6 Hak tuꞌ yu yanito yaꞌ rey Ezequías yebꞌ ebꞌnaj iswiꞌehal konhobꞌ ischejabꞌ yebꞌ carta sunil yulaj ismajul Israel yebꞌ Judá, bꞌay chal hakaꞌ tiꞌ: «Hex wet konhobꞌ Israel, meltzanhweko yul isqꞌabꞌ Komam Jahawil, isDiosal jichmam Abraham, yebꞌ jichmam Isaac, yebꞌ jichmam Israel, haxinwal chimeltzo Komam yebꞌ iskꞌulal iskꞌul teyinh, hex haywanhxanhe kexkolchakano yul isqꞌabꞌ naj isreyal Asiria. 7 Machojabꞌ cheyute hebꞌa hakaꞌ yute isbꞌa ebꞌyaꞌ komam yebꞌ ebꞌnaj yuxhtaj yet yok ebꞌnaj manhkꞌomal tet Komam Jahawil, isDiosal jichmam, yuxin yako Komam ebꞌnaj yinh isyaꞌtajil hakaꞌ lanhan jilni tinanh. 8 Mach chelutꞌnhe heyanma hakaꞌ yute isbꞌa ebꞌyaꞌ komam tuꞌ, wal xin awekto hebꞌa yalanh tzet chal Komam Jahawil, kat hekutxbꞌaniko hebꞌa yul Yatut Komam, huneꞌ nha yet Komam yinh sunilbꞌal tiempo, kat heyaqꞌni chejaꞌ hebꞌa yinh tzet chal Komam Jahawil, koDiosal, yu yinilo Komam isyaꞌtajil yati koxol yu ishowal. 9 Yuto ta chexmeltzoko yul isqꞌabꞌ Komam Jahawil chitzꞌaykanh iskꞌul ebꞌnaj inito heyet Israelal preso, kat yaqꞌni meltzoho ebꞌnaj ebꞌnaj sat istxꞌotxꞌ tiꞌ, yuto wal Komam Jahawil kaw saqꞌalkanoj yebꞌ kaw kꞌulchꞌankano iskꞌul. Tato chexmeltzoko yul isqꞌabꞌ Komam matxa chexisnahulnheto Komam,» xhito yaꞌ rey Ezequías yul hum tuꞌ.

10 Hak tuꞌ yu isto ebꞌnaj chejabꞌ yebꞌ teꞌ carta yulajla konhobꞌ sat txꞌotxꞌ Efraín yebꞌ txꞌotxꞌ Manasés masanta apni ebꞌnaj yulajla konhobꞌ sat txꞌotxꞌ Zabulón, yajaꞌ hayet yabꞌen anma tzet chal teꞌ carta tuꞌ yok anma tzebꞌoj, yok bꞌuchwal yinh ebꞌnaj chejabꞌ. 11 Yajaꞌ xin ay haywanh ebꞌnaj ah Aser, ah Manasés yebꞌ ebꞌnaj Zabulón yiyo isbꞌa tet Komam Dios, isto ebꞌnaj bꞌey Jerusalén. 12 Wal anma Judá haꞌ Komam Dios aniko yinh yanma yuxin huneꞌnhe yute isnabꞌal isyijen ischejbꞌanil yaꞌ rey yebꞌ ebꞌnaj iswiꞌehal konhobꞌ. Haꞌ anma Judá tuꞌ isyijen hakaꞌtikꞌa yalni ischejbꞌanil Komam Jahawil tet yaꞌ rey yebꞌ tet ebꞌnaj iswiꞌehal konhobꞌ tuꞌ.

13 Hak tuꞌ xin kaw niman anma iskutxbꞌako isbꞌa bꞌey Jerusalén yinh iskabꞌ ixahaw yu yekꞌtzen qꞌinh kaw ay yelapnoj yet chiwalax ixim pan machi yanhal aykoj, kaw xin nimankano anma iskutxbꞌako isbꞌa. 14 Yok anma yinolo ismexhahil bꞌay chinhuslax xahanbꞌal tet tioxh yebꞌ ismexhahil bꞌay chinhuslax incienso yul konhobꞌ Jerusalén, isto anma isqꞌojnayto yul haꞌ nichꞌan haꞌ Cedrón. 15 Haꞌ yinh 14 (iskanhlahonhebꞌ) tzꞌayik yinh iskabꞌ ixahaw ispotxꞌni ebꞌnaj noꞌ tzehla meꞌ xahanbꞌalil yinh qꞌinh pascua; hayet yilni ebꞌyaꞌ sacerdote yebꞌ ebꞌnaj levita huneꞌ tuꞌ, istxꞌixwikanh ebꞌnaj, yok ebꞌnaj issajnheno isbꞌa, yinito ebꞌnaj noꞌ xahanbꞌal yul Yatut Komam Jahawil. 16 Yok ebꞌnaj yinh istxolal yinh ismunil yul Yatut Komam hakaꞌtikꞌa yu yal-laxkano ischejbꞌanil ebꞌnaj, hakaꞌ yalni isley yaꞌ Moisés ischejabꞌ Komam Dios. Haꞌ ebꞌyaꞌ sacerdote chichahnilo ischikꞌil noꞌ xahanbꞌal tet ebꞌnaj levita, chistxinayo ebꞌyaꞌ ischikꞌil noꞌ yibꞌanh ismexhahil yet xahanbꞌal. 17 Xol anma kutxiko tuꞌ, txꞌiꞌal anma mach sajo yehi, yuxin haꞌ ebꞌnaj levita ok ebꞌnaj ispotxꞌoꞌ noꞌ xahanbꞌal yu anma maxhto sajo yehi yunhe yokkano xahanbꞌal tuꞌ yeto Komam yinh qꞌinh pascua. 18 Yuto kaw nimankano anma ah Efraín yebꞌ ah Manasés, ah Isacar yebꞌ anma Zabulón mach sajo yehi, kꞌuxni noꞌ xahanbꞌal yinh qꞌinh, mach xin isyije ebꞌnaj hakaꞌ yalnikano ley. Yaj txahli yaꞌ rey Ezequías yinh anma tuꞌ, yalni yaꞌ yinh istxah hakaꞌ tiꞌ: «Mamin, hach tiꞌ kaw kꞌulkano hakꞌul, chiwalan tawet, aqꞌ nimankꞌulal yinh konhobꞌ maꞌel yinh iskꞌul iskutxbꞌaniko isbꞌa tiꞌ yu kach issayni. 19 Mam Wahawil, isDiosal yichmam ebꞌnaj, aqꞌ nimankꞌulal yinh konhobꞌ tiꞌ, yuto mach issajnhe isbꞌa bꞌabꞌelal hakaꞌ yalni ley chiyijelax yet lanhanto maxhto chiꞌokto yul hawatut,» xhi yaꞌ rey.

20 Yabꞌen Komam Jahawil istxah yaꞌ rey Ezequías tuꞌ, yaqꞌni nimankꞌulal, kawxikanh konhobꞌ tuꞌ yu Komam. 21 Hak tuꞌ yu yekꞌtzen ebꞌnaj Israel qꞌinh kaw ay yelapnoj, iswani ixim pan machi yanhal, hujebꞌ tzꞌayik ekꞌtzelax qꞌinh tuꞌ bꞌey Jerusalén; kaw xin tzalahilal ye konhobꞌ kutxaniko tuꞌ, yaniko ismay Komam Jahawil. Hakpax tuꞌ ebꞌnaj levita yebꞌ ebꞌyaꞌ sacerdote, bꞌitni ebꞌnaj, yaniko ebꞌnaj munlabꞌal yet bꞌit yinh kaw ip tet Komam Jahawil. 22 Yaqꞌni yuchꞌandiosal yaꞌ rey Ezequías tet ebꞌnaj levita yuto kaw helan yute isbꞌa ebꞌnaj yinh ismunil Komam Jahawil.

Yulbꞌal hujebꞌ tzꞌayik iskꞌux ebꞌnaj levita tuꞌ noꞌ xahanbꞌal yulbꞌal qꞌinh kaw ay yelapnoj tuꞌ, yaqꞌni ebꞌnaj xahanbꞌal yet aqꞌankꞌulal tet Komam Dios, yaqꞌni ebꞌnaj yuchꞌandiosal tet Komam Jahawil, isDiosal yichmam ebꞌnaj. 23 Lahwi tuꞌ islahtiꞌnhen isbꞌa anma kutxaniko tuꞌ tato chiyekꞌtze hujebꞌxa tzꞌayik qꞌinh. Hak tuꞌ yu yekꞌtzenpaxo qꞌinh tuꞌ yinh tzalahilal yulbꞌal hujebꞌxa tzꞌayik. 24 Yuto issah yaꞌ rey Ezequías tuꞌ huneꞌ mil noꞌ tzehla wakax tet konhobꞌ, yok hujebꞌ mil noꞌ meꞌ. Hakpax tuꞌ ebꞌnaj iswiꞌehal konhobꞌ issah ebꞌnaj huneꞌ mil noꞌ tzehla wakax yok 10 (lahonhebꞌ) mil noꞌ meꞌ, yebꞌ xin kaw nimanxa ebꞌyaꞌ sacerdote issajnhe isbꞌa. 25 Hak tuꞌ yu yaqꞌni tzalaho iskꞌul konhobꞌ Judá yebꞌ ebꞌyaꞌ sacerdote yebꞌ ebꞌnaj levita yebꞌ sunil anma tit yulaj ismajul txꞌotxꞌ Israel. Aypaxo ebꞌnaj mach Israelo ay sat txꞌotxꞌ Israel tuꞌ yebꞌ sat txꞌotxꞌ Judá, iskutxbꞌapaxiko isbꞌa. 26 Kaw niman tzalahilal yu bꞌey Jerusalén yuto yettax istiempohal yaꞌ Salomón, iskꞌahol yaꞌ rey David, maxhto bꞌay chu hakaꞌ tuꞌ bꞌey Jerusalén. 27 Lahwi tuꞌ yok linhno ebꞌyaꞌ sacerdote yebꞌ ebꞌnaj levita isqꞌanni ebꞌnaj iskꞌulal Komam yibꞌanh konhobꞌ. Hayet istxahli ebꞌnaj yul Yatut Komam yabꞌen Komam tzet isqꞌan ebꞌnaj yinh istxah yul satkanh, bꞌay ay iskꞌulal Komam.