4 Haxa yet yekꞌto hayebꞌ tiempo, yok yinh isnabꞌal yaꞌ rey Joás iswatxꞌenkanh Yatut Komam Jahawil. 5 Yuxin iskutxbꞌako yaꞌ ebꞌyaꞌ sacerdote yebꞌ ebꞌnaj levita, yalni yaꞌ tet ebꞌnaj: «Asiꞌwe yulajla konhobꞌ sat txꞌotxꞌ Judá tiꞌ, kat hekutxbꞌankanh chꞌen melyu xol sunil ebꞌnaj Israel, haꞌ xin chꞌen chiꞌokniko yinh munil yinh isbꞌujbꞌal Yatut Komam Jahawil, koDiosal, hak tuꞌ xin hunun habꞌil yok chꞌen yinh munil yinh Yatut Komam, kaw xin yilal heyaniko huneꞌ tiꞌ yinh hekꞌul,» xhi yaꞌ. Yajaꞌ wal ebꞌnaj levita mach yako ebꞌnaj huneꞌ tuꞌ yinh iskꞌul. 6 Yuxin yawte yaꞌ rey Joás yaꞌ Joiada yahawil sacerdote, isqꞌambꞌen yaꞌ tet yaꞌ: «¿Tzet yinh xin mach chawako yinh hakꞌul hachejnito ebꞌnaj levita iskutxbꞌanokanh chꞌen ofrenda xol ebꞌnaj Judá yebꞌ xol ebꞌnaj Jerusalén, hakaꞌ yu isqꞌanni yaꞌ Moisés, ischejabꞌ Komam Jahawil tet konhobꞌ Israel, yu yokniko yinh Tabernáculo bꞌay chiꞌeh Kaxha yet istrato Komam Dios?» xhi yaꞌ rey Joás. 7 Yal yaꞌ rey hakaꞌ tuꞌ, yuto haꞌ ix Atalía, ix kaw txꞌojkano isbꞌeybꞌal yetato ix Yatut Komam Dios, yebꞌ ej yunin, yinilti ix munlabꞌal ayikto yul Yatut Komam Jahawil, yokniko yu ix yinh xahanbꞌal tet tioxh.

8 Ischejni yaꞌ rey Joás watxꞌelaxo huneꞌ kaxha, yalaxayo istiꞌ Yatut Komam Jahawil. 9 Ischejni yaꞌ ta chihal-laxikꞌo xol ebꞌnaj Judá yebꞌ Jerusalén tato chiyiti anma isyebꞌalqꞌabꞌ tet Komam Jahawil hakaꞌ yu yalnikano yaꞌ Moisés, ischejabꞌ Komam Dios tet konhobꞌ Israel bꞌey txꞌotxꞌ desierto. 10 Hayet yabꞌen sunil ebꞌnaj iswiꞌehal konhobꞌ yebꞌ sunil anma huneꞌ tuꞌ kaw tzalakanoj; yinito isyebꞌalqꞌabꞌ yanayto yul kaxha tuꞌ masanto nohiloj. 11 Haxa yet chiyilni ebꞌnaj levita tato nohnaxa kaxha tuꞌ, chinito ebꞌnaj tet naj issecretario yaꞌ rey yebꞌ tet yaꞌ saybꞌiliko yu yaꞌ iswiꞌehal sacerdote, chishamni ebꞌnaj kaxha tuꞌ, kat isto ebꞌnaj yanoyo istiꞌ Yatut Komam Dios hunelxa, haknhetikꞌa tuꞌ xin chiyute ebꞌnaj hunun tzꞌayik, yuxin kaw niman chꞌen melyu kutxikoj. 12 Haxa xin yaꞌ rey yebꞌ yaꞌ Joiada chꞌaqꞌni chꞌen melyu tuꞌ tet ebꞌnaj yahawil yinh munil yinh Yatut Komam Jahawil, haꞌ ebꞌnaj tuꞌ chitohlan ebꞌnaj kꞌupom chꞌen, ebꞌnaj hosom teꞌ, ebꞌnaj chakꞌom hierro yebꞌ bronce chiꞌokniko yinh Yatut Komam. 13 Yijbꞌan ebꞌnaj maestro albañil munil yinh Yatut Komam Dios, iswatxꞌenkano ebꞌnaj hakaꞌtikꞌa yet bꞌabꞌelal; hak tuꞌ yu islahwikano munil tuꞌ, iskawxelaxkanokanh Yatut Komam. 14 Haxa yet islahwikano munil tuꞌ yaqꞌni meltzoho ebꞌnaj chꞌen melyu matxa okniko yinh ismunil tet yaꞌ rey yebꞌ tet yaꞌ Joiada, iswatxꞌelax munlabꞌal chiꞌokniko yul Yatut Komam Jahawil yinh chꞌen melyu tuꞌ; watxꞌelax chꞌen munlabꞌal, chꞌen cuchara yebꞌ chꞌen vaso oro yebꞌ plata. Yulbꞌal sunilbꞌal tiempo itzitz yaꞌ sacerdote Joiada, hunun tzꞌayik yaltelax xahanbꞌal yul Yatut Komam Jahawil.

15 Haꞌ yaꞌ Joiada tuꞌ, 130 habꞌil yaꞌ yet iskam yaꞌ, yuxin kaw ichamilxa kam yaꞌ. 16 Hayet iskam yaꞌ, ismujlax yaꞌ bꞌey isKonhobꞌ yaꞌ David bꞌay mujan ebꞌyaꞌ rey, yuto iswatxꞌe yaꞌ iskꞌulal yinh yet konhobꞌ Israel yebꞌ yul sat Komam Dios, yet yijbꞌan yaꞌ munil yinh Yatut Komam.

17 Haxa yet xakamto yaꞌ sacerdote Joiada, yapni ebꞌnaj iswiꞌehal Judá iskꞌatanh yaꞌ rey Joás. Yok ebꞌnaj yalno tet yaꞌ tato chisyije ebꞌnaj sunil tzet chal yaꞌ, yal ebꞌnaj hakaꞌ tuꞌ yu ismonten ebꞌnaj yaꞌ; tzujan tuꞌ yok yaꞌ rey iswatxꞌeno tzet chiyal ebꞌnaj. 18 Isbꞌejkano ebꞌnaj Yatut Komam Jahawil, isDiosal yichmam ebꞌnaj, yok ebꞌnaj yinoyo isbꞌa tet tioxh Asera yebꞌ tet hunteqꞌanxa tioxh watxꞌebꞌil yu ebꞌnaj winaj. Hak tuꞌ yu istit ishowal Komam Dios yinh anma Judá yebꞌ Jerusalén yu ismul yakoj. 19 Ischejnito Komam Dios ischejabꞌ yu ismeltzo konhobꞌ yul isqꞌabꞌ Komam, yajaꞌ mach yabꞌeto konhobꞌ tzet yal ebꞌyaꞌ.

20 Yuxin hul Yespíritu Komam Dios yinh naj Zacarías, iskꞌahol yaꞌ sacerdote Joiada, yahto linhno naj yinh iswiꞌ huneꞌ wonhan, yalni naj tet konhobꞌ: «Hak tiꞌ yalni Komam Dios hakaꞌ tiꞌ: “Yu hemanhkꞌo chejbꞌanile, yuxin maxhtaj haꞌ iskꞌulal chiꞌay teyibꞌanh, yu kinhebꞌejkanojan yuxin chexinbꞌejpaxkanojan,” xhi Komam,» xhi naj Zacarías.

21 Yaj lahannhe yu yaniko konhobꞌ tuꞌ ishowal yinh naj Zacarías, ischejni yaꞌ rey Joás qꞌojlaxokanh naj bꞌey yamaqꞌil Yatut Komam Jahawil. 22 Yaꞌ rey Joás mach isnahti yaꞌ iskꞌulal iskꞌul yaꞌ Joiada yinh yaꞌ, ismam naj Zacarías tuꞌ, wal xin ispotxꞌkamo yaꞌ naj Zacarías, iskꞌahol yaꞌ Joiada, yajaꞌ hayet isqꞌojlaxkamo naj, yalnikano naj hakaꞌ tiꞌ: «Haꞌojabꞌ Komam Jahawil chiꞌilni huneꞌ tiꞌ, kat yaqꞌni ispaj teyet,» xhi naj.

23 Haxa yet yayilo huneꞌxa habꞌil yapni ebꞌnaj soldado ah Siria bꞌey Judá yebꞌ bꞌey Jerusalén, yaniko ebꞌnaj howal yinh yaꞌ rey Joás, yetanto ebꞌnaj tzetaj ilcha yul konhobꞌ tuꞌ, ismaqꞌnikamo ebꞌnaj ebꞌnaj iswiꞌehal konhobꞌ, yelqꞌanilti ebꞌnaj tzetaj ye tuꞌ, yanito ebꞌnaj tet naj rey bꞌey Damasco. 24 Haywanhnhe ebꞌnaj soldado ah Siria tuꞌ apni yaqꞌaꞌko howal yinh ebꞌnaj Judá, wal ebꞌnaj Judá tuꞌ kaw nimankano isbꞌisil ebꞌnaj, yajaꞌ haꞌ Komam Jahawil aniko ebꞌnaj yul isqꞌabꞌ ebꞌnaj sirio, yuto isbꞌejkano ebꞌnaj Komam Jahawil, isDiosal yichmam. Hak tuꞌ yu ispajtzelax tet yaꞌ Joás hakaꞌtikꞌa istxꞌojal iswatxꞌe.

25 Hayet yel ebꞌnaj sirio bꞌey tuꞌ, kaw yaꞌay yaꞌ rey Joás yu islahwilal yaꞌ ok yu ebꞌnaj. Haxa xin ebꞌnaj ischejabꞌ yaꞌ aniko howal yinh yaꞌ rey tuꞌ, yu ispotxꞌkamo yaꞌ iskꞌahol yaꞌ sacerdote Joiada. Haxa yet hilan yaꞌ rey sat istxꞌat ismaqꞌnikamo ebꞌnaj yaꞌ. Hak tuꞌ yu iskam yaꞌ rey Joás; ismujlax yaꞌ bꞌey iskonhobꞌ yaꞌ David, yajaꞌ xin mach mujlax yaꞌ bꞌay mujan ebꞌyaꞌ rey. 26 Haꞌ ebꞌnaj maqꞌnikamo yaꞌ Joás, haꞌ ebꞌnaj tiꞌ; naj Zabad iskꞌahol naj Simeat, naj amonita, yebꞌ naj Jozabad, iskꞌahol naj Simrit, naj moabita.

27 Haxa istzotiꞌal yinh ebꞌnaj iskꞌahol yaꞌ rey Joás, yebꞌ yet yanikanh yaꞌ yaqꞌbꞌil tohlabꞌal, yebꞌ yet iskawxenkanh yaꞌ Yatut Komam Jahawil, sunil tiꞌ tzꞌibꞌnhebꞌilkano yul hum chitzotel yinh ebꞌyaꞌ rey. Hayet iskam yaꞌ rey Joás, yok yaꞌ Amasías, iskꞌahol yaꞌ reyal seleloj.