3 Hayet 18 (waxajlahonhebꞌxa) habꞌil yok yaꞌ Josías isreyalo Judá, ischejnito yaꞌ istzꞌibꞌlom chiyij Safán bꞌey Yatut Komam. Naj Safán tuꞌ iskꞌahol naj Azalía ye naj, haxa naj Azalía iskꞌahol naj Mesulam ye naj, yalni yaꞌ rey Josías tet naj Safán hakaꞌ tiꞌ: 4 «Asiꞌ iskꞌatanh yaꞌ Hilcías, yaꞌ yahawil yinh ebꞌyaꞌ sacerdote, kat hawalni tet yaꞌ tato chiskꞌubꞌakanh yaꞌ chꞌen melyu chiyito konhobꞌ yul Yatut Komam Jahawil, chꞌen chiskutxbꞌa ebꞌnaj chitanhen ispultahil Yatut Komam. 5 Chiyako yaꞌ chꞌen yul isqꞌabꞌ ebꞌnaj yahaw munil yinh Yatut Komam Jahawil, haxa xin ebꞌnaj chitohlan ebꞌnaj chimunla yinh iswatxꞌen isbꞌujni ishatilal Yatut Komam, 6 kat istohlanpaxo ebꞌnaj hosom teꞌ, ebꞌnaj maestro albañil yebꞌ ebꞌnaj albañil, kat isloqꞌlaxpaxo te teꞌ, yebꞌ chꞌen chꞌen hosbꞌil chiꞌokniko yinh Yatut Komam. 7 Machi xin yilal chiqꞌanlaxayo bꞌaytet yinh chꞌokniko chꞌen melyu tet ebꞌnaj yahaw yinh munil, yuto kaw kꞌul isnabꞌal ebꞌnaj,» xhi yaꞌ rey Josías.

8 Yalni yaꞌ Hilcías, yahawil yinh ebꞌyaꞌ sacerdote tet naj Safán, istzꞌibꞌlom yaꞌ rey: «Maꞌilcha yumal chejbꞌanile yul Yatut Komam Jahawil wuhan,» xhi yaꞌ. Yaqꞌni yaꞌ yumal chejbꞌanile tuꞌ tet naj Safán, yilni naj tzet ayayo yul hum tuꞌ.^a 9 Haxa yet ismeltzo naj Safán, naj tzꞌibꞌlom tuꞌ, iskꞌatanh yaꞌ rey, yalni naj tet yaꞌ:

—Haꞌ ebꞌnaj hachejabꞌ tuꞌ, iskutxbꞌako ebꞌnaj chꞌen melyu chiꞌilaxto yul Yatut Komam, yaniko ebꞌnaj chꞌen yul isqꞌabꞌ ebꞌnaj yahawil yinh munil chibꞌujni Yatut Komam Jahawil tuꞌ, xhi naj.

10 Yalnipaxo naj Safán tet yaꞌ rey hakaꞌ tiꞌ: «Haꞌ yaꞌ sacerdote Hilcías aqꞌni huneꞌ teꞌ hum wetan,» xhi naj. Hak tuꞌ xin yu yilni naj Safán tzet ayayo yul teꞌ hum tuꞌ, yabꞌeꞌ yaꞌ rey.

11 Haxa yet yabꞌen yaꞌ rey tzet chal teꞌ tuꞌ, istzilnilo yaꞌ xil isqꞌap, 12 ischejnito yaꞌ rey tuꞌ awtelaxo yaꞌ Hilcías, yebꞌ naj Ahicam, iskꞌahol naj Safán, yebꞌ naj Acbor, iskꞌahol yaꞌ Micaías, yebꞌ naj Safán, naj tzꞌibꞌlom, yebꞌ naj Asaías, ischejabꞌ, yalni yaꞌ tet ebꞌnaj hakaꞌ tiꞌ: 13 «As qꞌambꞌewe tet Komam Jahawil winhan yebꞌ yinh konhobꞌ yebꞌ yinh sunil anma Judá, yebꞌ yinh tzet chal yelapno tzet ayayo yul teꞌ hum yet chejbꞌanile maꞌilcha tiꞌ; yuto wal tinanh kaw lemanti ishowal Komam Jahawil jinh, yuto mach yabꞌe yebꞌ xin mach isyije ebꞌnaj komam jichmam tzet chal huneꞌ hum tiꞌ,» xhi yaꞌ.

14 Hak tuꞌ yu isto yaꞌ sacerdote Hilcías, naj Ahicam, naj Acbor, naj Safán yebꞌ naj Asaías yilno ix ischejabꞌ Komam Jahawil chiyij Hulda, yixal naj Salum, iskꞌahol naj Ticva, naj iskꞌahol naj Harhas. Haꞌ ix Hulda tuꞌ chiꞌilni xilqꞌape chiꞌokniko yul Yatut Komam Jahawil, haꞌ xin bꞌey iskabꞌ cantón ay bꞌey Jerusalén ay ix. Hayet yapni ebꞌnaj iskꞌatanh ix istzotel ebꞌnaj tet ix. 15 Yalni ix tet ebꞌnaj: «Hak tiꞌ chiyute yalni Komam Jahawil, isDiosal Israel: “Hal tet yaꞌ kexchejniti wettiꞌan hakaꞌ tiꞌ: 16 ‘Hanintiꞌan chiwayojan isyaꞌtajil yibꞌanh konhobꞌ tiꞌ, yebꞌ yibꞌanh anma ay yul konhobꞌ tiꞌ, sunil isyaꞌtajil chal hum yil yaꞌ rey Judá tuꞌ. 17 Yuto kinisbꞌejkanojan ebꞌnaj, isnhusni ebꞌnaj teꞌ pom tet komon tioxh, yaqꞌnitij ebꞌnaj inhowalan yu sunil istxꞌojal iswatxꞌe, yuxin xatit lemna inhowalan yinh konhobꞌ tuꞌ, matxa xin chitanhayo inhowaltiꞌan,’ xhi Komam. 18 Yajaꞌ wal tet yaꞌ rey Judá kexchejnitij, hak tiꞌ cheyute heyalni hakaꞌ tiꞌ: Hak tiꞌ chiyute yalni Komam Jahawil, isDiosal Israel hakaꞌ tiꞌ: ‘Wal hach tiꞌ yu hawabꞌe tzet ayayo yul hum tiꞌ, 19 hawaqꞌni labꞌanbꞌo hawanma, hawinayo habꞌa insatajan yet hawabꞌen tzet walan yinh konhobꞌ tiꞌ, yebꞌ yinh anma ay yul konhobꞌ tiꞌ, tato chintanhtzelojan, kat istit intzꞌaktiꞌan yibꞌanh; hayet hawabꞌen tuꞌ, hatzilnilo xil haqꞌap yu bꞌiskꞌulal, hawok oqꞌo insatajan, wabꞌenan hatxah. 20 Yuxin chachwilojan sat yibꞌanhqꞌinal tiꞌ, kat hamuji yinh aqꞌankꞌulal, kat hawapni bꞌay ay ebꞌnaj hawichmam. Matxa xin chawil isyaꞌtajil chiwatijan yibꞌanh konhobꞌ tiꞌ,’ xhi Komam,”» xhi ix.

Hak tuꞌ yu ismeltzo ebꞌnaj, yapni ebꞌnaj yalno tet yaꞌ rey Josías yinh sunil tzet yabꞌe tuꞌ.