Ischah yaꞌ Ezequías ebꞌnaj chejlaxti bꞌey Babilonia
39
Haꞌ yinh huneꞌ tzꞌayik tuꞌ xin, yabꞌelo naj Merodac-baladán, iskꞌahol naj Baladán, isreyal Babilonia tato yabꞌiꞌay yaꞌ rey Ezequías yaj kawxipaxokanh yaꞌ, yuxin ischejto naj ischejabꞌ yaqꞌno carta yebꞌ sabꞌehal tet yaꞌ rey Ezequías. 2 Kaw xin tzalakanh yaꞌ Ezequías yet yapni ebꞌnaj, isyeni yaꞌ sunil isqꞌalomal tenbꞌabꞌil yul yatut tet ebꞌnaj; bꞌay ay chꞌen oro, chꞌen plata, yebꞌ anh kaw xuqꞌ sam yebꞌ teꞌ aceite kaw kꞌul; yebꞌpaxo bꞌay kꞌuwan chꞌen munlabꞌal yet howal, isye yaꞌ sunil isqꞌalomal kꞌuwan. Machi hunu isqꞌalomal yaꞌ kꞌuwan yul yatut yebꞌ isqꞌalomal ay yulajla konhobꞌ ayko yalanh yip, mach isye tet ebꞌnaj.3 Lahwi tuꞌ yapni yaꞌ Isaías iskꞌatanh yaꞌ rey Ezequías, yalni yaꞌ tet yaꞌ:
—¿Tzet ischejbꞌanil hunteqꞌan ebꞌnaj mahul takꞌatanh tiꞌ yebꞌ tzet konhobꞌal ebꞌnaj? xhi yaꞌ.
Istaqꞌwi yaꞌ Ezequías:
—Haꞌ ebꞌnaj tiꞌ, mahul ebꞌnaj kinyilaꞌan, kaw nahat ay ebꞌnaj, ispeto ebꞌnaj bꞌey Babilonia, xhi yaꞌ.
4 Isqꞌambꞌen yaꞌ:
—¿Tzet mayil ebꞌnaj yul hawatut tiꞌ? xhi yaꞌ.
Istaqꞌwi yaꞌ Ezequías:
—Sunil tzet ay yul watutan manyehan tet ebꞌnaj, machi hunu inqꞌalomalan mach manyehan tet ebꞌnaj, xhi yaꞌ.
5 Yalni xin yaꞌ Isaías tet yaꞌ Ezequías:
—Abꞌe istzotiꞌ Komam Yahawil kaw aykano yip, yuto hak tiꞌ yalni Komam hakaꞌ tiꞌ: 6 “Chꞌapni istzꞌayikal bꞌay chiꞌilaxto sunil tzet ay yul hawatut tiꞌ bꞌey Babilonia, kat yilaxpaxto sunil qꞌalomal kꞌubꞌabꞌilkano yu ebꞌnaj hawichmam; machi hunu haqꞌalomal tiꞌ chikani,” xhi Komam Jahawil. 7 Haꞌ ebꞌnaj hakꞌahol chipohcha tawinh, chiꞌilaxto ebꞌnaj preso bꞌey Babilonia, kat yalaxiko ebꞌnaj eunucohal yul ispalacio naj rey Babilonia, xhi yaꞌ Isaías tet yaꞌ.a
8 Yalni yaꞌ Ezequías tet yaꞌ Isaías hakaꞌ tiꞌ:
—Haꞌ istzotiꞌ Komam Jahawil maxawal tiꞌ kaw kꞌulkanoj, xhi yaꞌ.
Yalnipaxo yaꞌ:
—Yilaꞌxami, yajaꞌ tanhe ay aqꞌankꞌulal yebꞌ istꞌinhanil yulbꞌal istiempohal itzitz hinan, xhi yaꞌ rey Ezequías.