4 Yalni yaꞌ Joás tet ebꞌyaꞌ sacerdote: «Sunil chꞌen melyu chiꞌilaxti yeto Komam Jahawil yul yatut tiꞌ; chꞌen chꞌaqꞌlax istoholo hunun anma chikol-laxiloj,^b yebꞌ chꞌen yebꞌalqꞌabꞌ chitit yinh iskꞌul anma yaqꞌni tet Komam Jahawil yul yatut tiꞌ; 5 yilal ischahni ebꞌyaꞌ sacerdote tuꞌ chꞌen tet yet konhobꞌ, kat yokniko yinh isbꞌujbꞌalil ishatilal Yatut Komam Jahawil,» xhi yaꞌ.

6 Yajaꞌ hayet 23 (oxebꞌxa iskawinaj) habꞌil yok yaꞌ Joás reyal tuꞌ, maxhtotikꞌa munil yinh Yatut Komam Jahawil xawatxꞌi yu ebꞌyaꞌ sacerdote. 7 Yuxin yawte yaꞌ rey Joás yaꞌ Joiada, yaꞌ yahawil sacerdote, yebꞌ hunteqꞌanxa ebꞌyaꞌ sacerdote, yalni yaꞌ tet ebꞌyaꞌ hakaꞌ tiꞌ: «¿Tzet yinh xin maxhto chebꞌuj ishatilal Yatut Komam Dios? Wal tinanh xin, matxa chechah chꞌen melyu tet heyet konhobꞌ. Haxa chꞌen hechah, haꞌ chꞌen chꞌokniko isloqꞌni isbꞌujil ishatilal Yatut Komam,» xhi yaꞌ.

8 Hak tuꞌ yu islahtiꞌnhen isbꞌa ebꞌyaꞌ sacerdote tuꞌ ta matxa chischah ebꞌyaꞌ chꞌen melyu tet konhobꞌ, yebꞌ ta maxhtaj ebꞌyaꞌ tuꞌ chiꞌok ilno iswatxꞌelax ishatilal Yatut Komam.

9 Yuxin yiti yaꞌ sacerdote Joiada huneꞌ kaxha, isholni yaꞌ ismaj, yanayo yaꞌ kaxha tuꞌ yinh kowatxꞌqꞌabꞌ yinh ismexhahil xahanbꞌal bꞌay chiꞌokto ebꞌyaꞌ yul Yatut Komam Jahawil. Haꞌ yul kaxha tuꞌ xin, haꞌ tuꞌ chiyayto ebꞌyaꞌ sacerdote chiꞌilni istiꞌ ispultahil Yatut Komam chꞌen melyu chiꞌapni aqꞌlaxo yu konhobꞌ bꞌey Yatut Komam. 10 Haxa yet chilni ebꞌyaꞌ tato nohnaxa kaxha tuꞌ, chꞌapni naj istzꞌibꞌlom yaꞌ rey, yebꞌ yaꞌ yahawil yinh ebꞌyaꞌ sacerdote, haꞌ ebꞌnaj tuꞌ chibꞌisni chꞌen, kat yinikto ebꞌnaj chꞌen yul Yatut Komam, chiskꞌubꞌanto ebꞌnaj chꞌen. 11 Chaqꞌni ebꞌnaj chꞌen tet ebꞌnaj yahawil yinh munil yinh Yatut Komam Jahawil, haxa xin ebꞌnaj chitohlan ebꞌnaj hosom teꞌ yebꞌ ebꞌnaj maestro albañil chimunla yinh Yatut Komam Jahawil. 12 Chistolanpaxo ebꞌnaj ebꞌnaj albañil, yebꞌ ebꞌnaj kꞌupom chꞌen. Chiloqꞌlaxpaxo te teꞌ polbꞌil, yebꞌ chꞌen chꞌen kꞌupbꞌilxa chiꞌok yinh ishatilal Yatut Komam Jahawil. Haꞌ chꞌen melyu tuꞌ chiꞌokniko yet chitohlalax sunil munil chiwatxꞌelax yinh Yatut Komam. 13 Haꞌ chꞌen melyu chiꞌilaxto yul Yatut Komam tuꞌ, mach chiꞌokniko chꞌen yinh iswatxꞌebꞌanil chꞌen vaso, yebꞌ chꞌen nime sekꞌ plata, yebꞌ chꞌen chiꞌinilo istanhil cantil, yebꞌ chꞌen trompeta. Machi hunuxa munlabꞌal yinh plata chiꞌokniko yul Yatut Komam Jahawil chiloqꞌlax yinh chꞌen melyu tuꞌ. 14 Wal xin haꞌ tet ebꞌnaj chiꞌilni munil yinh Yatut Komam Jahawil chiꞌaqꞌlax chꞌen melyu tuꞌ, haxa xin ebꞌnaj chitohlan mak chiwatxꞌen munil. 15 Machi xin chiꞌil-lax ismunil ebꞌnaj winaj chikꞌubꞌan chꞌen melyu yet chistohlan ebꞌnaj ebꞌnaj chimunla tuꞌ, yuto tohol isnabꞌal ebꞌnaj chikꞌubꞌan chꞌen. 16 Yajaꞌ wal chꞌen melyu chꞌaqꞌlax istoholo mule, yebꞌ chꞌen chꞌaqꞌni tanho mule, mach chiꞌilaxto chꞌen yul Yatut Komam Jahawil, yuto yet ebꞌyaꞌ sacerdote ye chꞌen.

17 Haꞌ yinh hunteqꞌan tzꞌayik tuꞌ to naj Hazael, isreyal Siria yaqꞌaꞌko howal yinh konhobꞌ Gat, istanhilo konhobꞌ tuꞌ yu naj. Lahwi tuꞌ, yokpaxo yinh isnabꞌal naj Hazael isto yanoko howal yinh konhobꞌ Jerusalén. 18 Wal yaꞌ Joás, isreyal Judá, iskutxbꞌako yaꞌ sunil tzet aqꞌbꞌilxa yu yichmam yaꞌ tet Komam Dios ay yul Yatut Komam. Haꞌ yichmam yaꞌ tuꞌ xin haꞌ ton yaꞌ Josafat, yaꞌ rey Joram, yebꞌ yaꞌ Ocozías, isreyal Judá. Iskutxbꞌanpaxiko yaꞌ sunil yebꞌalqꞌabꞌe aqꞌbꞌilxa tet Komam yu yaꞌ, yebꞌ sunil melyu ay yul Yatut Komam, yebꞌ sunil qꞌalomal ay yul palacio; yanito yaꞌ sunil tuꞌ tet naj Hazael isreyal Siria. Hak tuꞌ xin matxa yako naj Hazael tuꞌ howal yinh Jerusalén.

19 Haꞌ hunteqꞌanxa tzet yu yaꞌ rey Joás, yebꞌ sunil tzet iswatxꞌe yaꞌ, tzꞌibꞌnhebꞌil yul hum chitzotel yinh tzetaj iswatxꞌe ebꞌyaꞌ isreyal Judá. 20 Yajaꞌ pakꞌiko ebꞌnaj ischejabꞌ yaꞌ rey Joás yinh, ismaqꞌnikamo ebꞌnaj yaꞌ bꞌey huneꞌ nha chiyij Milo yet lanhan isto yaꞌ bꞌey Sila. 21 Haꞌ xin naj Josacar, iskꞌahol naj Simeat yebꞌ naj Jozabad iskꞌahol naj Somer maqꞌnikamo yaꞌ rey Joás tuꞌ, ebꞌnaj tuꞌ ischejabꞌ yaꞌ ye ebꞌnaj. Ismujlax yaꞌ rey Joás bꞌey iskonhobꞌ yaꞌ David bꞌay mujan ismam icham yaꞌ, yebꞌ ismam yaꞌ. Yok yaꞌ Amasías, iskꞌahol yaꞌ reyal seleloj.