Ok yaꞌ Manasés isreyal Judá
21
12 (Kabꞌlahonhebꞌ) habꞌil yaꞌ Manasés yet yok yaꞌ reyal, 55 (holanhebꞌ yoxkꞌal) habꞌil xin ok yaꞌ reyal bꞌey Jerusalén. Hepsiba isbꞌi ismiꞌ yaꞌ. 2 Yaꞌ Manasés tuꞌ, haꞌ istxꞌojal iswatxꞌe yaꞌ sata Komam Jahawil, yu isbꞌeybꞌalnhen yaꞌ sunil isyahbꞌetajil iswatxꞌe hunteqꞌan nimeta konhobꞌ yilo Komam Jahawil sata ebꞌnaj Israel. 3 Yuto iswatxꞌepaxokanh yaꞌ Manasés tuꞌ bꞌay chiyiyo isbꞌa anma sata tioxh iswiꞌla wonhan, hunteqꞌan yilo yaꞌ Ezequías ismam yaꞌ. Iswatxꞌenpaxokanh yaꞌ ismexhahil xahanbꞌal sata tioxh Baal, iswatxꞌen yaꞌ yechel tioxh Asera, hakaꞌ yu yaꞌ Acab, isreyal Israel. Yinipaxayo isbꞌa yaꞌ tet sunil tzet chitzejtzon satkanh.a 4 Iswatxꞌenpaxo yaꞌ hunteqꞌan ismexhahil xahanbꞌal yul Yatut Komam Jahawil, yul yatut bꞌay yalkanoj: «Bꞌey Jerusalén bꞌay chibꞌina inbꞌihan,» xhi Komam Jahawil.b 5 Iswatxꞌenpaxokanh yaꞌ ismexhahil yet xahanbꞌal yul kabꞌebꞌ nime cuarto yul Yatut Komam Jahawil tet sunil tzet chitzejtzon ay yul satkanh. 6 Yaqꞌni nhusuꞌ yaꞌ yuninal yul qꞌaꞌ xahanbꞌalil tet istioxh, issayni yaꞌ rey tuꞌ ebꞌnaj ahbꞌe, yebꞌ ebꞌnaj chalni ta yohta tzet chiyuhi, yebꞌ ebꞌnaj kunlum yebꞌ ebꞌnaj chisqꞌumle isbꞌa tet ispixan kamom. Hunelnhe kaw txꞌoj sunil tzet iswatxꞌe yaꞌ rey Manasés, yaqꞌnitij yaꞌ ishowal Komam Jahawil. 7 Yanikto yaꞌ yechel tioxh Asera iswatxꞌe yul Yatut Komam Jahawil, yul yatut bꞌay yalkano tet yaꞌ David yebꞌ tet yaꞌ Salomón, iskꞌahol yaꞌ David tuꞌ hakaꞌ tiꞌ: «Chibꞌinakano inbꞌihan yinh sunilbꞌal tiempo yinh huneꞌ nha tiꞌ, yebꞌ yinh konhobꞌ Jerusalén insikꞌilojan xol hunun majan ebꞌnaj Israel. 8 Tato chisyije ebꞌnaj Israel sunil chejbꞌanile yebꞌ kuybꞌanile yebꞌ intzotiꞌan waqꞌan yalaꞌ yaꞌ Moisés inchejabꞌan tet ebꞌnaj, machi bꞌaqꞌinh chiwilojan ebꞌnaj sat txꞌo txꞌotxꞌ waqꞌkanojan tet yichmam ebꞌnaj,» xhi Komam.9 Yajaꞌ xin mach isyije ebꞌnaj tzet yal Komam, wal xin haꞌ kaw yaꞌ Manasés ijbꞌan ebꞌnaj iswatxꞌen istxꞌojal, kaw xin ekꞌna istxꞌojal iswatxꞌe ebꞌnaj sata nime konhobꞌ istanhtzelo Komam Jahawil yinh sat ebꞌnaj Israel. 10 Yuxin ischej Komam Jahawil ischejabꞌ yalno tet ebꞌnaj: 11 «Yu iswatxꞌe yaꞌ Manasés, isreyal Judá tiꞌ isyahbꞌetajil yebꞌ yu ekꞌna istxꞌojal iswatxꞌe yaꞌ sata istxꞌojal iswatxꞌe ebꞌnaj amorreo ekꞌlena yet yalanhtokanoj, yebꞌ yu yijbꞌa yaꞌ anma Judá yanoko ismul yet yinayo isbꞌa tet tioxh. 12 Yuxin yal Komam Jahawil, isDiosal Israel hakaꞌ tiꞌ: “Hanintiꞌan, chiwayojan isyaꞌtajil yibꞌanh konhobꞌ Jerusalén yebꞌ yibꞌanh anma Judá, kaw xin chitakkanh iskꞌul sunil mak chiꞌabꞌeni. 13 Chiwayojan isyaꞌtajil yibꞌanh Jerusalén hakaꞌ yu wanayojan isyaꞌtajil yibꞌanh Samaria yebꞌ yibꞌanh yuninal yaꞌ Acab. Chintxꞌahan Jerusalén hakaꞌ istxꞌahlax hunu sekꞌ chinhijlaxahti istzꞌilal yul, kat isnhohbꞌalaxi. 14 Chinbꞌejkanojan hanikꞌxa inkonhobꞌan kantokanoj, kat wanikojan yul isqꞌabꞌ ebꞌnaj ayko ishowal yinh, kat yilaxilo sunil tzet aya. 15 Yuto iswatxꞌe istxꞌojal yinh insatan, yaqꞌnitij inhowalan yettaxtikꞌa yet yel yichmam sat txꞌotxꞌ Egipto, masanto tinanh,” kachi,» xhi Komam.
16 Yebꞌpaxo xin, kaw niman chikꞌ malto yu yaꞌ rey Manasés, yuto ismaqꞌkamo yaꞌ mak machi ismul, isnohilo Jerusalén yu ischikꞌil anma, yijbꞌanpaxo yaꞌ anma Judá iswatxꞌen istxꞌojal yul sat Komam Jahawil. 17 Haꞌ hunteqꞌanxa tzet yu yaꞌ Manasés, yebꞌ tzet iswatxꞌe yaꞌ, yebꞌ ismul yaꞌ yakoj tzꞌibꞌnhebꞌilkano yul hum chitzotel yinh ebꞌyaꞌ isreyal Judá. 18 Iskam yaꞌ Manasés hakaꞌ yu iskamto ismam icham yebꞌ ismam yaꞌ, ismujlax yaꞌ yul peyabꞌ xolaj teꞌ kaj ay istiꞌ yatut, huneꞌ peyabꞌ yettikꞌa naj Uza ye yet yalanhtokanoj. Lahwi tuꞌ yokkano yaꞌ Amón iskꞌahol yaꞌ Manasés reyal seleloj.
Ok yaꞌ Amón isreyalo Judá
19 Hayet yok yaꞌ Amón isreyalilo Judá, 22 (kabꞌ iskawinaj) habꞌilxa yaꞌ, kabꞌnhe xin habꞌil ok yaꞌ reyal bꞌey Jerusalén, Mesulemet isbꞌi ismiꞌ yaꞌ, iskutzꞌin naj Haruz, ah Jotba. 20 Yaꞌ Amón tuꞌ, haꞌ istxꞌojal iswatxꞌe yaꞌ sata Komam Jahawil hakaꞌ ismam, haꞌ ton yaꞌ Manasés. 21 Isbꞌeybꞌalnhe yaꞌ sunil istxꞌojal iswatxꞌe ismam, yinayo isbꞌa yaꞌ tet tioxh hakaꞌ ismam. 22 Isbꞌejnikano yaꞌ Komam Jahawil, isDiosal yichmam, machi xin ekꞌyaꞌ yul isbꞌeh Komam Jahawil.
23 Haꞌ xin ebꞌnaj ischejabꞌ yaꞌ rey Amón tuꞌ pakꞌiko yinh, ismaqꞌnikamo ebꞌnaj yaꞌ bꞌey yatut. 24 Yahwano konhobꞌ Jerusalén, ismaqꞌnikamo anma ebꞌnaj maqꞌnikamo yaꞌ rey Amón, yaniko ebꞌnaj yaꞌ Josías, iskꞌahol yaꞌ Amón reyal selelo ismam.