Ok yaꞌ Jotam isreyalo txꞌotxꞌ Judá
27
Hayet yok yaꞌ Jotam reyal, 25 (howebꞌ iskawinaj) habꞌil yaꞌ, 16 (wajlahonhebꞌ) habꞌil ok yaꞌ reyal bꞌey Jerusalén; Jerusa isbꞌi ismiꞌ yaꞌ, iskutzꞌin yaꞌ Sadoc ye ix. 2 Haꞌ yaꞌ rey Jotam, haꞌ istoholal iswatxꞌe yaꞌ sata Komam Jahawil, isbꞌeybꞌalnhe yaꞌ sunil tzetaj iswatxꞌe yaꞌ Uzías, ismam yaꞌ, yajaꞌ mach okto yaꞌ yul Yatut Komam Jahawil. Walpaxo konhobꞌ tuꞌ, haꞌ istxꞌojal isbꞌeybꞌalnhe.3 Haꞌ yaꞌ watxꞌenhe huneꞌ niman ispultahil Yatut Komam Jahawil, iswatxꞌenpaxokanh yaꞌ txꞌiꞌal nha yibꞌanh iskꞌubꞌal konhobꞌ Ofel. 4 Iswatxꞌenpaxokanh yaꞌ txꞌiꞌal konhobꞌ bꞌey txꞌotxꞌ chewal txꞌotxꞌ Judá; iswatxꞌenpaxokanh yaꞌ bꞌay chiskol isbꞌa anma yebꞌ torre xolaj qꞌebꞌtalaj. 5 Yaqꞌnipaxo yaꞌ howal yebꞌ naj isreyal ebꞌnaj Amón, isqꞌoji yaꞌ yinh naj. Yaqꞌni ebꞌnaj Amón yinh huneꞌ habꞌil tuꞌ 100 (hokꞌal) talento chꞌen plata, yebꞌ 10 (lahonhebꞌ) mil yachan ixim trigo, yok 10 (lahonhebꞌ) mil yachan ixim cebada tohlabꞌalo tet yaꞌ rey Jotam tuꞌ. Haꞌ tuꞌ yaqꞌ ebꞌnaj Amón istohlabꞌalo tet yaꞌ yulbꞌal bꞌabꞌel habꞌil, haktikꞌapax tuꞌ yaqꞌ ebꞌnaj yinh iskabꞌ yebꞌ yox habꞌil. 6 Kaw yiqꞌkanokanh yip yaꞌ rey Jotam, yuto kꞌul isbꞌeybꞌal yaꞌ sata Komam Jahawil, isDiosal yaꞌ.
7 Haꞌ hunteqꞌanxa tzet iswatxꞌe yaꞌ rey Jotam yebꞌ sunil howal yaqꞌ yaꞌ, yebꞌ isbꞌeybꞌal yaꞌ, tzꞌibꞌnhebꞌilkano yul hum chitzotel yinh ebꞌyaꞌ isreyal Israel yebꞌ isreyal Judá. 8 Hayet yok yaꞌ reyal, 25 (howebꞌ iskawinaj) habꞌil yaꞌ, 16 (wajlahonhebꞌ) habꞌil ok yaꞌ reyal bꞌey Jerusalén. 9 Iskam yaꞌ rey Jotam tuꞌ hakaꞌ yu iskamto yichmam yaꞌ, ismujlax yaꞌ yul iskonhobꞌ yaꞌ David, yok yaꞌ Acaz, iskꞌahol yaꞌ reyal seleloj.