Ok yaꞌ Ocozías reyal bꞌey Judá
22
Haꞌ sunil anma ah Jerusalén aniko yaꞌ Ocozías reyal selelo ismam, haꞌ yaꞌ Ocozías tuꞌ tzujan unin yaꞌ. Wal xin ay hunbꞌulan ebꞌnaj soldado árabe apni bꞌey campamento ismaqꞌnikamo ebꞌnaj ebꞌnaj bꞌabꞌel iskꞌahol yaꞌ Joram, yuxin haꞌ yaꞌ Ocozías tuꞌ alaxiko reyal selelo ismam, isreyalo Judá. 2 42 (Kabꞌ yoxkꞌal) habꞌil yaꞌ Ocozías yet yok yaꞌ isreyalo Judá, huneꞌnhe xin habꞌil ok yaꞌ reyal bꞌey Jerusalén. Atalía isbꞌi ismiꞌ yaꞌ, iskutzꞌin yaꞌ Omri ye ix. 3 Haꞌ yaꞌ rey Ocozías tuꞌ isbꞌeybꞌalnhe yaꞌ tzetaj iswatxꞌe yaꞌ Acab yebꞌ yuninal, yuto haꞌ ismiꞌ yaꞌ ok aqꞌokꞌule tet yu iswatxꞌen istxꞌojal. 4 Iswatxꞌe yaꞌ istxꞌojal sata Komam Jahawil hakaꞌ istxꞌojal iswatxꞌe yaꞌ Acab yebꞌ yuninal, yuto hayet iskamto ismam yaꞌ, haꞌ ebꞌnaj iskꞌahol yaꞌ Acab ok aqꞌokꞌule tet yaꞌ yu iskꞌayto yaꞌ yinh istxꞌojal. 5 Yuxin haꞌ tzet yal ebꞌnaj tet yaꞌ Ocozías tuꞌ, haꞌ isbꞌeybꞌalnhe yaꞌ. Isto yaꞌ yinta yaꞌ Joram, iskꞌahol yaꞌ Acab, isreyal Israel yaqꞌaꞌ howal yinh naj Hazael, isreyal Siria, yebꞌ yinh konhobꞌ Ramot, ayko yul ismajul Galaad, yajaꞌ ok islahwilal yaꞌ Joram yu ebꞌnaj sirio yinh huneꞌ howal tuꞌ. 6 Yuxin meltzo yaꞌ Joram bꞌey konhobꞌ Jezreel yanhteꞌ islahwilal alaxiko bꞌey Ramot yet ayko yaꞌ yaqꞌlen howal yinh naj Hazael, isreyal Siria. Yuxin tit yaꞌ Ocozías ilwal yinh yaꞌ Joram, iskꞌahol yaꞌ Acab bꞌey konhobꞌ Jezreel, yuto haꞌ tuꞌ ay yaꞌ yanhteno isbꞌa.Ispotxꞌkamo yaꞌ Jehú yaꞌ Ocozías
7 Wal xin haꞌ Komam Dios aqꞌni yubꞌ yaꞌ Ocozías isto ilwal yinh yaꞌ Joram yu ispotxꞌlaxkamo yaꞌ. Yuxin haxa yet yapni yaꞌ yelti yaꞌ yebꞌ yaꞌ Joram yinh yaꞌ Jehú, iskꞌahol naj Nimsi. Haꞌ yaꞌ Jehú tuꞌ xin chejlax yaꞌ yu Komam Jahawil yok yaꞌ istanhtzenolo sunil yuninal yaꞌ Acab. 8 Hayet lanhan isyijen yaꞌ Jehú yaqꞌni isyaꞌtajil yinh yuninal yaꞌ Acab hakaꞌ yalni Komam Dios, yilchati ebꞌnaj iswiꞌehal Judá yebꞌ ebꞌnaj iskꞌahol yuxhta yaꞌ Ocozías iskꞌatanh yaꞌ Joram tuꞌ, ismaqꞌnikamo yaꞌ ebꞌnaj. 9 Wal yaꞌ Ocozías xin to yaꞌ yebꞌa isbꞌa bꞌey Samaria, yanito yaꞌ Jehú issayomal yaꞌ. Haxa yet yilchati yaꞌ, yilaxto yaꞌ sata yaꞌ Jehú, ispotxꞌlaxkamo yaꞌ, yajaꞌ ismuj ebꞌnaj yaꞌ, yuto yal ebꞌnaj hakaꞌ tiꞌ: «Yaꞌ tiꞌ, iskꞌahol yaꞌ Josafat ye yaꞌ, yaꞌ sayni Komam Dios yinh sunil yanma,» xhi ebꞌnaj. Machi xin hunu iskꞌahol yaꞌ Ocozías tuꞌ ay yip yok reyal seleloj.
Haꞌ ix Atalía yako isbꞌa reinahil yinh Judá
10 Hayet yilni ix Atalía, ismiꞌ yaꞌ Ocozías, tato potxꞌlaxkamo yaꞌ, yah lemna ix, yok ix ispotxꞌno sunil ebꞌnaj yuninal yaꞌ Ocozías, isreyal Judá. 11 Yajaꞌ haꞌ ix Josabet, iskutzꞌin yaꞌ rey yito ix naj nichꞌan Joás, yebꞌanto ix naj xol hunteqꞌanxa iskꞌahol rey Ocozías, ebꞌnaj lanhan issaylaxikꞌoj yunhe ismaqꞌlaxkamoj. Ebꞌalaxilo naj Joás yebꞌ ix chiꞌilni yul huneꞌ cuarto yul Yatut Komam Dios. Haꞌ ix Josabet tuꞌ iskutzꞌin yaꞌ rey Joram ye ix yebꞌ xin yixal yaꞌ sacerdote Joiada ye ix, yanabꞌ yaꞌ rey Ocozías ye ix. Hak tuꞌ yu yebꞌanilo ix Josabet tuꞌ naj Joás tet ix Atalías yuxin mach potxꞌlaxkamo naj. 12 Wajebꞌ habꞌil ebꞌalaxilo naj Joás yebꞌ ix chiꞌilni naj, yul Yatut Komam Dios xol ebꞌnaj chimunla yul Yatut Komam, yulbꞌal hayebꞌ habꞌil ok ix Atalía reinahil yinh konhobꞌ.