6 Isnhusni yaꞌ yuninal xahanbꞌalil tet tioxh bꞌey akꞌal yet iskꞌahol naj Hinom. Issayni yaꞌ ebꞌnaj ahbꞌe, ebꞌnaj txumlum, ebꞌnaj chalni ta yohta tzet chiyuhi, yebꞌ ebꞌnaj chisqꞌumle isbꞌa yebꞌ ispixan kamom. Hunelnhe kaw txꞌojkano sunil tzet iswatxꞌe yaꞌ rey tuꞌ, yuxin tit ishowal Komam Jahawil yinh yaꞌ. 7 Machnhetaj tuꞌ, to iswatxꞌepaxokanh yaꞌ huneꞌ chꞌen tioxh yul Yatut Komam Dios, huneꞌ Yatut Komam bꞌay yalkanoj tet yaꞌ David yebꞌ yaꞌ Salomón, iskꞌahol yaꞌ David hakaꞌ tiꞌ: «Haꞌ huneꞌ nha tiꞌ yebꞌ konhobꞌ Jerusalén tiꞌ insikꞌilojan xol sunil ebꞌnaj Israel, yu isbꞌina inbꞌihan yinh sunilbꞌal ej tiempo. 8 Matxa bꞌaqꞌinh chiwilojan ebꞌnaj Israel tiꞌ hunelxa sat txꞌo txꞌotxꞌ waqꞌkanojan tet yichmam ebꞌnaj tato chisyije ebꞌnaj chejbꞌanile yebꞌ kuybꞌanile yebꞌ ley inchejkanojan yalaꞌ yaꞌ Moisés inchejabꞌan,» xhikanoj.

9 Yajaꞌ wal yaꞌ rey Manasés tuꞌ yijbꞌa yaꞌ anma Judá yebꞌ konhobꞌ Jerusalén iswatxꞌen istxꞌojal yul sat Komam Jahawil, kaw xin ekꞌbꞌal istxꞌojal tzet isbꞌeybꞌalnhe ebꞌnaj sata nime konhobꞌ istanhzelo Komam Jahawil sata ebꞌnaj Israel. 10 Iskachlax yaꞌ rey Manasés yebꞌ iskonhobꞌ yu Komam Jahawil, yajaꞌ xin mach yabꞌe ebꞌnaj. 11 Yuxin ischejiko Komam Jahawil ebꞌnaj yahawil issoldado naj rey asirio yaqꞌaꞌko howal yinh Judá, iskꞌalnayo ebꞌnaj yaꞌ Manasés yu chꞌen cadena, yinito ebꞌnaj yaꞌ preso bꞌey Babilonia.

12 Yajaꞌ hayet yay isyaꞌtajil yibꞌanh yaꞌ rey Manasés, istxahli yaꞌ tet Komam Jahawil, isDiosal, yinayo isbꞌa yaꞌ sata Komam Dios, isDiosal yichmam. 13 Hayet istxahli yaꞌ Manasés tuꞌ, ispajtzen Komam istxah yaꞌ, yaqꞌni meltzoho Komam yaꞌ bꞌey Jerusalén, yok yaꞌ yinh ismunil yinh reyal hunelxa. Hak tuꞌ yu istxumni yaꞌ Manasés tuꞌ tato haꞌ Komam Jahawil, kaw Dioskanoj.

14 Lahwi tuꞌ, iswatxꞌenkanh yaꞌ Manasés iskꞌubꞌal iskonhobꞌ yaꞌ David, huneꞌ kꞌubꞌ yintaltoj, yinh yetkꞌulal bꞌay chito tzꞌayik yinh Gihón, yekꞌ bꞌey akꞌal masanta apni bꞌey pulta yet noꞌ kay. Iswatxꞌenpaxokanh yaꞌ konhobꞌ Ofel, kaw xin nahat yukanh istel iskꞌubꞌal tuꞌ; yaniko yaꞌ yahawil ebꞌnaj soldado yulajla hunun konhobꞌ ayko iskꞌubꞌal sat txꞌotxꞌ Judá. 15 Yinilo yaꞌ hunteqꞌan tioxh, isdiosal ebꞌnaj nan konhobꞌal, yinipaxilti yaꞌ huneꞌ tioxh ayikto yul Yatut Komam Jahawil, yinipaxilo yaꞌ hunteqꞌan ismexhahil yet xahanbꞌal aykanh yinh tzalan, bꞌay ay Yatut Komam Jahawil, yebꞌ hunteqꞌan ismexhahil yet xahanbꞌal aykanh yul konhobꞌ Jerusalén, yalni yaꞌ xin tet ebꞌnaj Judá ta chꞌilaxilto sunil tuꞌ yintalto konhobꞌ. 16 Lahwi tuꞌ iswatxꞌenkanh yaꞌ ismexhahil yet xahanbꞌal tet Komam Jahawil, isnhusni yaꞌ isxahanbꞌal yibꞌanh ismexhahil yet xahanbꞌal tuꞌ, yaqꞌnipaxo yaꞌ yebꞌalqꞌabꞌe yet aqꞌankꞌulal, yu yaqꞌni yaꞌ yuchꞌandiosal tet Komam Jahawil. Ischejni yaꞌ sunil anma Judá isyijeno tzet chiyal Komam Jahawil, isDiosal Israel. 17 Yajaꞌ wal anma ay yul konhobꞌ tuꞌ chito yaqꞌ isxahanbꞌal yibꞌanh hunteqꞌan ismexhahil yet xahanbꞌal aykanh bꞌay nahat yekanh, yajaꞌ haꞌ tet Komam Dios Jahawil, chaqꞌ isxahanbꞌal tuꞌ.

18 Haꞌ hunteqꞌanxa tzet iswatxꞌe yaꞌ rey Manasés yebꞌ istxah yaꞌ yaqꞌ tet Komam Dios, yebꞌ tzotiꞌ yal ebꞌyaꞌ ischejabꞌ Komam Jahawil yinh isbꞌi Komam, isDiosal Israel, haꞌ sunil tuꞌ, tzꞌibꞌnhebꞌilkano yul acta chitzotel yinh ebꞌyaꞌ isreyal Israel. 19 Haꞌ istxah yaꞌ Manasés yebꞌ yet ispajtzen Komam istxah yaꞌ, yebꞌ sunil istxꞌojal iswatxꞌe yaꞌ yet yaniko ismul yaꞌ sata Komam, yebꞌ yet iswatxꞌenkanh yaꞌ hunteqꞌan ismexhahil yet xahanbꞌal yebꞌ yet yanikanh yaꞌ tioxh Asera yebꞌ hunteqꞌanxa tioxh yet yalanhto maxhto chiyiyo isbꞌa yaꞌ tet Komam, sunil tuꞌ tzꞌibꞌnhebꞌilkano yul yum ebꞌyaꞌ ischejabꞌ Komam. 20 Iskam yaꞌ rey Manasés hakaꞌle yu iskamto yichmam yaꞌ, ismujlax yaꞌ yatut, yok yaꞌ Amón iskꞌahol yaꞌ reyal seleloj.

21 Hayet ok yaꞌ Amón reyal, 22 (kabꞌ iskawinaj) habꞌil yaꞌ, kabꞌnhe xin habꞌil ok yaꞌ reyal bꞌey Jerusalén. 22 Yaꞌ rey Amón tuꞌ, haꞌ istxꞌojal iswatxꞌe yaꞌ sata Komam Jahawil, isbꞌeybꞌalnhe yaꞌ istxꞌojal iswatxꞌe ismam, haꞌ ton yaꞌ rey Manasés, yuto yaqꞌ yaꞌ isxahanbꞌal tet hunteqꞌan tioxh iswatxꞌekanh ismam. 23 Yajaꞌ xin maxhtikꞌa yiyo isbꞌa yaꞌ rey Amón tuꞌ tet Komam Jahawil hakaꞌ yu yinayo isbꞌa ismam yaꞌ, wal xin islahiko yaꞌ yaniko ismul.

24 Ispakꞌiko ebꞌnaj ischejabꞌ yaꞌ yinh, ispotxꞌnikamo ebꞌnaj yaꞌ. 25 Haxa konhobꞌ Judá potxꞌnikamo ebꞌnaj ischejabꞌ yaꞌ rey Amón tuꞌ, yalni konhobꞌ ta chꞌok yaꞌ Josías, iskꞌahol yaꞌ Amón tuꞌ, reyal seleloj.