Ok naj Senaquerib yaqꞌaꞌko howal yinh Judá
32
Hayet xalahwi iswatxꞌenkano yaꞌ rey Ezequías sunil hunteqꞌan tuꞌ, yet kaw yijem yute isbꞌa yaꞌ tet Komam Dios, yapni naj Senaquerib, isreyal ebꞌnaj asirio howal yinh Judá, ishoynayo ebꞌnaj asirio tuꞌ ej konhobꞌ ayko iskꞌubꞌal yul ismajul Judá, yu yaqꞌni aykꞌayo ebꞌnaj.2 Yilnhe yaꞌ rey Ezequías tato hinanxa naj rey Senaquerib yaniko howal yinh konhobꞌ Jerusalén, 3 yalni yaꞌ rey Ezequías tet ebꞌnaj iswiꞌehal konhobꞌ yebꞌ tet ebꞌnaj soldado, kaw helan yinh howal, tato chismajche ebꞌnaj isnuqꞌ ha haꞌ ay yintalto konhobꞌ; ischahni iswiꞌ ebꞌnaj tuꞌ yinh tzet yal yaꞌ rey Ezequías. 4 Hak tuꞌ yu iskutxbꞌan isbꞌa sunil konhobꞌ, ismajchen ebꞌnaj sunil isnuqꞌ ha haꞌ yebꞌ haꞌ chiꞌekꞌ yojomal iskawilal konhobꞌ, yunhe machi ha haꞌ chiꞌilcha yu ebꞌnaj asirio yet chiꞌapni ebꞌnaj bꞌey tuꞌ.
5 Lahwi tuꞌ yiqꞌnikanh yip yanma yaꞌ rey Ezequías, ischejni yaꞌ watxꞌelaxokanh iskꞌubꞌal konhobꞌ matxa kꞌulo yekoj, ischejni yaꞌ watxꞌelaxokanh torre, yebꞌ huneꞌxa iskꞌubꞌal yinhla konhobꞌ, iskawxenpaxokanh yaꞌ campamento Milo, ayko yul isKonhobꞌ yaꞌ David,a ischejni yaꞌ watxꞌelaxo txꞌiꞌal chꞌen espada yebꞌ chꞌen escudo. 6 Yaniko yaꞌ rey Ezequías tuꞌ ebꞌnaj chiꞌok yahawilo yinh ebꞌnaj soldado aqꞌom howal, iskutxbꞌaniko yaꞌ ebꞌnaj bꞌey txonhbꞌal bꞌey ispultahil konhobꞌ, yiptzen yaꞌ ebꞌnaj, yalni yaꞌ hakaꞌ tiꞌ: 7 «Iqꞌwe yip heyanma, linhbꞌawe hebꞌa, mach chexxiw tet naj rey Asiria tuꞌ, mach chexxiwpaxo tet sunil issoldado naj tzujan yintaj, yuto ekꞌbꞌal ay jip yibꞌanh ebꞌnaj. 8 Haꞌ naj tuꞌ yinh yip issoldado naj chikawxi iskꞌul, walonh xin ayko Komam Jahawil, koDiosal jetbꞌihoj, haꞌ chikolwa jinh, kat yaqꞌni howal koseleloj,» xhi yaꞌ rey Ezequías. Hayet yabꞌen konhobꞌ tzet yal yaꞌ isreyal Judá, yiqꞌnikanh yip yanma.
9 Hayet ayko naj Senaquerib howal yinh konhobꞌ Laquis yebꞌ sunil issoldado, ischejnito naj ischejabꞌ bꞌey Jerusalén yalno tet yaꞌ rey Ezequías, isreyal Judá, yebꞌ tet sunil ebꞌnaj Judá kutxaniko bꞌey Jerusalén, yalni ebꞌnaj hakaꞌ tiꞌ:
10 «Hak tiꞌ chiyu yalni yaꞌ Senaquerib, isreyal ebꞌnaj asirio: ¿Mak yinh chikawxi hekꞌul yuxin kaw matzet chal hekꞌul chexkankano yul konhobꞌ Jerusalén yet hoybꞌil hexxayo juhanh? 11 Wal xin mach cheyaqꞌ subꞌchaho hebꞌa tet naj Ezequías, yuto lanhan kexyaniko naj yul isqꞌabꞌ kamikal, yebꞌ yul isqꞌabꞌ wahil, yebꞌ yul isqꞌabꞌ tajintiꞌal; chalni naj teyet hakaꞌ tiꞌ: “Komam Jahawil, koDiosal, haꞌ Komam chonhkolnilo yul isqꞌabꞌ isreyal Asiria,” xhi naj Ezequías. 12 ¿Tom maxhtaj naj Ezequías tiꞌ kexchejni heyuchkꞌanto bꞌay cheyiyo hebꞌa bꞌey nahat yekanh, yebꞌ ismexhahil bꞌay cheyaqꞌ hexahanbꞌal, yalni naj tet sunil anma Judá yebꞌ tet sunil anma ah Jerusalén tato hunchꞌannhe heDiosal, yebꞌ hunchꞌannhe mexhahil yet xahanbꞌal bꞌay cheyiyo hebꞌa yebꞌ bꞌay chenhus teꞌ pom? 13 ¿Tom mach heyohtajo tzet jaqꞌlehanh yebꞌ ebꞌyaꞌ wichmaman yinh sunil hunteqꞌan konhobꞌ ay sat txꞌo txꞌotxꞌ tiꞌ? ¿Tom yu iskolnilo isdiosal hunteqꞌan anma tuꞌ istxꞌotxꞌ yul inqꞌabꞌan? 14 ¿Tom ay hunu isdiosal hunteqꞌan konhobꞌ kolnilo iskonhobꞌ tet ebꞌyaꞌ wichmaman yet yuchkꞌakanto iskonhobꞌ? ¿Tzet xin chu kexiskolnilo heDiosal tuꞌ yul inqꞌabꞌan? 15 Yuxin wal tinanh mach cheyaqꞌ subꞌchaho hebꞌa tet naj Ezequías, machojabꞌ cheyaqꞌ ayo hekꞌul yebꞌ mach cheyayto yul heyanma yinh tzet chal naj, yuto maxhto hunu isdiosal hunteqꞌan konhobꞌ tuꞌ chu iskolnilo iskonhobꞌ yul inqꞌabꞌan yebꞌ yul isqꞌabꞌ wichmaman. Hajxam heDiosal tuꞌ, ¿tom chu kexiskolnilo yul inqꞌabꞌan?» xhito yaꞌ rey Senaquerib, xhi ebꞌnaj.
16 Hakpax tuꞌ ebꞌnaj ischejabꞌ naj Senaquerib kaw txꞌiꞌal tzet yalpaxo ebꞌnaj yinh Komam Jahawil yebꞌ yinh yaꞌ Ezequías, ischejabꞌ Komam. 17 Istzꞌibꞌnhenpaxo naj rey Senaquerib teꞌ hum tet yaꞌ Ezequías bꞌay chibꞌuchwa naj yinh Komam Jahawil, isDiosal Israel, yalnito naj hakaꞌ tiꞌ: «Hakaꞌ isdiosal hunteqꞌan nime konhobꞌ mach yu iskolnilo iskonhobꞌ yul inqꞌabꞌan, hakpax tuꞌ isDiosal naj Ezequías, ¿tom chu iskolnilo iskonhobꞌ yul inqꞌabꞌan?» xhito naj yul hum.
18 Ahpaxo yaw ebꞌnaj ischejabꞌ naj rey Senaquerib tet ebꞌnaj ay bꞌey Jerusalén, haꞌ ton ebꞌnaj ayahto yibꞌanh iskꞌubꞌal konhobꞌ, ah yaw ebꞌnaj yinh kaw ip yinh abꞌxubꞌal hebreo, yu isxibꞌtenkanh ebꞌnaj ebꞌnaj, kat ispax yip ebꞌnaj yu xiwkilal, kat yaykꞌay konhobꞌ tuꞌ yul isqꞌabꞌ ebꞌnaj. 19 Isbꞌuchwa ebꞌnaj yinh Komam Dios, isDiosal Jerusalén, hakaꞌ isbꞌuchwa ebꞌnaj yinh hunteqꞌanxa isdiosal konhobꞌ ay sat txꞌo txꞌotxꞌ tiꞌ, hunteqꞌan tioxh watxꞌebꞌil yu anma.
Iskol Komam Dios Jahawil yaꞌ rey Ezequías yebꞌ anma ah Jerusalén
20 Yuxin ok yaꞌ rey Ezequías yebꞌ yaꞌ Isaías, iskꞌahol yaꞌ Amoz txahlo yinh huneꞌ tuꞌ tet Komam Dios ay yul satkanh. 21 Ischejniti Komam Jahawil huneꞌ naj ángel istanhtzelo ebꞌnaj soldado asirio yul iscampamento; ebꞌnaj iswiꞌehal soldado yebꞌ ebꞌnaj capitán, yebꞌ ebꞌnaj kaw helan yinh howal. Hayet yilni naj rey Asiria huneꞌ tuꞌ ispaxto naj yinh txꞌixwilal; hayet yapni naj bꞌey iskonhobꞌ, yokto naj yul yatut istioxh, ispotxꞌlaxkamo naj yul yatut tioxh tuꞌ yu ebꞌnaj iskꞌahol.
22 Hak tuꞌ yu iskolni Komam Jahawil yaꞌ rey Ezequías yebꞌ konhobꞌ Jerusalén yul isqꞌabꞌ naj Senaquerib, isreyal Asiria, yebꞌpaxo yul isqꞌabꞌ hunteqꞌanxa nime konhobꞌ. Yaqꞌni xewo Komam sunil anma bꞌayejtuꞌwal yul konhobꞌ Jerusalén. 23 Yiniti anma yebꞌalqꞌabꞌe tet Komam Jahawil bꞌey Jerusalén, yinipaxti anma sabꞌehal kaw ay istohol tet yaꞌ Ezequías, isreyal Judá. Hak tuꞌ xin kaw ay yelapno elkaniko yaꞌ yul sat sunil nime konhobꞌ tzujaniloxa.
Yet isyabꞌiꞌay yaꞌ rey Ezequías
24 Haꞌ yinh huneꞌ tiempohal tuꞌ yabꞌiꞌay yaꞌ rey Ezequías, kaw xin how yute isbꞌa huneꞌ yabꞌil tuꞌ, kaw eliko iskam yaꞌ, yajaꞌ txahli yaꞌ tet Komam Jahawil. Ispajtzen Komam istxah yaꞌ, yaqꞌni Komam huneꞌ yechel tet yaꞌ kaw ay yelapnoj. 25 Kaw niman iskꞌulal Komam isyelo yinh yaꞌ Ezequías tuꞌ; yajaꞌ isnahulnheto yaꞌ iskꞌulal ischah tet Komam, ok loloꞌal yinh yanma yaꞌ, yinikanh isbꞌa yaꞌ, yuxin tit ishowal Komam yinh yaꞌ yebꞌ yinh Judá yebꞌ yinh Jerusalén. 26 Yajaꞌ hayet lahwi yinikanh isbꞌa yaꞌ tuꞌ istxumni isbꞌa iskꞌul yaꞌ, yinayo isbꞌa yaꞌ sata Komam Jahawil yebꞌ konhobꞌ Jerusalén, hak tuꞌ xin matxa tit ishowal Komam Jahawil yibꞌanh konhobꞌ yulbꞌal istiempohal yaꞌ rey Ezequías.
Yet yekꞌ yaꞌ Ezequías reyal yebꞌ yet iskami
27 Haꞌ yaꞌ rey Ezequías tuꞌ kaw nimankano isqꞌalomal yaꞌ, yebꞌ kaw ay yelapno elkaniko yaꞌ. Kaw niman chꞌen plata yebꞌ chꞌen oro iskutxbꞌako yaꞌ, yebꞌ chꞌen chꞌen kꞌulejchꞌan jilni, yebꞌ anh kaw xuqꞌ sam, yebꞌ niman yescudo yaꞌ yet howal, yebꞌ hunteqꞌanxa chꞌen chꞌen kaw kꞌulejchꞌan jilni kaw ochebꞌil. 28 Ischejni yaꞌ watxꞌelaxo nha bꞌay chikꞌubꞌalax ixim trigo, vino yebꞌ aceite. Ischejni yaꞌ watxꞌelaxopaxo teꞌ nha bꞌay chꞌok ejto no noqꞌ, yebꞌ xin bꞌay chꞌokto noꞌ wakax. 29 Ischejni yaꞌ watxꞌelaxokanh ej konhobꞌ, kaw xin nimankano ismeꞌ yebꞌ iswakax yaꞌ, yuto kaw nimankano qꞌalomal yaqꞌ Komam Dios tet yaꞌ.
30 Haꞌ ton yaꞌ Ezequías tuꞌ chejni majchelaxo isnuqꞌ ha haꞌ, haꞌ ton haꞌ Gihón, nahat yekanh, yiniti yaꞌ haꞌ yalanh txꞌotxꞌ, istit haꞌ yinh yetkꞌulal bꞌay chito tzꞌayik, yapni haꞌ bꞌey isKonhobꞌ yaꞌ David. Sunil tzet iswatxꞌe yaꞌ rey Ezequías tuꞌ kꞌul elikoj. 31 Yajaꞌ wal ebꞌnaj iswiꞌehal konhobꞌ Babilonia apni iskꞌatanh yaꞌ rey Ezequías chejlaxto ebꞌnaj yu yohtanhenilo ebꞌnaj kꞌaybꞌalkꞌule watxꞌelax yinh konhobꞌ Jerusalén; yajaꞌ xin apni ebꞌnaj tuꞌ, yu yilwen Komam Dios yaꞌ yu isyenilo isbꞌa sunil tzet chꞌekꞌ yinh yanma yaꞌ rey tuꞌ.
32 Haꞌ hunteqꞌanxa tzet iswatxꞌe yaꞌ rey Ezequías yebꞌ isyijemal yaꞌ tet Komam Dios, tzꞌibꞌnhebꞌilkano sunil yu yaꞌ Isaías, ischejabꞌ Komam Dios, yaꞌ iskꞌahol yaꞌ Amoz, yebꞌ yul hum chitzotel yinh ebꞌyaꞌ isreyal Judá yebꞌ isreyal Israel. 33 Hayet yapni istzꞌayikal iskam yaꞌ rey Ezequías, ismuji yaꞌ bꞌay mujan yichmam, yul huneꞌ panteón kaw niman yelapnoj, bꞌay mujan ebꞌnaj iskꞌahol yaꞌ David. Sunil Judá yebꞌ Jerusalén kaw kꞌul yu ismujwa yinh yaꞌ, yuto kaw ay yelapno yaꞌ yul sat. Ok iskꞌahol yaꞌ reyal seleloj, haꞌ ton yaꞌ Manasés.