3 Haxa yet yiqꞌnikanh yip yaꞌ yinh reyal, ispotxꞌnikamo yaꞌ ebꞌnaj chejabꞌ potxꞌnikamo ismam yaꞌ. 4 Yajaꞌ mach ispotxꞌkamo yaꞌ ebꞌnaj iskꞌahol ebꞌnaj hakaꞌ yalni yul hum yet ley tzꞌibꞌnhebꞌilkano yu yaꞌ Moisés bꞌay yalkano Komam Jahawil hakaꞌ tiꞌ: «Ebꞌnaj mame mach chu yaqꞌlax kamo ebꞌnaj yu ismul iskꞌahol, ebꞌnaj kꞌahole mach chu yaqꞌlax kamo ebꞌnaj yu ismul ismam, wal xin haꞌ hunun mak chiyako ismul haꞌ chikami,» xhikanoj.

5 Lahwi tuꞌ iskutxbꞌaniko yaꞌ rey Amasías sunil ebꞌnaj Judá yebꞌ ebꞌnaj Benjamín, issikꞌnilo yaꞌ ebꞌnaj chiꞌok iswiꞌehalo yinh hunun mil yebꞌ yinh hunun 100 (hokꞌal) ebꞌnaj winaj. Kutxbꞌalax ebꞌnaj yinh hunun majan hatatikꞌa yikꞌal; isbꞌislax ebꞌnaj winaj ayxako yinh 20 (hunkꞌal) habꞌil yebꞌ ebꞌnaj xapalkꞌon yinh 20 (hunkꞌal) habꞌil, haꞌ xin isbꞌisil ebꞌnaj tuꞌ, ay 300 mil ebꞌnaj helan yelto yinh howal, ay islanza yebꞌ yescudo. 6 Istohlanpaxo yaꞌ rey Amasías 100 (hokꞌal) talento chꞌen plata tet 100 mil ebꞌnaj soldado Israel kaw helan yinh howal, yu iskolwa ebꞌnaj yinta yaꞌ yinh howal. 7 Yajaꞌ ay huneꞌ ischejabꞌ Komam Dios tiꞌ apni iskꞌatanh yaꞌ Amasías, yalni yaꞌ tet yaꞌ:

—Mam rey machojabꞌ chito ebꞌnaj Israel howal tawintaj yuto mach ayoko Komam Jahawil yetbꞌiho ebꞌnaj, hakpax tuꞌ ebꞌnaj Efraín mach ayoko Komam yetbꞌiho ebꞌnaj. 8 Yajaꞌ ta chawito ebꞌnaj kolwal tawinh, yu hahipnhento habꞌa hato yinh howal, chachyaqꞌaꞌko Komam Dios yul isqꞌabꞌ ebꞌnaj chichiwa iskꞌul tawinh, yuto yinhnhe Komam Dios chiꞌilcha jip, haꞌ chu iskolwa jinh, haꞌ Komam chu konhistanhtzenpaxiloj, xhi yaꞌ.

9 Isqꞌambꞌen yaꞌ rey Amasías tet ischejabꞌ Komam Dios tuꞌ:

—¿Tzet xin chitanhkano chꞌen 100 talento plata aqꞌbꞌil wuhan tet ebꞌnaj soldado Israel, chal tuꞌ? xhi yaꞌ.

Istaqꞌwi ischejabꞌ Komam tet yaꞌ:

—Komam Dios ekꞌbꞌalto chꞌen chaqꞌ Komam tawet sata chꞌen hawaqꞌ tet ebꞌnaj tuꞌ, xhi yaꞌ.

10 Hak tuꞌ yu ispohnilo yaꞌ rey Amasías ebꞌnaj soldado titna bꞌey Efraín, yalni yaꞌ tet ebꞌnaj tato chimeltzo ebꞌnaj yatut. Yajaꞌ tit ishowal ebꞌnaj soldado Israel yinh ebꞌnaj Judá yet yabꞌen ebꞌnaj huneꞌ tuꞌ, kaw xin ok ishowal ebꞌnaj yinh iskꞌul, ispaxto ebꞌnaj yatut.

11 Yiqꞌni yip yanma yaꞌ rey Amasías, yinito yaꞌ ebꞌnaj Judá, iskonhobꞌ yinh howal, yapni ebꞌnaj bꞌey akꞌal chiyij Atzꞌam, ispotxꞌnikamo ebꞌnaj 10 (lahonhebꞌ) mil ebꞌnaj ah Seir bꞌey tuꞌ. 12 Istzabꞌnipaxayo ebꞌnaj Judá tuꞌ 10 (lahonhebꞌxa) mil ebꞌnaj ah Seir, yinahto ebꞌnaj ebꞌnaj yinh iswiꞌ huneꞌ chꞌen pahaw, isqꞌojnayto ebꞌnaj ebꞌnaj bꞌey tuꞌ, isxitmokanto isnimanil ebꞌnaj sunil.

13 Wal ebꞌnaj soldado Israel matxa ischahto yaꞌ rey Amasías yinta yinh howal, ebꞌnaj meltzoto yu yaꞌ, ok ebꞌnaj yaqꞌaꞌko howal yinh hunteqꞌan konhobꞌ Judá chiꞌichiti bꞌey Samaria masanta bꞌey Bet-horón, ispotxꞌnikamo ebꞌnaj oxebꞌ mil ebꞌnaj winaj, yinilo ebꞌnaj txꞌiꞌal tzetaj ye tuꞌ kaw kꞌul.

14 Haxa yet ismeltzoti yaꞌ rey Amasías yet ismaqꞌnikamo yaꞌ ebꞌnaj soldado yet Edom, yiniti yaꞌ hunteqꞌan istioxh ebꞌnaj Seir, yaniko yaꞌ isdiosaloj; yok yaꞌ yinoyo isbꞌa tet hunteqꞌan tioxh tuꞌ, isnhusni yaꞌ xahanbꞌal tet. 15 Yuxin tit ishowal Komam Jahawil yinh yaꞌ rey Amasías, ischejnito Komam huneꞌ ischejabꞌ iskꞌatanh yaꞌ, yalni ischejabꞌ Komam:

—¿Tzet yinh xin chaxhok hawiqꞌayo habꞌa tet istioxh konhobꞌ machi yu iskolnilo isbꞌa yul haqꞌabꞌ? xhi yaꞌ.

16 Hayet yabꞌen yaꞌ Amasías yalni ischejabꞌ Komam Dios hakaꞌ tuꞌ, istaqꞌwi yaꞌ hakaꞌ tiꞌ:

—¿Mak makaxhaniti hatzꞌajbꞌan inkꞌulan, hanin rey intiꞌan? Wal xin, kach hatiꞌ. ¿Mato chawoche chachkami? xhi yaꞌ. Hayet isbꞌejni yaꞌ rey Amasías tuꞌ istzoteli, istzotelpaxo ischejabꞌ Komam Dios, yalni hakaꞌ tiꞌ:

—Hanin tiꞌanh wohtajan tato nabꞌilxa yu Komam Dios kach istanhtzeniloj yu tzet maxawatxꞌe tiꞌ, yebꞌ yu mach chawabꞌe tzet chiwalan, xhi yaꞌ.

17 Wal yaꞌ Amasías isreyal Judá, hayet lahwi isqꞌanni yaꞌ istzꞌajbꞌanil isnabꞌal, yalnito yaꞌ tet yaꞌ rey Joás, isreyal Israel, iskꞌahol yaꞌ Joacaz, yaꞌ iskꞌahol yaꞌ Jehú, hakaꞌ tiꞌ: «Titanh kat jil-leniko kosat hununonh,» xhito yaꞌ. 18 Yuxin ischej yaꞌ Joás isreyal Israel hal-laxo tet yaꞌ Amasías isreyal Judá hakaꞌ tiꞌ: «Ay huneꞌ teꞌ txꞌix ay bꞌey Líbano halni tet teꞌ cedro ay bꞌey tuꞌ hakaꞌ tiꞌ: “Aqꞌ ix hakutzꞌin yixalo inkꞌaholan,” xhi, yajaꞌ xin ay hunteqꞌan noꞌ xoltelajil noqꞌ ay bꞌey Líbano tuꞌ ekꞌ xanhxon yibꞌanh teꞌ txꞌix tuꞌ. 19 Hach tiꞌ hawal hakaꞌ tiꞌ: “Kinqꞌojihan yinh ebꞌnaj Edom,” kachi. Yuxin yikanh isbꞌa hawanma, yaniko loloꞌal yinh. Ekꞌna kꞌul hakan bꞌey hawatut. ¿Tzet yinh xin chapitti hunu istxꞌojal tawinh, yu isqꞌoji tawinh, kat isqꞌojipaxo yinh konhobꞌ Judá?» xhito yaꞌ Joás tet yaꞌ rey.

20 Yajaꞌ xin mach yabꞌeto yaꞌ Amasías tzet yalto yaꞌ Joás tuꞌ, yuto xaꞌel yinh iskꞌul Komam Dios yaniko yaꞌ Amasías yul isqꞌabꞌ ebꞌnaj ayko ishowal yinh, yuto ok ebꞌnaj Judá yiqꞌayo isbꞌa tet istioxh ebꞌnaj Edom. 21 Hak tuꞌ yu isto yaꞌ Joás isreyal Israel yaqꞌno howal yinh yaꞌ Amasías, yil-len sat ebꞌyaꞌ iskawanhil, yaqꞌni howal ebꞌyaꞌ bꞌey Bet-semes, ayko yul ismajul txꞌotxꞌ Judá. 22 Yajaꞌ qꞌoji ebꞌnaj Israel yinh ebꞌnaj Judá, yelkanh ebꞌnaj Judá, ispaxto ebꞌnaj yatut. 23 Istzabꞌnayo yaꞌ Joás isreyal Israel yaꞌ Amasías isreyal Judá bꞌey Bet-semes, yaniko yaꞌ yaꞌ preso, yinito yaꞌ yaꞌ bꞌey Jerusalén. Yaꞌ Amasías iskꞌahol yaꞌ Joás ye yaꞌ, haxa yaꞌ Joás iskꞌahol yaꞌ Joacaz ye yaꞌ. Yuchkꞌanto yaꞌ Joás, isreyal Israel iskꞌubꞌal Jerusalén, 180 metro iskꞌubꞌal tuꞌ yuchkꞌayo yaꞌ, ichiti bꞌey pulta yet Efraín masanta apni bꞌey huneꞌ pulta chij isbꞌi isTxikin. 24 Yinipaxto ebꞌnaj Israel tuꞌ sunil chꞌen oro yebꞌ chꞌen plata yebꞌ sunil munlabꞌal ayikto yul Yatut Komam Dios; haꞌ ton hunteqꞌan qꞌalomal tanhebꞌil yu ebꞌnaj yikꞌal naj Obed-edom. Yinipaxto ebꞌnaj Israel tuꞌ qꞌalomal ay bꞌey yatut yaꞌ rey, yinipaxto ebꞌnaj, ebꞌnaj iskꞌahol ebꞌnaj Judá, ebꞌnaj kaw ay yelapnoj; ispaxto ebꞌnaj bꞌey Samaria.

25 Yaꞌ Amasías, iskꞌahol yaꞌ Joás isreyal Judá, 15 (holanhebꞌto) habꞌil ekꞌyaꞌ yet tzujanilxa yet iskam yaꞌ Joás, iskꞌahol yaꞌ Joacaz, isreyalo Israel. 26 Hunteqꞌanxa tzet iswatxꞌe yaꞌ rey Amasías yet yichebꞌanil yebꞌ yet islahobꞌal yet yok yaꞌ reyal, ¿tom mach tzꞌibꞌnhebꞌilkano yul hum chitzotel yibꞌanhilo ebꞌyaꞌ isreyal Judá yebꞌ ebꞌyaꞌ isreyal Israel xin? 27 Hataxtikꞌa yet ispohnilo isbꞌa yaꞌ rey Amasías yinh Komam Jahawil, yok hunteqꞌan ebꞌnaj yaniko howal yinh yaꞌ bꞌey Jerusalén, yuxin elkanh yaꞌ, isto yaꞌ bꞌey konhobꞌ Laquis, yajaꞌ chejlaxto issayomal yaꞌ, ispotxꞌlaxkamo yaꞌ bꞌey tuꞌ. 28 Lahwi tuꞌ yilaxti yaꞌ yibꞌanh cheh, ismujlax yaꞌ bꞌay mujan yichmam yaꞌ bꞌey Judá.