Ok yaꞌ Joacaz reyal yinh Israel
13
Hayet 23 (oxebꞌ iskawinaj) habꞌilxa yok yaꞌ Joás isreyalo Judá, yok yaꞌ Joacaz isreyalo Israel bꞌey Samaria. 17 (Hujlahonhebꞌ) habꞌil xin ok yaꞌ Joacaz iskꞌahol yaꞌ Jehú isreyalo Israel. 2 Yajaꞌ xin haꞌ istxꞌojal iswatxꞌe yaꞌ Joacaz tuꞌ yul sat Komam Jahawil, yuto ok tzujno yaꞌ yinta ismul yaꞌ rey Jeroboam, iskꞌahol naj Nabat yet yijbꞌan yaꞌ konhobꞌ Israel yaniko ismul yul sat Komam Dios, machi xin ispohilo isbꞌa yaꞌ Joacaz yinh istxꞌojal, hakaꞌ iswatxꞌe yaꞌ Jeroboam. 3 Hak tuꞌ yu istit lemna ishowal Komam Jahawil yinh konhobꞌ Israel, yaniko Komam konhobꞌ Israel yul isqꞌabꞌ naj Hazael, isreyal Siria, yebꞌ yul isqꞌabꞌ naj Ben-adad, iskꞌahol naj Hazael tuꞌ yinh txꞌiꞌal tiempo.4 Yuxin ok yaꞌ rey Joacaz txahlo tet Komam Jahawil, yabꞌen Komam istxah yaꞌ tuꞌ, yuto yil Komam isyaꞌtajil chiyaqꞌle konhobꞌ Israel, yuto kaw chiꞌekꞌyaꞌ ebꞌnaj Israel tuꞌ yu naj Hazael, isreyal Siria. 5 Yaqꞌni Komam Dios huneꞌ mak chikolni ebꞌnaj, hak tuꞌ yu yel ebꞌnaj Israel yul isqꞌabꞌ ebꞌnaj sirio, ismeltzo ebꞌnaj yulaj yatut hakaꞌtikꞌa yet yalanhtokanoj. 6 Waxanhka kol-laxilo ebꞌnaj yu Komam Dios, yajaꞌ mach ispohilo isbꞌa ebꞌnaj yinh istxꞌojal hakaꞌ iswatxꞌe ebꞌnaj yuninal yaꞌ Jeroboam yet yijbꞌan yaꞌ ebꞌnaj Israel yaniko ismul. Isbꞌeybꞌalnhe Israel istxꞌojal iswatxꞌe ebꞌnaj, machi xin ilaxilo tioxh Asera aykanh bꞌey Samaria.
7 Kaw xin haywanhxanhe issoldado yaꞌ Joacaz kani, kachanxanhe ebꞌnaj 50 (lahonh yoxkꞌalwanh) soldado ayahto yibꞌanh cheh, yebꞌ 10 (lahonhebꞌ) carruaje, yok huneꞌ mil ebꞌnaj soldado chibꞌelwi yu yoj, yuto istanhtzelo naj Hazael, isreyal Siria ebꞌnaj. Xanhobꞌtanhelax ebꞌnaj yu ebꞌnaj sirio tuꞌ hakaꞌ isxanhobꞌtanhelax pojoj.
8 Haꞌ hunteqꞌanxa tzet yu yaꞌ rey Joacaz yebꞌ sunil tzet iswatxꞌe yaꞌ yebꞌ ishelanil yaꞌ, tzꞌibꞌnhebꞌil yul hum chitzotel yinh ebꞌyaꞌ isreyal Israel. 9 Lahwi tuꞌ iskam yaꞌ Joacaz hakaꞌ yu iskamto ismam icham yebꞌ ismam yaꞌ, ismujlax yaꞌ bꞌey Samaria, yok yaꞌ Joás, iskꞌahol yaꞌ reyal seleloj.
Ok yaꞌ Joás isreyalo Israel
10 Haxa yet 37 (hujlahonhebꞌ iskawinaj) habꞌilxa yok yaꞌ Joás isreyalo Judá, yok yaꞌ Joás iskꞌahol yaꞌ Joacaz, isreyalo Israel bꞌey Samaria, 16 (wajlahonhebꞌ) habꞌil ok yaꞌ isreyal Israel. 11 Yajaꞌ haꞌ istxꞌojal iswatxꞌe yaꞌ Joás tuꞌ sata Komam Jahawil, yuto mach ispohilo isbꞌa yaꞌ yinh sunil istxꞌojal bꞌay yako yaꞌ Jeroboam ismul, yaꞌ iskꞌahol naj Nabat, yet yijbꞌan yaꞌ konhobꞌ Israel yanoko ismul. Haꞌ istxꞌojal iswatxꞌe yaꞌ Jeroboam, haꞌ isbꞌeybꞌalnhe yaꞌ Joás.
12 Haꞌ hunteqꞌanxa tzet yu yaꞌ rey Joás yebꞌ sunil tzet iswatxꞌe yaꞌ, yebꞌ yinh tzet yu yaniko yaꞌ howal yinh yaꞌ Amasías, isreyal Judá, tzꞌibꞌnhebꞌil yul hum chitzotel yinh ebꞌyaꞌ rey Israel. 13 Lahwi tuꞌ iskam yaꞌ rey Joás hakaꞌ yu iskamto ismam icham yebꞌ ismam yaꞌ, ismujlax yaꞌ bꞌey Samaria bꞌay mujan ebꞌyaꞌ rey Israel, yok yaꞌ Jeroboam reyal selelo yaꞌ.
Huneꞌ islahobꞌal tzotiꞌ yalkano yaꞌ Eliseo yet maxhto chikami
14 Wal yaꞌ Eliseo kaw yaꞌay yaꞌ, haꞌ xin huneꞌ yabꞌil tuꞌ aqꞌnikamo yaꞌ. Hayet yaꞌay yaꞌ, isto yaꞌ Joás, isreyal Israel, ilwal yinh yaꞌ. Hayet yapni yaꞌ Joás iskꞌatanh yaꞌ Eliseo yok yaꞌ oqꞌoj, yalni yaꞌ tet yaꞌ Eliseo:
—¡Hach inmaman, hach inmaman, iscarruaje Israel yebꞌ issoldado aykanh yibꞌanh cheh! xhi yaꞌ.a
15 Yalni yaꞌ Eliseo tet yaꞌ:
—Iti halitꞌ yebꞌ hayebꞌo isbꞌaqꞌ, xhi yaꞌ. Hak tuꞌ yu yinikanh yaꞌ Joás islitꞌ yebꞌ hayebꞌ isbꞌaqꞌ. 16 Lahwi tuꞌ yalni yaꞌ Eliseo tet yaꞌ Joás, isreyal Israel hakaꞌ tiꞌ:
—Watxꞌeko hunu isbꞌaqꞌ halitꞌ, xhi yaꞌ. Hayet lanhan iswatxꞌeniko yaꞌ isbꞌaqꞌ islitꞌ tuꞌ, yanayo yaꞌ Eliseo isqꞌabꞌ yibꞌanh isqꞌabꞌ yaꞌ. 17 Yalni yaꞌ Eliseo tet yaꞌ:
—Haj wentanah ayko yinh yetkꞌulal bꞌay chito tzꞌayik, xhi yaꞌ.
Hayet ishajni yaꞌ wentanah tuꞌ yalni yaꞌ Eliseo tet yaꞌ:
—Bejtzoto isbꞌaqꞌ halitꞌ, xhi yaꞌ.
Hayet isbꞌejtzonto yaꞌ isbꞌaqꞌ islitꞌ tuꞌ, yalni yaꞌ Eliseo tet yaꞌ:
—Haꞌ litꞌ tiꞌ, haꞌ chiyenilo tato chiskolilo Komam Jahawil iskonhobꞌ, haꞌ litꞌ tiꞌ chiyenipaxiloj tato chachiskolilo tet ebꞌnaj sirio bꞌey Afec, masanto chatanhtzekanilo ebꞌnaj sunil, xhi yaꞌ Eliseo. 18 Lahwi tuꞌ yalnipaxo yaꞌ Eliseo tet yaꞌ Joás, isreyal Israel.
—Ikanh isbꞌaqꞌ halitꞌ, xhi yaꞌ.
Hayet yinikanh yaꞌ isbꞌaqꞌ islitꞌ tuꞌ, yalni yaꞌ Eliseo tet yaꞌ:
—Wal tinanh tinhayo hawoj sat txꞌotxꞌ, xhi yaꞌ.
Oxelnhe xin istinhayo yaꞌ Joás yoj sat txꞌotxꞌ, yok linhnoj. 19 Yuxin tit ishowal yaꞌ Eliseo ischejabꞌ Komam Dios yinh yaꞌ Joás, yalni yaꞌ tet yaꞌ:
—Tato hatinhayo hawoj howel maka wajel sat txꞌotxꞌ, wal tuꞌ chatanhtzelo sunil ebꞌnaj sirio, matxa hunu ebꞌnaj xin chikan hawu, wal xin oxelnhe chachqꞌoji yinh ebꞌnaj sirio tuꞌ, xhi yaꞌ Eliseo.
20 Lahwi tuꞌ, iskam yaꞌ Eliseo, ismujlax yaꞌ. Haxa yinh yichebꞌanil hunxa habꞌil xin yapni hunbꞌulan ebꞌnaj elqꞌom ah Moab sat txꞌotxꞌ Israel; iqꞌbꞌil ischꞌen ebꞌnaj yet howal. 21 Hayet hunel tuꞌ xin to ebꞌnaj Israel ismujuꞌ huneꞌ kamom, hayet lanhan yapni ebꞌnaj bꞌay chismuj huneꞌ kamom, yilni ebꞌnaj hunbꞌulan ebꞌnaj elqꞌom, isbꞌejnikanikto ebꞌnaj huneꞌ kamom tuꞌ bꞌay mujan yaꞌ Eliseo, isto ebꞌnaj. Haxa yet yapni isnimanil huneꞌ kamom tuꞌ yibꞌanh isbꞌajil yaꞌ Eliseo, yulkanh iskꞌul huneꞌ kamom tuꞌ, yah linhnoj.
22 Yulbꞌal sunilbꞌal tiempo itzitz yaꞌ Joacaz kaw ekꞌyaꞌ yanma ebꞌnaj Israel yu naj Hazael, isreyal Siria. 23 Yajaꞌ tzꞌaykanh iskꞌul Komam Jahawil yinh Israel, istꞌanhxiko Komam yinh ebꞌnaj yu tzet tꞌinhbꞌabꞌilkano yu Komam tet yaꞌ Abraham, yebꞌ tet yaꞌ Isaac yebꞌ tet yaꞌ Jacob. Istꞌanhxiko Komam yinh ebꞌnaj, yuxin machi yoche Komam ta chitanhtzelaxkanilo ebꞌnaj, nitam yilaxilo ebꞌnaj sata Komam masanto tinanh.
24 Hayet iskam naj Hazael isreyal Siria, yok naj Ben-adad iskꞌahol naj reyal seleloj. 25 Haxa xin yaꞌ Joás iskꞌahol yaꞌ Joacaz kolnilo hunteqꞌan konhobꞌ yul isqꞌabꞌ naj Ben-adad iskꞌahol naj Hazael. Haꞌ hunteqꞌan konhobꞌ tuꞌ, haꞌ ton hunteqꞌan yilo naj Hazael tet yaꞌ Joacaz, ismam yaꞌ Joás, yet yaqꞌni ebꞌnaj howal. Oxel qꞌoji yaꞌ Joás yinh ebꞌnaj sirio, hak tuꞌ yu iskolnilo yaꞌ hunteqꞌan iskonhobꞌ ebꞌnaj Israel yul isqꞌabꞌ ebꞌnaj sirio.