Ok yaꞌ Acaz reyal yinh Judá
28
Hayet yok yaꞌ Acaz reyal 20 (hunkꞌal) habꞌil yaꞌ, 16 (wajlahonhebꞌ) xin habꞌil ok yaꞌ reyal yinh ebꞌnaj Judá bꞌey Jerusalén. Yaj maxhtaj istoholal iswatxꞌe yaꞌ sata Komam Jahawil hakaꞌ yaꞌ David, yichmam yaꞌ. 2 Wal xin isbꞌeybꞌalnhe yaꞌ tzetaj iswatxꞌe ebꞌyaꞌ isreyal Israel; ischejni yaꞌ aqꞌlaxo uluto chꞌen chꞌen, iswatxꞌelax yechel tioxh Baal yul molde. 3 Isnhusni yaꞌ teꞌ pom bꞌey akꞌal yet ebꞌnaj iskꞌahol naj Hinom, isnhusnipaxo yaꞌ yuninal xahanbꞌalil tet tioxh, hakaꞌ istxꞌojal chiswatxꞌe hunteqꞌan nime konhobꞌ ilaxilo sata ebꞌnaj Israel yu Komam. 4 Isnhusnipaxo yaꞌ isxahanbꞌal yebꞌ teꞌ pom tet tioxh bꞌay nahat yekanh iswiꞌla wonhan, yebꞌ yinh iskꞌul witz, yebꞌ yichla teꞌ nime qꞌebꞌtaj qꞌejholonhe yalanh xaj. 5 Yuxin yako Komam Jahawil, isDiosal Israel, yaꞌ rey Acaz tuꞌ yul isqꞌabꞌ naj isreyal ebꞌnaj sirio, istzabꞌcha ebꞌnaj Judá yu ebꞌnaj sirio tuꞌ, kaw xin niman ebꞌnaj ilaxto preso bꞌey Damasco. Yalaxpaxiko ebꞌnaj Judá tuꞌ yul isqꞌabꞌ yaꞌ isreyal Israel, kaw xin niman ebꞌnaj Judá tuꞌ ispotxꞌkamo yaꞌ. 6 Yuto hayet hunel yinhnhe huneꞌ tzꞌayik ispotxꞌkamo yaꞌ Peka, naj iskꞌahol naj Remalías, 120 mil ebꞌnaj Judá, ebꞌnaj potxꞌlaxkamo tuꞌ, winaj kaw helan yinh howal; maqꞌlaxkamo ebꞌnaj yuto ispohilo isbꞌa ebꞌnaj yinh Komam Jahawil, isDiosal yichmam. 7 Hakpax tuꞌ naj Zicri, winaj kaw ay yip, ah konhobꞌ Efraín, ismaqꞌkamo naj naj Maasías, iskꞌahol yaꞌ rey, ismaqꞌnipaxokamo naj naj Azricam, naj yahawil yeko yinh tzet ay yaꞌ rey, yebꞌpaxo xin ismaqꞌnikamo naj naj Elcana, naj iskabꞌ yinta yaꞌ rey. 8 Yinipaxto ebꞌnaj Israel 200 mil ebꞌnaj Judá preso, yaj xin yuxhtato isbꞌa ebꞌnaj. Xol ebꞌnaj tuꞌ ilaxto ebꞌix ix, ebꞌnaj tzehtaj yebꞌ ebꞌix qꞌopotaj, yinito ebꞌnaj txꞌiꞌal tzet ay ebꞌnaj Judá, yinito ebꞌnaj bꞌey Samaria.9 Haꞌ bꞌey tuꞌ ay huneꞌ ischejabꞌ Komam Jahawil chiyij Obed, hayet lanhan yapni ebꞌnaj soldado bꞌey Samaria tuꞌ yelti yaꞌ chahwal yinh ebꞌnaj, yalni yaꞌ tet ebꞌnaj hakaꞌ tiꞌ:
—Haꞌ Komam Jahawil, isDiosal jichmam tit ishowal Komam yinh ebꞌnaj Judá, yuxin yako Komam ebꞌnaj yul heqꞌabꞌ; ay xin ebꞌnaj hepotxꞌkamo yu hehowal, haꞌ hehowal tuꞌ xin ahapno yul satkanh sata Komam. 10 Tinanh xin cheyoche heyaqꞌaꞌko ebꞌnaj Judá yebꞌ anma ah Jerusalén yalanh heyip, cheyoche heyaqꞌaꞌko ebꞌnaj winaj yebꞌ ebꞌix ix hechejabꞌoj, ¿tom xin mach cheyako hemul tet Komam Dios, koDiosal yinh huneꞌ tuꞌ? 11 Yuxin abꞌewe tzet chiwaltiꞌan, aqꞌwe meltzoho ebꞌnaj heyuxhtaj heyiti preso tiꞌ, yuto matit ishowal Komam Dios teyinh yu huneꞌ tiꞌ, xhi yaꞌ Obed.
12 Hak tuꞌ yu yahwano ebꞌnaj yahawil yeko xol ebꞌnaj Efraín yinh ebꞌnaj soldado ispeto yinh howal, haꞌ ton naj Azarías, iskꞌahol naj Johanán, naj Berequías, iskꞌahol naj Mesilemot, naj Ezequías, iskꞌahol naj Salum, yebꞌ naj Amasa, iskꞌahol naj Hadlai. 13 Yalni ebꞌnaj tet ebꞌnaj:
—Anma heyiti preso, mach cheyiti bꞌey tiꞌ, yuto maꞌok komul yul sat Komam Jahawil yinh huneꞌ tiꞌ, matit ishowal Komam jibꞌanh. Haꞌ tzet chewatxꞌe tiꞌ haꞌ chiꞌaniko yaqꞌbꞌil komul, chislahnayo Komam ishowal yibꞌanh ebꞌnaj Israel tiꞌ, xhi ebꞌnaj.
14 Hak tuꞌ yu yanikano ebꞌnaj soldado Israel tuꞌ, anma Judá yiti preso, yebꞌ sunil tzetaj ye tuꞌ yilo ebꞌnaj tet anma sata ebꞌnaj yahawil konhobꞌ, yebꞌ sata sunil konhobꞌ. 15 Hak tuꞌ yu iskankano anma Judá ilaxto preso tuꞌ yul isqꞌabꞌ ebꞌnaj yahawil chibꞌina tiꞌ. Haꞌ xol sunil tzet yiti ebꞌnaj soldado tuꞌ saylaxilo xilqꞌape yaqꞌlax tet ebꞌnaj machi xil isqꞌap, yunhe yaniko ebꞌnaj yinh, yaqꞌlaxpaxo isxanhabꞌ ebꞌnaj machi isxanhabꞌ aykoj. Lahwi tuꞌ yaqꞌlax tzet chislo ebꞌnaj yebꞌ tzet chiyukꞌu. Yanhtelax islahwilal ebꞌnaj oki, yalaxahto ebꞌnaj matxa yip yibꞌanh burro, yilaxto sunil ebꞌnaj tuꞌ bꞌey konhobꞌ Jericó, haꞌ ton konhobꞌ bꞌay ay teꞌ palma, yu iskankano ebꞌnaj iskawilal yuxhtaj. Lahwi tuꞌ ismeltzo ebꞌnaj yahawil tuꞌ bꞌey Samaria.
16 Haꞌ yinh huneꞌ tiempo tuꞌ yato yaꞌ rey Acaz tzotiꞌ tet ebꞌnaj rey ay bꞌey Asiria ta chikolwa ebꞌnaj yinh yaꞌ, 17 yuto apnipaxo ebꞌnaj Edom yaqꞌaꞌko howal yinh ebꞌnaj Judá, yinito ebꞌnaj ebꞌnaj preso. 18 Hakpax tuꞌ ebꞌnaj filisteo ok ebꞌnaj ismajayo konhobꞌla ay bꞌey txꞌotxꞌ Sefela yebꞌ bꞌey txꞌotxꞌ Neguev yul ismajul Judá; hunteqꞌan konhobꞌ aykꞌay yu ebꞌnaj filisteo, haꞌ ton konhobꞌ Bet-semes, yebꞌ konhobꞌ Ajalón, konhobꞌ Gederot, yebꞌ konhobꞌ Soco yebꞌ yaldeahil, konhobꞌ Timna yebꞌ yaldeahil, konhobꞌ Gimzo yebꞌ yaldeahil; yehayo ebꞌnaj bꞌey hunteqꞌan konhobꞌ tuꞌ. 19 Ilaxilo ispixan ebꞌnaj Judá tuꞌ yu Komam Jahawil yu ismul yaꞌ Acaz isreyal Judá yuto isbꞌeybꞌalnhe yaꞌ Acaz tuꞌ istxꞌojal bꞌey Judá, yaniko yaꞌ ismul yul sat Komam Jahawil, mule kaw nanxa yoki.
20 Yapni naj Tiglat-pileser, isreyal ebꞌnaj asirio yinh yaꞌ Acaz, yajaꞌ xin mach kolwa naj yinh yaꞌ, wal xin ok naj yaqꞌaꞌko howal yinh ebꞌnaj Judá. 21 Iskutxbꞌaniko yaꞌ rey Acaz sunil qꞌalomal ayikto yul Yatut Komam Jahawil yebꞌ yul ispalacio yaꞌ, yebꞌ qꞌalomal ay yul yatut ebꞌnaj yahaw konhobꞌ, yaqꞌni yaꞌ tet naj rey Asiria yu iskolwa naj yinh yaꞌ, yajaꞌ xin mach kolwa naj. 22 Waxanhka kaw niman isyaꞌtajil ay yibꞌanh ebꞌnaj Judá, yajaꞌ wal yaꞌ rey Acaz kaw ahkanokanh yaꞌ iswatxꞌen istxꞌojal sata Komam Jahawil. 23 Yuto yaqꞌ yaꞌ isxahanbꞌal tet istioxh ebꞌnaj Damasco, ebꞌnaj qꞌoji yinh ebꞌnaj yuto yal yaꞌ hakaꞌ tiꞌ: «Haꞌ istioxh naj rey Siria tiꞌ kolwa yinh ebꞌnaj tuꞌ, yuxin han huninan chiwaqꞌan inxahanbꞌalan tet istioxh naj, yu iskolwa winhan,» xhi yaꞌ Acaz. Yuxin kaw aqꞌlax ekꞌoyaꞌ yanma yaꞌ rey Acaz yebꞌ sunil Israel yu ebꞌnaj Siria. 24 Yaꞌ Acaz tuꞌ iskutxbꞌako yaꞌ sunil munlabꞌal ayikto yul Yatut Komam Dios, ismaqꞌnipoho yaꞌ, ispebꞌankano yaꞌ ispultahil Yatut Komam Jahawil. Ischejni yaꞌ watxꞌelaxokanh bꞌay chiyiyo isbꞌa anma tet tioxh sunil yul konhobꞌ Jerusalén. 25 Ischejnipaxo yaꞌ watxꞌelaxokanh bꞌay chisnhus anma Judá ispom tet tioxh bꞌay nahat yekanh, sunil yulajla konhobꞌ ay sat txꞌotxꞌ Judá. Hak tuꞌ yu yaqꞌnitij yaꞌ rey Acaz tuꞌ ishowal Komam Jahawil, isDiosal yichmam.
26 Haꞌ hunteqꞌanxa tzet iswatxꞌe yaꞌ rey Acaz yebꞌ isbꞌeybꞌal yaꞌ yet yichebꞌanil yebꞌ islahobꞌal yet ayko yaꞌ reyal, tzꞌibꞌnhebꞌilkano yul hum chitzotel yibꞌanhilo ebꞌyaꞌ isreyal Judá yebꞌ isreyal Israel. 27 Hayet yapni istzꞌayikal iskam yaꞌ rey Acaz hakaꞌle yu iskamto yichmam yaꞌ, ismujlax yaꞌ bꞌey konhobꞌ Jerusalén, yajaꞌ mach mujlax yaꞌ yul ispantionh ebꞌyaꞌ isreyal Israel. Haꞌ xin yaꞌ Ezequías, iskꞌahol yaꞌ ok reyal seleloj.