Ok yaꞌ Ezequías isreyalo Judá
29
Hayet yok yaꞌ Ezequías reyal, 25 (howebꞌ iskawinaj) habꞌil yaꞌ, 29 (bꞌalonhebꞌ iskawinaj) habꞌil ok yaꞌ reyal bꞌey Jerusalén. Abías isbꞌi ismiꞌ yaꞌ, iskutzꞌin naj Zacarías ye ix. 2 Haꞌ istoholal iswatxꞌe yaꞌ yul sat Komam Jahawil, isbꞌeybꞌalnhe yaꞌ sunil tzetaj iswatxꞌe yaꞌ David yichmam.Ichiko anma yinoyo isbꞌa bꞌey Yatut Komam yu yaꞌ rey Ezequías
3 Haꞌ yinh bꞌabꞌel ixahaw yet bꞌabꞌel habꞌil yok yaꞌ Ezequías reyal, ishajni yaꞌ ispultahil Yatut Komam Jahawil, ischejni yaꞌ watxꞌelaxo pulta matxa kꞌuloj. 4 Ischejni yaꞌ yawtelaxo ebꞌyaꞌ sacerdote yebꞌ ebꞌnaj levita, iskutxbꞌaniko yaꞌ ebꞌnaj bꞌey txonhbꞌal ayko yinh yetkꞌulal bꞌay chiꞌahilo tzꞌayik. 5 Yalni yaꞌ tet ebꞌnaj: «¡Hex levita, abꞌewe tzet chiwalan! Sajnhewe hebꞌa tinanh kat hesajnhenpaxo Yatut Komam Jahawil, isDiosal jichmam, cheyinilti sunil tzet mach sajo ayikto yul Yatut Komam tiꞌ, 6 yuto haꞌ ebꞌyaꞌ komam ok ebꞌyaꞌ ismanhkꞌo tzet chal Komam Jahawil, yok ebꞌyaꞌ iswatxꞌeno istxꞌojal sata Komam, koDiosal, yuto ispohilo isbꞌa ebꞌyaꞌ yinh Komam; yilo sat ebꞌyaꞌ yinh Yatut Komam, yanito yichinh ebꞌyaꞌ yinh. 7 Ispebꞌankano ebꞌyaꞌ ispultahil Yatut Komam, isbꞌutnikano ebꞌyaꞌ isqꞌaqꞌal chꞌen lámpara yul Yatut Komam. Matxa isjepaxo ebꞌyaꞌ isnhusuꞌ teꞌ pom yebꞌ isxahanbꞌal yul Yatut Komam Dios tuꞌ, isDiosal Israel. 8 Yuxin tit ishowal Komam Jahawil yinh ebꞌnaj Judá yebꞌ yinh ebꞌnaj Jerusalén, yaniko Komam ebꞌnaj yul isqꞌabꞌ kꞌaykꞌulal yebꞌ xiwquilal, yebꞌ txꞌixwilal hakaꞌ chu heyilni yu isbꞌaqꞌ hesat. 9 Ispotxꞌlaxkamo ebꞌnaj yu chꞌen espada, yilaxto ebꞌnaj kokꞌahol yebꞌ ebꞌix kokutzꞌin yebꞌ ebꞌix jixal preso. 10 Wal tinanh, xaꞌok yinh innabꞌalan intꞌinhbꞌankanojan intratohan yebꞌ Komam Jahawil, isDiosal Israel, yu yinilo Komam ishowal jibꞌanh. 11 Wal tinanh hex wet konhobꞌ, mach cheyaqꞌ subꞌchaho hebꞌa, yuto haꞌ Komam Jahawil sikꞌnhehexkanikoj yu hemunla sata Komam yul yatut, yu heyok ischejabꞌoj, yebꞌ yu henhusni teꞌ pom tet Komam,» xhi yaꞌ Ezequías.
12 Haꞌ xin ebꞌnaj levita ok yinh huneꞌ munil tuꞌ, haꞌ ton ebꞌnaj tiꞌ: Naj Mahat, iskꞌahol naj Amasai yebꞌ naj Joel iskꞌahol naj Azarías, ebꞌnaj tuꞌ yuninal naj Coat ye ebꞌnaj. Haxa xol ebꞌnaj yuninal naj Merari, haꞌ ebꞌnaj tiꞌ: Naj Cis, iskꞌahol naj Abdi, naj Azarías, iskꞌahol naj Jehalelel. Haxa xol ebꞌnaj yuninal yaꞌ Gersón haꞌ ebꞌnaj tiꞌ: Naj Joa, iskꞌahol naj Zima yebꞌ naj Edén iskꞌahol naj Joa. 13 Haxa xol yuninal naj Elizafán, ebꞌnaj tiꞌ: Naj Simri yebꞌ naj Jeiel. Haxa xol ebꞌnaj yuninal yaꞌ Asaf haꞌ ebꞌnaj tiꞌ: Naj Zacarías yebꞌ naj Matanías. 14 Haxa xol ebꞌnaj yuninal naj Hemán haꞌ ebꞌnaj tiꞌ: Naj Jehiel yebꞌ naj Simei. Haxa xol ebꞌnaj yuninal naj Jedutún haꞌ ebꞌnaj tiꞌ: Naj Semaías yebꞌ naj Uziel. 15 Sunil ebꞌnaj tuꞌ iskutxbꞌako isbꞌa yebꞌ yikꞌal, issajnhen isbꞌa ebꞌnaj bꞌabꞌel hakaꞌ yu ischejlax yubꞌ ebꞌnaj yu yaꞌ rey, yebꞌ hakaꞌ yalni Istzotiꞌ Komam Jahawil; yokto ebꞌnaj issajnheno yul Yatut Komam Jahawil.
16 Hayet yokto ebꞌyaꞌ sacerdote yul Yatut Komam Jahawil yu issajnhenkano ebꞌyaꞌ, yinilti ebꞌyaꞌ tzetaj ye tuꞌ mach sajo ayikto yul Yatut Komam, yanilti ebꞌyaꞌ amaqꞌ, haxa xin ebꞌnaj levita tuꞌ inito bꞌey haꞌ nichꞌan haꞌ Cedrón. 17 Haꞌ yinh bꞌabꞌel tzꞌayik yinh bꞌabꞌel ixahaw issajnhen isbꞌa ebꞌnaj levita, haxa yinh iswaxajebꞌ tzꞌayik yapni ebꞌnaj yamaqꞌil Yatut Komam Jahawil yokto ebꞌnaj, issajnhen ebꞌnaj Yatut Komam Jahawil yulbꞌal wajebꞌ tzꞌayik. Haxa yinh 16 (iswajlahonhebꞌ) tzꞌayik yinh bꞌabꞌel ixahaw tuꞌ islahwikano issajnhen ebꞌnaj Yatut Komam. 18 Lahwi tuꞌ isto ebꞌnaj levita sata yaꞌ rey Ezequías, yalni ebꞌnaj tet yaꞌ: «Mam rey, malahwi kosajnhenkanojanh yul Yatut Komam Jahawil yebꞌ ismexhahil bꞌay chinhuslax noꞌ xahanbꞌal, yebꞌ sunil munlabꞌal chiꞌokniko yinh, makosajnhenpaxkanojanh mexha bꞌay chiꞌalaxayo ixim pan sata Komam yebꞌ sunil munlabꞌal chiꞌokniko yet chiꞌalaxayo ixim. 19 Makowatxꞌenanh sunil munlabꞌal chiꞌokniko yul Yatut Komam, makosajnhenkanojanh, haꞌ ton hunteqꞌan munlabꞌal yahbꞌililo yu yaꞌ Acaz yu ismanhkꞌomal tet Komam Dios yet ayko yaꞌ reyal. Haꞌ sunil munlabꞌal tuꞌ kꞌul yu kowatxꞌenkanojanh sata mexha yet xahanbꞌal tet Komam Jahawil,» xhi ebꞌnaj.
20 Haxa yet hunxa tzꞌayik kaw sahabꞌ ahwano yaꞌ rey Ezequías, iskutxbꞌaniko yaꞌ ebꞌnaj iswiꞌehal konhobꞌ, yahto ebꞌnaj bꞌey Yatut Komam Jahawil. 21 Yinito ebꞌnaj hujkꞌonh noꞌ tzehla wakax, yok hujkꞌonh ej noꞌ icham meꞌ, yok hujkꞌonh noꞌ tzehla meꞌ, yok hujkꞌonh noꞌ tzehla chiw, yaqꞌni ebꞌnaj noꞌ yebꞌalqꞌabꞌehal yinh ismul ebꞌnaj yahawil konhobꞌ yebꞌ yinh ismul konhobꞌ Judá, yebꞌ yu sajnhelax Yatut Komam Jahawil. Yalni yaꞌ rey tet ebꞌyaꞌ sacerdote, ebꞌyaꞌ iskꞌahol yaꞌ Aarón ta chiyalte ebꞌyaꞌ no noqꞌ yibꞌanh ismexhahil yet xahanbꞌal yet Komam Jahawil. 22 Ispotxꞌni ebꞌyaꞌ sacerdote noꞌ tzehla wakax, ischahni ebꞌyaꞌ ischikꞌil noꞌ, istxihnayo ebꞌyaꞌ ischikꞌil noꞌ yibꞌanh ismexhahil yet xahanbꞌal. Lahwi tuꞌ ispotxꞌni ebꞌyaꞌ noꞌ meꞌ, istxihnipaxayo ebꞌyaꞌ ischikꞌil noꞌ yibꞌanh ismexhahil yet xahanbꞌal, ispotxꞌnipaxo ebꞌyaꞌ noꞌ tzehla meꞌ, istxihnipaxayo ebꞌyaꞌ ischikꞌil no yibꞌanh ismexhahil yet xahanbꞌal tuꞌ.
23 Tzujan tuꞌ yiniti ebꞌyaꞌ noꞌ icham chiw sata yaꞌ rey yebꞌ sata sunil konhobꞌ, noꞌ chiꞌaqꞌlax xahanbꞌalil istanhbꞌalo mule, yanayo sunil ebꞌyaꞌ isqꞌabꞌ yibꞌanh noꞌ. 24 Lahwi tuꞌ ispotxꞌni ebꞌyaꞌ sacerdote noꞌ chiw, istxihnayo ebꞌyaꞌ ischikꞌil noꞌ yibꞌanh ismexhahil yet xahanbꞌal. Hak tuꞌ yu yaqꞌlax noꞌ xahanbꞌalil yu yaqꞌlax tanho ismul sunil anma Israel, yuto yu istanhkano ismul sunil ebꞌnaj Israel, yuxinto ischej yaꞌ rey yaqꞌlax noꞌ yebꞌalqꞌabꞌehal, isnhuslax noꞌ xahanbꞌalil.
25 Yanipaxiko yaꞌ rey Ezequías ebꞌnaj levita yul Yatut Komam Jahawil, yu yaniko ebꞌnaj chꞌen cimbalo, teꞌ salterio yebꞌ teꞌ arpa yul Yatut Komam, hakaꞌ yu ischejnikano yaꞌ rey David yebꞌ naj Gad, naj chiꞌaqꞌni istzꞌajanil isnabꞌal yaꞌ rey David, yebꞌ yaꞌ Natán ischejabꞌ Komam Dios. Hak tuꞌ yu yalnikano ebꞌyaꞌ ischejabꞌ Komam Dios, yuto haꞌ Komam Jahawil chejni ebꞌyaꞌ.
26 Ayko xin munlabꞌal yet bꞌit watxꞌebꞌilkano yu yaꞌ rey David, yul isqꞌabꞌ ebꞌyaꞌ levita, hakpax tuꞌ ebꞌyaꞌ sacerdote ayko trompeta yul isqꞌabꞌ ebꞌyaꞌ. 27 Ischejni yaꞌ rey Ezequías nhuslaxo xahanbꞌal yibꞌanh ismexhahil yet xahanbꞌal tet Komam Dios, haꞌ xin yet lanhan isnhuslax xahanbꞌal tuꞌ yaniko ebꞌnaj bꞌit tet Komam Jahawil, yaniko ebꞌnaj chꞌen trompeta yebꞌ munlabꞌal yet bꞌit iswatxꞌekano yaꞌ David, yaꞌ ekꞌlena reyal xol Israel. 28 Sunil anma kutxaniko tuꞌ aniko ismay Komam Dios, chixin bꞌitni ebꞌnaj bꞌitnom tet Komam, yaniko ebꞌyaꞌ sacerdote chꞌen trompeta masanto yet istzꞌakanto xahanbꞌal. 29 Haxa yet islahwi isnhuslaxkano xahanbꞌal tuꞌ, yay xulno yaꞌ rey yebꞌ sunil ebꞌnaj ayko iskꞌatanh, yay xulnoj, yinayo isbꞌa tet Komam. 30 Lahwi tuꞌ yalni yaꞌ rey Ezequías yebꞌ ebꞌnaj iswiꞌehal konhobꞌ tet ebꞌnaj levita tato chisbꞌitnhe ebꞌnaj Komam Jahawil yu bꞌit watxꞌebꞌilkano yu yaꞌ David, yebꞌ yaꞌ Asaf, ischejabꞌ Komam Dios. Hak tuꞌ yu yok ebꞌnaj isbꞌitnheno Komam yinh tzalahilal, yay jahno ebꞌnaj, yinayo isbꞌa tet Komam.
31 Lahwi tuꞌ yalni yaꞌ rey Ezequías tet konhobꞌ: «Haꞌ yinh huneꞌ tzꞌayik tiꞌ maxewatxꞌekano hebꞌa yul isqꞌabꞌ Komam Jahaw yuxin hitzanhwekoj yebꞌ hexahanbꞌal, kat heyaniko bꞌit tet Komam Jahawil yul yatut,» xhi yaꞌ. Hak tuꞌ yu yiniti konhobꞌ tuꞌ isxahanbꞌal yebꞌ isbꞌitnhen Komam Dios, yinipaxti sunil mak no noqꞌ chinhuslax yinh xahanbꞌal tit yinh yanma yaqꞌni. 32 Hak tiꞌ xin isbꞌisil no noqꞌ yiti konhobꞌ isxahanbꞌalo tuꞌ, 70 (lahonhebꞌ iskanhwinaj) noꞌ wakax, 100 (hokꞌal) noꞌ icham meꞌ 200 noꞌ tzehla meꞌ yu isnhuslax noꞌ xahanbꞌalil tet Komam. 33 Haꞌ isbꞌisil yebꞌalqꞌabꞌe, 600 noꞌ wakax yebꞌ oxebꞌ mil noꞌ meꞌ.
34 Yaj xin haywanhnhe ebꞌyaꞌ sacerdote, yuxin matxa eliko ebꞌyaꞌ ispotxꞌni noꞌ xahanbꞌal, yuxin haxa ebꞌnaj levita ok kolwal yinh ebꞌyaꞌ masanto lahwikano munil tuꞌ. Hak tuꞌ yu iswatxꞌenpaxkano isbꞌa hunteqꞌanxa ebꞌyaꞌ sacerdote, yuto haꞌ ebꞌnaj levita ekꞌbꞌal kaw ishin isbꞌa iswatxꞌen isbꞌa sata ebꞌyaꞌ sacerdote. 35 Kaw txꞌiꞌal noꞌ xahanbꞌal nhuslaxi, yebꞌ ismantecahil xahanbꞌalil yet aqꞌankꞌulal aqꞌlax tet Komam, yaqꞌlaxpaxo vino yebꞌalqꞌabꞌehal yinta hunun xahanbꞌal.