Yabꞌiꞌay yaꞌ Ezequías
38
Hayet huneꞌ tiempo tuꞌ yabꞌiꞌay yaꞌ rey Ezequías, tꞌinhanxa xin iskam yaꞌ. Yapni yaꞌ Isaías ischejabꞌ Komam Dios, iskꞌahol yaꞌ Amoz ilwal yinh yaꞌ rey Ezequías tuꞌ, yalni yaꞌ tet yaꞌ: «Hak tiꞌ chiyute yalni Komam Jahawil hakaꞌ tiꞌ: “Halkano tet hawuninal yebꞌ hawixal yinh tzet chukano hamunil, yebꞌ tzet chukano istxolal tzet ay hach, yuto chaxhkam yu huneꞌ yabꞌil tiꞌ, matxa chaxhanhchahi,” xhi Komam,» xhi yaꞌ Isaías.2 Hayet yabꞌen yaꞌ Ezequías hakaꞌ tuꞌ, ismeltzon isbꞌa yaꞌ sat istxꞌat, istꞌanhxiko yaꞌ yinh sat bꞌitzꞌabꞌ, istxahli yaꞌ tet Komam Jahawil. 3 Yalni yaꞌ yinh istxah: «Mam Wahawil, chinqꞌanan tawet tato chanati inbꞌeybꞌalan ta hanhe isyelal inwatxꞌehan yinh hasat yebꞌ ta yinh sunil wanmahan inyijenan tzet hawala, inwatxꞌenan tzet chawoche,» xhi yaꞌ. Yok yaꞌ rey Ezequías oqꞌo sikꞌlebꞌil.
4 Istzotel Komam Jahawil tet yaꞌ Isaías, yalni Komam: 5 «As il yaꞌ Ezequías kat hawalni tet yaꞌ: Haꞌ Komam Jahawil, isDiosal yaꞌ David hawichmam chalni: Mawabꞌehan hatxah, mawilnihan yal hasat, yuxin chiwaqꞌan holanhebꞌxa habꞌil hakawil. 6 Chachinkolilojan yebꞌ konhobꞌ tiꞌ yul isqꞌabꞌ naj rey Asiria, kat intanhenan konhobꞌ tiꞌ,» xhi Komam. 7 Yalnipaxo yaꞌ Isaías: «Haꞌ huneꞌ yechel tiꞌ chiyaqꞌ Komam Jahawil tawet yunhe hawohtanheniloj tato chiyij isbꞌa tzet chal Komam tawet. 8 Haꞌ yinh isreloj yaꞌ rey Acaz, chiyaqꞌ meltzoho Komam Jahawil 10 (lahonhebꞌ) xalabꞌ yenhel yoj tzꞌayik,» xhi yaꞌ Isaías. Hak tuꞌ yu ismeltzo 10 (lahonhebꞌ) xalabꞌ yenhel yoj tzꞌayik yintaj.
9 Hayet isyabꞌi ay yaꞌ rey Ezequías yebꞌ yet iskawxikanh yaꞌ, istzꞌibꞌnhenkano yaꞌ hakaꞌ tiꞌ:
10 «Hanintiꞌan walan ta haꞌ yinh intiempohalan yet ayto wipan chinkaman,
chinilaxtojan yul kamikal, chikꞌotzbꞌalax yikta intiempohalan.
11 Walan tato matxa chiwilan yinh Komam Jahawil,
sat yibꞌanhqꞌinal tiꞌ bꞌay ay anma itzitz,
yebꞌ xin ta matxa chiwilan anma aypaxo sat yibꞌanhqꞌinal tiꞌ.
12 Hekꞌlax intiempohalan hakaꞌ ishekꞌlaxikꞌo qꞌap mantiado yet ebꞌnaj tanhem meꞌ.
Kꞌuplaxilto yoj inkawilan yu yabꞌil, hakaꞌ iskꞌuplaxilo txꞌal txꞌal xalahwi ischemlaxi,
tzꞌayik aqꞌbꞌal chinekꞌyaꞌan yu Komam.
13 Kaw chꞌel wawan chꞌekꞌ aqꞌbꞌal masanto yet chisajbꞌiloj,
hakaꞌtanhe lanhan iskꞌuxni poho noꞌ bꞌalam inbꞌajilan;
chiwabꞌenan isyaꞌil chꞌekꞌ tzꞌayik, chꞌekꞌ aqꞌbꞌal yu Komam.
14 Kaw chꞌel wawan hakaꞌ noꞌ grulla yebꞌ hakaꞌ noꞌ yalomtioxh,
chinqꞌajwihan hakaꞌ noꞌ palamuch, chintꞌanhxikanhan satkanh, chiwalnihan:
“Mam Wahawil, kaw chinekꞌyaꞌan, aqꞌ yip wanmahan,” kinchihan.
15 ¿Tzet tzꞌaj wuteꞌan? Haꞌ Komam aniti huneꞌ yabꞌil tiꞌ winhan,
yuxin chewchotanhe chiwute hinbꞌahan yulbꞌal istiempohal inkawilan yu bꞌiskꞌulal ay yul wanmatiꞌan.
16 Mam Wahawil chisje yitzitzbꞌi anma yu tzet chawatxꞌe,
yuxin ay inkawilan, hach xin chinhawanhtehan, kat inkawxikanhan.
17 Hul huneꞌ isyaꞌtajil wibꞌanhan yaj yu iskꞌulalo winhan.
El yinh hakꞌul kinhakolnihan yet kinhawaqꞌni itzitzbꞌokanhan yul txꞌotxꞌ bꞌay etza kinkamilojan,
hakaꞌto haqꞌojkanto inmulan tawintaj.
18 Yuto haꞌ kambꞌal mach chiyako hamay, haꞌ kamikal mach chachisbꞌitnhe,
haꞌ anma chito yul kambꞌal tuꞌ mach chiyako isyelal tzet chawala yipo iskꞌul.
19 Wal xin haꞌ mak itzitz, haꞌ mak itzitz haꞌ chikaxhbꞌitnheni,
hakaꞌ chu kach inbꞌitnhenan tinanh.
Haꞌ ebꞌnaj mame chiyalilo ebꞌnaj hayelal tet yuninal.
20 Haꞌ Komam Jahawil chinkolnihan, yuxin chijako komunlabꞌal,
kat kobꞌitnhen Komam Jahawil yul Yatut yinh sunilbꞌal tiempo itzitzonh sat yibꞌanhqꞌinal tiꞌ,»
xhi yaꞌ Ezequías yinh istzꞌibꞌ.
21 Halbꞌilxa yu yaꞌ Isaías tet yaꞌ Ezequías hakaꞌ tiꞌ:
—Ikanh teꞌ higo kokꞌbꞌinaxa,
kat hawaniko teꞌ yinh bꞌay ayko yabꞌil tawinh,
kat hakawxikanh, xhi yaꞌ.
22 Xaxin isqꞌambꞌepaxo yaꞌ Ezequías tzet chiyaqꞌ Komam yechelo tet, tato chiꞌanhcha yaꞌ, kat yahto yaꞌ Yatut Komam Jahawil hunelxa.