3 Hayet waxajebꞌxa habꞌil yok yaꞌ Josías reyal, yet nichꞌan tzehto yaꞌ yichiko yaꞌ issayni Komam Dios, isDiosal yaꞌ David, yichmam yaꞌ, haxa yet 12 (kabꞌlahonhebꞌxa) habꞌil yok yaꞌ reyal tuꞌ, yok yaꞌ yinilo sunil ismachiswalilal bꞌey Judá yebꞌ Jerusalén, yinilo yaꞌ hunteqꞌan ismexhahil yet xahanbꞌal nahat yekanh, yinilo yaꞌ yechel tioxh Asera yebꞌ hunteqꞌanxa chꞌen tioxh. 4 Yuchkꞌalaxto ismexhahil yet xahanbꞌal aykanh tet tioxh Baal yinh sat yaꞌ, ischejni yaꞌ ismaqꞌlaxpoho istioxhal tzꞌayik aykanh yibꞌanh, ischejnipaxo yaꞌ ismaqꞌlaxpoho yechel tioxh Asera yebꞌ hunteqꞌanxa chꞌen tioxh, kaw kokꞌ ayikoj, istixhlaxayo ispojojal tuꞌ bꞌay mujlax ebꞌnaj halten xahanbꞌal tet hunteqꞌan tioxh tuꞌ. 5 Ischejni yaꞌ rey Josías nhuslaxoto isbꞌajil ebꞌnaj sacerdote yibꞌanh hunteqꞌan ismexhahil yet xahanbꞌal tuꞌ, hak tuꞌ yu issajnhenkano yaꞌ Judá yebꞌ Jerusalén. 6 Haktikꞌapax tuꞌ xin yute yaꞌ yulajla konhobꞌ yul ismajul txꞌotxꞌ Manasés, Efraín, Simeón, masanta Neftalí yebꞌ hunteqꞌanxa konhobꞌ xaꞌuchkꞌalaxto yinhla ishoyanil. 7 Haxa yet lahwi ischejni yaꞌ rey Josías yuchkꞌalaxokanto hunteqꞌan ismexhahil yet xahanbꞌal tuꞌ, yebꞌ yet islahwi ismaqꞌlaxpoho yechel tioxh Asera yebꞌ hunteqꞌanxa chꞌen tioxh sunil yul ismajul Israel, ismeltzo yaꞌ bꞌey Jerusalén.

8 Hayet 18 (waxajlahonhebꞌxa) habꞌil yok yaꞌ Josías reyal, yet lahwi issajnhenkano yaꞌ Judá yebꞌ Yatut Komam Dios, ischejnito yaꞌ naj Safán iskꞌahol naj Azalía, yebꞌ naj Maasías, naj yahawil konhobꞌ, yebꞌ naj Joa, naj tzꞌibꞌlom, iskꞌahol naj Joacaz, yu isto ebꞌnaj iswatxꞌeno munil yinh Yatut Komam Jahawil, isDiosal. 9 Yapni ebꞌnaj tuꞌ iskꞌatanh yaꞌ Hilcías, iswiꞌehal yinh ebꞌyaꞌ sacerdote, yaqꞌni ebꞌnaj chꞌen yebꞌalqꞌabꞌ iskutxbꞌakanh ebꞌnaj levita, chitanhen ispultahil Yatut Komam Jahawil, chꞌen yaqꞌ ebꞌnaj Manasés, ebꞌnaj Efraín, yebꞌ anma kantokano yinh ebꞌnaj Israel, yebꞌ sunil Judá, Benjamín, yebꞌ konhobꞌ Jerusalén. 10 Yalaxiko chꞌen melyu tuꞌ yul isqꞌabꞌ ebꞌnaj yahawil yeko yinh munil iswatxꞌenkanh tzet etaxnato yinh Yatut Komam Jahawil, haxa xin ebꞌnaj chitohlan ebꞌnaj chiwatxꞌen munil tuꞌ. 11 Istohlanpaxo ebꞌnaj ebꞌnaj hutxꞌum teꞌ, yebꞌ ebꞌnaj yahaw munil chiloqꞌni chꞌen chꞌen chipaqꞌbꞌalaxi, yaqꞌnipaxo ebꞌnaj chꞌen melyu isloqꞌbꞌanil teꞌ patzabꞌ yebꞌ teꞌ aqꞌinteꞌ chiꞌokniko yinh nha yetato ebꞌnaj isreyal Judá.

12 Haꞌ ebꞌnaj chimunla tuꞌ kaw kꞌul yute isbꞌa ebꞌnaj yinh ismunil. Haꞌ xin ebꞌnaj tiꞌ ayko ijbꞌalomal yinh munil tuꞌ: Naj Jahat, naj Abdías ebꞌnaj kawanh levita tiꞌ, iskꞌahol naj Merari ye ebꞌnaj. Naj Zacarías yebꞌ naj Mesulam, ebꞌnaj tiꞌ iskꞌahol naj Coat, haꞌ ebꞌnaj alaxikoj yu yilni iswatxꞌi munil. Sunil ebꞌnaj levita tuꞌ, kaw helanpaxo ebꞌnaj yaniko munlabꞌal yet bꞌit. 13 Haꞌ xin ebꞌnaj ayiko tanheno ebꞌnaj chiꞌijnikꞌo tzetaj chiꞌokniko yinh munil tuꞌ, haꞌ ebꞌnaj aypaxiko yilomalo hunteqꞌanxa munil. Haꞌ xol ebꞌnaj levita tuꞌ ay ebꞌnaj tzꞌibꞌlom, ay ebꞌnaj yahawil, yebꞌ ebꞌnaj chitanhen ispultahil Yatut Komam.

14 Hayet yinilti ebꞌnaj chꞌen melyu yul Yatut Komam Jahawil, chꞌen ilaxti tet Komam, yilchati teꞌ hum bꞌay ayayo ischejbꞌanil Komam Jahawil yu yaꞌ sacerdote Hilcías, teꞌ hum aqꞌbꞌilkano yu yaꞌ Moisés. 15 Yuxin yal yaꞌ Hilcías tet naj tzꞌibꞌlom, haꞌ ton naj Safán:

—Maꞌilcha teꞌ hum bꞌay ayayo chejbꞌanile yet Komam Jahawil wuhan yul Yatut Komam, xhi yaꞌ. Tzujan tuꞌ yaqꞌni yaꞌ Hilcías teꞌ hum tuꞌ tet naj Safán.

16 Yinito naj Safán hum tuꞌ tet yaꞌ rey Josías, yalni naj tet yaꞌ:

—Mam rey, haꞌ sunil munil taqꞌebꞌil hawu, mayijkano isbꞌa iswatxꞌikano yu ebꞌnaj hachejabꞌ. 17 Iskutxbꞌako ebꞌnaj chꞌen melyu ay yul Yatut Komam Jahawil, yaniko ebꞌnaj chꞌen yul isqꞌabꞌ ebꞌnaj ilom munil tuꞌ, haxa xin ebꞌnaj tohlan ebꞌnaj munlawom, xhi naj.

18 Yalnipaxo naj Safán, naj tzꞌibꞌlom tuꞌ tet yaꞌ rey Josías hakaꞌ tiꞌ:

—Haꞌ yaꞌ sacerdote Hilcías maꞌaqꞌni huneꞌ hum tiꞌ wetan, xhi naj. Lahwi tuꞌ yok naj Safán yilno tzet ayayo yul hum tuꞌ, yabꞌeꞌ yaꞌ rey Josías.

19 Hayet yabꞌen yaꞌ rey tzet chal teꞌ hum tuꞌ, istzilnilo yaꞌ xil isqꞌap, 20 ischejnito yaꞌ rey yaꞌ Hilcías, naj Ahicam iskꞌahol naj Safán yebꞌ naj Abdón iskꞌahol naj Micaía, yebꞌ naj Safán naj tzꞌibꞌlom yebꞌ naj Asaías ischejabꞌ yaꞌ rey Josías tuꞌ, yalni yaꞌ tet ebꞌnaj:

21 —As qꞌambꞌewe winhan tet Komam Jahawil yebꞌ yinh hunteqꞌanxa ebꞌnaj Israel yebꞌ ebꞌnaj Judá, kat kam heqꞌambꞌen tet Komam yinh tzet chal yelapno teꞌ hum maꞌilcha tiꞌ, yuto kaw lemanti ishowal Komam Jahawil jibꞌanh tinanh, yuto mach isyije ebꞌyaꞌ komam icham Istzotiꞌ Komam Jahawil hakaꞌ yalni hum bꞌay ayayo chejbꞌanile yu Komam tiꞌ, xhi yaꞌ rey Josías.

22 Hak tuꞌ yu isto yaꞌ Hilcías yebꞌ ebꞌnaj ischej yaꞌ rey tuꞌ iskꞌatanh ix Hulda, ix ischejabꞌ Komam Dios, ix yixal naj Salum. Naj Salum tuꞌ iskꞌahol naj Ticva ye naj, haxa naj Ticva iskꞌahol naj Harhas ye naj. Haꞌ naj Harhas tuꞌ ayko yilomal xilqꞌape chiꞌokniko yu ebꞌyaꞌ sacerdote yinh ismunil yul Yatut Komam. Ix Hulda tuꞌ bꞌey iskabꞌ cantón bꞌey Jerusalén ay ix, yalni ebꞌnaj ischejbꞌanil tet ix. 23 Istaqꞌwi ix tet ebꞌnaj:

—Haꞌ Komam Jahawil, isDiosal Israel chihalni hakaꞌ tiꞌ: “Halwe tet yaꞌ kexchejni wetan, hak tiꞌ yute yalni Komam Jahawil: 24 Chiwatijan sunil isyaꞌtajil yibꞌanh konhobꞌ yebꞌ yibꞌanh anma ay yul konhobꞌ tiꞌ hakaꞌ tzet tzꞌibꞌnhebꞌilayo yul teꞌ hum awtelax sata yaꞌ isreyal Judá. 25 Yuto kinhebꞌejkanojan, heyaqꞌni hexahanbꞌal tet tioxh mach diosoj, heyaqꞌnitij inhowalan, yu sunil istxꞌojal hewatxꞌe yu heqꞌabꞌ, yuxin chiwatijan inhowalan yibꞌanh konhobꞌ tiꞌ, matxa xin chꞌekꞌayo inhowal tuꞌan,” xhi Komam Dios. 26 Yalnipaxo ix tet ebꞌnaj: Yajaꞌ wal tet yaꞌ isreyal Judá, kexchejni heqꞌambꞌeꞌ tet Komam Dios, hak tiꞌ cheyute heyalni hakaꞌ tiꞌ: “Haꞌ Komam Jahawil, isDiosal Israel chihalni: ‘Yu maxawabꞌe tzet chiyal istzotiꞌal huneꞌ hum tuꞌ, 27 yok bꞌiskꞌulal yinh hawanma, hawinayo habꞌa insatajan yet hawabꞌen tzet chꞌeliko konhobꞌ tiꞌ wuhan, hatzilnilo xil haqꞌap, hawok oqꞌoj insatajan, yuxin wabꞌehan hatxah. 28 Haninan chaxhwilojan sat yibꞌanhqꞌinal tiꞌ hakaꞌ ebꞌnaj hawichmam. Wal xin aqꞌankꞌulal chaxhkami, kat hamujlax iskꞌatanh ebꞌnaj hawichmam, yuxin matxa chawil yu isbꞌaqꞌ hasat sunil isyaꞌtajil chiwayojan yibꞌanh konhobꞌ yebꞌ yibꞌanh sunil anma ay yul konhobꞌ tiꞌ,’ xhi Komam,” xhi ix tet ebꞌnaj.

Hak tuꞌ yu ismeltzo ebꞌnaj, yalni ebꞌnaj sunil tzet yal ix, ischejabꞌ Komam Dios tuꞌ tet yaꞌ rey Josías. 29 Yuxin iskutxbꞌako yaꞌ rey ebꞌnaj ichamta winaj Judá yebꞌ Jerusalén. 30 Yahto yaꞌ rey Josías tuꞌ Yatut Komam Jahawil, yebꞌ sunil ebꞌnaj Judá yebꞌ ebꞌnaj Jerusalén, yebꞌ ebꞌyaꞌ sacerdote yebꞌ ebꞌnaj levita, yebꞌ sunil konhobꞌ, nixhte unin yebꞌ ichamta anma; yawtelax yumal chejbꞌanile yet Komam Jahawil yabꞌeꞌ sunil anma, haꞌ ton yumal chejbꞌanile ilcha yul Yatut Komam Jahawil. 31 Lahwi tuꞌ yok linhno yaꞌ rey Josías yich ispilalil Yatut Komam Jahawil, istaqꞌweniko yaꞌ yibꞌanh isbꞌeybꞌalnhen chejbꞌanile yet Komam Jahawil, yalni yaꞌ ta chiskꞌubꞌa yaꞌ chejbꞌanile yet Komam, yebꞌ xin istxolal tzet chal Komam, yebꞌ kuybꞌanile yet Komam, yinh sunil iskꞌul yebꞌ sunil yanma. Yaniko yaꞌ yinh ismunil yinh tzet istaqꞌwekano yibꞌanh yinh tzet tzꞌibꞌnhebꞌilkano yul hum ilcha tuꞌ. 32 Ischejni yaꞌ anma ah Jerusalén, yebꞌ anma Benjamín isyijen hakaꞌ yalni ischejbꞌanil Komam Dios, Hak tuꞌ yu yanikto isbꞌa anma yalanh chejbꞌanile yet Komam Dios, isDiosal yichmam ebꞌnaj. 33 Yaꞌ rey Josías tuꞌ yilo yaꞌ sunil isyahbꞌetajil sat sunil txꞌotxꞌ Israel, ischejni yaꞌ sunil anma Israel isyijen tzet chal Komam Jahawil, isDiosal. Haꞌ yulbꞌal sunilbꞌal tiempo itzitz yaꞌ rey Josías tuꞌ, mach ispohilo isbꞌa anma Israel yinh Komam isDiosal yichmam.