3 Hayet yok yaꞌ Uzías reyal tuꞌ 16 (wajlahonhebꞌ) habꞌil yaꞌ, wal xin 52 (kabꞌlahonhebꞌ yoxkꞌal) habꞌil xin ok yaꞌ reyal bꞌey Jerusalén, Jecolías isbꞌi ismiꞌ yaꞌ, ah Jerusalén ix.

4 Haꞌ istoholal iswatxꞌe yaꞌ sata Komam Jahawil, isbꞌeybꞌalnhen yaꞌ tzetaj iswatxꞌe yaꞌ Amasías, ismam. 5 Yako yaꞌ yinh iskꞌul issayni Komam Dios yulbꞌal istiempohal yet itzitz naj Zacarías, yuto haꞌ naj Zacarías tuꞌ, kuyni yaꞌ isxiw tet Komam Jahawil, kaw yayo Komam isyaxil yibꞌanh yaꞌ.

6 Haꞌ yaꞌ rey Uzías, to yaꞌ yebꞌ issoldado yaqꞌaꞌko howal yinh ebꞌnaj filisteo, yuchkꞌanto ebꞌnaj iskꞌubꞌal konhobꞌ Gat, yebꞌ konhobꞌ Jabnia, yebꞌ iskꞌubꞌal konhobꞌ Asdod. Iswatxꞌenkanh yaꞌ konhobꞌ yulaj ismajul txꞌotxꞌ Asdod yebꞌ sat istxꞌotxꞌ ebꞌnaj filisteo. 7 Haꞌ Komam Dios kolwa yinh yaꞌ Uzías yet yaniko yaꞌ howal yinh ebꞌnaj filisteo, yebꞌ yinh ebꞌnaj árabe ay bꞌey Gur-baal, yebꞌ yinh ebꞌnaj amonita. 8 Yaqꞌni ebꞌnaj amonita istohlabꞌal tet yaꞌ rey Uzías, ispujnato isqꞌumal yaꞌ rey tuꞌ bꞌey ismohonal txꞌotxꞌ Egipto, yuto kaw yiqꞌkanokanh yip yaꞌ sikꞌlebꞌil.

9 Iswatxꞌenpaxokanh yaꞌ Uzías ej torre bꞌey Jerusalén; iskawilal pulta yinh istxikin iskꞌubꞌal, yebꞌ bꞌey ispultahil akꞌal, yebꞌpaxo hunteqꞌan ejxa istxikin; kaw kꞌul yutekanh yaꞌ hunteqꞌan torre tuꞌ. 10 Iswatxꞌenpaxokanh yaꞌ ej torre bꞌey txꞌotxꞌ desierto, ischejnipaxo yaꞌ hol-laxo txꞌiꞌal kꞌuh, yuto kaw niman isnoqꞌ yaꞌ satla akꞌal Sefela yebꞌ yichla witz istiꞌ ha haꞌ, kaw aypaxo istzꞌunubꞌ yaꞌ yebꞌ teꞌ uva yinhla istzalanil witz yebꞌ satla akꞌal bꞌay ay txꞌo txꞌotxꞌ kaw kꞌul. Yaꞌ rey Uzías tuꞌ kaw ay yanma yaꞌ yinh tzꞌunubꞌ.

11 Aypaxo xin issoldado yaꞌ rey Uzías chiꞌelto yinh howal yinh hunun majan. Haꞌ istxolal hunun majan ebꞌnaj soldado tuꞌ, haꞌ naj Jeiel istzꞌibꞌlom yaꞌ, watxꞌeni, yebꞌ naj Maasías gobernador, yebꞌ naj Hananías, huneꞌ naj iswiꞌehal yinh ebꞌnaj ischejabꞌ yaꞌ rey. 12 Haꞌ ebꞌnaj iswiꞌehal yinh ebꞌnaj soldado ay 2,600 ebꞌnaj tuꞌ, winaj kaw helan yebꞌ kaw ay yip yanma. 13 Haxa ebꞌnaj soldado ayko yalanh ischejbꞌanil ebꞌnaj 307,500 isbꞌisil ebꞌnaj, ebꞌnaj tuꞌ winaj kaw helan yinh howal yebꞌ kaw ay yip yanma, haꞌ xin ebꞌnaj tuꞌ chikolwa yinh yaꞌ rey yaqꞌni howal yinh ebꞌnaj chiꞌaniko howal yinh. 14 Yaqꞌni watxꞌeꞌ yaꞌ rey Uzías tuꞌ ischꞌen ebꞌnaj soldado chiꞌokniko yinh howal; chꞌen escudo, chꞌen lanza, chꞌen yelmo chiꞌahto yinh iswiꞌ ebꞌnaj, chꞌen coraza yebꞌ litꞌ, yebꞌ ula chiqꞌojnito chꞌen chꞌen. 15 Ischejni yaꞌ ebꞌnaj ingeniero iswatxꞌen chꞌen nime chꞌen yet howal bꞌey Jerusalén, yanahto ebꞌnaj chꞌen yibꞌanh torre yebꞌ yinh ej istxikin iskꞌubꞌal konhobꞌ yu isqꞌojnito chꞌen nime litꞌ, yebꞌ chꞌen nime qꞌojbꞌal. Kaw xin nahat apnikano isqꞌumal ismay yaꞌ rey Uzías tuꞌ, yuto kꞌaykanilo iskꞌul anma yabꞌen hanta iskꞌulal iskꞌul Komam Dios kolwa yinh yaꞌ, hak tuꞌ yu yiqꞌnikanokanh yip yaꞌ.

16 Hayet yiqꞌnikanokanh yip yaꞌ isloloꞌbꞌilo yanma yaꞌ, yok yaꞌ yanoko iswinajil, yajaꞌ yu yetanto isbꞌa yaꞌ. Ok yaꞌ manhkꞌomal tet Komam Jahawil, yokto yaꞌ isnhusno teꞌ pom yibꞌanh mexha bꞌay chinhuslax pom yul Yatut Komam. 17 Yokto yaꞌ sacerdote Azarías yebꞌ xin 80 (kanhwinajxa) ebꞌyaꞌ sacerdote kaw ay yip yanma, yinta yaꞌ yul Yatut Komam Jahawil. 18 Mach xin ischah iswiꞌ ebꞌyaꞌ sacerdote tuꞌ yinh tzet iswatxꞌe yaꞌ rey Uzías, yuxin yal ebꞌyaꞌ tet yaꞌ hakaꞌ tiꞌ: «Mam rey Uzías, machi hawok yinh huneꞌ munil hanhusni teꞌ pom tet Komam Jahawil, wal xin hanhe ebꞌyaꞌ sacerdote titna yinh yaꞌ Aarón chu isnhusni teꞌ pom tet Komam; yuxin elanhto yul Yatut Komam tiꞌ, yuto maxawako hamul tet Komam, yuxin mach hatzano hachahni huneꞌ iskꞌulchꞌanil chitit tet Komam Jahawil tiꞌ,» xhi ebꞌyaꞌ tet yaꞌ.

19 Wal yaꞌ rey Uzías tuꞌ, tꞌunhbꞌil lesen yu yaꞌ bꞌay ayayto teꞌ pom chalte yaꞌ tet Komam, istit ishowal yaꞌ rey yinh ebꞌyaꞌ sacerdote tuꞌ, yaj hayet istit ishowal yaꞌ yelilo lepra yinh ispalanh yaꞌ sata ebꞌyaꞌ sacerdote bꞌay linhankanh yaꞌ sata ismexhahil bꞌay chinhuslax teꞌ pom yul Yatut Komam Jahawil tuꞌ. 20 Hayet yilni yaꞌ Azarías, iswiꞌehal yinh ebꞌyaꞌ sacerdote, yebꞌ sunil ebꞌyaꞌ sacerdote tato elilo lepra yinh ispalanh yaꞌ rey tuꞌ, yinilti ebꞌyaꞌ yaꞌ yinh anhe yul Yatut Komam, hakpax tuꞌ yaꞌ islahiko yaꞌ yeltij, yuto haꞌ Komam Jahawil aniti huneꞌ yabꞌil tuꞌ yinh yaꞌ.

21 Hak tuꞌ xin yu yokkano lepra yinh yaꞌ rey Uzías masanto yet iskam yaꞌ. Haꞌ yulbꞌal tiempo ayko lepra yinh yaꞌ, nan eh yaꞌ yul huneꞌ nha nahat yeloj, matxa chahlaxikto yaꞌ yul Yatut Komam Jahawil. Haxa xin yaꞌ Jotam, iskꞌahol yaꞌ ok reyal seleloj, yul yatut yaꞌ yebꞌ yinh konhobꞌ tuꞌ.

22 Haꞌ hunteqꞌanxa tzet iswatxꞌe yaꞌ rey Uzías yet yichebꞌanil yebꞌ yet islahobꞌal yet yekꞌ yaꞌ reyal, tzꞌibꞌnhebꞌilkano yu yaꞌ Isaías, ischejabꞌ Komam Dios, yaꞌ iskꞌahol yaꞌ Amoz. 23 Hayet iskam yaꞌ rey Uzías, ismujlax yaꞌ bꞌay mujan ebꞌyaꞌ rey, yichmam yaꞌ. Yajaꞌ mach mujlax yaꞌ bꞌey ispantionh ebꞌyaꞌ rey yuto chal-lax yinh yaꞌ hakaꞌ tiꞌ: «Txꞌaktanhe yaꞌ,» xhi. Lahwi tuꞌ yok yaꞌ Jotam, iskꞌahol yaꞌ reyal seleloj.