2. ISKABꞌ MAJAN KUYBꞌANILE: TZOTIꞌ YIBꞌANHILO YAQꞌLOBꞌAL ISKꞌUL ISRAEL
(40:1–55:13)
Komam Jahawil chꞌaqꞌni yaqꞌlobꞌal iskꞌul konhobꞌ Sión
40
Yalni Komam Dios hakaꞌ tiꞌ:«Aqꞌwe yaqꞌlobꞌal iskꞌul inkonhobꞌan,
aqꞌwe yaqꞌlobꞌal iskꞌul,» xhi Komam.
2 Yalnipaxo Komam: —Tzotelanhwe tet anma Jerusalén yinh kaw ip,
cheyalni tet tato xalahwi istzꞌayikal bꞌay ayko chejabꞌo bꞌey nan konhobꞌal bꞌay kaw chꞌekꞌyaꞌ yanma,
yebꞌ ta xaꞌaqꞌlaxkano nimankꞌulal yinh ismul,
yuto kayel wayojan isyaꞌtajil yibꞌanh ispajo selel ismul,a xhi Komam.
3 Ay huneꞌ mak chiꞌawi bꞌey txꞌotxꞌ desierto chalni:
«¡Watxꞌewe isbꞌeh Komam Jahawil,
toholbꞌanhewe bꞌeh tet koDiosal bꞌey txꞌo txꞌotxꞌ machi yahaw, matzet chichꞌibꞌ sat!b
4 ¡Nohtzeweyo nime hokan, qꞌajweyo witz yebꞌ wonhan, yu yakꞌalbꞌikanoj,
kat hetoholbꞌanhen bꞌeh kotxkiltanhe yekꞌi, cheyakꞌalnhe bꞌeh hopkixhtanhe!
5 Kat isyeni Komam Jahawil isqꞌaqꞌal ismay, hun xin chu yilni sunil anma,
haꞌ huneꞌ tiꞌ haꞌ Komam halnhekanoj,» xhi mak chiꞌawi tuꞌ.
6 Yalni huneꞌ yul nuqꞌe wetan:
«Awanh yinh kaw ip,» xhi. Inqꞌambꞌenan tet:
«¿Tzet ye tuꞌ chiwalan yinh kaw ip tuꞌ?» kinchihan. Yalni wetan:
«Hala tato sunil anma, lahan hakaꞌ teꞌ telaj, haxa ismay anma tuꞌ, lahan hakaꞌ isxumakil teꞌ telaj.
7 Haꞌ teꞌ telaj chitajilo teꞌ, kat ispaxilo yip teꞌ xumak
yet chꞌelti jaqꞌeqꞌ yul istiꞌ Komam Jahawil kat yapni yinh teꞌ.
Yinh kaw yeli hakaꞌ teꞌ telaj tuꞌ, hak tuꞌ ye iskonhobꞌ Komam.
8 Chitajilo teꞌ telaj, kat xin ispax yip teꞌ xumak kat ishowayoj,
yajaꞌ wal Istzotiꞌ Komam Dios, koDiosal,
aynhetikꞌa yinh sunilbꞌal ej tiempo,» xhi.
9 Hex ah Sión cheyalikꞌo kꞌul-la tzotiꞌ, ahanhweto yinh iswiꞌ wonhan kaw nahat yekanh.
Hakexpax tuꞌ hex ah Jerusalén.
¡Awanhwe yinh kaw ip, mach chexxiw heyahwi!
Cheyalni tet konhobꞌla ay yulaj ismajul Judá hakaꞌ tiꞌ: «¡Ilwe koDiosal!» kexchi.
10 Haꞌ Komam Jahawil, Komam chihul yebꞌ sunil yip,
sunil tzet chꞌokto yalanh yip isqꞌabꞌ Komam, iqꞌbꞌil ispaj istohol ismunil anma yu Komam,
haꞌ ispaj chiyaqꞌ Komam xin sataj Komam aykoj.
11 Hakaꞌ hunu naj tanhem meꞌ, Komam chistanhe ismeꞌ,
chelbꞌilkanh noꞌ yunin meꞌ yu Komam yinh istxam iskꞌul.
Chistanhe Komam noꞌ miꞌe yinh kaw kꞌul, noꞌ lanhanto yay yunin.
Machi hunuxa mak hakaꞌ Komam Dios isDiosal Israel
12 ¿Mak malen ha haꞌ yul isbꞌetx, yebꞌ malen satkanh yu isqꞌuchubꞌ?
¿Mak kutxbꞌaniko ispojojal txꞌo txꞌotxꞌ yu oxebꞌ yiximal isqꞌabꞌ?
yebꞌ xin ¿mak malen yu malbꞌal hanta yalil witz yebꞌ wonhan ay yul yibꞌanhqꞌinal tiꞌ?
13 ¿Mak kuyni Yespíritu Komam Jahawil,
maka mak aqꞌni hunu kuybꞌanile tet Komam yu iskuywahi?
14 ¿Mak tet tiꞌ isqꞌan Komam kuybꞌanile yunhe istzꞌajnalo iskꞌul?
¿Mak yeni isbꞌelal istoholal tet Komam? maka ¿tom ay mak kuyni Komam yinh helanile?
maka ¿tom ay mak yeni ishelanil nabꞌale tet Komam?
15 Haꞌ yul sat Komam, haꞌ ej nime konhobꞌ, lahan hakaꞌ hunu tuꞌan ha haꞌ,
haꞌ ej nime konhobꞌ tuꞌ lahanpaxo hakaꞌ isqꞌal pojoj chikankano yul malbꞌal.
Haꞌ Komam chꞌaqꞌni kꞌayoꞌkanh ej konhobꞌ ayayo xolbꞌal haꞌ mar, hakaꞌ iskꞌaykanh pojoj.
16 Haꞌ sunil teꞌ qꞌebꞌtaj ay bꞌey Líbano mach kꞌuxano teꞌ yok siꞌal yok yetto xahanbꞌal tet Komam;
hakpax tuꞌ sunil no noqꞌ, mach kꞌuxano noꞌ xahanbꞌalo tet Komam.
17 Haꞌ sunil ej konhobꞌ matzet chalilo yul sat Komam;
ta chikolahanbꞌa nime konhobꞌ tuꞌ yebꞌ Komam, matzet chal yelapno sata Komam,
lahan hakaꞌta machi hunteqꞌan konhobꞌ tuꞌ yul sat.
18 ¿Mak yebꞌ hunu tzet ye tuꞌ tiꞌ chu helahbꞌan Komam Dios? maka
¿tzet tioxhal chisje helahbꞌan yebꞌ Komam?
19 Haꞌ naj watxꞌem echele, chiswatxꞌe naj tioxh,
haxa naj chakꞌom plata chꞌaniko chꞌen oro yinh huneꞌ tioxh tuꞌ;
chiswatxꞌen naj chꞌen plata cadenahil yinh isnuqꞌ tioxh.
20 Wal mak machi ismelyu,
ha te teꞌ machi ok noꞌ ih yinh,
chissaya, kat issayni hunu naj hosom teꞌ kaw helan,
chiswatxꞌen naj istioxh naj tuꞌ yinh teꞌ, machi xin chibꞌili huneꞌ tioxh tuꞌ.
21 ¿Tom mach heyohtajoj?
¿tom maxhto bꞌay cheyabꞌe?
¿tom maxhto hunelo xahal-lax teyet yettax yichebꞌanil?
¿Tom maxhto chiꞌaqꞌlax hekuyuꞌ yettax iswatxꞌikano txꞌo txꞌotxꞌ tiꞌ?
22 Haꞌ Komam Dios tzꞌonhan yul istzꞌonhobꞌal yibꞌanh iskꞌolanil txꞌo txꞌotxꞌ tiꞌ,
haxa anma ay sat txꞌotxꞌ xin lahan hakaꞌ noꞌ qꞌul yul sat Komam;
haꞌ Komam lehnito satkanh hakaꞌ hunu qꞌap cortina;
haꞌ Komam tuꞌ xin lehbꞌanto satkanh tuꞌ
hakaꞌ hunu qꞌap mantiado chꞌok nhahil.
23 Haꞌ ebꞌnaj winaj kaw ay yip,
matzet chal yelapno chiꞌelkaniko ebꞌnaj yu Komam.
Haꞌ ebꞌnaj chiꞌijbꞌali sat txꞌo txꞌotxꞌ tiꞌ chistanhtzekanilo Komam.
24 Chitanhkanilo ebꞌnaj hakaꞌ hunu te teꞌ maxhtikꞌa tzꞌunbꞌiloj,
mach yayto xeꞌ yul txꞌotxꞌ,
hayet isxuniko Komam jaqꞌeqꞌ yinh istajnaloj,
yijlaxto yu kajtuxkum, hakaꞌ yijlaxto xaj teꞌ tajin teꞌ.
25 Haꞌ Komam machi istxꞌojal, chiqꞌambꞌen hakaꞌ tiꞌ:
«¿Mak yebꞌ hunu tiꞌ, lahan hinan yul hesat yebꞌi? ¿Mak yebꞌ hunu tiꞌ chu kinhelahbꞌanan?» xhi.
26 Ahanhwe tꞌanhno satkanh, kat heyilni mak watxꞌen sunil tuꞌ.
Haꞌ Komam chiꞌiniltij, kat isbꞌisni txꞌumel,
chiyawten isbꞌi hunun txꞌumel tuꞌ,
machi hunu txꞌumel tiꞌ chito nahul yu.
Haꞌ yip Komam kaw nimankano yelapnoj,
sunil tzet ye tuꞌ ayko yul isqꞌabꞌ yuto kaw aykano yip.
27 Hex Israel, hex Jacob,
¿tzet yinh xin cheyal hakaꞌ tiꞌ: «Mach chil Komam Jahawil tzet chikowatxꞌe?
matxa chonhisnati Komam Dios yinh tzet chonhelikoj. ¿Tzet yinh xin hak tuꞌ heyalni?»
28 ¿Tom maxhto heyohtajoj? ¿tom maxhto bꞌay cheyabꞌe tato haꞌ Komam aynhetikꞌa yinh sunilbꞌal ej tiempo,
haꞌ Jahawil, haꞌ watxꞌenhe txꞌo txꞌotxꞌ bꞌaytajtuꞌwal chikachnakan apnoj?
Haꞌ Komam tuꞌ mach chipax yip, mach chisikipaxoj;
haꞌ yitzꞌatil iswiꞌ Komam machi hunu mak chiqꞌoji istxumniloj.
29 Haꞌ Komam chꞌaqꞌni yip mak sikomxa aya,
chiyaqꞌnipaxo Komam niman yip mak matxatikꞌa nino yip.
30 Ebꞌnaj tzehtaj chipáxilo yip ebꞌnaj kat issikꞌilo ebꞌnaj,
ebꞌnaj tzehtaj tuꞌ chibꞌajbꞌayoj kat yaykꞌayi.
31 Yajaꞌ wal mak chikawxi iskꞌul yinh Komam Jahawil, chiyiqꞌ yip yinh yakꞌtohal.
Chikanh xikꞌ ebꞌnaj hakaꞌ noꞌ tꞌiw,
chꞌok ebꞌnaj yinh anhe, machi sikiloj;
chꞌekꞌ ebꞌnaj yinh isbꞌel yaj machi tinhxikanh yanma ebꞌnaj.