5. TZOTIꞌ YIBꞌANHILO JUDÁ YEBꞌ ISRAEL MASANTO YET CHITANHILO TXꞌOTXꞌ SAMARIA
(4:1–17:41)
Ok yaꞌ Amasías reyalil yinh Judá
14
Hayet kabꞌxa habꞌil yok yaꞌ Joás, iskꞌahol yaꞌ Joacaz, isreyalo Israel, yok yaꞌ Amasías iskꞌahol yaꞌ Joás isreyalo Judá. 2 25 (Howebꞌ iskawinaj) habꞌil yaꞌ Amasías yet yok yaꞌ isreyalo Judá, 29 (bꞌalonhebꞌ iskawinaj) habꞌil xin ok yaꞌ reyal bꞌey Jerusalén. Joadán isbꞌi ismiꞌ yaꞌ Amasías, ah konhobꞌ Jerusalén ix. 3 Yaꞌ Amasías tuꞌ iswatxꞌe yaꞌ istoholal sata Komam Jahawil, yajaꞌ mach apni iswatxꞌen yaꞌ istoholal hakaꞌ yichmam yaꞌ, yaꞌ David. Isbꞌeybꞌalnhe yaꞌ isbꞌeybꞌal ismam, haꞌ ton yaꞌ Joás. 4 Waxanhka tohol yute isbꞌa yaꞌ, yajaꞌ machi yuchkꞌato yaꞌ ismexha xahanbꞌal ej tioxh iswiꞌla wonhan, yuto haꞌ tuꞌ chibꞌey konhobꞌ isnhusuꞌ isxahanbꞌal yebꞌ teꞌ pom.5 Haxa yet yiqꞌni yip yaꞌ Amasías yinh reyal, ismaqꞌnikamo yaꞌ ebꞌnaj maqꞌnikamo ismam yaꞌ yet ayko ismam yaꞌ tuꞌ reyal. 6 Yajaꞌ mach ismaqꞌkamo yaꞌ iskꞌahol ebꞌnaj maqꞌnikamo ismam yaꞌ tuꞌ, yu yijebꞌil yu yaꞌ tzet tzꞌibꞌnhebꞌilkano yul hum yu yaꞌ Moisés bꞌay yalkano Komam Jahawil hakaꞌ tiꞌ: «Haꞌ ebꞌnaj mame mach chu ismaqꞌlaxkamo ebꞌnaj yu istohlan ismul iskꞌahol. Yebꞌpaxo xin ebꞌnaj uninale mach chu yalaxayo kamikal yibꞌanh ebꞌnaj yu istohlan ismul ismam, wal xin haꞌ hunun mak chiyako ismul, haꞌ chikami,» xhikano Komam.
7 Yaꞌ Amasías tuꞌ, ismaqꞌkamo yaꞌ 10 mil ebꞌnaj ah Edom sat akꞌal chiyij isbꞌi Atzꞌam atzꞌam. Yaniko yaꞌ howal yinh konhobꞌ Sela, istanhilo yu yaꞌ, yaniko yaꞌ Jocteel isbꞌiho konhobꞌ tuꞌ, hakto tuꞌ isbꞌi tinanh.
8 Lahwi tuꞌ yanito yaꞌ rey Amasías ischejabꞌ yalno tet yaꞌ Joás iskꞌahol yaꞌ Joacaz, haxa yaꞌ Joacaz tuꞌ iskꞌahol yaꞌ Jehú, isreyal Israel, yalni hakaꞌ tiꞌ: «Titanh, kat jil-len kosat,» xhito yaꞌ.
9 Yalnito yaꞌ Joás isreyal Israel ispaj istzotiꞌ yaꞌ Amasías isreyal Judá, hakaꞌ tiꞌ: «Haꞌ teꞌ txꞌix ay bꞌey Líbano yal teꞌ tet teꞌ cedro ay bꞌey Líbano tuꞌ: “Aqꞌ ix hakutzꞌin tet inkꞌaholan yunhe yok ix yixalo naj,” xhi. Yajaꞌ ekꞌ noꞌ xoltelajil noqꞌ bꞌey Líbano tuꞌ isxanhnayo noꞌ teꞌ txꞌix tuꞌ. 10 Hach tiꞌ, yinh kaw yeli kach qꞌoji yinh ebꞌnaj ah Edom, yuxin kaw ayko loloꞌal yinh hawanma, yuxin kam lahiko haloloꞌnhen habꞌa. Yajaꞌ kananhkano hawatut tuꞌ, mach chachtit howal winhan, ¿tzet yinh xin chahuchti isyaꞌtajil tawibꞌanh yebꞌ yibꞌanh Judá, yunhe hatanhilo yebꞌ Judá tuꞌ?» xhiti yaꞌ.
11 Yajaꞌ mach yabꞌeto yaꞌ Amasías tzet yalti yaꞌ Joás, yuxin tit yaꞌ Joás isreyal Israel yaqꞌaꞌko howal yinh yaꞌ Amasías isreyal Judá, ischalen isbꞌa ebꞌyaꞌ bꞌey Bet-semes yul ismajul Judá. 12 Yaykꞌay ebꞌnaj Judá tuꞌ yu ebꞌnaj Israel, yelkanh ebꞌnaj Judá xin, hununxanhe yu ispaxto ebꞌnaj yulaj ismantiado. 13 Istzabꞌnayo yaꞌ Joás isreyal Israel yaꞌ Amasías isreyal Judá bꞌey Bet-semes yaniko yaꞌ yaꞌ preso. Yaꞌ Amasías tuꞌ iskꞌahol yaꞌ Joás ye yaꞌ, haxa yaꞌ Joás iskꞌahol yaꞌ Ocozías ye yaꞌ. Lahwi tuꞌ isto yaꞌ Joás bꞌey konhobꞌ Jerusalén, yuchkꞌanayo yaꞌ 180 metro iskꞌubꞌal konhobꞌ tuꞌ, ichiti bꞌey ispultahil iskꞌubꞌal Efraín masanta yinh hunxa ispultahil istxikin iskꞌubꞌal konhobꞌ tuꞌ. 14 Yinipaxto yaꞌ sunil chꞌen oro yebꞌ chꞌen plata yebꞌ sunil munlabꞌal ilcha yu yaꞌ yul Yatut Komam Jahawil, yinipaxto yaꞌ sunil qꞌalomal ay yul ispalacio yaꞌ Amasías, yinipaxto yaꞌ ebꞌnaj kꞌahole preso. Lahwi tuꞌ ismeltzo yaꞌ Joás bꞌey Samaria.
15 Haꞌ hunteqꞌanxa tzet yu yaꞌ rey Joás yebꞌ sunil tzet iswatxꞌe yaꞌ, yebꞌ hanta yip yaꞌ, yebꞌ yet yaqꞌni yaꞌ howal yebꞌ yaꞌ Amasías isreyal Judá, tzꞌibꞌnhebꞌilkano yul hum chitzotel yinh ebꞌyaꞌ isreyal Israel. 16 Lahwi tuꞌ iskam yaꞌ Joás hakaꞌ yu iskamto ismam icham yaꞌ yebꞌ ismam yaꞌ, ismujlax yaꞌ bꞌey Samaria bꞌay mujbꞌil ebꞌyaꞌ isreyal Israel, yok yaꞌ Jeroboam, iskꞌahol yaꞌ reyal seleloj.
17 Wal yaꞌ Amasías, iskꞌahol yaꞌ Joás, isreyal Judá, 15 (holanhebꞌto) habꞌil kankano yaꞌ tzujanilxa yet iskam yaꞌ Joás, iskꞌahol yaꞌ Joacaz, isreyal Israel. 18 Haꞌ hunteqꞌanxa tzet iswatxꞌe yaꞌ Amasías tuꞌ tzꞌibꞌnhebꞌil yul hum chitzotel yinh ebꞌyaꞌ isreyal Judá. 19 Alaxiko howal yinh yaꞌ Amasías bꞌey Jerusalén, yuxin elkanh yaꞌ isto yaꞌ bꞌey Laquis, yajaꞌ tzujchayo yaꞌ bꞌey tuꞌ, ismaqꞌlaxkamo yaꞌ. 20 Lahwi tuꞌ yilaxto isnimanil yaꞌ yibꞌanh cheh, ismujlax yaꞌ bꞌey Jerusalén, bꞌay mujan yichmam yaꞌ bꞌey iskonhobꞌ yaꞌ David. 21 Hak tuꞌ xin sunil konhobꞌ Judá aniko yaꞌ Azarías, iskꞌahol yaꞌ Amasías reyal seleloj. Yaꞌ Azarías tuꞌ, 16 (wajlahonhebꞌ) habꞌil yaꞌ yet yalaxiko yaꞌ reyal. 22 Iswatxꞌenkanh yaꞌ Azarías tuꞌ konhobꞌ Elat, yaqꞌni meltzoho yaꞌ yul isqꞌabꞌ Judá, yet xakamto ismam yaꞌ.
Ok yaꞌ iskabꞌ Jeroboam reyal yinh Israel
23 Hayet 15 (holanhebꞌxa) habꞌil, yok yaꞌ Amasías, iskꞌahol yaꞌ Joás, isreyal Judá, yok yaꞌ Jeroboam, iskꞌahol yaꞌ Joás isreyal Israel bꞌey Samaria; 41 (huneꞌ yoxkꞌal) habꞌil xin ok yaꞌ Jeroboam tuꞌ reyal. 24 Yajaꞌ haꞌ istxꞌojal iswatxꞌe yaꞌ iskabꞌ Jeroboam tuꞌ, sata Komam Jahawil, yuto mach ispohilo isbꞌa yaꞌ yinh istxꞌojal yako yaꞌ bꞌabꞌel Jeroboam, yaꞌ iskꞌahol naj Nabat. Yaꞌ bꞌabꞌel Jeroboam tuꞌ, kaw yijbꞌa yaꞌ konhobꞌ Israel yaniko ismul.a
25 Iskolnilo yaꞌ Jeroboam tuꞌ ismohonal Israel, chiꞌichiti bꞌay chonhokapno bꞌey Hamat masanta bꞌey haꞌ mar yul ismajul Arabá, hakaꞌtikꞌa yu yalnikano Komam Jahawil, isDiosal Israel, tet yaꞌ Jonás, ischejabꞌ Komam, yaꞌ iskꞌahol yaꞌ Amitai, ah Gat-hefer. 26 Yuto yil Komam Jahawil sunil isyaꞌtajil kaw how chiyaqꞌle konhobꞌ Israel, machi xin hunu ebꞌnaj Israel chu iskolni isbꞌa tet isyaꞌtajil, machi xin hunu mak chikolwa yinh. 27 Wal Komam Jahawil mach isje tato chibꞌutlaxtanho isbꞌi Israel tuꞌ sat yibꞌanhqꞌinal tiꞌ, yuxin haꞌ yaꞌ Jeroboam, iskꞌahol yaꞌ Joás yako Komam Dios iskolnolo konhobꞌ Israel.
28 Haꞌ hunteqꞌanxa tzet yu yaꞌ iskabꞌ Jeroboam, yebꞌ sunil tzet iswatxꞌe yaꞌ, yebꞌ ishelanil yaꞌ, yebꞌ ej howal yaqꞌ yaꞌ, yebꞌ yet iskolnilo yaꞌ hunteqꞌan konhobꞌ yettikꞌa Judá, haꞌ ton konhobꞌ Damasco yebꞌ konhobꞌ Hamat, haꞌ sunil tuꞌ tzꞌibꞌnhebꞌilkano yul hum chitzotel yinh ebꞌyaꞌ rey Israel. 29 Haxa yet iskam yaꞌ Jeroboam tuꞌ ismujlax yaꞌ bꞌay mujan ebꞌyaꞌ isreyal Israel, yok yaꞌ Zacarías iskꞌahol yaꞌ, reyal seleloj.