2 Lahwi tuꞌ yaniko yaꞌ rey Ezequías ebꞌyaꞌ sacerdote yebꞌ ebꞌnaj levita yinh istxolal yinh ismunil Komam Dios yinh hunun majan yu isnhusni xahanbꞌal yebꞌ yaqꞌni yebꞌalqꞌabꞌe yet aqꞌankꞌulal, yebꞌ yu yaqꞌni ebꞌnaj yuchꞌandiosal tet Komam, yebꞌ yu isbꞌitni ebꞌnaj tet Komam, satakꞌto ispultahil yamaqꞌil Yatut Komam Jahawil. 3 Issahni yaꞌ rey Ezequías no noqꞌ chꞌaqꞌlax xahanbꞌalil yinh sakꞌayalil yebꞌ yinh qꞌejbꞌiyal, yebꞌ noꞌ chꞌaqꞌlax xahanbꞌalil yinh istzꞌayikal xewilal yebꞌ noꞌ chꞌaqꞌlax xahanbꞌalil yet unin ixahaw, yebꞌ yet chꞌekꞌtzelax qꞌinh kaw ay yelapnoj, hakaꞌ yalni hum yet ley aqꞌbꞌilkano yu Komam Jahawil. 4 Yalnipaxo yaꞌ rey Ezequías tet konhobꞌ Jerusalén tato chiyaqꞌ ebꞌnaj isyebꞌalqꞌabꞌ yilaltikꞌa yaqꞌni chikolwa yinh ebꞌyaꞌ sacerdote yebꞌ ebꞌnaj levita yuto yinhxanhe chejbꞌanile yet Komam Jahawil okkano ebꞌnaj munil. 5 Hayet yelto chejbꞌanile tuꞌ xol ebꞌnaj Israel yiniti ebꞌnaj bꞌabꞌel sat istzꞌunubꞌ yebꞌalqꞌabꞌehal tet Komam, yiti ebꞌnaj ixim trigo, vino, aceite, yebꞌ noꞌ kabꞌ, yebꞌ kaw niman isbꞌabꞌel sat istzꞌunubꞌ ebꞌnaj tuꞌ yitij, yinipaxti ebꞌnaj isdiezmo yinh sunil tzet ayah, kaw xin niman diezmo tuꞌ kutxikoj.

6 Hakpax tuꞌ ebꞌnaj ay yulaj konhobꞌ yul ismajul txꞌotxꞌ Israel yebꞌ ismajul txꞌotxꞌ Judá, yaqꞌ ebꞌnaj isdiezmohal iswakax, yebꞌ ismeꞌ; yinipaxti ebꞌnaj isdiezmohal tzetaj ye tuꞌ yetxatikꞌa Komam Dios yehi, hunteqꞌan haltebꞌil yu ebꞌnaj tet Komam Jahawil. Haꞌ sunil tzet yiti konhobꞌ tuꞌ toxanhe tokano tennoj. 7 Haꞌ yinh yox ixahaw ichiko konhobꞌ tuꞌ iskutxbꞌaniko isyebꞌalqꞌabꞌ, haxa yinh ishuj ixahaw xin islahwikano yiniti konhobꞌ isyebꞌalqꞌabꞌ. 8 Haxa yet isbꞌey yaꞌ rey Ezequías yebꞌ ebꞌnaj iswiꞌehal konhobꞌ yilno yebꞌalqꞌabꞌe tenbꞌalax tuꞌ, yaqꞌni ebꞌnaj yuchꞌandiosal tet Komam Jahawil, isqꞌanni ebꞌnaj iskꞌulal Komam yibꞌanh konhobꞌ Israel. 9 Lahwi tuꞌ isqꞌambꞌen yaꞌ rey Ezequías tet ebꞌyaꞌ sacerdote yebꞌ tet ebꞌnaj levita yinh yebꞌalqꞌabꞌe tenanto tuꞌ. 10 Istaqꞌwi yaꞌ Azarías iswiꞌehal yinh ebꞌyaꞌ sacerdote, yikꞌal yaꞌ Sadoc, yalni yaꞌ tet yaꞌ rey tuꞌ: «Hataxtikꞌa yet yichiko konhobꞌ yiniti isyebꞌalqꞌabꞌ bꞌey Yatut Komam Jahawil tiꞌ, kolohnihanh tzet ilaxti tiꞌ masanto kaw chinoh kokꞌulanh, yajaꞌ xin tenanto tzet yiti konhobꞌ tet Komam, yuto haꞌ Komam Jahawil anayo isyaxil yibꞌanh iskonhobꞌ, yuxin haꞌ tzet yiti konhobꞌ tiꞌ kaw nimanto mach chonhqꞌojihanh kolonihanh,» xhi yaꞌ Azarías.

11 Yuxin ischej yaꞌ rey Ezequías ta chiwatxꞌelax bꞌay chiteni tzet ye tuꞌ bꞌey Yatut Komam Jahawil; hak tuꞌ yu iswatxꞌelaxi. 12 Iskꞌubꞌalaxto bꞌabꞌel sat tzꞌunubꞌ yiti anma isyebꞌalqꞌabꞌoj, yebꞌ diezmo, yebꞌ tzetaj ye tuꞌ yet Komam Dios yehi. Haꞌ xin huneꞌ naj levita chiyij Conanías ok tanheno hunteqꞌan yebꞌalqꞌabꞌe tuꞌ, haxa naj Simei yuxhta naj Conanías ok iskabꞌo istanhenoj. 13 Naj Jehiel, naj Azazías, naj Nahat, naj Asael, naj Jerimot, naj Jozabad, naj Eliel, naj Ismaquías, naj Mahat, yebꞌ naj Benaía, ok ebꞌnaj yilomalo ismunil Komam yalanh ischejbꞌanil naj Conanías yebꞌ yuxhta naj, naj Simei. Ok ebꞌnaj tiꞌ yinh ismunil Komam Dios hakaꞌtikꞌa yu ischejni yaꞌ rey Ezequías yebꞌ yaꞌ Azarías, yaꞌ iswiꞌehal yeko yinh Yatut Komam Dios. 14 Haꞌ xin naj levita chiyij Coré, iskꞌahol naj Imna, naj ayko istanheno ispultahil Yatut Komam Dios ayko yinh yetkꞌulal bꞌay chiꞌahilo tzꞌayik, haꞌ naj ayko yilomalo yinh ischahni chꞌen yebꞌalqꞌabꞌ chitit yinh iskꞌul anma yaqꞌni tet Komam Jahawil, yebꞌ xin haꞌ naj ayko yilomalo yinh ispohnikanh chꞌen yebꞌalqꞌabꞌ tuꞌ yebꞌ tzetaj ye tuꞌ yet Komam Jahawil. 15 Haxa ebꞌnaj levita tiꞌ xin kolwa yinh naj Coré: Naj Edén, naj Miniamín, naj Jesúa, naj Semaías, naj Amarías yebꞌ naj Secanías, haꞌ ebꞌnaj tuꞌ kolwa ispohnikanh yebꞌalqꞌabꞌe xol iskonhobꞌ ebꞌyaꞌ sacerdote, hatatikꞌa hunun majan, aqꞌlax yet ichamta anma yebꞌ nixhte unin. 16 Ebꞌnaj chiꞌokto yul Yatut Komam Jahawil yinh ismunil yinh hunun tzꞌayik hatatikꞌa yeko ebꞌnaj yinh istxolal, ebꞌnaj tzꞌibꞌnhebꞌilxayo isbꞌi yul hum, ebꞌnaj ayxako yinh oxebꞌ habꞌil yebꞌ ebꞌnaj xapalkꞌon yinh oxebꞌ habꞌil. 17 Hakpax tuꞌ ebꞌyaꞌ sacerdote tzꞌibꞌnhebꞌilpaxo isbꞌi ebꞌyaꞌ yinh hunun majan hatatikꞌa yikꞌal, yebꞌ ebꞌnaj levita xapalkꞌon ishabꞌilal yinh 20 (hunkꞌal) habꞌil tzꞌibꞌnhelax isbꞌi ebꞌnaj, hatatikꞌa yinh hunun majan yebꞌ yinh ismunil. 18 Ebꞌnaj tuꞌ tzꞌibꞌnhebꞌil isbꞌi ebꞌnaj yebꞌ yixal yebꞌ nixhte yuninal yebꞌ ebꞌnaj tzehtaj yebꞌ ebꞌix qꞌopo yebꞌ sunil mak ayko yalanh yip ebꞌnaj. Haꞌ sunil mak tuꞌ kaw yijem issajnhen isbꞌa yu ismunla yinh ismunil Komam Dios. 19 Hakpax tuꞌ yulajla konhobꞌ ay ebꞌnaj ayko yaqꞌni tzet chislo ebꞌyaꞌ sacerdote, ebꞌyaꞌ titna yinh yaꞌ Aarón, ebꞌyaꞌ ay yinhla iskonhobꞌ ebꞌyaꞌ sacerdote, yebꞌ tet ebꞌnaj levita ay yul hunteqꞌanxa konhobꞌ.

20 Haꞌ sunil hunteqꞌan tuꞌ iswatxꞌe yaꞌ rey Ezequías yul ismajul txꞌotxꞌ Judá. Haꞌ sunil tzet iswatxꞌe yaꞌ tuꞌ kaw kꞌul, kaw tohol, yebꞌ kaw haꞌ isyelal yul sat Komam Jahawil, isDiosal yaꞌ. 21 Yaꞌ rey Ezequías tuꞌ issayilo yaꞌ Komam Dios yinh sunil yanma, yuto iswatxꞌe yaꞌ munil bꞌey Yatut Komam, isyijen yaꞌ hakaꞌ yalni ley yebꞌ ischejbꞌanil Komam, yuxin haꞌ sunil tzet iswatxꞌe yaꞌ Ezequías tuꞌ kꞌul elikoj.