliseo
19 Ismeltzo yaꞌ Elías, yilchayo yaꞌ Eliseo, iskꞌahol yaꞌ Safat yu yaꞌ. Lanhan istꞌokni 12 (kabꞌlahonhkꞌonh) noꞌ wakax txꞌo txꞌotxꞌ yu yaꞌ, haꞌ yaꞌ xin tzujaniko yinta noꞌ kakꞌonh islahobꞌal; yekꞌto yaꞌ Elías tuꞌ, islebꞌanto yaꞌ xil isqꞌap hukaniko yinh yibꞌanh yaꞌ Eliseo.c 20 Yinhnhena tuꞌ isbꞌejnikano yaꞌ Eliseo noꞌ wakax, isto yaꞌ istzujnoyo yaꞌ Elías, yalni yaꞌ hakaꞌ tiꞌ:
—Mamin, chiwalan tawet tato chawaqꞌ inhamanilan intohan taqꞌlokano tet inmaman yebꞌ tet inmiꞌan, chintzꞌohnikanojan isqꞌotx, tzujan tuꞌ, kat wok tzujnojan tawintaj, xhi yaꞌ.
Istaqꞌwi yaꞌ Elías tet yaꞌ:
—Asiꞌ, lahwi tuꞌ kat hameltzohi, natij tzet mawuhan tawinh, xhi yaꞌ.
21 Lahwi tuꞌ ismeltzo yaꞌ Eliseo iskꞌatanh yaꞌ Elías, yiniti yaꞌ Eliseo kakꞌonh noꞌ wakax, ispotxꞌnikamo yaꞌ noꞌ, haꞌtikꞌa xin te teꞌ chisnhikꞌiko noꞌ wakax istꞌokni txꞌotxꞌ tuꞌ, haꞌ teꞌ isnhus yaꞌ siꞌal, isqꞌantzen yaꞌ noꞌ chibꞌe tuꞌ, yaqꞌni yaꞌ noꞌ iskꞌuxuꞌ ebꞌnaj chimunla yintaj, lahwi tuꞌ yahwano yaꞌ, yok tzujno yaꞌ yinta yaꞌ Elías, yu isyijen yaꞌ tzet chal yaꞌ.