—Hak tiꞌ chiyute yalni Komam Jahawil hakaꞌ tiꞌ: “Watxꞌekano sunil tzet ay hach tet hawuninal yebꞌ hawixal, yuto matxa chachanhchahi, chachkamo yu huneꞌ yabꞌil tiꞌ,” xhi Komam, xhi yaꞌ Isaías.

2 Yuxin ismeltzo isbꞌa yaꞌ Ezequías, ishakxito yaꞌ yinh sat bꞌitzꞌabꞌ, istxahli yaꞌ tet Komam Jahawil, yalni yaꞌ yinh istxah: 3 «Mamin, kaw chinqꞌanan tawet, kaw chinqꞌanan tawet tato chanati inbꞌeybꞌalan, ta hanhe isyelal chinwatxꞌehan yinh hasat, yebꞌ ta yinh sunil wanmahan inwatxꞌenan tzet chawoche,» xhi yaꞌ yinh istxah. Yok yaꞌ Ezequías oqꞌo sikꞌlebꞌil.

4 Haxa yet lanhan ispaxto yaꞌ Isaías yet maxhto chiꞌapni yaꞌ yiktabꞌal yamaqꞌil yatut yaꞌ Ezequías, istzotel Komam Jahawil tet yaꞌ, yalni Komam: 5 «Meltzanh iskꞌatanh yaꞌ Ezequías, yahawil yinh inkonhobꞌan, kat hawalni tet yaꞌ: “Hak tiꞌ chiyute yalni Komam Jahawil, isDiosal yaꞌ David hawichmam: Hanintiꞌan wabꞌehan hatxah, wilnihan yal hasat, yuxin chachwanhtehan, yetto oxe kachto watutan. 6 Chiwaqꞌnihan 15 (holanhebꞌxa) habꞌil hakawil, kat kach inkolnihan yebꞌ konhobꞌ tiꞌ yul isqꞌabꞌ naj rey Asiria, chintanhehan konhobꞌ tiꞌ yu iskꞌulal inkꞌulan winhan, yebꞌ yinh yaꞌ David inchejabꞌan,” kachi,» xhi Komam tet yaꞌ Isaías.

7 Ischejni yaꞌ Isaías chil-laxo poho hayebꞌ sat teꞌ higo, yalaxiko teꞌ yinh isnimanil yaꞌ Ezequías bꞌay ayko yabꞌil, hak tuꞌ yu iskawxikanh yaꞌ. 8 Haꞌ yaꞌ Ezequías halbꞌilxatikꞌa yu yaꞌ tet yaꞌ Isaías hakaꞌ tiꞌ:

—¿Tzet xin chawaqꞌ yechelo wetan tato chinanhchahan yu Komam Jahawil, yebꞌ tato chintohan yet oxe yul Yatut Komam Jahawil? xhi yaꞌ. 9 Istaqꞌwi yaꞌ Isaías:

—Haꞌ huneꞌ yechel tiꞌ chiyaqꞌ Komam Jahawil tawet yu hawohtanheniloj tato chiyij isbꞌa tzet chiyal Komam Jahawil. ¿Chimhawoche ta chibꞌelwi 10 (lahonhebꞌ) qꞌoch, maka chawoche chimeltzo 10 (lahonhebꞌ) isqꞌochal yenhel yintaj? xhi yaꞌ Isaías tet yaꞌ.^a 10 Istaqꞌwi yaꞌ Ezequías:

—Ta chibꞌabꞌi yenhel sataj, mach yaꞌtajoj, wal ta ismeltzo yenhel yintaj, kaw yaꞌtaxa, xhi yaꞌ.^b

11 Yuxin txahli yaꞌ Isaías tet Komam Jahawil, haxa Komam aqꞌni meltzoho 10 (lahonhebꞌ) qꞌochal yenhel yintaj yinh isreloj yoj tzꞌayik watxꞌebꞌil yu yaꞌ Acaz.

12 Hayet huneꞌ tiempo tuꞌ, naj Merodac-baladán, iskꞌahol naj Baladán isreyal Babilonia yabꞌelo naj tato yaꞌay yaꞌ Ezequías, yuxin ischejto naj ischejabꞌ yilno yaꞌ Ezequías, yanito naj carta yebꞌ sabꞌehal tet yaꞌ. 13 Kaw xin kꞌul yu ischahni yaꞌ Ezequías ebꞌnaj chejabꞌ tuꞌ, isye yaꞌ sunil isqꞌalomal tet ebꞌnaj, isye yaꞌ chꞌen oro yebꞌ chꞌen plata kꞌuwan yu, yebꞌ anh kaw xuqꞌ sam, yebꞌ bꞌay kꞌuwan teꞌ aceite, teꞌ kaw kꞌul, isyenipaxo yaꞌ bꞌay kꞌuwan ischꞌen yet howal. Sunil isqꞌalomal yaꞌ Ezequías tuꞌ ay yul palacio yebꞌ ay sat txꞌotxꞌ Israel isye yaꞌ tet ebꞌnaj. 14 Lahwi tuꞌ yapni yaꞌ Isaías ischejabꞌ Komam Dios iskꞌatanh yaꞌ rey Ezequías. Isqꞌambꞌe yaꞌ Isaías tet yaꞌ hakaꞌ tiꞌ:

—¿Bꞌaytuꞌwal ispeto hunteqꞌan ebꞌnaj mahul takꞌatanh tiꞌ? ¿Tzet mahul ebꞌnaj yalaꞌ tawet? xhi yaꞌ Isaías. Istaqꞌwi yaꞌ Ezequías tet yaꞌ:

—Haꞌ hunteqꞌan ebꞌnaj tiꞌ kaw nahat ispeto ebꞌnaj, bꞌey txꞌotxꞌ Babilonia ay ebꞌnaj, xhi yaꞌ. 15 Isqꞌambꞌenpaxo yaꞌ Isaías tet yaꞌ rey:

—¿Tzet yil ebꞌnaj bꞌey hawatut? xhi yaꞌ. Istaqꞌwi yaꞌ Ezequías:

—Yil ebꞌnaj sunil tzet ay yul watutan, machi hunu inqꞌalomaltiꞌan machi inyehan tet ebꞌnaj, xhi yaꞌ. 16 Yuxin yal yaꞌ Isaías tet yaꞌ Ezequías:

—Abꞌe tzet chiyal Komam Jahawil, yuto haꞌ Komam chalni hakaꞌ tiꞌ: 17 “Chiꞌapni istzꞌayikal, sunil qꞌalomal ay yul hawatut tiꞌ yebꞌ sunil qꞌalomal tenbꞌabꞌilkano yu ebꞌnaj hawichmam masanto tinanh chiꞌilaxto bꞌey Babilonia, matxa hunu tzet chikankanoj,” xhi Komam Jahawil. 18 Chalnipaxoj: “Haꞌ ebꞌnaj hakꞌahol chiꞌilaxoto ebꞌnaj, kat yilaxilo huneꞌ majan yetbꞌi isnimanil ebꞌnaj, yu yok ebꞌnaj munil yul ispalacio naj rey bꞌey Babilonia,” xhi Komam, xhi yaꞌ Isaías. 19 Yalni yaꞌ Ezequías tet yaꞌ Isaías:

—Haꞌ Istzotiꞌ Komam chawal tiꞌ kaw kꞌulkanoj, xhi yaꞌ.

Yuto ekꞌ yul isnabꞌal yaꞌ: «Tanhe ay aqꞌankꞌulal yebꞌ istꞌinhanil yulbꞌal tzꞌayik ay intokꞌotiꞌan,» xhi yaꞌ Ezequías yul isnabꞌal.^c

20 Haꞌ hunteqꞌanxa tzet iswatxꞌe yaꞌ rey Ezequías, yebꞌ sunil yip yaꞌ, yebꞌ yet iswatxꞌen yaꞌ huneꞌ pila, yebꞌ isbꞌeh ha haꞌ chito yul konhobꞌ, tzꞌibꞌnhebꞌil yul hum chitzotel yinh ebꞌyaꞌ rey Judá. 21 Iskam yaꞌ Ezequías hakaꞌ yu iskamto ismam icham yebꞌ ismam yaꞌ, yok yaꞌ Manasés, iskꞌahol yaꞌ reyal seleloj.