23
Haxa yinh ishuj habꞌil yaniko yinh iskꞌul yaꞌ Joiada yawten ebꞌnaj iswiꞌehal Judá yetbꞌihoj, yalni yaꞌ tzet chiꞌekꞌ yinh isnabꞌal tet ebꞌnaj. Haꞌ ebꞌnaj iswiꞌehal yawte yaꞌ, haꞌ ebꞌnaj tiꞌ: Naj Azarías iskꞌahol naj Jeroham, naj Ismael iskꞌahol naj Johanán, naj Azarías iskꞌahol yaꞌ Obed, naj Maasías iskꞌahol naj Adaía yebꞌ naj Elisafat iskꞌahol naj Zicri. 2 Haꞌ ebꞌnaj tuꞌ ischejto yaꞌ Joiada yulajla ismajul Judá, iskutxbꞌaniko ebꞌnaj ebꞌnaj levita ay yulajla konhobꞌ ay sat txꞌotxꞌ Judá, yebꞌ ebꞌnaj iswiꞌehal xol ebꞌnaj Israel, isto ebꞌnaj bꞌey Jerusalén. 3 Haꞌ sunil ebꞌnaj iskutxbꞌako isbꞌa tuꞌ iswatxꞌe ebꞌnaj istrato yebꞌ yaꞌ rey bꞌey Yatut Komam Dios, yalni yaꞌ Joiada tet ebꞌnaj kutxaniko tuꞌ: «Ilwekꞌanabꞌi ay iskꞌahol yaꞌ rey lah, haꞌ yaꞌ tiꞌ chiꞌok reyalil, yunhe yijni isbꞌa tzet yalkano Komam Jahawil yinh yuninal yaꞌ David. 4 Wal tinanh xin yijewe tzet chiwalan. Haꞌ hunu hex yet yox majan, hextikꞌa chexhul yinh tzꞌayikal sábado, hextikꞌa chexok hetanheꞌ ispultahil Yatut Komam Dios yebꞌ ebꞌyaꞌ sacerdote yebꞌ ebꞌnaj levita. 5 Haxa hunxa yet yox majan hex xin chexok hetanheꞌ yatut yaꞌ rey haxa hunxa yet yox majan hex xin, chetanhepaxo ispultahil Cimiento. Wal sunil konhobꞌ xin chiꞌok linhno yamaqꞌil Yatut Komam Dios. 6 Machi xin hunu komon anma chiꞌokto yul Yatut Komam Jahawil, kachannhe ebꞌyaꞌ sacerdote yebꞌ ebꞌnaj levita chiꞌokto isyijeꞌ ismunil yul Yatut Komam, yuto haꞌ ebꞌnaj saybꞌiliko yu ismunla yinh ismunil Komam. Wal sunil anma xin chiꞌok linhno sata Komam Jahawil, kat yok istanheno Yatut Komam. 7 Haꞌ xin ebꞌnaj levita chiꞌok hoyno yinh rey yunhe istanhelax yaꞌ, iqꞌbꞌil chꞌen yet howal yu ebꞌnaj. Haꞌ ebꞌnaj levita tuꞌ chitanhen yaꞌ rey yet chiꞌelti yaꞌ maka yet chiꞌokto yaꞌ, yaj ta ay hunu komon anma chiꞌokto yul Yatut Komam, maqꞌbꞌil iskami,» xhi yaꞌ sacerdote Joiada.8 Isyijen ebꞌnaj levita yebꞌ ebꞌnaj ah Judá sunil tzet yal yaꞌ sacerdote Joiada, issayni ebꞌnaj hunun iswiꞌehal hunun majan ebꞌnaj tuꞌ, ebꞌnaj chiꞌok yinh ismunil yinh tzꞌayik sábado, yebꞌ xin ebꞌnaj chꞌel yinhtikꞌa qꞌejbꞌiyal sábado. Wal ebꞌnaj chiꞌelti yinh qꞌejbꞌiyal sábado tuꞌ, machi chalaxilti ebꞌnaj yu yaꞌ sacerdote Joiada. 9 Yaniko yaꞌ sacerdote Joiada chꞌen lanza yebꞌ chꞌen nixhtej yebꞌ chꞌen nime escudo tet ebꞌnaj iswiꞌehal yinh 100 (hokꞌal) ebꞌnaj levita. Haꞌ hunteqꞌan chꞌen yet howal tuꞌ yul Yatut Komam Dios kꞌubꞌabꞌil chꞌen, haꞌ chꞌen okniko yu yaꞌ rey David. 10 Yaniko yaꞌ Joiada sunil konhobꞌ tuꞌ yinh istxolal, sunil ebꞌnaj winaj ayko yespada yul isqꞌabꞌ. Yalaxiko ebꞌnaj istanheno Yatut Komam Dios yebꞌ yinhla istxikin Yatut Komam yinh kowatxꞌqꞌabꞌ yebꞌ yinh hunxa istxikin yinh komekqꞌabꞌ. Yalaxiko ebꞌnaj istanheno yinh ismexhahil yet xahanbꞌal, yebꞌ istanheno yaꞌ rey yinhla sunil ishoyanil bꞌay ay yaꞌ. 11 Lahwi tuꞌ xin yinilti yaꞌ sacerdote Joiada yaꞌ iskꞌahol yaꞌ rey, yanahto ebꞌnaj iscorona yaꞌ yinh iswiꞌ, yalaxiko yumal chejbꞌanile yet Komam Dios yul isqꞌabꞌ yaꞌ, yalaxkaniko yaꞌ reyalil, isjobꞌlaxayo aceite yibꞌanh iswiꞌ yaꞌ yu yaꞌ sacerdote Joiada yebꞌ yu ebꞌnaj iskꞌahol yaꞌ Joiada tuꞌ, yalni ebꞌnaj hakaꞌ tiꞌ: «¡Tzalajonhwe yinh koreyal tiꞌ!» xhixanhe ebꞌnaj.
12 Hayet yabꞌen ix Atalía tato xanhe chiwejcha anma yekꞌ yulaj bꞌeh yebꞌ xanhe chiwejcha anma yu tzalahilal yinh yaꞌ rey, isto ix yilno bꞌey Yatut Komam Dios bꞌay kutxaniko konhobꞌ. 13 Haxa yet yilni ix, linhankanh yaꞌ rey bꞌay aykanh ispilalil yul Yatut Komam bꞌay chonhoknapnoj, aypaxiko ebꞌnaj iswiꞌehal konhobꞌ iskꞌatanh yaꞌ rey yebꞌ ebꞌnaj chiꞌoqꞌtzen chꞌen trompeta, sunil xin konhobꞌ tuꞌ kaw tzalahilal yehi, chꞌoqꞌtzelax chꞌen bocina, chaniko ebꞌnaj bꞌitnom chꞌen munlabꞌal yet bꞌit, yet chibꞌitni. Hayet yilni ix Atalía sunil tuꞌ, istzilnito ix xil isqꞌap, yalni ix hakaꞌ tiꞌ: «¡Makexpakꞌiko winhan! ¡Makexpakꞌiko winhan!» xhi ix.a
14 Yajaꞌ ischejilti yaꞌ sacerdote Joiada ebꞌnaj yahawil yinh ebꞌnaj soldado yalni yaꞌ tet ebꞌnaj: «Iwelto ix bꞌey tiꞌ, kat heyok tzujno yinta ix, kat hepotxꞌnikamo ix yu espada chililon ye,» xhi yaꞌ. Yal yaꞌ hakaꞌ tuꞌ yuto mach isje yaꞌ tato chipotxꞌlaxkamo ix yul Yatut Komam Jahawil. 15 Yinilti ebꞌnaj ix Atalía yul Yatut Komam, haxa yet yelti ix yul pulta bꞌay ay noꞌ cheh yet ebꞌyaꞌ rey, ispotxꞌnikamo ebꞌnaj ix bꞌey tuꞌ.
16 Lahwi tuꞌ istꞌinhbꞌankano yaꞌ sacerdote Joiada yebꞌ konhobꞌ yebꞌpaxo yaꞌ rey tato kaw iskonhobꞌ Komam Jahawil chukaniko ebꞌnaj. 17 Lahwi tuꞌ, isto sunil konhobꞌ bꞌey yatut tioxh Baal, yuchkꞌanayo ebꞌnaj ismexhahil yet xahanbꞌal. Ispotxꞌnikamo ebꞌnaj naj Matán satalti ismexhahil yet xahanbꞌal, naj Matán tuꞌ haꞌ naj sacerdote yeko yinh tioxh Baal. 18 Yaniko yaꞌ Joiada munil chiwatxꞌelax yul Yatut Komam Jahawil yul isqꞌabꞌ ebꞌyaꞌ sacerdote yebꞌ ebꞌnaj levita, hakaꞌtikꞌa yu yalnikano yaꞌ David yet yaniko yaꞌ ebꞌyaꞌ munil yul Yatut Komam Jahawil, yu isnhusni ebꞌyaꞌ xahanbꞌal tet Komam Jahawil hakaꞌ yalni isley yaꞌ Moisés. Kaw xin chitzala ebꞌyaꞌ sacerdote yebꞌ ebꞌnaj levita, isbꞌitni ebꞌnaj hakaꞌ yu yalnikano yaꞌ David. 19 Yanipaxiko yaꞌ Joiada istanhemal Yatut Komam Jahawil yu machi hunu mak mach sajoj hakaꞌ yalni ley chiꞌokto yul Yatut Komam.
20 Lahwi tuꞌ yawten yaꞌ Joiada ebꞌnaj iswiꞌehal yinh hunun 100 (hokꞌal) ebꞌnaj soldado, yebꞌ ebꞌnaj iswiꞌehal konhobꞌ, yebꞌ ebꞌnaj yahaw konhobꞌ, yebꞌ sunil konhobꞌ, yu yinito ebꞌnaj yaꞌ rey tuꞌ. Hak tuꞌ yu yel yaꞌ rey yul Yatut Komam Jahawil, haxa yet yapni ebꞌnaj yul yiktabꞌanil huneꞌ niman ispultahil palacio, istzꞌonhbꞌaniko ebꞌnaj yaꞌ rey tuꞌ yul istzꞌonhobꞌal. 21 Yok sunil konhobꞌ tuꞌ yinh tzalahilal, yok yinh aqꞌankꞌulal, yu istejkamo ebꞌnaj ix Atalía yu chꞌen espada.